LOKE HÓBEN SA PUNTRA

Nos Tin Ku Kibra ku Otro? (Parti 1)

TOKA NA

Tin bes esei ta e mihó opshon. Wak kiko a pasa ku Jill. E ta bisa: “Promé, mi tabata gusta ora mi frei tabata puntra mi tur ora bai unda mi tabata, kiko mi tabata hasiendo i ku ken mi tabata. Pero a yega asina leu ku mi no por a pasa tempu ku niun otro hende ku no ta é. E tabata asta bira yalurs ora mi pasa tempu ku mi famia, foral mi tata. Ora mi a kibra kuné, mi a sinti ku un peso grandi a kita for di riba mi!”

Sarah tabatin e mesun eksperensia. El a kuminsá nota ku John, e mucha hòmber ku e tabata ‘date’, tabata sarkástiko, eksigente i tabata trata hende masha malu. Sarah ta konta: “Un biaha, el a yega mi kas tres ora lat! Ora ku mi mama a habri porta, e no a ni sikiera kumindá. El a djis bisa: ‘Ban, nos ta lat.’ E no a bisa, ‘Mi ta lat’. El a bisa: ‘Nos ta lat.’ E mester a pidi despensa òf splika dikon el a yega lat. Anto mas ku tur kos, e mester a mustra mi mama rèspèt!”

Si ún biaha un persona hasi algu ku bo no gusta esei no nesesariamente ta nifiká ku boso mester kibra ku otro. (Salmo 130:3) Pero ora ku Sarah a realisá ku John tabatin kustumber di tin mal manera, el a disidí di kibra kuné.

Kiko si meskos ku Jill i Sarah bo ripará ku esun ku bo ta ‘date’ lo no ta un bon kasá pa bo? Por fabor, no sera bo wowo pa e realidat! Aunke ta difísil pa aseptá, kisas ta mihó pa stòp e relashon. Proverbionan 22:3 ta bisa: “Un hende prudente ta mira maldat i ta skonde.” (Beibel Santu)

Ta bèrdat ku por ta difísil pa stòp un relashon. Pero kòrda ku matrimonio ta un union permanente i ta mihó bo sufri un poko awor ku sufri pa restu di bo bida.