Primeiru Pedro 2:1-25
2 Hasai tiha buat aat hotu husi imi-nia an,+ no hasai tiha lohi, laran-makerek, laran-moras no hatete aat malu.
2 Hanesan bebé neʼebé foin moris,+ haburas hakarak ba susubeen neʼebé moos husi Maromak nia liafuan, atu nuneʼe, liuhusi ida-neʼe mak imi bele sai boot hodi hetan salvasaun,+
3 tanba imi rasik sente* ona Naʼi nia laran-diʼak.
4 Tanba imi hakbesik ba nia neʼebé nuʼudar fatuk neʼebé moris, neʼebé ema la simu,+ maibé Maromak hili ona nia no nia folin-boot ba Maromak.+
5 Imi mós hanesan fatuk neʼebé moris neʼebé harii daudaun hodi sai uma espirituál,+ hodi sai amlulik santu. Atu nuneʼe imi bele hasaʼe sakrifísiu espirituál+ neʼebé Maromak simu liuhusi Jesus Kristu.+
6 Tanba Eskritura dehan: “Iha Siaun haʼu tau fatuk neʼebé haʼu hili, fatuk prinsipál* neʼebé folin-boot iha fundasaun neʼe; no ema hotu neʼebé tau fiar ba nia sei la sai triste.”*+
7 Tan neʼe, nia sai folin-boot ba imi, tanba imi fiar ona. Maibé ba sira neʼebé la fiar, Eskritura dehan: “Fatuk neʼebé badaen sira la simu+ sai ona fatuk prinsipál”,*+
8 no sai “fatuk neʼebé halo ema sidi no fatuk boot neʼebé halo ema monu”.+ Sira sidi tanba sira la halo tuir Maromak nia liafuan. Neʼe mak sira-nia rohan neʼebé hein hela sira.
9 Maibé imi mak “suku* neʼebé Maromak hili ona, no imi mak amlulik neʼebé serbí nuʼudar liurai, nasaun santu ida,+ no ninia povu espesiál,+ atu nuneʼe imi bele haklaken kona-ba hahalok kmanek”*+ husi Ida neʼebé bolu imi atu sai husi nakukun hodi tama fali ba ninia naroman neʼebé furak.+
10 Uluk imi laʼós Maromak nia povu, maibé agora imi mak ninia povu.+ Uluk imi la simu Maromak nia laran-sadiʼa, maibé agora imi simu ona ninia laran-sadiʼa.+
11 Maluk doben sira, imi mak hanesan ema estranjeiru neʼebé hela temporáriu,+ no haʼu husu namanas ba imi atu kontinua hasees an husi hakarak isin nian+ neʼebé halo funu kontra imi.*+
12 Hatudu nafatin hahalok diʼak iha nasaun sira-nia leet,+ atu nuneʼe kuandu sira duun imi nuʼudar ema aat, sira bele sai sasin ba imi-nia hahalok diʼak,+ no rezultadu mak, sira sei hahiʼi Maromak iha tempu neʼebé nia mai atu haree didiʼak ema.
13 Halo tuir Naʼi nia hakarak hodi hakruʼuk ba ema hotu neʼebé iha podér,*+ hakruʼuk ba liurai+ tanba nia aas liu fali imi,
14 no hakruʼuk ba ukun-naʼin sira tanba liurai hili sira atu fó kastigu ba ema neʼebé halo sala maibé fó hahiʼi ba ema neʼebé halo diʼak.+
15 Tanba Maromak nia hakarak mak atu imi halakon* liafuan folin-laek husi ema beik liuhusi imi-nia hahalok diʼak.+
16 Moris bá hanesan ema livre,+ no keta uza liberdade neʼe nuʼudar razaun atu halo hahalok aat,*+ maibé uza ida-neʼe nuʼudar Maromak nia atan.+
17 Hatudu respeitu ba ema oioin,+ hadomi maluk fiar-naʼin* hotu,+ hamtaʼuk Maromak+ no hatudu respeitu ba liurai.+
18 Atan sira tenke hakruʼuk ba sira-nia patraun ho respeitu,+ laʼós deʼit ba patraun sira neʼebé diʼak no la ulun-toos, maibé mós ba sira neʼebé susar atu halo kontente.
19 Maromak kontente bainhira ema ida tahan susar* no terus neʼebé la iha justisa tanba nia hakarak atu iha konxiénsia neʼebé moos iha Maromak nia oin.+
20 Imi manán saida se imi hetan baku tanba halo sala no tahan terus neʼe?+ Maibé se imi tahan terus tanba halo buat diʼak, Maromak kontente ho ida-neʼe.+
21 Tuir loloos, Maromak bolu imi ba dalan neʼe, tanba Kristu rasik terus ba imi,+ no nia husik ezemplu ba imi atu laʼo tuir ninia ain-fatin ho didiʼak.+
22 Nia la halo sala ida,+ no lia-bosok ida la sai husi ninia ibun.+
23 Kuandu ema koʼalia liafuan kroʼat* ba nia,+ nia la koʼalia fali liafuan kroʼat* ba sira.+ Kuandu nia hetan terus,+ nia la ameasa sira neʼebé fó-terus ba nia, maibé nia entrega ninia an ba Ida neʼebé tesi-lia+ tuir justisa.
24 Nia rasik mak lori ita-nia sala sira+ bainhira ema prega ninia isin iha ai-riin,*+ atu nuneʼe ita bele sai livre husi sala* no moris atu halo buat neʼebé loos. No “liuhusi ninia kanek sira mak imi hetan kura”.+
25 Tanba uluk imi mak hanesan bibi-malae neʼebé laʼo sala dalan,+ maibé agora imi fila fali ona ba bibi-atan+ no ida neʼebé tau matan ba imi-nia moris.*
Nota-rodapé
^ Ka “esperiénsia; koko”.
^ Ka “fatuk neʼebé tau iha uma nia lidun”.
^ Orj., “moe”.
^ Ka “fatuk neʼebé tau iha uma nia lidun”.
^ Orj., “hahalok diʼak”. Neʼe katak ninia hahalok neʼebé merese atu hetan gaba.
^ Ka “rasa”.
^ Haree “Psiké” iha Glosáriu.
^ Ka “ba buat neʼebé ema kria”.
^ Ka “imi halo nonook”.
^ Ka “uza liberdade neʼe atu subar hahalok sala”.
^ Ka “maun-alin”.
^ Ka “triste; moras”.
^ Ka “insulta”.
^ Ka “insulta”.
^ Ka “ai-hun”.
^ Ka “ita la iha ligasaun tan ho sala”.
^ Haree “Psiké” iha Glosáriu.
