•   Wolootu xonantanna macciishshatto woyite mayi macciishshamannohe?

  •  Mittoreno dilawannoe—xonama nooreentilla yee hedeemmo.

  •  Mito geeshsha giwisannoe—kayi hakkeya busha coyeeti yee dihedeemmo.

  •  Macca gibbannoe—horo rosa didandoommo.

•   Ati xonante egennootto?

  •  Horo diegennoommo

  •  Sae sae

  •  Duucha woyite

•   Busha qaale coyiˈrate daafira ati mayyaatto?

  •  Hakkeya bushare diˈˈikkino

  •  Lowo geya bushareeti

 Xonama lowo geya busha coye labbannohe? ‘Dilabbannoe’ yaattoha ikkara dandaanno. ‘Qarrisannohu meu coyi heeˈreenna ise daafira yaadeemmo? Qoleno dimannu baalunku xonamannoho!’

 yaattora dandaatto. Kayinni addinta mannu baalunku xonamannoho? Ammani hoogi, busha qaale coyiˈra qorophannohu batinyu manni no. Kuni manni wolu manni afinokkiha mito coye afino. Lawishshaho:

•  Xonama ati hiittoo manchootiro leellishshanno. Coyiˈrattori giddoyidi ayimmakki leellishanno. Hakko daafira, busha qaale coyiˈrakki wolootu daafira hedattokkiha ikkoottota leellishshara dandiitanno. Ikkina ati hattoo manchooti?

   Qullaawu Maxaafi togo yaanno: “Afuunni fulannohu . . . wodanu giddonni fulanno.”—Maatewoosi 15:18.

•  Xonama wolootu ate daafira gara ikkinokkire heddanno gede assitara dandiitanno. Kasi Kontirooli (Xonansho Gargadha) yaanno maxaafi togo yaanno: “Coyiˈneemmo gari, hiittoo manni jaalanke ikkannoro leellishara, maatenke woy ledonke loosanno manni ayirrisannonke gede assara woy hoogara, hattono mannu ledo noonke aante seekkara woy hunara, qoleno looso woy loosu bayicho lopho afiˈneemmo gede woy hoongeemmo gede assaranna egenninonkekki manni ayirrisannonke woy ayirrisannonkekki gede assara dandaanno.” Qoleno kuni maxaafi togo yaanno: “Xonama hoogoommoro mannu ledo nooe aante albinni roore woyyaabbannohu bai ikka? yite ateneeto xaˈmi.”

   Qullaawu Maxaafi togo yaanno: “Bunshe baala kiˈnewiinni hunne.”—Efesooni Sokka 4:31.

•  Xonama ati heditto gede busuleho yinannihe gede diassitannohe. Hawu Ruudi! yinanni maxaafisira Dokiteri Alekisi Pakeri togo yiino: “Woˈmanka woyite xonamanno manni yaannore macciishsha ceeˈmishshanno.” Isi lede, macca gibbannore coyiˈranno manchi “xiinxalla, coommannore coyiˈrannoha, egennaamo woy shaqqado ikka didandaanno. Coyiˈratto coyi gumu nookkiha, xawe leellannokkihanna haafare ikkiro, hedatto garino hattooha ikkasi digattanno” yiino.

   Qullaawu Maxaafi togo yaanno: “Afiiˈnenni bushu coyi fuloonke.”—Efesooni Sokka 4:29.

•  Mixo fushshiˈri. Mittu agani woy hakkuyi woro ikkitanno yanna giddo bushare coyiˈra agurate mayira disharramatto? Woyyeessiˈrootto coye sanxarazhete woy kalaanderete borreessidhe amaxxa dandaatto. Kayinni tenne mixokki wonshiˈrate assattori wolurino heeˈrara dandaanno. Lawishshaho:

•  Surrekkira busha qaalla woˈmitanno gede assanno boohaarshiwiinni xooqi. Qullaawu Maxaafi, “Bushu jaaloomi dancha amanyoote hunanno” yaanno. (1 Qorontoosi 15:33) ‘Jaaloomu’ manna calla ikkikkinni laˈˈatto filme godoˈlattota viidiyote godoˈle, hattono macciishshatto muuziiqano ikkara dandaanno. Tonaa lamalu dirihu Keneezi togo yiino: “Mittu sirbi baxisinonke daafira calla, xono nooha ikkinota wodanchinummokki mitteenni sirbinammora dandiineemmo.”

•  Gikki yoottoha ikkoottota leellishi. Mitu manni macca gibbanno xono xonamannohu, hatto assa jawa mancho ikkinoonnita leellishshanno yee hedanno daafiraati. Noore coyiˈniro kayi, coyi dihattooti. Qullaawu Maxaafi, gikki yiino mannira “danchanna busha bade afate rosi [noonsata]” kulanno. (Ibiraawoota 5:14) Gikki yiino manni wolootu “naaddansara” yee harunsanno biddishsha lashshi diassanno.

 Addanko bushare coyiˈra surre (hattono qooxeessa) daaffanno ikkinnina kaaˈlitannori dino. Wonanni tenne alamera bushare coyiˈranno manni batiˈre no! Kasi Kontirooli yinanni maxaafi “Busha qaale coyidhe noohu aana leddooti” yiino. “Xonotenni daafamino qooxeessa keereensate atino dandaattore assi. Hatto assittoro tiiˈˈikki dibushiishannohe; wolootuno ayirrissannohe.”