DAMI KONTA: Bainhira haʼu-nia apá komesa sente ulun-moras, neʼe haree hanesan baibain deʼit. Maibé ninia moras sai makaʼas liután, no haʼu-nia amá bolu ambulánsia. Haʼu hanoin-hetan tempu neʼebé ambulánsia lori apá, neʼe mak dala ikus haʼu haree nia moris hela. Loron tolu liutiha, nia mate. Iha tempu neʼebá, haʼu tinan neen deʼit.

Ba tinan barak, haʼu fó-sala ba haʼu-nia an. Haʼu hanoin beibeik kona-ba tempu neʼebé ambulánsia lori haʼu-nia apá, no haʼu husu ba haʼu-nia an: ‘Tansá mak haʼu hamriik deʼit? Tansá mak haʼu la halo buat ida?’ Bainhira haʼu haree ferik-katuas sira neʼebé iha problema saúde, haʼu hanoin: ‘Tansá mak sira sei moris maibé haʼu-nia apá mate ona?’ Haʼu-nia amá ajuda haʼu atu bele koʼalia sai haʼu-nia sentimentu. Ami mós hetan ajuda barak husi ami-nia maluk Testemuña sira.

Ema balu hanoin katak bainhira ema neʼebé ita hadomi mate, ita sente triste tebetebes no depois menus ba daudaun. Maibé haʼu la hanesan, iha tempu foin-saʼe mak haʼu sente triste tebetebes.

Ba joven sira neʼebé sira-nia inan ka aman mate ona, haʼu hakarak hatete: “Diʼak atu koʼalia ba ema ruma kona-ba susar neʼebé imi hasoru daudaun. Fó sai imi-nia sentimentu duké rai deʼit iha imi-nia laran.”

Haʼu hanoin tebes haʼu-nia apá liuliu iha tempu importante oioin iha haʼu-nia moris tanba haʼu hakarak tebes apá atu hamaluk haʼu. Maibé haʼu hetan kmaan husi Bíblia iha Apokalipse 21:4 neʼebé promete katak, lakleur Maromak ‘sei hamaran ita-nia matan-been hotu husi ita-nia matan, no mate sei la iha tan, no ema sei la tanis tan ka laran-susar ka laran-tristeʼ.

DERRICK KONTA: Haʼu hanoin-hetan tempu diʼak bainhira haʼu ho haʼu-nia apá bá kail ikan no harii tenda iha foho. Nia gosta saʼe foho.

Haʼu-nia apá iha moras-fuan. Haʼu hanoin-hetan bainhira haʼu sei kiʼik, haʼu bá vizita nia iha ospitál dala ida ka dala rua. Maibé haʼu la hatene katak nia mak moras todan. Ikusmai, bainhira haʼu tinan sia, nia mate.

Bainhira nia mate, haʼu tanis hela deʼit. Neʼe mak dala primeiru neʼebé haʼu sente triste tebes hanesan neʼe. Haʼu lakohi koʼalia ho ema ida no lakohi halo buat ida. Joven sira husi haʼu-nia igreja koko atu fó kmaan mai haʼu, maibé neʼe ba tempu uitoan deʼit.  Sira hatete: “Neʼe mak destinu”, “Maromak bolu nia”, ka “Agora nia iha lalehan”. Neʼe la halo haʼu sente kmaan, no haʼu mós seidauk hatene Bíblia nia hanorin kona-ba ema neʼebé mate ona.

Ikusmai, haʼu-nia amá komesa estuda Bíblia ho Testemuña ba Jeová. Lakleur haʼu no haʼu-nia maun mós estuda. Ami aprende kona-ba ema mate nia kondisaun no mós Maromak nia promesa kona-ba moris-hiʼas. (João 5:28, 29) Maibé eskritura neʼebé ajuda tebes haʼu mak Maromak nia liafuan husi Isaías (Yesaya) 41:10, neʼebé dehan: “Keta taʼuk tanba haʼu hamutuk ho ó. Keta laran-taridu tanba haʼu mak ó-nia Maromak. Haʼu sei hametin ó, sin, haʼu sei ajuda ó.” Hodi hatene katak Jeová apoia haʼu, neʼe sempre fó kmaan mai haʼu.

JEANNIE KONTA: Bainhira haʼu tinan hitu, haʼu-nia amá mate tanba moras kankru. Haʼu hanoin-hetan ho momoos loron neʼebé nia mate. Nia mate iha uma no haʼu-nia avó sira mós iha. Ema hotu kalma. Ami-nia han-kalan mak manu-tolun sona. Haʼu sente katak buat hotu neʼebé akontese mak mehi deʼit.

Husi tempu neʼebá, ba tinan barak, haʼu hanoin katak nuʼudar biin haʼu tenkesér forte atu tau matan ba haʼu-nia alin-feto, tan neʼe haʼu subar haʼu-nia laran-triste. Toʼo agora, haʼu toman atu rai hela deʼit haʼu-nia sentimentu, no neʼe la diʼak ba haʼu-nia saúde.

Ami-nia maluk Testemuña sira hatudu domin boot no apoia ami. Maski ami foin komesa tuir reuniaun sira, maibé sira ajuda ami iha dalan oioin hanesan família rasik. Haʼu-nia apá la presiza teʼin ba tinan ida, tanba sira sempre lori hahán mai ami.

Eskritura ida neʼebé kona loos haʼu-nia laran mak Salmo (Mazmur) 25:16, 17. Ema neʼebé hakerek salmu neʼe husu ba Maromak: “Hatudu laran-sadiʼa ba haʼu, tanba haʼu mesak deʼit no kbiit-laek. Haʼu-nia laran-taridu aumenta liután; Favór ida, halo haʼu livre husi haʼu-nia neon-susar.” Hodi hatene katak haʼu nunka mesak, neʼe halo haʼu sente kmaan. Maromak sempre hamutuk ho ita. Ho Bíblia nia ajuda, haʼu bele laʼo ba oin no tau atensaun ba buat neʼebé halo haʼu kontente, hanesan Bíblia nia promesa kona-ba moris-hiʼas. Haʼu hein atu hasoru fali haʼu-nia amá iha mundu foun no koñese liután nia.—2 Pedro 3:13.

Ita hakarak aprende liután kona-ba Bíblia nia liafuan neʼebé lori kmaan ba ema neʼebé triste? Download broxura “Kuandu Ema neʼebé Ita Hadomi Mate”. Loke sítiu www.pr418.com/tdt, no buka iha LIVRU & VÍDEO > LIVRU & BROXURA SIRA.