Salmos 77:1-20
Takiqkunata pusariqpaq. Jedutún* nisqaman jina. Asafpa takin.+
77 Diospa yanapaynintan mañakusaq, paytan wajakusaq,Diostan tukuy kallpaywan wajakusaq, payqa uyarimuwanqan.+
2 Llaki p’unchaypin Jehová Diosta maskhani.+
Tutakunapin mana sayk’uspa payman makiyta jaywarini.
Manan imapas sonqoytaqa tiyaykachinchu.
3 Diosmanta sapa yuyarispan llakikuni,+llakiq ñit’isqanmi kashani, manañan kallpaypas kanñachu.+ (Séla).
4 Manan ñawiy ch’illmiykunallantapas munankichu,may llakisqan kashani, manan ni rimaytapas atinichu.
5 Ñaupa tiempokunapin yuyayniyqa kashan,+unay watakuna imachus pasasqanpin piensashani.
6 Tutakunapin takisqay takita yuyarini,+sonqoypin yuyaymanani,+allin-allintan chaykunapi piensani.
7 ¿Wiñaypaqchu Jehová Dios qonqapuwasun?+
¿Manañachu jayk’aqpas khuyapayakuyninta rikuchiwasun?+
8 ¿Wiñaypaqchu mana tukukuq munakuyninpas* chinkapunqa?
¿Manañachu jayk’aqpas promesankuna junt’akunqa?
9 ¿Qonqapunchu Dios khuyapayakuq kayninta?+
¿K’araq phiñakuyninchu llakipayakuq kayninta p’ampapun? (Séla).
10 Mana sayk’uspan nishani: “Kaymi noqataqa llakichishawan:+
Ancha jatun Diosqa manañan ñaupaq jinañachu rikupuwanchis”, nispa.
11 Jehová* Diospa imakunachus ruwasqantan yuyarisaq;ñaupa tiempokunapi admiranapaq ruwasqaykikunatan yuyarisaq.
12 Llapa ima ruwasqaykipin allinta piensasaq,imaynatachus imatapas ruwanki chaypin yuyaymanasaq.+
13 Diosnilláy, ñanniykikunaqa ch’uya ñankunan.
¿Ima diosmi qan jina jatun Dios kanman?+
14 Qanllan cheqaq Diosqa kanki,qanllan ancha jatun ruwaykunata ruwaqqa kanki.+
Llapa llaqtakunamanmi kallpaykita rikuchirqanki.+
15 Atiyniykiwanmi llaqtaykita librarqanki,+Jacobpa churinkunata, Josepa churinkunatawanmi librarqanki. (Séla).
16 Diosnilláy, unukunan qanta rikurqasunki,qanta rikuspan unukunaqa mancharikurqanku;+chinkay-chinkay unukunan manchakuymanta khatatatarqanku.*
17 Phuyukunan unuta jich’aykamurqan.
Yana phuyu sonqokunapin rayo t’ojarqan,flechaykikunapas kayman jaqaymanmi phawarirqan.+
18 Rayo jina t’ojasqaykiqa+ carretakunaq ruedan jinan raqhaqaqarqan.
Llifllikiypas llapa kay pachatan k’ancharimurqan;+kay pachataq manchakuymanta chhafchirikurqan.+
19 Qanqa lamar-qochaq chaupintan pasamurqanki,+chakiykiqa askha unukunaq chaupintan chimpamurqan;ichaqa manan maymanchus sarusqaykiqa reparakurqanchu.
20 Llaqtaykitaqa ovejakunata jinan pusamurqanki,+Moiseswan Aaronpiwanmi paykunata pusachimurqanki.+
Uraypi willakuykuna
^ Qhaway Explicasqa simikuna nisqapi “Mana tukukuq munakuy” nisqata.
^ Hebreo rimaypiqa “Jah” ninmi. Jah nisqaqa pisi letrakunallapin “Jehová” ninanta nishan.
^ Khatatataytaqa “kharkatiy” nillankutaqmi.
