Foin daudaun, Ita-nia belun ka família ida mate ka lae? Se nuneʼe, informasaun neʼe bele ajuda Ita atu tahan hasoru sentimentu triste.

Iha informasaun neʼe

•  Haʼu sente triste demais ka lae?

•  Oinsá atu tahan hasoru sentimentu oioin kuandu ema mate?

•  Ita-nia kolega hanoin saida

 Ema barak bele sente triste tebetebes no ba tempu kleur.

 “Haʼu hanoin kona-ba haʼu-nia avó-mane loroloron. Maski nia mate ona ba tinan rua, maibé susar ba haʼu atu la tanis bainhira koʼalia kona-ba nia.”—Olivia.

 “Haʼu-nia avó-feto sempre anima haʼu atu kumpre haʼu-nia planu sira, maibé ikusmai nia mate no labele haree bainhira haʼu kumpre ida-neʼe. Haʼu sente triste kuandu haʼu kumpre haʼu-nia planu ida-idak, tanba nia la iha neʼe hamutuk haʼu.”—Alison.

 Bainhira triste, neʼe bele halo Ita sente emosaun oioin. Porezemplu:

 “Kuandu haʼu-nia tiu mate, haʼu hakfodak, no haʼu sente hanesan neʼe ba tempu kleur. Neʼe mak dala primeiru ema neʼebé besik ho haʼu mate. Buat hotu akontese lalais loos no neʼe afeta tebes haʼu.”—Nadine.

 “Kuandu haʼu-nia avó-mane mate, haʼu sente hirus ba nia tanba nia la tau matan didiʼak ba ninia saúde, maski ami fó-hanoin beibeik nia.”—Carlos.

 “Bainhira haʼu-nia avó-mane mate, ami-nia família tomak hamutuk ho nia, só haʼu no haʼu-nia biin deʼit mak lae. Tuirmai, haʼu fó-sala ba haʼu-nia an tanba haʼu la fó adeus ba nia.”—Adriana.

 “Feen-laʼen neʼebé besik tebes ho ami-nia família mate tanba asidente karreta. Husi tempu neʼebá, kuandu membru husi haʼu-nia família sai husi uma, haʼu sente taʼuk tanba hanoin katak karik nia mós sei mate.”—Jared.

 “Bainhira haʼu-nia avó-feto mate tinan tolu liubá, haʼu arrepende tanba ladún gasta tempu barak ho nia kuandu nia sei moris.”—Julianna.

 Normál atu sente hakfodak, hirus, fó sala ba Ita-nia an, taʼuk no arrepende bainhira ema neʼebé Ita hadomi mate. Se agora daudaun Ita sente sentimentu sira-neʼe, fiar bá katak neineik-neineik sentimentu sira-neʼe sei menus. Entaun, saida mak Ita bele halo agora atu tahan hasoru sentimentu triste neʼe?

 Koʼalia ba belun ida. Bíblia hatete katak belun neʼebé loos “sai hanesan maun ka alin iha tempu susar”. (Provérbios 17:17) Koʼalia ba ema ida neʼebé Ita sente katak bele ajuda no apoia Ita.

 “Normál atu sente triste. Dala ruma Ita bele halo ida-neʼe mesak, maibé tuirmai Ita hanoin katak buat hotu sei nunka sai diʼak. Tan neʼe diʼak atu koʼalia ba ema ruma.”—Yvette.

 Hanoin-hetan sira neʼebé mate ona. Bíblia hatete katak “ema diʼak lori sai buat diʼak neʼebé rai hela iha ninia laran”. (Lucas 6:45) Ita bele hakerek kona-ba memória furak sira ka halibur foto sira iha album ida.

 “Haʼu deside atu hakerek buat hotu neʼebé haʼu-nia belun hanorin mai haʼu antes nia mate, no haʼu kontinua hetan benefísiu husi ninia ezemplu. Hakerek kona-ba nia ajuda haʼu atu tahan hasoru sentimentu triste.”—Jeffrey.

 Tau matan Ita-nia saúde. Bíblia rekoñese katak halo ezersísiu bele lori benefísiu ba ita-nia saúde. (1 Timóteo 4:8) Han hahán neʼebé saudavel, halo ezersísiu no deskansa.

 “Bainhira ita sente triste, karik ita ladún hanoin ho loos, tan neʼe ita presiza tau matan ba ita-nia saúde. Keta haluha han no mós presiza toba.”—Maria.

 Ajuda ema seluk. Bíblia hatete: “Kontente liu atu fó duké simu.”—Apóstolu 20:35.

 “Koko atu halo buat ruma ba ema seluk, liuliu ba sira neʼebé mós hasoru situasaun atu hanesan. Neʼe bele ajuda fó-hanoin Ita katak ema seluk mós terus.”—Carlos.

 Fó sai Ita-nia sentimentu liuhusi orasaun. Bíblia bolu Maromak Jeová nuʼudar “Maromak neʼebé rona ba orasaun”. (Salmo 65:2) Bíblia mós dehan katak Jeová “kura ema neʼebé laran-kanek; nia falun sira-nia kanek”.—Salmo 147:3.

 “Husu Jeová atu fó apoiu no anima neʼebé Ita presiza. Loron balu sei susar liu fali loron seluk, maibé Jeová sempre prontu atu ajuda ita.”—Jeanette.

 Iha hanoin neʼebé loos. Hanoin-hetan katak ema ida-idak triste iha dalan neʼebé la hanesan. Bíblia hatete katak Jacob ‘lakohi simu kmaan’ bainhira nia hanoin katak ninia oan-mane mate ona. (Génesis 37:35) Tan neʼe keta hakfodak se Ita kontinua sente triste.

 “Iha buat oioin neʼebé bele halo haʼu hanoin-hetan haʼu-nia avó-feto, maski nia mate tinan 15 liubá.”—Taylor.

 Imajina katak Ita-nia ruin tohar. Klaru katak Ita sente moras tebes no presiza tempu atu sai diʼak fali. Maibé doutór mós sei fó sujestaun kona-ba buat neʼebé Ita bele halo atu ajuda Ita sai diʼak fali.

 Sai diʼak fali husi kanek mak atu hanesan ho lakon ema neʼebé Ita hadomi tanba mate. Presiza tempu atu sentimentu triste sai menus. Tan neʼe Ita presiza pasiénsia. Haree sujestaun sira iha informasaun neʼe no deside sujestaun ida-neʼebé mak bele ajuda Ita.