Kecap ”hirup deui” nu aya dina Alkitab téh asalna tina basa Yunani, nyaéta anastasis. Kecap éta hartina ”hudang” atawa ”nangtung deui”. Jalma nu geus maot téh bakal dihirupkeun deui jadi dirina sorangan, lain jalma séjén.​—1 Korintus 15:12, 13.

 Pangajaran ngeunaan dihirupkeunana deui jalma-jalma tina maot téh aya ogé dina Kitab-Kitab Ibrani, nu sok disebut Perjangjian Lawas. Misalna, liwat Yésaya, Allah jangji, ”Anu parantos tariwas, tangtos bakal harudang deui, mayit-mayitna bakal harirup deui.”​—Yesaya 26:19; Ayub 14:13-​15; Daniel 12:​2, 13.

 Jalma-jalma bakal dihirupkeun deui di mana? Aya nu bakal dihirupkeun deui di sorga pikeun jadi raja bareng jeung Al-Masih. (2 Korintus 5:1; Wahyu 5:​9, 10) Ku Alkitab, maranéhna téh disebut ”jalma-jalma nu mimiti dihirupkeun deui” jeung jalma-jalma nu ”dihirupkeun ti heula”. Kekecapan éta nunjukkeun, bakal aya jalma-jalma séjén nu dihirupkeun deui sanggeus maranéhna. (Wahyu 20:6; Filipi 3:​11) Nah, jalma-jalma séjén ieu bakal dihirupkeun deui di bumi, jumlahna téh jauh leuwih loba tibatan nu dihirupkeun deui di sorga.​—Jabur 37:29, Terjemahan Dunia Baru.

 Bakal kumaha kaayaan jalma nu dihirupkeun deui? Allah méré Isa kawasa pikeun ngahirupkeun deui jalma nu geus maot. (Yahya 11:25) Isa bakal ngahirupkeun deui ”kabéh nu aya di jero kuburan”. (Yahya 5:​28, 29) Maranéhna bakal dihirupkeun deui sabagé dirina sorangan jeung boga sipat-sipat saperti saacan maranéhna maot. Maranéhna gé bakal inget deui kabéh kajadian nu baheula pernah kaalaman ku maranéhna. Jalma nu dihirupkeun deui di sorga bakal dibéré wujud roh. Ari jalma nu dihirupkeun di bumi bakal dibéré awak jasmani nu séhat.​—Yesaya 33:24; 35:​5, 6; 1 Korintus 15:42-​44, 50.

 Saha waé nu bakal dihirupkeun deui? Ceuk Alkitab, ”Nu maot bakal dihirupkeun deui, boh jalma bener boh jalma teu bener.” (Kisah 24:15) Jalma bener téh nyaéta umat Allah nu satia, saperti Nuh, Sara, jeung Ibrahim. (Kajadian 6:9, 10; Ibrani 11:11; Yakobus 2:​21) Jalma teu bener téh nyaéta jalma-jalma nu teu taat ka Allah lantaran teu pernah diajar ngeunaan Anjeunna.

 Tapi, aya jalma-jalma nu ngalakukeun hal nu kacida jahatna jeung teu barobah nepi ka maotna. Tah, jalma-jalma jiga kitu mah moal dihirupkeun deui.​—Matius 23:33; Ibrani 10:26, 27.

 Iraha jalma nu maot bakal dihirupkeun deui? Ceuk Alkitab, jalma nu ka sorga bakal dihirupkeun deui salila kahadiran Al-Masih, nu dimimitian ti taun 1914. (1 Korintus 15:21-​23) Ari nu di bumi mah bakal dihirupkeun deui salila Pamaréntahan Sarébu Taun Isa Al-Masih, waktu bumi dirobah jadi pirdaus.​—Lukas 23:43; Wahyu 20:​6, 12, 13.

 Ku naon urang bisa percaya yén nu maot bakal dihirupkeun deui? Alkitab nyaritakeun salapan kisah ngeunaan jalma nu dihirupkeun deui. Unggal kajadian téh aya saksina. (1 Raja 17:17-​24; 2 Raja 4:​32-​37; 13:20, 21; Lukas 7:​11-​17; 8:​40-​56; Yahya 11:38-​44; Kisah 9:​36-​42; Kisah 20:​7-​12; 1 Korintus 15:​3-6) Misalna, Isa ngahirupkeun deui Lazarus di hareupeun loba jalma, padahal Lazarus geus maot salila opat poé. (Yahya 11:39, 42) Malah, jalma-jalma nu ngéwa ka Isa gé teu bisa nyangkal hal éta. Éta sababna, maranéhna hayang maéhan Isa jeung Lazarus.​—Yahya 11:47, 53; 12:​9-​11.

 Alkitab nunjukkeun, Allah boga kawasa jeung hayang ngahirupkeun deui jalma nu geus maot. Anjeunna inget sagala hal ti jalma-jalma nu bakal dihirupkeun deui ku Anjeunna. (Ayub 37:23; Matius 10:30; Lukas 20:37, 38) Allah sanggup jeung hayang ngahirupkeun deui jalma-jalma nu geus maot! Ceuk Alkitab, ”Gusti bakal sono ka mahluk ciptaan Gusti.”​—Ayub 14:15, Terjemahan Dunia Baru.

Kasalahpahaman ngeunaan dihirupkeunana deui jalma tina maot

 Mitos: Hirup deui tina maot téh maksudna arwahna asup deui kana awakna.

 Fakta: Alkitab ngajarkeun, mun saurang jalma maot, geus teu aya bagian dina dirina nu hirup kénéh. (Kajadian 2:7; Yeheskel 18:4) Hirup deui téh lain hartina arwahna asup deui kana awakna, tapi jalma éta bakal diciptakeun deui ku Allah.

 Mitos: Sababaraha jalma nu dihirupkeun deui bakal langsung dibinasakeun.

 Fakta: Ceuk Alkitab, ”Nu ngalampahkeun hal-hal jahat bakal dihirupkeun pikeun dihakiman.” (Yahya 5:​29) Tapi, maranéhna téh bakal dihakiman dumasar kana hal-hal nu dilakukeun ku maranéhna sanggeus maranéhna dihirupkeun deui, lain dumasar kana hal-hal nu baheula dilakukeunana. Ceuk Isa, ”Nu maot bakal ngadéngé sora Putra manusa. Saha waé nu merhatikeun bakal hirup.” (Yahya 5:​25) Ngaran maranéhna bakal dicatet dina ”gulungan kahirupan” lamun maranéhna ”merhatikeun”, atawa ngajalankeun, hal-hal nu diajarkeun ka maranéhna sanggeus maranéhna dihirupkeun deui. ​—Wahyu 20:12, 13.

 Mitos: Waktu dihirupkeun deui, saurang jalma bakal ngagunakeun awakna nu baheula.

 Fakta: Sanggeus maot, awak saurang jalma bakal ancur.​—Pandita 3:​19, 20.