Si bo ta usa Internet, bo por ta sigur ku tardi òf trempan lo bo haña bo ku kualke tipo di pornografia. Haley di 17 aña a bisa: “Bo no tin nodi di busk’é mas. E mes ta buska bo.”

 Pornografia por ta un tentashon pa asta esnan ku di bèrdat ke evit’é. Greg di 18 aña a bisa: “Mi a pensa ku nunka lo mi a wak pornografia, pero m’a hasié. Nunka bo no por konfia bo mes.”

 Awendia ta mas fásil ku nunka pa hende haña akseso na pornografia. I sexting ta pone ku awor hopi hóben ta produsí i distribuí nan mes pornografia.

 E punto ta: Awor ta mas difísil pa evitá pornografia ku tempu bo mayornan i welanan tabatin bo edat. E pregunta ta: Ta posibel pa abo rechasá pornografia?—Salmo 97:10.

 E kontesta ta sí, pero solamente si di bèrdat bo ke esei. Pero promé, bo mester ta konvensí ku pornografia ta algu malu. Laga nos wak algun mito i realidat tokante pornografia.

 Mito: Pornografia no ta hasi bo daño.

 E realidat ta ku pornografia ta hasi mesun daño na bo mente ku loke humamentu ta hasi ku bo pulmonnan. E ta kontaminá bo. E ta rebahá algu ku Dios a krea ku e intenshon pa uni dos hende ku tin un laso fuerte i duradero ku otro. (Génesis 2:24) Ku tempu, bo no tin kunes mas ku loke ta bon òf malu. Por ehèmpel, ekspertonan ta bisa ku mayoria di hende hòmber ku ta wak pornografia ta haña ku violensia kontra hende muhé no ta asina malu.

  Beibel ta papia di algun hende ku “a pèrdè tur sentido moral.” (Efesionan 4:19) Nan a permití nan konsenshi bira sin heful te na e punto ku nan no ta sinti duele mas ora nan hasi algu malu.

 Mito: Pornografia ta siña bo tokante sèks.

 E realidat ta ku pornografia ta hasi bo golos. E ta pone bo mira hende komo un simpel opheto pa satisfasé bo deseonan seksual. For di un investigashon a sali na kla ku esnan ku tin kustumber di wak pornografia por sinti ku nan no ta seksualmente satisfecho despues ku nan kasa.

  Beibel ta bisa kristiannan ku nan mester rechasá kompletamente tur loke tin di haber ku “fornikashon, impuresa, pashon, mal deseo i golosidat,” esta, tur loke ta hiba na wakmentu di pornografia.—Kolosensenan 3:5.

 Mito: Hende ku no ta wak pornografia no tin un mente habrí.

 E realidat ta ku hende ku ta rechasá pornografia tin un punto di bista elevá tokante sèks. Nan ta mir’é komo un regalo di Dios ku ta hasi e laso entre un hòmber i un muhé kasá mas fuerte. Esnan ku tin e punto di bista ei por disfrutá mas di relashon seksual despues ku nan kasa.

  Beibel ta papia hopi habrí tokante sèks. Por ehèmpel, e ta bisa esposonan: “Alegrá bo den e esposa di bo hubentut. . . . Sea semper enkantá ku su amor.”—Proverbionan 5:18, 19, Beibel Santu.

 Kiko si bo ta sinti ku e tentashon pa wak pornografia ta muchu fuerte pa resistí? E blachi di tarea “Kon Mi Por Rechasá Pornografia?” por yuda bo.

 Sea sigur ku bo por resistí e tentashon pa wak pornografia. I si bo tin e kustumber di wak pornografia, bo por stòp. Ta bale la pena pa purba.

 Tuma e ehèmpel di Calvin, kende a atmití ku el a kuminsá wak pornografia ku mas o ménos 13 aña. Calvin a bisa: “Mi tabata sa ku esei ta malu, pero mi no por a dominá mi mes i keda sin wak. I despues ku mi a wak, mi a sinti mi hopi malu. Ku tempu, mi tata a bin haña sa, i pa ta sinsero, mi a sinti un alivio! Por fin mi por a haña e yudansa ku mi tabatin mester.”

 Calvin a siña rechasá pornografia. El a bisa: “Wak pornografia ta un fout grandi ku mi a hasi i te awe ainda mi ta paga pa esei pasobra e imágennan no ta sali for di mi mente. I tin biaha, ainda mi tin e tentashon pa wak kos ku no ta bon. Pero despues mi ta pensa kon felis i limpi mi futuro lo ta ora mi hasi e kosnan na e manera ku Yehova ke.”