Kulandzisa KwaJohane 6:1-71
6 Ngemuva kwaloko, Jesu wesuka waya ngesheya kweLwandle LwaseGalile lolubitwa nangekutsi lwaseThibheriyase.+
2 Sicumbi lesikhulu sebantfu besisolo simlandzela,+ ngobe besibona timangaliso lebekatenta nakelapha labagulako.+
3 Ngako Jesu wenyukela entsabeni, wafike wahlala khona nebafundzi bakhe.
4 Umkhosi wemaJuda weliPhasika+ besewusedvute.
5 Jesu watsi nakaphakamisa emehlo, wabona sicumbi lesikhulu sebantfu sita kuye, wase utsi kuFiliphu: “Sitatitsenga kuphi tinkhwa khona labantfu batowudla?”+
6 Loku bekakusho kuze abone kutsi ucabangani, ngobe yena bekakwati loko bekatakwenta.
7 Filiphu watsi: “Tinkhwa tabodenariyo* labangu-200 ngeke tibenele labantfu ngisho nobe ngamunye wabo singamnika lucetu.”
8 Andreya umnakabo Simoni Phetro, naye lobekangumfundzi, watsi:
9 “Nangu umfana lonetinkhwa tebhali letisihlanu netinhlanti letincane letimbili. Kodvwa loku kungasita ngani kubantfu labanyenti kangaka?”+
10 Jesu watsi: “Tjelani labantfu bahlale phansi.” Bekunetjani lobunyenti kulendzawo, ngako bahlala lapho. Kulabantfu bekunemadvodza langaba ngu-5 000.+
11 Jesu watsatsa letinkhwa, wabonga, wabese utinika labantfu; wenta kanjalo nangaletinhlanti letincane, futsi labantfu badla besutsa.
12 Nasebadlile, Jesu watsi kubafundzi bakhe: “Butsani loko lokusele kuze kube bete lesikumoshako.”
13 Ngako bakubutsa, bagcwalisa bobhasikidi labangu-12 ngaletinkhwa tebhali lebetisele kulabo lebebadlile.
14 Ngesikhatsi labantfu babona letimangaliso lebekatentile, batsi: “Vele lomuntfu ungulomPhrofethi lokwatsiwa utawufika eveni.”+
15 Ngako Jesu wesuka waya+ entsabeni ayedvwa+ ngobe bekati kutsi besebeta batewumbamba kuze bambeke abe yinkhosi.
16 Kwatsi naselishona, bafundzi bakhe behlela elwandle,+
17 bafike bagibela sikebhe, besuka bewelela ngesheya baya eKhaphanawume. Ngaleso sikhatsi, besekuhwalele futsi Jesu bekasolo angakefiki.+
18 Kwaba nemagagasi lamakhulu elwandle ngobe bekunesiphepho.+
19 Kodvwa batsi nasebahambe emakhilomitha* langetulu kwalasihlanu, babona Jesu ahamba etikwemanti asondzela esikebheni; base besaba kakhulu.
20 Yena watsi kubo: “Ningesabi, ngimi lo!”+
21 Ngako besebafuna agibele esikebheni, futsi masinyane sikebhe sefika kulendzawo lebebaya kuyo.+
22 Ngakusasa, lesicumbi sebantfu lebesisele ngesheya kwelwandle sabona kutsi sekute lesinye sikebhe lapho, ngephandle nje kwesikebhe lesincane, nekutsi bafundzi baJesu bahambe bodvwa ngobe yena bekangakagibeli nabo.
23 Kodvwa tikebhe taseThibheriyase tefika edvute nalendzawo lapho bebadlele khona tinkhwa ngemuva kwekutsi iNkhosi ibonge.
24 Ngesikhatsi labantfu babona kutsi Jesu nebafundzi bakhe abekho lapho, bagibela etikebheni tabo befika eKhaphanawume bamfuna.
25 Nabamtfola ngesheya kwelwandle batsi kuye: “Mfundzisi,*+ ufike nini lapha?”
26 Jesu watsi kubo: “Ngicinisile, ngicinisile ngitsi kini: Nine aningifuni ngobe nibone timangaliso, kodvwa ningifuna ngobe nidle tinkhwa nesutsa.+
27 Ningabosebentela kudla lokuphelako, kodvwa sebentelani kudla lokuhlala kuze kube phakadze,+ loko iNdvodzana yemuntfu letawuninika kona; ngobe ngiyo leyemukelwe+ nguBabe, longuNkulunkulu.”
28 Batsi kuye: “Yini lesingayenta kuze sente lokwemukelekako kuNkulunkulu?”
29 Jesu wabaphendvula watsi: “Nguloku lokwemukelwa nguNkulunkulu, kutsi nikholwe nguloyo lamtfumile.”+
30 Babese batsi kuye: “Ngusiphi simangaliso+ lotawusenta kuze sisibone bese siyakholwa kuwe? Yini vele lotayenta?
31 Bokhokho betfu badla imana ehlane+ njengobe nje kubhaliwe kwatsiwa: ‘Wabanika sinkhwa lesivela ezulwini kuze basidle.’”+
32 Jesu watsi kubo: “Ngicinisile, ngicinisile ngitsi kini: Mosi akaninikanga sinkhwa sibili lesivela ezulwini, kodvwa nyalo Babe uninika sona.
33 Ngobe sinkhwa lesivela kuNkulunkulu singuloyo lowehla avela ezulwini, futsi lonika bantfu* kuphila.”
34 Ngako batsi kuye: “Nkhosi ubohlale usipha lesinkhwa.”
35 Jesu watsi kubo: “Mine ngisinkhwa sekuphila. Loyo lota kimi ngeke kwenteke alambe, naloyo lokholwa ngimi ngeke kwenteke ome.+
36 Ngitsite kini: Ningibonile kodvwa anikholwa.+
37 Bonkhe bantfu lengibanikwa nguBabe batawuta kimi, naloyo lota kimi ngeke ngimcoshe;+
38 ngobe ngehle ezulwini+ kuze ngitowenta intsandvo yaloyo longitfumile, hhayi intsandvo yami.+
39 Intsandvo yaloyo longitfumile ikutsi kube bete lolahlekako kulabo langinike bona, kodvwa kutsi ngibavuse+ ngelilanga lekugcina.
40 Ngobe intsandvo yaBabe ikutsi bonkhe labemukela iNdvodzana, futsi bakholwe nangiyo, kufanele batfole kuphila lokuphakadze.+ Mine ngitabavusa+ ngelilanga lekugcina.”
41 Ngako emaJuda acala kukhonona ngobe Jesu bekatsite: “Ngisinkhwa lesivela ezulwini.”+
42 Ase atsi: “Kantsi lona akusuye yini Jesu indvodzana yaJosefa, babe wakhe namake wakhe lesibatiko?+ Pho wentiwa yini kutsi atsi: ‘Ngivela ezulwini’?”
43 Jesu wawaphendvula watsi: “Yekelani kukhonona.
44 Kute umuntfu longeta kimi ngaphandle kwekutsi Babe longitfumile amdvonse;+ futsi ngitamvusa ngelilanga lekugcina.+
45 BaPhrofethi babhala batsi: ‘Bonkhe bayawufundziswa nguJehova.’*+ Wonkhe umuntfu lolalela Babe futsi afundze kuye uyeta kimi.
46 Kute umuntfu loke wabona Babe,+ ngaphandle kwaloyo losuka kuNkulunkulu; loyo-ke nguye lobone Babe.+
47 Ngicinisile, ngicinisile ngitsi kini: Loyo lokholwako utawutfola kuphila lokuphakadze.+
48 “Mine ngisinkhwa sekuphila.+
49 Bokhokho benu badla imana ehlane kodvwa bagcina bafile.+
50 Lesi sinkhwa lesehla sivela ezulwini, kuze kutsi nobe ngubani losidlako angafi.
51 Mine ngingulesinkhwa sekuphila lesivela ezulwini; nangabe umuntfu asidla utawuphila phakadze; futsi-ke inyama yami ingulesinkhwa lengitaninika sona kuze bantfu* batotfola kuphila.”+
52 LamaJuda abese acala kuphikisana odvwa atsi: “Lomuntfu angasinika njani inyama yakhe kutsi siyidle?”
53 Ngako Jesu watsi kuwo: “Ngicinisile, ngicinisile ngitsi kini: Ngaphandle kwekutsi nidle inyama yeNdvodzana yemuntfu, ninatse nengati yayo, nite kuphila.+
54 Loyo lodla inyama yami, anatse nengati yami utawutfola kuphila lokuphakadze, futsi ngitamvusa+ ngelilanga lekugcina;
55 ngobe inyama yami ikudla sibili, nengati yami isinatfo sibili.
56 Loyo lodla inyama yami, anatse nengati yami uhlala amunye nami, nami ngiba munye naye.+
57 Njengobe Babe lophilako angitfumile futsi ngiphila ngenca yakhe, naloyo lodla inyama yami naye utawuphila ngenca yami.+
58 Lesi ngiso sinkhwa lesivela ezulwini. Akufani nangesikhatsi bokhokho benu badla kodvwa bagcina bafile. Nobe ngubani lodla lesinkhwa utawuphila phakadze.”+
59 Letintfo watikhuluma nakafundzisa esinagogeni* eKhaphanawume.
60 Nabeva loku, bafundzi bakhe labanyenti batsi: “Lenkhulumo ihlasimulisa umtimba, futsi ayilaleleki.”
61 Kodvwa Jesu bekati kutsi bafundzi bakhe bakhuluma ngaloku, ngako watsi kubo: “Kuyanetfusa yini loku?
62 Nitawutsini-ke nanibona iNdvodzana yemuntfu yenyuka ibuyela lapho yachamuka khona?+
63 Umoya ngiwo lonika kuphila,+ kodvwa inyama yona ayinamsebenti. Loko lengikushito kini kugcwele umoya longcwele futsi kunika kuphila.+
64 Kodvwa labanye benu abakukholwa loku.” Kusukela ekucaleni, Jesu bekati kutsi bobani labo lebebangakholwa nekutsi ngubani lona lobekatamtsengisa.+
65 Wachubeka watsi: “Kungako ngitsite kini: Kute umuntfu longeta kimi ngaphandle kwanakavunyelwe nguBabe.”+
66 Ngenca yaloku, bafundzi bakhe labanyenti bamhlubuka babuyela etintfweni lebebatishiyile,+ futsi abazange basahamba naye.
67 Jesu wase utsi kubaphostoli bakhe labangu-12: “Nani senifuna kuhamba yini?”
68 Simoni Phetro wamphendvula watsi: “Nkhosi, singahamba siyephi?+ Ngobe nguwe lonemavi laholela ekuphileni lokuphakadze.+
69 Siyakholwa futsi siyati kutsi wena unguLongcwele waNkulunkulu.”+
70 Jesu watsi kubo: “Angitsi nganikhetsa nonkhe nine leningu-12?+ Kodvwa lomunye wenu ungumnyundzeli.”*+
71 Jesu bekakhuluma ngaJudasi indvodzana yaSimoni Skariyothi, ngobe nguye lobekatamtsengisa, nanobe bekangulomunye walaba labangu-12.+
Imibhalo lengentansi
^ Fundza Sandzisanchazo B14.
^ NgesiGriki kutsi, “emastadiya langaba ngu-25 nobe langaba ngu-30.” Stadiya sisinye besilingana nemamitha langu-185. Fundza Sandzisanchazo B14.
^ NgesiGriki kutsi, “Rabi.”
^ NgesiGriki kutsi, “umhlaba.”
^ Fundza Sandzisanchazo A5.
^ NgesiGriki kutsi, “umhlaba.”
^ Kungaphindze kubekwe ngekutsi, “emhlanganweni wesive.”
^ Nobe “ungudeveli.”
