Mitte egennootto beetto baxisseennahe, lamunku dancha minaannanna minaama ikkitinannironna teˈee afate baxillu jaalooma kalaqiˈrate sumuu yitini. Jaaloomiˈne lexxanni haˈranno woyite maa heda hasiissannoˈne?

Konni birxichira

•  Noore fantine hasaawa hasiissannoˈneta hedde

•  Hedoˈne babbaxxitara dandiitannota hedde

•  Baxillu jaaloomi daafuronna yaaddo abbannota hedde

 Atinna jaalakki mitteenni yanna sayissinanni woyite, mimmito albinni roore egentinanni. Mito coye affinannihu, jaaliˈne ikkito laˈˈatenniiti.

 Ikkollana, lamunku noore fantine hasaawa hasiissannoˈneti mite coyibba no. Konni garinni hasaabbinanni woyite, dandaami deerrinni, baxillu ille diwe noo coye laˈinannita hoolaˈnera wodhitinoonte.

 Lamunku hasaawa hasiissannoˈne coyibba giddo gama aante nooreeti:

•   Woxu hajo. Asalu nooˈne? Woxe doogimale fushshate qarri nooˈne? Adhantinihu gedensaanni, woxe afidhinannihunna fushshitinannihu hiittoonniiti?

•   Fayyimma. Fayyimmaˈne hiittooti? Konni albaanni fayyimmaˈne buuto gawajjannori tuncu yee egenninoˈne?

•   Mixo. Heeshshoˈne giddo assa hasidhinanni coyi maati? Atetinna jaalakki mixo mitto garaati? Adhantinihu gedensaanni miteekke coyi injaa hoogeennaˈne mixoˈne wonshiˈra hoogginiro, hagiirraamma ikka dandiitinanni?

•   Maate. Xaa yannara maateˈne giddo kiˈne kaaˈlo hasiissannosihu no? Albillittena kiˈne kaaˈlo hasiissannohu heeˈranno? Ooso ila hasidhinanni? Hasidhinanniha ikkiro, meˈˈe iltinanni?

 Togoo hajo kayissine hasaabbinanni woyite, noore maaxxinikki fantine hasaabbe. Kiˈneneeto seekkiˈrate yitine noore maaxxinoonte woy coye daheessitinoonte.—Ibiraawoota 13:18.

 Tenne hedde: Jaalakki daafira afa hasiissannoheri maati? Ate daafira ise afa hasiissannoseri maati? Xa noore fantine hasaawaˈne, albillitte adhamate sumuu yitiniro dancha gede hasaawate rosichi heeˈrannoˈne gede kaaˈlitannoˈnehu hiittoonniiti?

 Qullaawu Maxaafi Biddishsha: “Mimmitinkera halaale coyiˈno.”—Efesooni Sokka 4:25.

 “Beetto ‘Lewu agani gedensaanni adhaera huucciˈriekki digatanno’ yite heddara dandiitanno; beettu kayi mittu diri gedensaanni yee hedara dandaanno. Konni garinni, beetto mulenni adhammeemmo yite hedde, coyi heddino gede ikka hoogeenna baasa dadillitara dandiitanno. Hakko daafira, lamunku mimmitu hedo afansa danchate.”—Mine assidhunku mitto diro ikkinoseti Eeriyaana.

 Lamu manni gudisame mitto ikka didandaanno. Hakko daafira, atinna jaalakki baalunku coyira sumuu yineemmo woy baalunku coyira hedonke mitte ikkitanno yitine heddinoonte. Lawishshaho, budiˈnenna lossiˈne mittu coyira babbaxxitino hedo heedhannoˈne gede assara dandaanno.

 Tenne hedde: Hakkeya dhiwinokki coyira hedoˈne babbaxxitanno woyite, Qullaawu Maxaafi biddishshilla diigama hoogi geeshsha, keeru heeˈrara yitine lamunku hedoˈne agurate maahoyye yitinanni?

 Qullaawu Maxaafi Biddishsha: ‘Shaqqilliˈne manna duuchaho leello.’—Filiphisiyusi Sokka 4:5, Haaro Gondooro.

 “‘Baalunku coyira sumuu yineemmoreeti’ yitine heddinirono, badooshshu heeˈrasi digattanno. Afoo xaada dancha ikkiturono, sumuu yaa hoongeemmo woyite leellinsheemmo akatta roore hasiissannote.”—Seenne adhinku onte diro ikkinosihu Maatiwu.

 Baxillu jaaloomi lowo yannaˈne adhannotinna mito woyite isinni yaachishannoˈneti egennantinote. Mayi kaaˈlannoˈneyya?

 Dhukaˈne affinoonnire ikke. Wodanaˈne quwa saˈine baxillu jaaloomira uyitine wole loosu qeechaˈne woy wole jaallaˈne lashshi assitinoonte. Mine assidhunku onte diro ikkinoseti Aleena togo yitino: “Adhantini gedensaannino jaallaˈne kaaˈlo hasiissannoˈne; insarano kiˈne kaaˈlo hasiissannonsa. Baxillu jaalooma amaddinoonni daafira calla, jaallaˈne facci assitine agurtinoonte.”

 Adhantini gedensaanni, yannaˈnenna wolqaˈne heeshshoˈne giddo baalunku coyira beeha hasiissannoˈneta qaagge. Konnira, mayira xaanni hatto assa dirosiisidhinanni?

 Tenne hedde: Baxillu jaaliˈne wodanasinna yannasi wolqasira aleenni aaˈnera agadhitinanni? Woy isi yannaˈnenna wodanaˈne wolqaˈnera aleenni uyitinasira agadhanno? Jaaloomiˈnenni kainohunni lamunku daafurtine wolqa baˈinannikki gede, maa assa dandiitinanni?

 Qullaawu Maxaafi Biddishsha: “Kalqete aana ikkannori baalunku yanna afiˈrino.”—Rosiisaancho 3:1.

 “Baxillu jaalooma amadino beettinna beetto mitteenni yanna sayisanno woyite boohaarannoha calla ikkiro, adhamanno woyite coyi hedino gede ikka hoogeenna mase jalli yaara dandaanno. Lamunku barru baala assiˈnanni coyibba mitteenni assa lawishshaho dikko fule mitore hidha, mini looso loosanna mitteenni magansiˈra hasiissannonsa. Tenne assansa adhamanno woyiteno mitteenni kaaˈlame loosanno gede dancha rosicho ikkitannonsa.”—Seenne adhinku lame diro ikkinosihu Daanieeli.

 Baxillu jaaloomi, adhamatenna jaalooma uurrisate giddo mitte doodhate yine yannate geeshsha kalaqiˈnanni jaalooma ikkinota qaagge. Lamente giddo mitte doodhitinanni woyite heda hasiissannoˈne coyibba 3ki gafira ronseemmo.