Iha Estadus Unidus, iha kompañia barak neʼebé prodús game eletróniku sira no manán osan dolar rihun ba rihun, . . .

1.   Ema ho idade hira mak halimar game eletróniku?

   1.   Idade 18

   2.   Idade 30

2.   Porsentu hira husi mane no feto mak gosta halimar game eletróniku?

   1.   Mane porsentu 55; feto porsentu 45

   2.   Mane porsentu 15; feto porsentu 85

3.   Husi grupu rua tuirmai, ida-neʼebé mak barak liu halimar game eletróniku?

   1.   Feto ho idade 18 ba leten

   2.   Mane ho idade 17 mai kraik

 Dadus sira-neʼe bele fó sai kona-ba sé mak halimar beibeik game. Maibé dadus neʼe la fó sai impaktu ka rezultadu diʼak no aat husi game eletróniku.

 Ita konkorda ho komentáriu kona-ba game eletróniku ida-neʼebé?

•  “Game bele halo ita kontente no bele halo ita sai besik ho família no belun sira.”​—Irene.

•  “Game mak atividade diʼak atu halo se ita lakohi hanoin demais kona-ba problema iha ita-nia moris.”​—Annette.

•  “Game ajuda ita-nia kakutak atu ativu.”​—Christopher.

•  “Ita sai matenek atu rezolve problema.”​—Amy.

•  “Halimar game mak hanesan kadi ita-nia kakutak, ita sei matenek atu halo planu no forma estratéjia.”​—Anthony.

•  “Game bele treinu Ita atu serbisu hamutuk.”​—Thomas.

•  “Game balu mak ba ezersísiu nian no ita bele iha saúde diʼak.”​—Jael.

 Ita konkorda ho komentáriu balu ka karik Ita konkorda ho komentáriu hotu? Karik vídeo game bele lori rezultadu diʼak ba Ita-nia isin no neon. Hanesan Annette hatete ona, karik game balu mak “atividade diʼak atu halo se ita lakohi hanoin demais kona-ba problema iha ita-nia moris”. Neʼe mós laʼós hanoin neʼebé sala.

 ● Bíblia hatete katak “iha tempu ba atividade hotu neʼebé ema halo iha mundu”, inklui tempu atu deskansa no halimar.​—Eclesiastes 3:1-4.

 Game eletróniku naʼok hotu Ita-nia tempu ka lae?

 “Kuandu komesa ona halimar game, susar atu para. Haʼu koʼalia beibeik ba haʼu-nia an: ‘Hela nivel ida tan!’ Maibé ikusmai haʼu halimar game ba oras barak demais.”​—Annette.

 “Vídeo game bele gasta ita-nia tempu barak. Ita tuur ba oras barak no sente orgullu tanba manán ona game dala lima, maibé realidade mak ita la manán buat ruma.”​—Serena.

 Buat neʼebé importante: Se Ita-nia osan lakon, karik Ita bele buka no hetan fali. Maibé neʼe sei la akontese ho Ita-nia tempu. Tan neʼe, Ita bele dehan katak tempu mak folin-boot liu fali osan. Keta gasta arbiru Ita-nia tempu.

 ● Bíblia hatete: “Kontinua halaʼo moris ho matenek . . . , hodi uza didiʼak imi-nia tempu.”​—Koloso 4:5.

 Game eletróniku afeta Ita-nia hanoin ka lae?

 “Kuandu halimar vídeo game, ema bele ‘halo’ hahalok krime neʼebé tuir loloos iha moris baibain merese atu tama komarka ka hetan kastigu-mate.”​—Seth.

 “Iha game barak, se ema ida hakarak manán, nia presiza hakaʼas an atu ninia inimigu lakon. No dala barak presiza oho inimigu ho dalan neʼebé aat tebes.”​—Annette.

 “Dala ruma, ita bele koʼalia arbiru ba ita-nia kolega sira liafuan hanesan, ‘mate ka lae!’ ka ‘haʼu sei oho ó!’”​—Nathan.

 Buat neʼebé importante: Hadook an husi game neʼebé envolve buat sira neʼebé Maromak odi, hanesan violénsia, sala seksuál, no espiritizmu.​—Galásia 5:19-21; Éfeso 5:10; 1 João 2:15, 16.

 ● Bíblia hatete katak Jeová “odi ema hotu neʼebé gosta violénsia”, laʼós deʼit ema neʼebé halo violénsia. (Salmo 11:5) Maski karik game eletróniku neʼebé Ita hili la hatudu katak iha futuru Ita sei sai ema hanesan neʼe, maibé karik neʼe hatudu sai agora daudaun Ita mak ema hanesan saida.

 Hanoin toʼok: Livru ida (Getting to Calm) kona-ba oinsá inan-aman presiza kalma nafatin bainhira koʼalia ho sira-nia oan joven, hatete: “Tuir loloos, vídeo game sira neʼebé iha violénsia fó impaktu boot liu ba labarik sira-nia hahalok duké televizaun, tanba labarik sira laʼós deʼit nonton jagoan sira neʼebé hirus-teen no ohodór, maibé sira mak sai nuʼudar jagoan neʼe. Game sira hanorin ita hanesan mestre ida hanorin iha klase laran, no game sira-neʼe hanorin violénsia.”​—Kompara ho Isaias 2:4.

 Joven barak aprende ona kona-ba oinsá atu halimar game eletróniku ho balansu. Hanoin toʼok kona-ba ezemplu rua.

 “Uluk haʼu halimar vídeo game durante oras barak toʼo kalan-boot no hanoin: ‘Diʼak hela, haʼu iha oras lima atu toba. Hela nivel ida tan.’ Maibé agora, haʼu iha hanoin neʼebé loos kona-ba halimar game. Mai haʼu, halimar game mak hobi deʼit neʼebé dala ruma haʼu bele halo, maibé la demais liu.”​—Joseph.

 “Haʼu hamenus tempu neʼebé haʼu uza atu halimar game no haʼu bele kumpre buat barak. Haʼu bele haklaken ho diʼak liután, ajuda ema seluk iha haʼu-nia kongregasaun no mós aprende atu toka instrumentu múzika ida. Tuir loloos, iha buat barak tan neʼebé haʼu bele halo.”​—David.

 ● Bíblia hatete katak mane no feto neʼebé maduru hatene atu ‘kontrola sira-nia hahalok’. (1 Timóteo 3:2, 11) Sira hatene oinsá atu goza tempu, maibé sira mós hatene bainhira mak atu para no sira kontrola an.​—Éfeso 5:10.

 Buat neʼebé importante: Halimar game eletróniku iha tempu neʼebé loos bele halo Ita kontente. Maibé keta husik game kontrola Ita-nia tempu ka halo Ita la fokus tan ba buat sira neʼebé importante iha Ita-nia moris. Tan neʼe, duké hakaʼas an atu halo hotu nivel sira iha game, diʼak liu tau fokus atu realiza Ita-nia planu sira iha Ita-nia moris.