Faamaumauga a Ioane 6:1-71
6 Ua mavae nei mea, ona alu atu lea o Iesu i le isi itu o le sami* o Kalilaia, po o Tiperia.+
2 Ua mulimuli atu pea le motu o tagata e toʻatele iā te ia,+ auā ua latou vāai i faailoga na ia faia i le faamālōlōina o ē mamaʻi.+
3 Ua alu aʻe Iesu i le mauga, ma ua nonofo ai i inā ma ona soo.
4 O le taimi lea ua latalata le Paseka,+ o le tausamiga a tagata Iutaia.
5 Ona tepa aʻe lea o Iesu ma iloa ai le motu o tagata e toʻatele ua ō mai iā te ia, ona ia fetalai atu lea iā Filipo: “O fea tatou te faatau mai ai ni falaoa e aai ai nei tagata?”+
6 Ae ua ia fai atu nei upu ina ia tofotofo ai o ia, auā ua ia silafia le mea o le a ia faia.
7 Ua tali mai Filipo iā te ia: “E lē lava le 200 tenari* e faatau ai ni falaoa mo i latou, ina ia tofu ai le tagata ma sina mea.”
8 Ona faapea mai lea iā te ia o se tasi o ona soo, o Aneterea le uso o Simona Peteru:
9 “O loo i inei se tamaitiiti e iai ana falaoa karite* e lima ma tamaʻi iʻa e lua. Ae pe e lava ai le toʻatele i nei mea?”+
10 Ua faapea atu Iesu: “Ia fai ane i tagata e nonofo i lalo.” Talu ai e telē le mutia i inā, o lea ua nonofo ai i lalo tamāloloa pe tusa ma le 5,000.+
11 Ona tago lea o Iesu i falaoa ma fai le faafetai, ona ia tufatufa atu lea i ē ua nonofo ai i inā. Ua ia faia foʻi faapena i tamaʻi iʻa, ma ua latou aai ai seʻia oo ina latou maoona.
12 Ina ua latou maoona, ona ia fetalai atu lea i ona soo: “Ia aoao mai mea ua totoe, ina ia aua neʻi maʻimau se mea.”
13 Ona latou aoaoina lea, ma ua tutumu ai ato e 12 i mea na totoe, mai i falaoa karite e lima na aai ai tagata.
14 Ua vāai atu tagata i le vavega na ia faia, ona faapea ane lea: “E moni lava o le Perofeta lenei na valoia e sau i le lalolagi.”+
15 Ua silafia e Iesu o le a latou ō mai e puʻe o ia e fai ma tupu, ona toe alu ese+ ai lea na o ia i le mauga.+
16 Ua oo i le afiafi, ona ō ifo lea o ona soo i le sami,+
17 ma feosofi i le vaa, ua folau atu i le isi itu o le sami e agaʻi i Kapanaumi. O le taimi lea ua pogisa, ae e leʻi oo atu lava Iesu iā i latou.+
18 Ua amata ona sou le sami ina ua agi mai se matagi malosi.+
19 Peitaʻi, a o latou alo atu e tusa ma le tolu po o le fā maila,* ona latou vaaia ai lea o Iesu o loo savali i luga o le sami ma ua latalata atu i le vaa, ona fefefe ai lea o i latou.
20 Ae ua fetalai atu o ia iā i latou: “Aua tou te fefefe, o aʻu lenei!”+
21 Ona latou ave aʻe lea o ia ma le fiafia i le vaa, ma ua alu atu saʻo loa le vaa i uta i le mea o loo latou taumafai e ō i ai.+
22 I le aso na sosoo ai, ua iloa atu ai e le motu o tagata na iai i le isi itu o le sami, ua leai se vaa i inā. Sa iai se tamaʻi vaa i inā, ae e leʻi ō faatasi ai Iesu ma ona soo i lenā vaa, auā sa ō na o ona soo.
23 Peitaʻi, e iai vaa mai i Tiperia ua taunuu ane e lata i le mea na latou aai ai i falaoa ina ua uma ona fai e le Alii le faafetai.
24 Ua iloa e le motu o tagata e lē o iai i inā Iesu po o ona soo, ona latou faaee lea o o latou vaa ma ō atu i Kapanaumi e suʻe Iesu.
25 Ina ua latou maua o ia i le isi itu o le sami, ona latou fai mai lea iā te ia: “Le Aʻoaʻo e,*+ o anafea na e maliu mai ai i inei?”
26 Ona tali atu lea o Iesu: “E moni, e moni, ou te fai atu iā te outou, ua outou saʻilia aʻu ona sa outou aai i falaoa ma maoona ai, ae e lē ona o faailoga na outou vāai i ai.+
27 Aua tou te galulue mo meaʻai e pala, a o le meaʻai e tumau ai i le ola e faavavau,+ lea e tuuina atu e le Atalii o le tagata iā te outou; auā o ia lenei ua faamaonia e le Atua le Tamā.”+
28 Ona latou fai mai lea iā te ia: “O le ā e tatau ona matou faia ina ia faataunuu ai galuega a le Atua?”
29 Ua tali atu Iesu iā i latou: “O le galuega lenei a le Atua, ia outou faatuatua i lē ua Ia auina mai.”+
30 Ua latou faapea mai: “O le ā se faailoga+ e te faia ina ia matou vāai i ai ma talitonu ai iā te oe? O le ā le galuega o e faia?
31 Na aai o matou augātamā i le manai i le toafa,+ e pei ona tusia: ‘Ua ia avatu iā i latou le areto mai i le lagi e aai ai.’”+
32 Ona fetalai atu lea o Iesu iā i latou: “E moni, e moni, ou te fai atu iā te outou, e leʻi avatua e Mose iā te outou le areto mai i le lagi, ae ua avatu e loʻu Tamā le areto moni mai i le lagi.
33 Auā o le areto mai i le Atua, o ia lea ua alu ifo mai i le lagi ma foaʻi atu le ola i le lalolagi.”
34 Ona latou fai mai lea iā te ia: “Le Alii e, ia e foaʻi mai pea lenā areto iā i matou.”
35 Ua fetalai atu Iesu iā i latou: “O aʻu o le areto o le ola. O lē e sau iā te aʻu, e lē toe fia ʻai lava o ia, ma o lē e faatuatua mai iā te aʻu, e lē toe fia inu lava o ia.+
36 Ae e pei ona ou fai atu iā te outou, ua outou vāai mai iā te aʻu ae tou te lē talitonu lava.+
37 O i latou uma ua foaʻi mai e le Tamā iā te aʻu, e ō mai iā te aʻu, ma ou te lē tuliesea lava lē e sau iā te aʻu;+
38 auā na ou sau mai i le lagi+ e fai le finagalo o lē na auina mai aʻu, ae e lē o loʻu lava loto.+
39 O le finagalo lenei o lē na auina mai aʻu, ia lē maʻimau se tasi o i latou uma ua ia foaʻi mai iā te aʻu, ae ia ou toe faatutūina+ i latou i le aso mulimuli.
40 Auā o le finagalo lenei o loʻu Tamā, o so o se tasi e talia le Atalii ma faatuatua iā te ia, e ao ona maua le ola e faavavau,+ ma ou te toe faatūina+ o ia i le aso mulimuli.”
41 Ona tomumumu ai lea o tagata Iutaia ona o lana fetalaiga: “O aʻu o le areto na alu ifo mai i le lagi”;+
42 ma ua latou faapea ane: “Pe e lē o Iesu ea lea o le atalii o Iosefa, o lē ua tatou iloa lona tamā ma lona tinā?+ E faapefea la ona ia fai mai, ‘Ua ou sau mai i le lagi’?”
43 Ua tali atu Iesu iā i latou: “Soia tou te tomumumu.
44 E lē mafai ona sau se tagata iā te aʻu, seʻi vaganā ua tosina mai o ia e le Tamā+ o lē na auina mai aʻu, ma ou te toe faatūina o ia i le aso mulimuli.+
45 Ua tusia e le ʻau Perofeta: ‘E aʻoaʻoina i latou uma e Ieova.’*+ O i latou uma ua faalogo ma aʻoaʻoina e le Tamā, e ō mai iā te aʻu.
46 E lē faapea ai e iai se tagata ua vaai i le Tamā;+ ae e na o lē ua auina mai e le Atua, o ia lea ua vaai i le Tamā.+
47 E moni, e moni, ou te fai atu iā te outou, o lē e talitonu iā te aʻu, e ola o ia e faavavau.+
48 “O aʻu o le areto o le ola.+
49 Na aai o outou augātamā i le manai i le toafa, ae ua feoti i latou.+
50 O le areto lenei ua alu ifo mai i le lagi, ma e lē oti le tagata e ʻai ai.
51 O aʻu o le areto ola na sau mai i le lagi. Pe a ʻai se tasi i lenei areto, o le a ola o ia e faavavau. E lē gata i lea, o le areto ou te avatua, o loʻu tino lea e fai ma sui o ola o le lalolagi.”+
52 Ua fefinaua‘i tagata Iutaia ma faapea ane: “E faapefea ona aumai e lenei tagata lona tino tatou te aai ai?”
53 Ona fetalai atu lea o Iesu iā i latou: “E moni, e moni, ou te fai atu iā te outou, pe afai tou te lē aai i le tino o le Atalii o le tagata ma inu i lona toto, e lē i totonu iā te outou le ola.+
54 O lē e ʻai i loʻu tino ma inu i loʻu toto, e maua e ia le ola e faavavau, ma ou te toe faatūina+ o ia i le aso mulimuli;
55 auā o loʻu tino o le meaʻai moni lea, ma o loʻu toto o le meainu moni lea.
56 O lē e ʻai i loʻu tino ma inu i loʻu toto e tumau ona autasi o ia ma aʻu, ma ou te autasi foʻi ma ia.+
57 E pei ona soifua le Tamā o lē na auina mai aʻu, ma ua ou ola ona o le Tamā, o lē foʻi la e ʻai i loʻu tino, e ola o ia ona o aʻu.+
58 O le areto lenei ua alu ifo mai i le lagi. E lē pei o le areto na aai ai o outou augātamā ae mulimuli ane feoti. Ae o lē e ʻai i lenei areto, o le a ola o ia e faavavau.”+
59 Na fetalai o ia i nei mea, a o ia aʻoaʻo atu i se sunako* i Kapanaumi.
60 Ina ua faalogo le toʻatele o le ʻausoo i lenei mea, ona faapea ane lea: “E mataʻutia nei upu; o ai se isi e fia faalogo i ai?”
61 Ua silafia e Iesu ua tomumumu ona soo e uiga i lenei mea, ona ia fetalai atu lea: “Po ua outou tausuai ea i lenei mea?
62 Ae e faapefea pe a outou vāai atu, ua alu aʻe le Atalii o le tagata i le mea na iai muamua?+
63 O le agaga o le Atua e maua ai le ola;+ e leai se aogā o le tino. O upu ua ou fai atu ai iā te outou, e mai i le agaga paia ma e maua ai le ola.+
64 Ae e lē talitonu nisi o outou.” Auā na silafia e Iesu mai i le amataga ē e lē talitonu, ma lē e faalataina o ia.+
65 Ua ia fetalai atili atu: “O le mea lenei na ou fai atu ai iā te outou, e leai se tasi e mafai ona sau iā te aʻu, pe a lē finagalo i ai le Tamā.”+
66 Ona o lenei mea, ua toe foʻi ai le toʻatele o ona soo i mea na latou tuua,+ ma lē toe savavali ai ma ia.
67 Ona faapea atu lea o Iesu i le toʻa 12: “Po ua outou fia ō foʻi ma outou?”
68 Ua tali mai Simona Peteru iā te ia: “Le Alii e, o ai a matou ō i ai?+ Ua iā te oe upu o le ola e faavavau.+
69 Ua matou talitonu ma matou iloa o oe o Lē e Paia a le Atua.”+
70 Ua tali atu Iesu iā i latou: “Po ou te leʻi filifilia ea outou e toʻa 12?+ Ae o se tasi o outou ua faitala taufaaleaga.”*+
71 O le mea moni, na fetalai o ia e uiga iā Iuta, le atalii o Simona le Sekara, auā o ia lenei o le a faalataina o ia, e ui o ia o se tasi o le toʻa 12.+
Faamatalaga Pito i Lalo
^ O lenei sami, o se vaituloto telē. O nisi taimi e taʻua o le vai o Kalilaia.
^ O se isi ituaiga saito. O le upu Peretania, o le barley.
^ Pe ā ma le lima po o le ono kilomita. Ele., “pe ā ma le 25 po o le 30 setatio.” Tagaʻi i le Faa. E14.
^ Po o le “Rapi e.” Tagaʻi i le Uiga o Upu.
^ Pe atonu “i se mea na potopoto ai le lautele.”
^ Po o le “o se tiapolo.”
