E toʻatele tagata ua popole ona o le faaleagaina o le lalolagi ma meafaiola o loo iai. E tusa ai ma faamatalaga a tagata tomai i le siʻosiʻomaga i le lalolagi, o gaoioiga a tagata ua lamatia ai le tele o meafaiola o loo i le lalolagi ma o nisi meafaiola ua tau mou atu.

 Po o le a faaleagaina e tagata le lalolagi? Po o le a mafai ona latou ola i se auala e lē faaleagaina ai le natura?

 E toʻatele tagata atamamai e talitonu e mafai e le tagata ona puipuia le lalolagi ma lē faaleagaina ai le natura. Ua faapea mai tagata suʻesuʻe, ina ia taulau taumafaiga a tagata, e manaʻomia ona faia ni suiga i le tele o vala ma ia faia uma i le taimi e tasi. O nei suiga e aofia ai:

•   Faaleleia le auala e tausia ai fanua, vaomatua, faataufusi, ma ogāsami.

•   Faaaogā auala eseese e fai ai faatoʻaga ma auala eseese e maua ai le malosiaga.

•   Le suia o le auala e saunia ma tufatufaina ai meaʻai ina ia tele fualaau ʻaina e taumafaina e tagata, ae faaitiitia le taumafa i aano o manu fasi ma iʻa. O le faia faapea o le a faaitiitia ai le maʻimau o meaʻai.

•   Ia talia le manatu e lē faalagolago le fiafia o le olaga i le tele o meafaitino.

 O le ā sou manatu? Pe e mafai moni lava ona galulue faatasi faigāmalo, pisinisi ma tagata? Pe e te manatu e lē mafai ona tupu lenei mea ona o le manaʻo tele, manatu faapito ma le leai o se utaga mamao e faaalia e isi?—2 Timoteo 3:1-5.

 Ua faamautinoa mai e le Tusi Paia o le a tumau le lalolagi. O loo faamatala mai ai le māfuaaga e lē lava ai taumafaiga a tagata e faasaoina ai le lalolagi, ma le suiga e manaʻomia ona faia. O loo faamatala mai ai foʻi le auala o le a faataunuu ai lenei suiga.

 Aiseā e lē lava ai gaoioiga a tagata e faasaoina ai le lalolagi? Na foafoaina e Ieova a le Atua le lalolagi, ma tofia le tagata e na te tausia. (Kenese 1:28; 2:15) E na o le pau le auala e mafai ona latou taulau ai, o le mulimuli i taʻitaʻiga ma usiusitaʻi i faatonuga a Lē na foafoaina mea. (Faataoto 20:24) Nai lo o lea, na latou teena Ieova ma filifili e fai le mea e mananaʻo i ai. (Failauga 7:29) E lē mafai e le tagata ona tausia le lalolagi i sona lava tomai, ma e tusa lava pe iai ni suiga e latou te faia, e lē mafai ona latou taulau moni.—Faataoto 21:30; Ieremia 10:23.

 Le suiga e tatau ona fai. O le a faamuta e le Atua le faaleagaina e tagata o le lalolagi. (Faaaliga 11:18) E na te lē faaleleia faigāmalo ma tagata ia e faaleagaina le lalolagi, ae o le a ia aveesea. (Faaaliga 21:1) O le māfuaaga lea na fetalai mai ai Ieova: “Faauta! Ou te faia ia fou mea uma lava.”—Faaaliga 21:5.

 Le auala o le a faataunuu ai lenei suiga. O le a suia e Ieova faigāmalo faaletagata i le Malo o le Atua o loo i le lagi. O le a pulea e lenā malo e ala i le taʻitaʻiga a Iesu Keriso le lalolagi.—Tanielu 2:44; Mataio 6:10.

 O le a aʻoaʻoina e le Malo o le Atua tagata ia ola e ōgatusa ma tapulaa amiotonu a le Atua. Pe a amanaʻia e tagata Lē na foafoaina mea ma mulimuli i lana taʻitaʻiga, o le a mafai ona latou ola e aunoa ma le faaleagaina o le natura. (Isaia 11:9) Ua faamatala mai e le Tusi Paia le auala o le a maua ai e tagatānuu o le Malo o le Atua se olaga sili ona lelei, lea e faatumauina ai le lelei o le siʻosiʻomaga. O mea nei o le a faia e le Malo o le Atua:

•   O le a fau ma soloi meaʻai.—Salamo 72:16.

•   Toe faafou punaʻoa faalenatura.—Isaia 35:1, 2, 6, 7.

•   Faamautinoa o le a tausia e tagata meaola ma lē afāina ai tagata.—Isaia 11:6-8; Hosea 2:18.

•   Aveesea o mala faalenatura.—Mareko 4:37-41.

 E mafai ona e faatalitalia ua toeitiiti ona aumaia lea e le Malo o le Atua o nei suiga. Mo nisi faamatalaga, ia faitau i le mataupu “O Afea o le a Pule ai le Malo o le Atua i le Lalolagi?”