Baxillu jaalooma amaddininku boode yanna saˈino; xa kayi mito coye huluullama hanaffinoonni. Jaaloomaˈne suffinironso agurtiniro woyyanno? Konne birxicho qixxeessinoonnihu, lamente giddo mitte doodhitinanni gede kaaˈlateeti.

Konni birxichira

•  Huluullo kalaqannore

•  Lamete giddo mitte doodha

•  Jaalooma agura doodhitiniro

 Mittu beettinna mitte beetto jaalooma amade mito geeshsha keeshshihu gedensaanni, mereeronsa lowo badooshshi noota huwatara dandaanno. Lawishshaho:

•   Mittu wayi gama ofolle boohaara baxanno; mittu kayinni ilaalla noowa lekkatenni milli yaa baxanno.

•   Mittu hasaawe hashuu diyaannoho; mittu kayinni sammiimaho.

•   Mittu awaawurannoho; mittu kayi ammanaminoho.

 Sasenti ikkito addi addita ikkitinota wodanche. Umiti banxanni coyi babbaxxinota leellishshannote; layinkiti akatu badooshshi noota leellishshanno; sayikkiti kayinni gallanni seeri babbaxxinota leellishshannote.

 Hanni hedde: Lamunku adhantiniha ikkiro, konni sasunku coyi (badooshshi) giddo dandee heeˈrate roore ayirrannoˈnehu hiikkoyeti? Kuri giddo lamunku duqqitine heeˈrate sumuu yitinannihu heeˈranno?

 Minaanninna minaama baxanno coyi woy akatinsa babbaxxinoha ikkiro nafa, adhamansa hagiirru noota ikka dandiitanno. Hige wonanni kuˈu kuˈuyi ledo sumuu yaanno yaa lamunku mitto gara ikkanno yaa diˈˈikkitino. Mito woyite, minaanninna minaama galtensa baxxannore baxa rosara, wole agurina kuˈuyi akati kuˈuyira kaaˈlara nafa dandaanno. a

 Wole widoonni kayinni, galteˈne ikkanno manchi kiˈne galtinanni seerinni galannoha ikka hasiissannosi; wole yaattonni ammaˈnote, amanyootunna garanna gara ikkinokki coyi daafira nooˈne lao mitte ikka hasiissannose. Galtinanni seeri mitto ikka hoogiro, hatti baxillu jaaloomaˈne agurate heda hasiissannoˈneta leellishanno malaateeti.

 Lawishshaho, ammaˈnote coyira sumuu diyitinoonni yine hendo. Mittu maxaafi togo yaanno: “Xiinxallo duucha higge leellishshinonte gede, addi addi ammaˈno noonsa minaanninna minaamara adhamansa diigamase digattanno.”​—Fayting for Yuur Meereji.

 Qullaawu Maxaafi biddishsha: “Ammantinokkiri ledo maxxagantinoonte. . . . Xawaabbahonna tunsichoho mayi xaadi no?”—2 Qorontoosi 6:14.

 Qullaawu Maxaafi kulanno garinni, “adhantannore lowo qarri amadannonsa.” (1 Qorontoosi 7:28) Hakko daafira, xa baxillu jaalooma amaddine heedhinoonni yannara hakkuyi qarri giddo gamu iilliˈnero, dhagge ikkoonkeˈne.

 Shiimu coyira sumuu yaa hoogginoonni daafira calla, jaaloomiˈne diseyanno yaa diˈˈikkitino. Heda hasiissannoˈne xaˈmo: Togoo coye gaˈlabbotenni hasaabbine tira dandiitinanni? Adhantinanniha ikkiro, lamunkura tini dandoo hasiissannoˈneti egennantinote.

 Qullaawu Maxaafi biddishsha: “Mimmitiˈnera shaqqaddanna shooshaqoota ikke; . . . mimmitiˈne sao agurre.”—Efesooni Sokka 4:32.

 Wole widoonni kayinni, duucha woyite nyerri yitinanniha ikkiro woy sumuu yaa hoogginoonni coyi jawa ikkiro, hatti lamunku mitteenni heeˈrate maltinoonnikkire ikkitinoonnita leellishshannota ikkitara dandiitanno. Coyi hatto ikkiro, tenne ganaanni anfe gaabbantenni xa afa woyyate!

 Qara hedo: Baxillu jaalaˈne huluullantinanni gede assannohu jawu coyi heeˈriro woy adhamate qixxaawaˈne huluullantiniro, togoo huluullo lashshi assitine saˈinoonte!

 Qullaawu Maxaafi biddishsha: “Egennaamu manchi bushare afiro maaxamanno; hawanyu kayinni eˈˈe qarramanno.”—Lawishsha 22:3.

 Baxillu jaalooma agura lowo geya xissiissara dandiitanno. Ikkollana, lamunku giddo mittoho woy lamunkura, jaaloomiˈne daafira huluullantinanni gede assinoˈnehu jawu coyi heeˈrironna hakku coyi huluulle higa giwiˈnero, woyyitannoti jaaloomaˈne agura ikkitara dandiitanno.

 Ikkina jaaloomaˈne agurtinannihu ma garinniiti? Addi korkaati heeˈriˈnero ikkinnina, jaaloomaˈne agurtinoonnita kulate mobayiletenni sokka soya woy silke bilbila hoogginiro woyyate. Hatteentenni, tenne jawa hajo injiitanno yannanna bayicho doortine hasaabbe.

 Qullaawu Maxaafi biddishsha: “Mimmitiˈnera halaale coyidhe.”—Zakkaariyaasi 8:16.

 Baxillu jaaloomaˈne agurtini yaa diqiniinoˈne yaateni? Deeˈni, hatto yaa diˈˈikkitino. Wonanni baxillu jaalooma amaddinoonnihu, mimmito laˈine kaˈine adhamate woy adhama hoogate doodhitinara ikkinota qaagge. Jaaloomaˈne agurtinoonniha ikkiro nafa, konni jaaloominni konni kaˈira kaaˈlannoˈnere lowore rosa dandiitinanni.

 Kiˈneneeto togo yitine xaˈme: ‘Konni jaaloominni umiˈya daafira maa huwatoommo? Mine kalaqiˈrammora albaanni rosa woy assa hasiissannoehu wodanchoommo coyi no? Wirro baxillu jaalooma amadummoro, albihunni woyyino garinni assa hasiˈreemmo coyi maati?’