Bible ayeke mbeti so na lege ni Nzapa ayeke sara tënë na e azo kue. A lingbi e manda ni si e hinga biani zo so ayeke wani (Jean 17:3; 2 Timothée 3:16). Na yâ ti Bible, Jéhovah Nzapa afa ye so lo leke na bê ti lo ti sara ndali ti azo nga ndali ti sese so ala yeke na ndö ni.—Genèse 3:15; Apocalypse 21:3, 4.

Mbeni mbeti ti ga na ye ti nzoni na azo na yâ ti gigi ti ala ti lingbi na Bible ayeke dä ape. Bible amû maboko na e ti gi ti duti na asarango ye ti Jéhovah tongana ndoye, nzoni bê nga na bango mawa ti zo. Bible asara si azo ayeke na beku, nga a mû maboko na azo ti gbu ngangu même na yâ ti apasi so ayeke tâ ngangu mingi. A fa nda ti aye ti dunia so, so ayeke nde na ye so bê ti Nzapa aye; ye so bê ti Nzapa aye ayeke ti lo nzoni mingi.—Psaume 119:105; aHébreu 4:12; 1 Jean 2:15-17.

A sû Bible ândö giriri na yanga ti Hébreu, Araméen nga na Grec. A kiri peko ni kue wala gï mbeni mbage ni, na ayanga ti kodro 3 000 tongaso. Bible la a kiri peko ni na ayanga ti kodro mingi nga gï ni la ayeke mbeti so azo mingi ayeke na ni. A yeke na lege ni ti tene a duti tongaso. Mbeni prophétie ti Bible atene: “A yeke fa ande nzoni tënë ti Royaume [so ayeke kota tënë ti yâ ti Bible] na ndö ti sese kue so azo ayeke dä tongana mbeni tënë ti témoin ndali ti amara kue. Na pekoni, nda ni ayeke ga.”—Matthieu 24:14.

Tënë ti yâ ti Bible ayeke kota mingi na lê ti e. Ni la, ye so e ye ayeke ti sigi na mbeni bible so atënë ni ague oko na ati so ayeke na yâ ti angbene mbeti ni so a sû ni giriri, mbeni bible so ayeke polele nga so dikongo ni akpengba pëpe. Ambage so atene “Amama-ndia ti kua ti kiringo peko ti Bible,” “Ambeni ye so ayeke na yâ ti bible so”, “Bible ague tongana nyen ngbii si asi na e laso?”, a fa nga ambeni nzene nzene tënë na ndö ti bible so.

Azo so aye Jéhovah Nzapa nga ayeke voro lo aye ti wara mbeni Mbeti ti Nzapa so atënë ni ayeke na lege ni nga so zo alingbi ti mä yâ ni (1 Timothée 2:4). Ndani la si e sigi na bible so na yanga ti Sango ti gue oko na ye so e leke na bê ti e ti sara, so ti tene ti kiri na peko ti Mbeti ti Nzapa ti fini dunia na ayanga ti kodro mingi. Ye so e yeke ku nga e sambela ndali ni a yeke ti tene mo so mo yeke diko bible so, mo wara ye ti nzoni na lege ti Mbeti ti Nzapa so na ngoi so mo yeke sara ngangu ti ‘gi Nzapa, na mo wara lo biani’.—Kusala 17:27.