Ӕз райгуырдтӕн горӕт Секешфехервары. Уыцы горӕтыл цӕуы иу мин азӕй фылдӕр ӕмӕ йын ис хъӕздыг истори. Хъуыды ма кӕнын, Дыккаг дунеон хӕсты фӕстӕ горӕт куыд тынг пырх уыд, уый.

Гыццылӕй мӕ хъомыл кодтой мӕ мадыфыд ӕмӕ мӕ мадымад. Ныр дӕр ма сӕ арӕх ӕрымысын, уӕлдайдӕр та мӕ мадымад Элизабеты. Уый мын баххуыс кодта, цӕмӕй Хуыцауыл баууӕндыдаин. Ӕртӕ азы мыл куы сӕххӕст, уӕдӕй фӕстӕмӕ-иу алы алы изӕр дӕр иумӕ куывтам, дзырдтам-иу, Хицауы куывд кӕнӕ Нӕ Фыд кӕй хонынц, уыцы куывд. Фӕлӕ йын йӕ хъуыды бамбӕрстон, 30 азы мыл куы цыд, ӕрмӕстдӕр уӕд.

Мӕ ныййарджытӕ бирӕ куыстой, цӕмӕй ӕхца ӕрӕмбырд кодтаиккой ӕмӕ хӕдзар балхӕдтаиккой. Уымӕ гӕсгӕ цардтӕн мӕ мадыфыд ӕмӕ мӕ мадымадмӕ. Фӕлӕ-иу алы дыууӕ къуыри дӕр сабаты ӕнӕхъӕн бинонтӕй иумӕ ӕрӕмбырд стӕм. Уыцы рӕстӕг-иу мӕхицӕй амондджындӕр никӕй хуыдтон.

1958 азы мӕ ныййарджыты бӕллиц сӕххӕст: хӕдзар балхӕдтой ӕмӕ не ’ртӕ дӕр уым ӕрцардыстӕм. Мӕ цинӕн кӕрон нӕ уыд – кӕдӕй-уӕдӕй цардтӕн мӕ ныййарджытимӕ! Фӕлӕ мӕ цин бирӕ нӕ ахаста – ӕрдӕгазы фӕстӕ мӕ фыд ракӕй амард.

Ӕз мӕхимӕ ныхъхъуыстон. Хъуыды-ма кӕнын, Хуыцаумӕ куыд куывтон: «Мӕ Хуыцау, лӕгъстӕ дын куы кодтон, цӕмӕй мӕ фыд удӕгасӕй баззадаид! Ӕнӕ уымӕй куыд цӕрон? Цӕуылнӕ мӕ фехъуыстай?». Тынг мӕ фӕндыд базонын, мӕ фыд ныр кӕм ис: уӕларвмӕ ацыд ӕви ӕппындӕр никуыуал нал ис? Фыд кӕмӕн уыд, уыцы сывӕллӕттӕм хӕлӕгӕй мардтӕн.

Бирӕ азты дӕргъы искуы иу хатт йеддӕмӕ алы бон дӕр цыдтӕн мӕ фыды уӕлмӕрдмӕ. Йӕ цырты раз-иу мӕ зонгуытыл ӕрлӕууыдтӕн ӕмӕ-иу куывтон: «О Хуыцау, бамбарын мын кӕн, мӕ фыд ныр кӕм ис, уый». Куывтон ма, цӕмӕй мын баххуыс кодтаид, ӕмӕ, адӕймаг цӕмӕн цӕры, уый бамбӕрстаин.

13 азы мыл куы цыд, уӕд мӕ бафӕндыд немыцаг ӕвзаг сахуыр кӕнын. Афтӕ мӕм каст, ӕмӕ хъӕздыг немыцаг литературӕйы мӕ фарстатӕн дзуапп ссардзынӕн. 1967 азы ахуыр кӕнынмӕ ацыдтӕн горӕт Йенӕмӕ (уӕды рӕстӕг хауди Скӕсӕн Германимӕ). Немыцаг философты чингуытӕ, уӕлдайдӕр та, адӕймаг цӕмӕн цӕры, уый тыххӕй фыст кӕм уыд, уыцы чингуытӕ, зыд каст кодтон. Кӕд дзы мӕ зӕрдӕмӕ цыдӕртӕ фӕцыди,  уӕддӕр иу чиныджы дӕр не ссардтон, цы мӕ хъуыди, уый. Ӕмӕ дарддӕр Хуыцаумӕ куывтон, цӕмӕй мын баххуыс кодтаид.

1970 азы ӕрыздӕхтӕн Венгримӕ. Уым базонгӕ дӕн, фӕстӕдӕр мӕ цард кӕимӕ баиу кодтон, уыцы чызгимӕ – Розӕимӕ. Уыцы рӕстӕг Венгри уыд социалистон бӕстӕ. Розӕимӕ нӕ цард куы баиу кодтам, уымӕй гыццыл фӕстӕдӕр Австримӕ цӕрынмӕ ацыдыстӕм. Фӕлӕ нӕ нысан уыд Сиднейы ӕрцӕрын (Австрали), уым цард мӕ мадыфсымӕр.

Австрийы куыст тагъд ссардтон. Иухатт мын ме ’мкусджытӕй иу загъта, Библийы дзуапп ме ’ппӕт фарстатӕн дӕр кӕй ис. Уый мын радта, Библи чи ӕмбарын кӕны, дыууӕ ахӕм чиныджы. Уайтагъд сӕ бакастӕн ӕмӕ мӕ бафӕндыд фылдӕр базонын. Уымӕ гӕсгӕ ныффыстон Йегъовӕйы Ӕвдисӕнтӕм, мыхуыры сӕ чи рауагъта, уыдонмӕ, цӕмӕй мын ноджыдӕр литературӕ ӕрӕрвыстаиккой.

Нӕ чындзӕхсӕвыл иу аз цы бон сӕххӕст, растдӕр нӕм уыцы бон ӕрбацыд иу ӕрыгон австриаг Йегъовӕйы Ӕвдисӕн. Курдиат цы литературӕйы тыххӕй арвыстон, уый мын ӕрбахаста ӕмӕ мӕ бафарста, Библи ахуыр кӕнын дӕ нӕ фӕнды, зӕгъгӕ. Ӕз сразы дӕн. Бирӕ фарстатӕ мӕм кӕй уыд, уымӕ гӕсгӕ ахуыр кодтам къуыри дыууӕ хатты, ӕмӕ-иу нӕ ныхас алы хатт дӕр ахаста цыппар сахаты бӕрц!

Йегъовӕйы Ӕвдисӕнты фӕрцы-иу Библийӕ цы базыдтон, уый мӕм тынг диссаг каст. Мӕхимӕ уыд Библи венгриаг ӕвзагыл, ӕмӕ мын Хуыцауы ном уым куы равдыстой, уӕд мӕ уырнгӕ дӕр нӕ кодта. Аргъуанмӕ 27 азы фӕцыдтӕн ӕмӕ дзы Хуыцауы ном иу хатт дӕр нӕ фехъуыстон. Мӕ зӕрдӕмӕ тынг фӕцыдысты, Библийы мӕ фарстатӕн цы бӕлвырд ӕмӕ ӕнцонӕмбарӕн дзуаппытӕ уыд, уыдон. Зӕгъӕм, базыдтон, адӕймаг фынӕйӕ куыд ницы фембары, афтӕ мӕрдтӕ дӕр кӕй ницыуал фембарынц (Екклесиаст 9:5, 10; Иоанны 11:11–15). Базыдтон ма, Хуыцау зӕрдӕ кӕй ӕвӕры, мӕлӕт кӕм нал уыдзӕн, ахӕм ног дунейӕ (Раргомад 21:3, 4). Ныфс мӕ ис, мӕ фыды кӕй фендзынӕн, уымӕн ӕмӕ ног дунейы мӕрдтӕ «райгас уыдзысты» (Хъуыддӕгтӕ 24:15).

Розӕ дӕр Библи зӕрдиагӕй ахуыр кӕнын райдыдта. Нӕ уырнындзинад тагъд сфидар ӕмӕ, Библи цы публикацимӕ гӕсгӕ ахуыр кодтам, уый фестӕм дыууӕ мӕймӕ! Ӕмбырдтӕм цыдыстӕм Паддзахады залмӕ ӕмӕ иу фембӕлд дӕр нӕ цух кодтам. Нӕ зӕрдӕмӕ тынг фӕцыд, Йегъовӕйы Ӕвдисӕнтӕ кӕрӕдзи кӕй уарзынц, се ’хсӕн иудзинад кӕй ис ӕмӕ кӕрӕдзийы фарсмӕ ӕрбалӕууынмӕ алы хатт дӕр цӕттӕ кӕй сты (Иоанны 13:34, 35).

1976 азы нын Розӕимӕ бар радтой, цӕмӕй Австралимӕ ацыдаиккам. Уым уайтагъд ссардтам Йегъовӕйы Ӕвдисӕнты. Уыдон ныл афтӕ тынг бацин кодтой, ӕмӕ нӕм афтӕ фӕкаст, цыма нӕ бинонты ’хсӕнмӕ бахаудыстӕм. 1978 азы нӕхӕдӕг дӕр Йегъовӕйы Ӕвдисӕнтӕ систӕм.

Уыйбӕрц рӕстӕг мӕ цы фарстатӕ тыхсын кодтой, уыдонӕн кӕдӕй-уӕдӕй дзуапп ссардтон. Йегъовӕ Хуыцаумӕ баввахс дӕн, ӕмӕ мын фӕзынд, зӕгъӕн дӕр кӕмӕн нӕй, ахӕм хорз Фыд (Иаковы 4:8). Стӕй ма мын фидар ныфс фӕзынд, тагъд ног дунейы мӕ зӕххон фыды ногӕй кӕй фендзынӕн (Иоанны 5:28, 29).

1989 азы Розӕимӕ сфӕнд кодтам фӕстӕмӕ Венгримӕ ацӕуын, цӕмӕй, цӕуыл ӕууӕндыдыстӕм, уый тыххӕй радзырдтаиккам нӕ хиуӕттӕн, не ’мбӕлттӕн, стӕй ӕндӕр адӕмӕн дӕр. Махӕн уыд фадат цалдӕр сӕдӕ адӕймагимӕ Библи ахуыр кӕнынӕн ӕмӕ уый нӕхицӕн стыр кадыл нымайӕм. 70 адӕймагӕй дзы фылдӕр райдыдтой Йегъовӕйӕн лӕггад кӕнын, уыдонӕй иу уыд мӕ мад.

17 азы дӕргъы куывтон, цӕмӕй мӕ фарстатӕн дзуаппытӕ ссардтаин. Уымӕй 39 азы рацыд, ӕмӕ ма абон дӕр кувын. Фӕлӕ абон кувын афтӕ: «Бузныг дын, мӕ зынаргъ уӕларвон Фыд, гыццыл лӕппуйы куывдтытӕ кӕй фехъуыстай, уый тыххӕй».