Mitte xiinxallo buuxissino garinni, Ameerikaho 80 anga ikkitanno qeedhonna seenni huuccatto assiˈranno; kayi kuri giddo huuccatto barru baala assidhannori daratella ikkitanno. Kuri giddo mitootu, ‘Isi huuccatto mulla beedho afiˈrate yine calla assinannireetinso macciishshannohu no?’ yite hedansa digattanno.

•  Huuccatto maati?

•  Maganu addinta macciishshanno?

•  Mayi daafira huucciˈra dandeemmo?

•  Darawokki yitinore

 Huuccatto baalankare kalaqino Kalaqaanchi ledo hasaambanni hasaawaati. Hanni hatto yaa mayyaatero hedi! Yihowa duuchante doogonni manna lowo geeshsha rooranno; ikkirono, “isi ninkewiinni dixeertiˈrino.” (Soqqamaasinete Looso 17:27) Isinni Qullaawu Maxaafi giddo togo yaannohu dhagge ikkanno koyishshi no: “Maganunniwa shiqqi yiiyye; isino kiˈnewa shiqqi yaanno.”​—Yaiqoobi 4:8.

 Maganunniwa shiqqi yaa dandaattohu hiittoonniiti?

•   Mitte doogo huuccattote​—tini ati Magano hasaawisatto doogooti.

•   Wole doogo Qullaawa Maxaafa xiinxallate​—tini Maganu ate hasaawisanno doogooti.

 Konni garinni ati Magano hasaawisattohanna isino hasaawisannahe macciishshattoha ikkiro, isi ledo muli jaaloomi heeˈrannohe.

 “Woˈmunkura Aliidi Magani Yihowa ledo hasaawa, mannu oosora lowo ayirrinyeeti.”​—Jeremii.

 “Giddoˈyata fushshe huuccattotenni Yihowara hasaaphaˈya, isiwa albinni roore gamba yeemma gede assitannoe.”​—Miranda.

 Magano ammanattohanna iso huucciˈrattoha ikkirono, isi huuccattokki macciishshannota ammana qarra ikkitahera dandiitanno. Ikkollana, Qullaawu Maxaafi Yihowa ‘huuccatto macciishshannoha’ ikkinota kulanno. (Faarso 65:2) Isinni Maganu Qaali, “Qarrisannoˈnere baala isi aana tuqqe” yee amaalannonke. Mayira? “[Korkaatuno] kiˈnere malannohu isooti.”​—1 Pheexiroosi 5:7.

 Hanni tenne hedi: Muli jaallakki ledo ganyite hasaawate woˈnaalatto? Maganu ledono hatto hasaawa dandaatto. Iso huuccattotenni woˈmanka woyite hasaawisi; qoleno hasaawisattosi woyite suˈmasi gani. (Faarso 86:5-7; 88:9) Ee, Qullaawu Maxaafi “Agurtinikkinni huuccidhe!” yaannonke.​—1 Teselonqe 5:​17.

 “Huuccatto gordoho noo Anniˈya ledo hasaaweemmo hasaawaati. Huuccatto assiˈreemmo woyite wodaniˈyara noore gudise hasaapheemmosi.”​—Moyisis.

 “Amaˈya ledo woy muli jaaliˈya ledo hasaaweemmahu gede, Yihowa ledo baalankare gudise fane hasaaweemma.”​—Kaareni.

 Qullaawu Maxaafi togo yaanno: “Baalunku coyira galaxxitinanninna huuccidhinanni hasidhinoonni coye Maganoho kuˈle.”—Filiphisiyusi Sokka 4:6.

 Hatto yaa qarra ikkinohere Maganoho hasaapha dandaatto yaate? Ee! Isinni Qullaawu Maxaafi, “Isi irkisannohena, yaaddokki Maganu aana tugi” yaanno.—Faarso 55:22.

 Hige huuccatto assiˈratto woyite, Maganoho qarrakki calla kula hasiissannohe yaa diˈˈikkino. Chanteeli yinanni wedellitte togo yitino: “Yihowa kaaˈlannoe gede calla huucciˈreemmaha ikkiro, hatti jaaloomanke hakkeya diseekkitanno.” Leddeno, “Balanxe assinonkerira galaxxa hasiissannonke yee hedeemma; qoleno kulle galaxxa hasiissannonkeri lowori no” yitino.

 Hanni tenne hedi: Heeshshokki giddo Yihowa galaxxatto gede assannoheri mayi mayi noohe? Techo Yihowa galaxxatto gede assannoheha sase coye heda dandaattokka?

 “Shiimu coyi nafa, lawishshaho biifadu awawi nafa, huuccattotenni Yihowa galaxxineemmo gede kakkayisankera dandaanno.”​—Anita.

 “Yihowa kalaqinori giddo dhagge ikkannohere woy lowo geeshsha baxattoha Qullaawu Maxaafi qummeeshsha hiinci; hakkiinni hakko coyi daafira Yihowa galaxxi.”​—Biriyani.