Maganu Huuccattonke Macciishshanno?
Maganu huuccattoˈya macciishsha ikka yite huluullante egennootto? Hatto ikkiro, huluullamattohu ate calla diˈˈikkootto. Batinyu manni qarrinsa daafira Magano huucciˈrinoha ikkirono, qarrinsa kayinni dihoˈlino. Hatto yaa kayinni Maganu huuccattonke dimacciishshanno yaateni? Deeˈni! Qullaawu Maxaafi garunni huucciˈnummoro Maganu huuccattonke macciishshannota kulanno. Hanni Qullaawu Maxaafi kulannore laˈno.
MAGANU MACCIISHSHANNO.
“Mannu baalu . . . atewa daanno; atino huuccattonsa macciishshatto.”—Faarso 65:2, 3.
Mitu manni huuccatto macciishshannohu noota ammanannokkiha ikkirono, huuccatto assiˈrannohu woyyimma afiˈrate yee calla ikkinota coyiˈranno. Huuccatto assiˈra hasiissannonkehu kayinni qarrinkenni woyyimma afiˈrate yine calla diˈˈikkino. Qullaawu Maxaafi togo yee jawaachishannonke: “Kaaliiqi woshshidhannosirira, . . . baalaho mule no. . . . raarensa macciishshe gatisannonsa.”—Faarso 145:18, 19.
Yihowa * soqqamaasinesi huuccidhanno huuccatto macciishshannota addaxxa dandiineemmo. Isi baxillunni togo yiino: “Hatte yannara woshshidhinannie; anewa higgine huuccidhinannie; anino macciishsheemmoˈne.”—Ermiyaasi 29:12.
MAGANU ISO HUUCCIˈNAMMORA HASIˈRANNO.
“Jaattine huuccidhe.”—Roomu Sokka 12:12.
Qullaawu Maxaafi, “Jaattine huuccidhe” hattono “Woˈmanka woyite . . . huuccidhe” yee jawaachishannonke. Konni daafira, Yihowa iso huucciˈnammora hasiˈranno.—Maatewoosi 26:41; Efesooni Sokka 6:18.
Yihowa iso huucciˈnammora hasiˈrannohu mayiraati? Hanni mitto lawishsha laˈno: Mittu shiimu qaaqqi annasi kaaˈlasira xaˈmiˈriro annu lowo geeshsha hagiidhanno. Annu qaaqqisira mayi hasiisannosironna maa hedannoro afinoha ikkirono, qaaqqu kaaˈlie yaanna macciishshasi qaaqqisi iso addaxxannotanna baxannosita afanno gede assitannosi. Hatteente gede, ninkeno Yihowa huucciˈneemmoha ikkiro, iso addaxxineemmotanna isiwa albinni roore shiqa hasiˈneemmota leellinsheemmo.—Lawishsha 15:8; Yaiqoobi 4:8.
MAGANU ATE DAAFIRA LOWO GEESHSHA HEDANNO.
“Kiˈnere malannohu isootina, qarrisannoˈnere baala isi aana tuqqe.”—1 Pheexiroosi 5:7.
Maganu baxannonkehuranna ninke daafira hedannohura, iso huucciˈnammora hasiˈranno. Isi qarrankenna yaaddonke seekke afino; hattono kaaˈlankera hasiˈranno.
Moote Daawiti, Maganu kaaˈlasira heeshshosi diro duucha hige huucciˈrino; hattono giddosita isira hasaaphino. (Faarso 23:1-6) Maganu iso ma garinni laino? Maganu Daawiti baxannosi; qoleno duucha hige huucciˈrino huuccatto macciishshinosi. (Soqqamaasinete Looso 13:22) Maganu ninkerano hedanno daafira huuccattonke macciishshanno.
“HUUCCATTOˈYA MACCIISHSHINOE DAAFIRA, KAALIIQA BAXEEMMOSI”
Tenne coyiˈrinohu Qullaawu Maxaafiha Faarsote maxaafa borreessituri giddo mittoho. Isi Maganu huuccattosi macciishshinota seekke afino; tenne afasi lowo geeshsha kaaˈlitinosi. Isi albinni roore Maganunniwa shiqino; hattono iillinosi qarranna dadille dandee saˈˈate jawaante afiˈrino.—Faarso 116:1-9.
Maganu huuccattonke macciishshannota addaxxinummoro, jaante huucciˈneemmo. Hanni aliyye Ispeenera heeˈrannohu Paatiro woˈnaalsha laˈno. Isi 19 diri beettosi makeenu danonni shiiˈrino. Paatiro lowo geeshsha dadillino daafira giddosita Maganoho kuˈlino; hattono kaaˈlasiranna sheshifachishasira wirro wirro hige huucciˈrino. Hakkiinni mayi ikkiyya? Isi togo yiino: “Yihowa ammanate roduuwiˈya widoonni anenna minaamaˈya kaaˈlenna sheshifachishe huuccattoˈyara dawaro qolinoe.”
Yihowa duucha woyite huuccattonkera dawaro qolannohu, baxxannonke jaallanke sheshifachishshannonkenna kaaˈlitannonke gede asseeti
Huuccatto beettosi reyotenni kayissinokkiha ikkirono, Paatironna maatesi duucha doogganni kaaˈlitinonsa. Minaamasi Maariya Karimeni togo yitino: “Huuccatto shesho afiˈreemma gede kaaˈlitinoe. Huuccatto assiˈreemma woyite keerenna geˈne afiˈreemma daafira, Yihowa giddoˈyata afinota huwatoomma.”
Qullaawu Maxaafinna addi addi woˈnaalshuwa Maganu huuccatto macciishshannota leellishshanno. Kayinni Maganu baalanta huuccatto macciishshanno yaa diˈˈikkino. Ikkina Maganu mite huuccatto macciishshe mite macciishshannokkihu mayiraati?
