Bo a haña un persona ku por ta un bon kasá? Si ta asina, kon bo por sa si e persona ei ta pas ku bo?

 Ta importante pa bo wak e persona no di pafó so, sino di paden tambe. Pasobra por resultá ku e mucha muhé di mas bunita kisas no ta konfiabel òf e mucha hòmber di mas popular no ta dje desente ei. Bo ke un hende ku bo ta sinti bo kómodo kuné—un hende ku di bèrdat ta pas ku bo personalidat i ku tin mesun metanan ku bo.—Génesis 2:18; Mateo 19:4-6.

 Wak e persona ku un mente habrí. Pero, tene kuidou! Bo por ta inkliná na mira solamente loke bo ke mira. Pues, tuma bo tempu. Purba di haña sa kon e persona ta di bèrdat.

 Hopi hende ku ta ‘date’ no ta wak mas aleu. Na lugá di esei, nan ta wak solamente e kosnan ku nan tin en komun: “Nos ta gusta e mesun tipo di muzik.” “Nos ta gusta hasi e mesun kosnan.” “Nos ta di akuerdo ku otro den tur kos!” Pero, bo tin ku wak mas aleu ku djis e kosnan superfisial ei. Ta importante pa bo konosé ‘e hende ku e ta di paden.’ (1 Pedro 3:4, Efesionan 3:16) En bes di konsentrá riba e kosnan ku boso ta di akuerdo ku otro kuné, ta mihó bo wak kiko ta pasa ora boso no ta di akuerdo ku otro riba algu.

 Wak e siguiente ehèmpelnan:

•   Kon e persona akí ta reakshoná ora e tin un desakuerdo ku un otro hende? E ta insistí riba su opinion, òf kisas asta ta haña un “atake di rabia” òf papia “kos ofensivo” ku e hende ei? (Galationan 5:19, 20; Kolosensenan 3:8) Òf e persona akí ta rasonabel, dispuesto pa sede pa asina mantené pas ora ta trata di preferensia personal?—Santiago 3:17.

•   E persona ta yalurs, gusta manipulá hende òf ke bo pa e so? E ta eksigí pa sa kiko bo ta hasi na tur momento? Nicole a bisa: “Mi a yega di tende di parehanan ku ta pleita pasobra un di nan no por wanta ku e otro no ta bisa unda e ta òf kiko e ta hasi na kada momento. Mi no ta kere ku esaki ta un bon señal.”—1 Korintionan 13:4.

•   Kiko otro hende ta pensa di e persona? Lo ta bon pa bo papia ku otro hende ku konos’é pa basta tempu kaba, manera personanan maduro di e kongregashon. Asina bo por sa si nan ta “papia bon” di dje.—Echonan 16:1, 2.