Qullaawu Maxaafi, heeˈnanni gobba seeri hoola hoogi geeshsha quwa saˈnikki angannita dihoolanno. Ikkollana dimbinannita hoolanno.—Faarso 104:15; 1 Qorontoosi 6:10.

 Heeˈratto gobba seeri woy annikkinna amakki fajjihekkinni agatto gede mannu xixxiiwannohehalla ikki?

•  Agu abbannore hedi

•  Maa assattoro balaxxe doodhi

•  Darawokki yitinore

 Darawokki giddo mitootaho, boohaarate ago aga hasiissannonsaha lawansara dandaanno. Ikkollana agitto gedensaanni mayi kalaqamara dandaanno?

•  Seeru garinni qorichishamattora dandaatto. Heeˈratto gobba seeri fajjikkinni ago agattoha ikkiro, woxunni qorichinshahera, jaddo loosino yine kassansahera, makeena kadate fajjokki adhinahera, mito looso loosi yine qorichinshahera, wole agurina usurrahera dandiinanni.—Roomu Sokka 13:3.

•  Suˈmikki baˈˈara dandaanno. Agu mayinae baˈnanni gede assara dandaanno. Agunni kainohunni gedenaa gaabbattore coyiˈrattora woy assattora dandaatto. (Lawishsha 23:31-33) Dagoomittete webisayite halaˈlitinote tenne yannara, assattori seeda yanna suˈmakki hunara dandaanno.

•  Gawajjinanniheta gargadhite afattokki gede assannohe. Agu mannimmakki gawajjinannita woy seyantanniheta hooˈlite afattokki gede assahera dandaanno. Qoleno wolootu xixxiibbeennahe roore gawajjannore woy gobbate seeri fajjannokkire assatto gede assahera dandaanno.

•  Araado. Mite xiinxallo leellishshanno garinni, anje heeˈre aga hanafino manni roore agu araadonni amadamanno. Yaaddo gargadhate, callimma hooˈlate, woy malalli yaankera yine ago aga fulle anfeemmokki gede assite sakaalte amaddankera dandiitanno.

•  Reyo. Muli diro Yunayitidi Isteetisete ago age oofanno manni abbino danonni, 52 daqiiqi sai kiiro mittu manchi reyino. Mitte yannara ontu diri giddo, ago age oofanno manni abbino danonni 21 diri woro ikkinonsari 1,500 saˈˈanno wedelli reyino. Ati ago agoottokkiha ikkiro nafa, age heeˈre oofanno manchi makeena eittoro dano iillitahera dandiitanno.

 Assattore balaxxe hedittoro, ago doogimale aga abbitanno gawajjonni gata dandaatto.

 Qullaawu Maxaafi Biddishsha: “Egennaamu manchi bushare afiro maaxamanno.” (Lawishsha 22:3) Makeena kandara albaanni woy woˈma hedo uyine loonsanni looso loonsammora kaˈne heeˈne ago aga dancha diˈˈikkitino.

 Togo Assate Murciˈri: ‘Ago aga hasiˈrummoro nafa, ageemmohu gobbate seeri fajjannohanna noommo gari injaannoha ikkiro callaati.’

 Qullaawu Maxaafi Biddishsha: ‘Hakkunni hajajantinanni manchi borojje ikkitinanni.’ (Roomu Sokka 6:16) Ago darawoˈne aggino daafira calla agginanniha ikkiro, insa shombinni fooltinanni yaate. Malalli yaannoˈne gede woy yaaddo gargadhate yitine ago agginanniha ikkiro, qarra cince saˈˈate dandoo diheedhannoˈne.

 Togo Assate Murciˈri: ‘Darawoˈya ageemmo gede xixxiibbaera diwodheemmo.’

 Qullaawu Maxaafi Biddishsha: “Agaasinete ledo hossooti.” (Lawishsha 23:20) Busha jaalla assate murciˈroottore assattokki gede assitahera dandiitanno. Ago quwa sayise aganno manniwa aanattoha ikkiro, umikkira qarra abbiˈratto.

 Togo Assate Murciˈri: ‘Ago quwa sayise aganno manni ledo dijaalooˈmeemmo.’