Hopi studiante ta haña lès den un “klas” diferente awor—nan kas. Si esei ta bo kaso, kon bo por saka mayor probecho for di esei? Ata algun sugerensia. a

•  Sinku tep ku por yuda bo

•  Loke otro hóben ta bisa

•   Traha un Skema. Purba di mantené un roster fiho, manera lo bo tabatin na skol. Plania tempu spesífiko pa hasi tarea di skol, pa hasi trabou i otro tarea importante. Si ta nesesario, bo por adaptá bo skema.

   Beibel ta bisa: “Ma laga tur kos tuma lugá desentemente i na un manera ordená.”—1 Korintionan 14:40.

   “Hasi manera ta na skol bo ta. Bo tin ku kaba ku sierto tarea den un sierto tempu stipulá.”—Katie.

   Pensa riba esaki: Dikon ta bon pa bo traha un skema i pon’é un kaminda ku bo por wak e?

•   Kultivá disiplina propio. Segun ku bo ta krese lo bo ripará ku pa bo ta un persona madurá tin biaha bo mester hasi sierto kos—asta ora bo no tin gana. No posponé esei!

   Beibel ta bisa: “Sea ferviente i no floho.”—Romanonan 12:11, nota.

   “E desafio di mas grandi ta disipliná bo mes. Ta fásil pa bini ku èksküs i bisa ‘mi ta traha mi hùiswèrk despues.’ Despues bo ta keda sin hasié i ta kai atras ku bo lès.”—Alexandra.

   Pensa riba esaki: Kon hasiendo bo hùiswèrk na e mes lugá i na e mes orario tur dia por yuda bo kultivá disiplina propio?

•   Buska un bon lugá pa bo studia. Pone tur loke bo mester banda di bo. E lugá kaminda bo ta studia mester ta konfortabel, pero no demasiado kómodo. Bo mester por traha sin kabishá! Si na bo kas no tin un área spesífiko ku bo por usa pa studia, kisas bo por usa e kushina òf kualke otro kamber den kas.

   Beibel ta bisa: “E plannan di hende balente siguramente ta kondusí na abundansia.”—Proverbionan 21:5.

   “Pone wega di basketbòl i e weganan di vidio un banda, pone bo telefòn na silensio, i warda bo guitara den su estuche. Un ambiente sin distraishon ta masha importante.”—Elizabeth.

   Pensa riba esaki: Ki kambio bo por hasi na e lugá ku bo ta studia pa bo por konsentrá mihó?

•   Siña konsentrá. Konsentrá riba un tópiko en bes di hasi hopi kos pareu. Ta fásil pa bo hasi fout, si bo purba di hasi hopi kos pareu, i esei por tarda bo di kaba bo tareanan.

   Beibel ta bisa: “[Usa] boso tempu di e mihó manera.”—Efesionan 5:16.

   “Ora mi tin mi telefòn banda di mi, ta difísil pa mi konsentrá. Mi a pèrdè hopi tempu hasiendo kos di ménos importansia.”—Olivia.

   Pensa riba esaki: Kon bo por oumentá e kantidat di tempu ku bo ta usa pa konsentrá riba un tópiko?

•   Tuma pousa. Bai kana un ratu, kore baiskel òf hasi ehersisio. Un hòbi tambe por ta refreskante. “Pero, kaba bo tarea promé,” e buki School Power ta bisa. E buki ta sigui bisa: “Lo bo disfrutá di bo tempu liber mas si bo kaba di hasi tur loke bo mester a hasi.”

   Beibel ta bisa: “Un man yen di sosiegu ta mihó ku dos moketa yen di trabou i korementu tras di bientu.”—Eklesiástes 4:6.

   “Bo por siña toka un instrumènt òf bai un lès di arte na skol. Awor ku mi no por hasi e kosnan ei mas, mi a ripará kuantu mi tabata gusta hasi nan. Ta bon pa bo tin un hòbi pa yena bo tempu liber di skol.”—Taylor.

   Pensa riba esaki: Ki ta algun kos ku bo por hasi den bo pousa ku por yuda bo sigui ku bo hùiswèrk ku un mente relahá?