•  Yanna danchu garinni horoonsiˈra hasiissannohehu mayiraati?

•  Maa assa dandaatto?

•  Darawokki yitinore

•   Yanna woxu gedeeti. Horoonsiˈrittokki mulla saˈuro, hasiˈratto woyite afiˈra didandaatto. Yanna danchu garinni horoonsiˈrittoro kayinni, hagiirsiisannohe coye assatto yanna afiˈratto!

   Qullaawu Maxaafi biddishsha: “Ceeˈmaleessu mitto coye afiˈrate lowo geeshsha halchanno; ikkollana mittoreno [diafiˈranno]; jaate loosiˈrannohu halchinore baala afiˈranno.”—Lawishsha 13:4.

   Qara hedo: Yanna garunni horoonsiˈra kuttubbannota ikkitukkinni hasiˈroottore assateno yanna afiˈratto gede assitannohete.

•   Yanna garunni horoonsiˈra jawa ikkatto woyite kaaˈlitannohe dandooti. Isinni yannakki horoonsiˈratto gari loosokki hoogatto gede woy loossanni heeˈratto gede assahera dandaanno. Lawishshaho atera umikki dirijjite heedhuhero, duucha woyite barrisiˈre daanno loosaasinchi heeˈrahera hasiˈratto?

   Qullaawu Maxaafi biddishsha: “Shiimu coyira ammanamino manchi lowo coyira ammanamanno.”—Luqaasi 16:10.

   Qara hedo: Yannakki horoonsiˈratto gari ayimmakki daafira kulannori no.

 Hige yanna garunni horoonsiˈra shota diˈˈikkitino. Hanni tennera ataawe ikkannoha mito coye laˈno.

 Ataawe ikkannore #1: Jaalla

 “Jaallaˈya haˈne boohaarro yitannoe woyite, yanna nooekkiha ikkiro nafa sammi yee ledonsa haˈreemma. ‘Dayummaro rahe rahe loose guxxeemmana’ yee hedeemma. Mito woyite kayinni hedoommari diˈˈikkanno; hakko daafira qarrameemma woyiti no.”—Sintiya.

 Ataawe ikkannore #2: Hedo billaallitanno gede assannore

 “Televizhiine lowo geeshsha dogganno. Mite televizhiinete pirogiraamenna filmuwa laˈˈa agura qarra ikkitanno.”—Ayivii.

 “Taabileeteˈya horoonsiˈranni lowo yanna gudeemma. Horoonsiˈra agureemmahu kinchu goofiro callaati; tini aneneeto bushiisheemma gede assitannoe.”—Maari.

 Ataawe ikkannore #3: Teyo gaˈa yaa

 “Rosu mine uyinoonnieha mini loosonna loosa hasiissannoeha wole looso teyo gaˈa yaanni keeshshiishate rosichi nooe. Looso loose guda hasiissannoe yanna iillita geeshsha kaaˈlaari nookkire assanni yannaˈya guxxeemma; yanna konni garinni horoonsiˈra bushate.”—Beeti.

1.   Loosa hasiissannohe looso baalanka borreessi. Borreessattori giddo mitu mini giddo loosatto loosonna rosu mine uyinoonnihe looso ikkara dandaanno. Mitto mittonka looso mitte lamalara mageeshshi yanna giddo loosse gudattoro borreessiˈri.

    Qullaawu Maxaafi biddishsha: “Woyyanno coye baddine [affe].”—Filiphisiyusi Sokka 1:10.

2.   Gattinohe yanna giddo assa hasiˈrattore borreessi. Lawishshaho dagoomittete webisayite horoonsiˈratto yanna woy televizhiine laˈˈatto yanna borreessiˈra dandaatto. Hakkiinni borreessoottoha mitto mittonka coye assitanni mitte lamala giddo mageeshshi yanna sayisattoro borreessi.

    Qullaawu Maxaafi biddishsha: “Afidhini yanna baalatenni . . . hayyotenni heedhe.”—Qolasiyaasi Sokka 4:5.

3.   Soma fushshiˈri. Borreessiˈroottoha lamenka coye wirro lai. Roore hasiisanno coyira gari yanna gaaˈmootto? Boohaarattonna woleno hattoore assatto yanna ajisha hasiissannohe ikka?

    Kaaˈlitanno amaale: Barru barrunku loosattore borreessite amaxxi; hakkiinni mitto mittonka coye loosse guditto kiiro malaatisiˈri.

    Qullaawu Maxaafi biddishsha: “Jawaatu manchi hedo jirotenni xaadissanno.”—Lawishsha 21:5.

4.   Fushshiˈrootto mixo woy somi garinni loosi. Lowo geeshsha hasiisanno looso loosate yite mito koyishsha adha giwa hasiissannoheti egennantinote. Ikkirono mixokki garinni loosittoro, roore anga yanna gattannohe daafira hagiirsiisannohe coye assa dandaatto.

    Qullaawu Maxaafi biddishsha: “Jawaattine loosse ikkinnina, ceeˈmaleeyye ikkitinoonte.”—Roomu Sokka 12:11.

5.   Loosse kaittoro umikkira afansha woy baˈraaˈra uyi; kayinni hatto assate muddantooti. Taara yinanni wedellitte togo yitino: “Mito woyite borreessiˈroommari giddo lamere loose kaummaro, ‘15 daqiiqa televizhiine lae kae wirro loosiˈyara higeemma’ yee hedeemma. Hakkiinni kayi 15 daqiiqa, 30 daqiiqa, mitte saate ikkanna afummakki televizhiine laˈˈanni lame saate woˈma ofolleemma!”

    Malu maatiyya? Boohaarsha barru dilgokki gede assite laˈˈantenni, loosokki guxxittohu gedensaanni umikkira aatto baˈraaˈri gede assite hedi.

    Qullaawu Maxaafi biddishsha: ‘Mannaho daafure loosiˈrinohunni hagiidhate . . . kaˈaanni woliri kaaˈlannosiri dino.’—Rosiisaancho 2:24.