Genèse 18:1-33
18 Na pekoni, Jéhovah+ asi na lo na popo ti akota keke ti Mamré,+ tongana lo yeke duti na yanga ti tente na midi, ngoi so lâ asu mingi.
2 Lo yô lê ti lo na nduzu na lo bâ akoli ota so ayeke luti ayo na lo kete.+ Na ngoi so lo bâ ala, lo londo na yanga ti tente ni, lo kpe loro ti mû devant ti ala, na lo kuku na sese na gbe ti ala.
3 Lo tene: “Jéhovah, tongana mbi nzere na lê ti mo, pardon, mo hon mbi wakua ti mo hongo pëpe.
4 Pardon, zia a ga na kete ngu a sukula na gere ti ala.+ Na pekoni, ala wu terê ti ala kete na gbe ti keke.
5 So ala si ge na ndo ti mbi wakua ti ala so, zia mbi ga na mbeni kete kobe, si ala te ala wara ngangu. Na pekoni, ala lingbi ti hon senge.” Tongaso, ala tene: “Nzoni. Sara tongana ti so mo tene.”
6 Tongaso, Abraham akpe hio na terê ti Sara na yâ ti tente na lo tene: “Mû mbeni ye* hio, mo haka pendere farine fani ota, mo më ni na mo sara mapa.”
7 Na pekoni, Abraham akpe lo gue na ndo so anyama ti lo ayeke dä, lo soro mbeni pendere kete koli-bagara so nyama ti lo awoko. Lo mû ni na mbeni zo ti kua ti lo, na hio lo leke kobe ni.
8 Na pekoni, lo mû beurre, lait nga na kete koli-bagara so lo leke ni awe, lo zia ni na gbe ti ala. Lo luti na terê ti ala na gbe ti keke ni na ngoi so ala yeke te ye.+
9 Ala hunda lo, ala tene: “Wali ti mo Sara ayeke na ndo wa?”+ Lo tene: “Lo la na yâ ti tente so!”
10 Tongaso mbeni oko na popo ti ala atene: “Ti tâ tënë ni, na ngu ti peko na oko ngoi ni so, mbi yeke kiri na ndo ti mo ge, na wali ti mo Sara ayeke dü ande molenge ti koli.”+ Andâ Sara ayeke mä lo na yanga ti tente ni so ayeke na peko ti koli ni.
11 Abraham na Sara aga mbakoro awe, ngu ti ala ahon mingi.+ Sara ahon ngu ti dungo ni awe. +
12 Tongaso, Sara ato nda ti he ngia na yâ ti bê ti lo kâ, lo tene: “So mbi woko kue awe, nga seigneur ti mbi aga mbakoro awe so, mbi yeke wara mara ti ngia tongaso?”+
13 Jéhovah atene na Abraham: “Ngbanga ti nyen Sara ahe ngia na lo tene: ‘Mbi so mbi ga mbakoro awe so, mbi yeke dü biani?’
14 Mbeni ye ti kara Jéhovah ayeke dä?+ Na ngu ti peko na oko ngoi ni so, mbi yeke kiri na ndo ti mo ge, na Sara ayeke dü ande molenge ti koli.”
15 Me Sara abere, lo tene: “Mbi he ngia pëpe!” ndali ti so mbeto asara lo. Me lo tene: “Ti tâ tënë ni, mo he ngia.”
16 Na ngoi so akoli so alondo ti hon nga ala bâ ndo na mbage ti Sodome,+ Abraham ague legeoko na ala ti zia ala na lege.
17 Jéhovah atene: “Mbi yeke honde na Abraham ye so mbi ye ti sara?+
18 Ti tâ tënë ni, Abraham ayeke ga ande kota mara nga mara ti ngangu, nga na lege ti lo a yeke iri tënë nzoni ande na ndö ti amara kue ti sese.*+
19 Mbi lë kpengba songo na lo ti tene lo mû yanga na amolenge ti lo nga na azo ti da ti lo na peko ti lo, si ala bata lege ti Jéhovah na sarango ye na lege ni nga mbilimbili,+ si mbi Jéhovah, mbi sara ye so mbi mû zendo ni na Abraham.”
20 Jéhovah atene: “Azo ayeke dema terê mingi ndali ti azo ti Sodome na Gomorrhe;+ nga siokpari ti ala ane mingi.+
21 Mbi yeke descend kâ ti bâ wala ala yeke sara ye tâ tongana ti so mbi mä dema ni so. Me tongana a yeke tongaso pëpe, mbi yeke hinga ande ni.”+
22 Akoli so azia ndo ni ti gue na Sodome; me ti Jéhovah,+ lo ngbâ na terê ti Abraham.
23 Tongaso, Abraham apusu nduru na lo, lo hunda lo, lo tene: “Tâ tënë mo yeke futi azo ti mbilimbili legeoko na azo ti sioni?+
24 Ka tongana azo ti mbilimbili ayeke 50 na yâ ti gbata ni, mo yeke futi ala na mo yeke pardonné gbata ni pëpe ndali ti azo ti mbilimbili 50 so?
25 Mo lingbi ti pensé lâ oko pëpe ti sara ye tongaso, ti fâ zo ti mbilimbili legeoko na zo ti sioni, si oko ye so asi na zo ti sioni asi nga na zo ti mbilimbili! + Mo lingbi ti pensé lâ oko pëpe ti sara ye tongaso! + Juge ti sese kue ayeke sara ye na lege ni ape?”+
26 Jéhovah atene: “Tongana mbi wara azo ti mbilimbili 50 na yâ ti Sodome, mbi yeke pardonné gbata ni kue ndali ti ala.”
27 Me Abraham atene: “Pardon, Jéhovah, mû lege na mbi ti ngbâ ti sara tënë na mo, atâa so mbi yeke fuku ti sese nga mburu ti wâ.
28 Ka tongana azo ti mbilimbili amanke 5 ti ga 50, mo yeke futi gbata ni kue ndali ti ala 5 so amanke so?” Lo tene: “Mbi yeke futi ni pëpe tongana mbi wara azo 45 dä.”+
29 Me lo kiri lo hunda Nzapa, lo tene: “Ka tongana ala 40 la ayeke dä?” Lo tene: “Mbi yeke futi ni pëpe ndali ti azo 40 so.”
30 Me Abraham angbâ ti tene: “Pardon, Jéhovah, sara ngonzo pëpe,+ me zia mbi ngbâ ti sara tënë: “Ka tongana ala 30 la ayeke dä?” Lo tene: “Mbi yeke futi ni pëpe tongana mbi wara azo 30 kâ.”
31 Me Abraham angbâ ti tene: “Pardon, Jéhovah, mû lege na mbi ti ngbâ ti sara tënë na mo: “Ka tongana ala 20 la ayeke dä?” Lo tene: “Mbi yeke futi ni pëpe ndali ti azo 20 so.”
32 Ti hunzi na ni, lo tene: “Pardon, Jéhovah, sara ngonzo pëpe, me zia mbi tene gï tanga ti tënë ti mbi: “Ka tongana gï ala bale-oko la ayeke dä?” Lo tene: “Mbi yeke futi ni pëpe ndali ti azo bale-oko so.”
33 Tongana Jéhovah ahunzi ti sara tënë na Abraham awe, lo hon ti lo,+ na Abraham akiri na ndo ti lo.
Akete tënë na terê ni
^ Wala “amara kue ti sese ayeke wara ande tënë nzoni ndali ti ala wani.”
