Salmus 19:1-14
Cantaqkunata dirigeqpaq. David qellqanqan salmus.
19 Teyta Dios poderösu kanqantaqa, ciëluchö llapan këkaqkunam musyatsikuyan,+y altuchö kaqkunam musyatsikuyan Teyta Dios llapanta kamanqanta.+
2 Tsëkuna musyatsikuyanqanqa, mana ushakaq yakunömi cada junaq këkan,y cada paqasmi Teyta Dios yachaq kanqanta musyatsikuyan.
3 Manam parlayantsuni manam voznimpis wiyakantsu,
4 peru entëru patsachömi willakuyashqa,patsapa juknin kuchumpita juknin kuchunyaqmi musyatsikuyashqa.+
Teyta Diosmi, intipaq o rupaypaq ciëluchö carpa* wayin rurapushqa.
5 Tsëmi intiqa o rupayqa shumaq cuartumpita noviu yarqamoqnö chipapar-raq yarqamun,kallpasapa nuna imëpis purinqan nänipa kushishqa cörreqnömi kushishqa yarqamun.
6 Patsapa juknin kuchumpa yarqamurmi, juknin kuchumpa jeqarkun,+y achachënintaqa manam imapis tsapantsu.
7 Teyta Jehoväpa leyninqa llapampis allilla karmi+ kallpayoqta tikratsimantsik.+
Teyta Jehovä mandakunqankunaqa confiakuypaq karmi+ mana yachaqkunata yachaqta tikratsin.+
8 Teyta Jehoväpa leyninkunaqa llapampis alli karmi shonquntsikta kushitsin.+
Teyta Jehoväpa mandamientunkunaqa limpiu karmi, mana musyaqtapis yachaqta tikratsimantsik.+
9 Llapan shonquntsikwan Teyta Jehoväta respetëqa*+ sagrädum, tsënö respetaq nunakunaqa imëpis respetëkäyanqallam.
Teyta Jehoväpa leyninkunaqa* imëpis allillam.+
10 Tsëkunaqa örupita mas shumaqmi,mëtsika alli örupitapis mas munapëpaqmi.+
Abëjapa mielnimpitapis masmi mishkin,+ panalpita shutuykaq mielpitapis masmi mishkin.
11 Teyta Dios, tsë leykunawanmi sirwishoqnikita musyatsinki mana allita mana ruranampaq,+y cäsukoqkunaqa, mëtsika bendiciontam chaskiyan.+
12 Peru jutsata* rurëkanqantaqa, ¿piraq cuentata qokunman?+
Cuentata mana qokur jutsata ruranqäpita perdonëkallämë.
13 Teyta Dios, yachaq tukur imatapis ruraptïqa michëkallämë.+
Mana alli munënïkuna vencimänanta ama dejëkullëtsu.+
Qam yanapamaptikim munanqëkinö limpiu shonquyoqna kashaq,+y mananam imëka mana allikunata rurar kashaqnatsu.
14 Teyta Jehovä, parlanqäkuna y shonqüllachö pensanqäkuna munanqëkinö kallätsun.+
Noqapaqqa, tsapämaq qaqa cuentam kanki,+ y qammi Salvamaqnï* kanki.+
Nötakuna
^ Kënöpis niyanmi: toldu.
^ Hebreu idiömachöqa “mantsëqa” ninmi. Rikäri “Bibliachö palabrakunata entiendinapaq” neqta.
^ O “pitapis juzgar castiganqanqa”.
^ Kënöpis niyanmi: pecäduta.
^ O “Rantimaqnï”.