Wiili yinanni wedellichi togo yiino: “Qullaawa Maxaafa nabbambanni gara afa hoogittoro, ceeˈmishannore lawahera dandaanno.”

 Qullaawu Maxaafi niwaawe hagiirsiisannota assiˈrate kaaˈlannori maatiro afa hasiˈratto? Kuni birxichi tennera kaaˈlannohe.

•  Nabbawatto qummeeshshi xawe leellannohe gede assiˈri

•  Unte xiinxalli!

•  Darawokki yitinore

 Nabbawatto xagge giddora hedotenni gudisante ei. Aane noore assa dandaatto:

1.   Xiinxalla hasiˈrattota Qullaawu Maxaafi xagge doodhi. Mitte Qullaawu Maxaafi xagge woy Wongeelluwate giddonni mitto gafa doodha dandaatto; qoleno jw.org aana noote diraamu garinni qixxeessinoonnite Qullaawu Maxaafi niwaawe giddonni mitte doodha dandaatto.

2.   Doodhootto xagge nabbawi. Callikki woy jaallakkinna maatekki miilla ledo mitteenni huurokki naggi assite nabbawa dandaatto. Mittu manchi odeessaancho ikke nabbawanna wolootu kayinni xaggete giddo kulloonnihu wolu manni coyiˈrinore nabbawa dandiitanno.

3.   Aante noo hedo giddo mitte woy hakkiinni saˈino hedo harunsate woˈnaali:

   •   Nabbawoottota Qullaawu Maxaafi xagge misile kayisate woˈnaali. Woy Qullaawu Maxaafi giddo kulloonniri ikkino aante leellishshanno misile woy chaartete gedeere qixxeessi. Mitte mittente misile aana noori maa leellishannoro kulannoha misilete xawishsha borreessi.

   •   Mittu ammanamino manchire kultanno xagge nabbawatto woyite, hakkuyi manchi akattanna assinore, hattono afiˈrino atoote borreessi.

   •   Nabbawootto xagge odoote gede assite borreessi. Nabbawootto xagge addi addi garinni odeessi; qoleno xaggete giddo kulloonni mannanna insa daafira affinore woloota “qaalu xaˈmo xaˈmi.”

   •   Gara ikkinokkire doodhino manchi xagge nabbawatto woyite, hakku manchi ma assannoti gattinoro hedi. Lawishshaho, Pheexiroosi Yesuusa kaadinota kultanno xagge hedi. (Maarqoosi 14:66-72) Pheexiroosi hakkawoyite maa assannoti gattino?

   •   Nabbawoottori roore baxisannohe gede wolereno assa hasiˈrittoro, Qullaawu Maxaafi xagge xinta assidhe umikki diraama borreessiˈri. Hakko diraaminni maa ronsannirono xawisi.—Roomu Sokka 15:4.

 Qullaawu Maxaafi xagge giddo kulloonniha mitto mittonka coye hixamanyite xiinxallittoro, muxxe ayyaanaamitte jiro afiˈratto. Mito woyite isinni xaggete giddo noohu mittu woy lamu qaali calla nafa lowore kulannoha ikkara dandaanno.

 Lawishshaho, Maatewoosi 28:7 noo hedo Maarqoosi 16:7 ledo heewisiisi.

•    Maarqoosi, Yesuusi rosaanosira leellannota borreessi woyite “Pheexiroosira” yaannohano lede kulinohu mayiraati?

•  Eero: Maarqoosi hakkawoyite ikkinore illesinni dilaino; isira tenne mashalaqqe kulinosihu Pheexiroosi ikkikkinni digatino.

•  Ledde xiinxallittoro afiˈrattota muxxe jiro: Pheexiroosi Yesuusi isi ledo wirro xaadara hasiˈrinota afasi sheshifachishshusikki digattino yineemmohu mayiraati? (Maarqoosi 14:66-72) Yesuusi, Pheexiroosira addu jaala ikkinota leellishinohu hiittoonniiti? Ati Yesuusi faale haˈranna wolootaho addu jaala ikka dandaattohu hiittoonniiti?

 Qullaawu Maxaafi yaannori xawe leellannohe gede assiˈrattohanna unte xiinxallattoha ikkiro, Qullaawu Maxaafi niwaawe roore hagiirsiissannota ikkitannohe!