Kulandzisa KwaJohane 8:12-59
8 12 Jesu waphindze wakhuluma nabo watsi: “Mine ngikukhanya kwelive.+ Loyo longilandzelako ngeke kwenteke ahambe ebumnyameni, kodvwa utawuba nekukhanya+ lokuletsa kuphila.”
13 BaFarisi batsi kuye: “Wena uyatifakazela, ngako bufakazi bakho abusilo liciniso.”
14 Jesu wabaphendvula watsi: “Ngisho nobe ngitifakazela mine, bufakazi bami buliciniso ngobe ngiyati kutsi ngivelaphi nekutsi ngiyaphi.+ Kodvwa nine anati kutsi ngivelaphi nekutsi ngiyaphi.
15 Nehlulela ngalenikubona ngaphandle,*+ kodvwa mine angehluleli muntfu.
16 Nakwenteka ngehlulela, ngehlulela ngendlela lefanele, ngobe angisingedvwa, kodvwa Babe longitfumile unami.+
17 NaseMtsetfweni wenu kubhaliwe kwatsiwa: ‘Bufakazi bebantfu lababili buliciniso.’+
18 Mine ngiyatifakazela, naBabe longitfumile uyangifakazela.”+
19 Babese batsi kuye: “Uphi Babe wakho?” Jesu wabaphendvula watsi: “Mine aningati, naBabe animati.+ Kube beningati, benitawumati naBabe.”+
20 Konkhe loku wakusho nakafundzisa ethempelini ngesikhatsi eme endzaweni lokubekwa kuyo emabhokisi emnikelo.+ Kodvwa kute lowambamba ngobe sikhatsi sakhe besisengakefiki.+
21 Wabese utsi kubo: “Mine ngiyahamba futsi nitangifuna, kepha nitawufela etonweni tenu.+ Ngeke nikhone kufika lapho ngiya khona.”+
22 EmaJuda atsi: “Utsi nje akafuni kutibulala? Ngobe utsi: ‘Ngeke nikhone kufika lapho ngiya khona.’”
23 Ngako watsi kuwo: “Nine nivela emhlabeni, kodvwa mine ngivela ezulwini.+ Nine nivela kulelive, kodvwa mine angiveli kulo.
24 Kungako ngitsite kini nitawufela etonweni tenu. Ngobe naningakholwa kutsi nginguye, nitawufela etonweni tenu.”
25 Wona atsi kuye: “Ungubani?” Jesu wawaphendvula watsi: “Ngitihluphelani nje ngekukhuluma nani?
26 Tinyenti tintfo lokufanele ngitisho ngani futsi nginehlulele ngato. Ecinisweni, Loyo longitfumile uneliciniso futsi loko lengakuva kuye ngiko lengikukhuluma kubantfu.”*+
27 Abazange bacondze kutsi ubatjela ngaBabe wakhe wasezulwini.
28 Jesu wabese utsi: “Naseniyilengisile iNdvodzana yemuntfu elugodvweni,+ nitawati kutsi nginguye,+ nekutsi angitenteli lutfo ngekwami,+ kodvwa letintfo ngitikhuluma njengobe Babe angifundzisile.
29 Loyo longitfumile unami, futsi akakangishiyi ngedvwa, ngobe ngihlale ngenta tintfo letimjabulisako.”+
30 Njengobe bekasho letintfo, bantfu labanyenti bakholwa kuye.
31 Jesu wakhuluma nalamaJuda lebekakholwe kuye, watsi: “Nanigcina emavi ami, nisuke nibafundzi bami sibili.
32 Nitawulati liciniso,+ futsi liciniso litanikhulula.”+
33 Wona amphendvula atsi: “Tsine siyintalelwane ya-Abrahama futsi asikaze sibe tigcili temuntfu. Usho kutsini-ke nawutsi: ‘Nitawukhululeka’?”
34 Jesu watsi kuwo: “Ngicinisile, ngicinisile ngitsi kini: Wonkhe umuntfu lowonako usigcili sesono.+
35 Ngetulu kwaloko, sigcili asihlali endlini kuze kube phakadze, kodvwa indvodzana ngiyo lehlala phakadze.
36 Ngako nangabe iNdvodzana inikhulula, nitawukhululeka mbamba.
37 Ngiyati kutsi niyintalelwane ya-Abrahama. Kodvwa nifuna kungibulala ngobe anikwemukeli lengikufundzisako.
38 Mine ngikhuluma loko lengikubone ngisesenaBabe,+ kodvwa nine nenta tintfo lenativa kubabe wenu.”
39 Wona amphendvula atsi: “Babe wetfu ngu-Abrahama.” Jesu watsi: “Kube benibantfwana ba-Abrahama,+ benitawenta loko lakwenta.
40 Kodvwa nifuna kungibulala, ngibe nginitjele liciniso lengilive kuNkulunkulu.+ Abrahama akazange akwente loko.
41 Nine nenta loko babe wenu lakwentako.” Wona atsi kuye: “Asisiwo emavezandlebe;* sinaBabe munye, lokunguNkulunkulu.”
42 Jesu watsi kuwo: “Kube Nkulunkulu bekanguBabe wenu, benitangitsandza,+ ngobe ngivela kuye. Angizange ngititele, kodvwa ngatfunywa nguye.+
43 Nentiwa yini kutsi ningakucondzi loko lengikushoko? Kungobe aniwalaleli emavi ami.
44 Nine nivela kubabe wenu longuDeveli, nifuna nekwenta loko lokufiswa nguye.+ Yena bekangumbulali kusukela ekucaleni,+ futsi akazange ahlale ecinisweni ngobe ute liciniso. Nakakhuluma emanga, ukhuluma intfo yakhe, ngobe ungumcambimanga nababe wemanga.+
45 Ngenca yekutsi mine nginitjela liciniso, aningikholwa.
46 Ngubani kini longatsi nginesono? Nangabe-ke ngikhuluma liciniso, aningikholwa leni?
47 Loyo lovela kuNkulunkulu uyawalalela emavi aNkulunkulu.+ Kungako ningalaleli, ngobe aniveli kuNkulunkulu.”+
48 LamaJuda amphendvula atsi: “Sinemanga yini nasitsi: ‘Wena ungumSamariya+ futsi unelidimoni’?”+
49 Jesu watsi kuwo: “Ngite lidimoni, kodvwa ngihlonipha Babe, futsi nine aningihloniphi.
50 Mine angitifuneli ludvumo;+ munye lolufunako nalowehlulelako.
51 Ngicinisile, ngicinisile ngitsi kini: Nangabe umuntfu alalela emavi ami, ngeke aze afe.”+
52 LamaJuda atsi kuye: “Sesiyati kutsi vele unelidimoni. Abrahama wafa, nebaphrofethi bafa, kodvwa wena utsi: ‘Nangabe umuntfu alalela emavi ami, ngeke aze afe.’
53 Kukhona yini loncono ngako kunababe wetfu Abrahama lowafa? Ngisho nebaphrofethi nabo bafa. Wena-ke ucabanga kutsi ungubani?”
54 Jesu watsi: “Nangabe ngitikhatimulisa mine, inkhatimulo yami ilite. NguBabe longikhatimulisako,+ loyo nine lenitsi unguNkulunkulu wenu.
55 Nine animati,+ kodvwa mine ngiyamati.+ Kube ngitsite angimati bengitawube ngingumcambimanga njengani. Kepha ngiyamati futsi ngiyaligcina livi lakhe.
56 Babe wenu Abrahama wajabula kakhulu nakutsiwa utawubona lilanga lami, ngako walibona futsi loko kwamjabulisa.”+
57 LamaJuda abese atsi kuye: “Usete ngisho neminyaka lengu-50 budzala, kodvwa utsi sewumbonile Abrahama?”
58 Jesu watsi kuwo: “Ngicinisile, ngicinisile ngitsi kini: Mine ngaba khona Abrahama asengekho.”+
59 Ngako batsatsa ematje kuze bamgcobe ngawo, kodvwa Jesu wabhaca futsi waphuma ethempelini.
Imibhalo lengentansi
^ Nobe “ngekwembono webantfu.”
^ NgesiGriki kutsi, “kulomhlaba.”
^ Nobe “Asizange sitalwe ngebugwadla.” Ligama lesiGriki lelihunyushwe ngekutsi “bugwadla,” lifaka ekhatsi tonkhe tinhlobo tekulalana letingemukeleki kuNkulunkulu. NgesiGriki kutsi por·neiʹa. Fundza Tinchazelo Temagama.