Ӕз райгуырдтӕн Саксонийы иу хъӕуы, уӕд хауди Германийы Демократон Республикӕмӕ (ГДР). Нӕ бинонтӕ уыдысты ӕнгом ӕмӕ кӕрӕдзи уарзтой, стӕй мӕ афтӕ хъомыл кодтой, цӕмӕй ӕгъдауджын уыдаин. ГДР уыди коммунистон бӕстӕ, ӕмӕ уый тыххӕй Саксонийы бирӕтӕ динмӕ куыдфӕндыйы цӕстӕй кастысты. Ӕмӕ мӕн дӕр Хуыцау нӕ уырныдта. Ӕстдӕс азмӕ мӕ цардыл тынг ӕндӕвтой атеизм ӕмӕ коммунизм.

Коммунизм мӕ зӕрдӕмӕ цӕмӕн цыд? Уымӕн ӕмӕ коммунизм алкӕмӕн дӕр ӕмхуызон бартӕ лӕвӕрдта. Стӕй ма афтӕ хъуыды кодтон, ӕмӕ алцыдӕр ӕмхуызон адих кӕнын хъӕуы, цӕмӕй тынг хъӕздгуытӕ дӕр ма уа ӕмӕ тынг мӕгуыртӕ дӕр. Уымӕ гӕсгӕ бацыдтӕн ӕрыгон коммунистты организацимӕ. 14 азы мыл куы цыди, уӕд куыстон, ӕрдз сыгъдӕг уа, уымӕ йӕ хъус чи дардта, иу ахӕм организацийы. Уым макулатурӕйӕ ног цыдӕртӕ арӕзтам. Горӕт Ауэйы мын мӕ куыстӕй афтӕ бузныг уыдысты, ӕмӕ мӕ хицӕуттӕ рахуыдтой горӕты кадджын цӕрӕг ӕмӕ мын радтой сертификат. Кӕд нырма ӕрыгон уыдтӕн, уӕддӕр ГДР-ы зындгонд политиктӕй кӕимӕдӕрты зонгӕ уыдтӕн. Афтӕ мӕм каст, ӕмӕ хорз цӕмӕдӕр тырнын ӕмӕ мын хорз фидӕн уыдзӕн.

Уый фӕстӕ мӕ цард цӕхгӕр фӕивта. 1989 азы Берлины къул ныппырх кодтой, ӕмӕ уый фӕстӕ Скӕсӕн Европӕйы коммунизмӕн кӕрон ӕрцыд. Уыцы хабары тыххӕй арвыцӕфау фӕдӕн. Уымӕй бирӕ нӕ рацыд, афтӕ базыдтон, ГДР-ы алы ран дӕр хӕрам хъуыддӕгтӕ кӕй кодтой. Зӕгъӕм, коммунистты фарс чи нӕ хӕцыд, уыдоны ницӕйӕгтыл нымадтой, раст цыма иннӕтӕй ӕвзӕрдӕр уыдысты, уыйау. Уымӕн гӕнӕн куыд уыд?! Ау, мах, коммунисттӕ, афтӕ нӕ хъуыды кодтам, ӕмӕ адӕмӕн ӕмхуызон бартӕ ис? Коммунизм ӕрмӕстдӕр ныхӕстӕй уыд? Мӕты ныххаудтӕн.

Царды мын сӕйрагдӕр цы уыд, уый фӕивта, ӕмӕ мӕ хъарутӕ музыкӕмӕ ӕмӕ ныв кӕнынмӕ сарӕзтон. Мӕ бон уыди музыкалон академийы ахуыр кӕнын, стӕй та университетмӕ бацӕуын. Ӕмӕ уымӕ гӕсгӕ мӕ бӕллиц уыди, цӕмӕй музыкант ӕмӕ нывгӕнӕг суыдаин. Стӕй мӕ гыццылӕй цы ӕгъдауыл ахуыр кодтой, уый дӕр ницӕмӕуал дардтон. Ныр мын сӕйрагдӕр уыди мӕ рӕстӕг хъӕлдзӕгӕй ӕрвитын, зӕгъӕм, уыцы-иу рӕстӕг цалдӕр чызгимӕ ӕмбӕлдтӕн. Фӕлӕ кӕд музыкант ӕмӕ нывгӕнӕг уыдтӕн ӕмӕ мӕхи куыд фӕндыд, афтӕ цардтӕн, уӕддӕр къаддӕр нӕ мӕт кодтон. Суанг ма мӕ нывтӕй дӕр бӕрӕг уыд, мӕ зӕрдӕйы цы тас уыд, уый. Цымӕ фидӕны цы уыдзӕн? Ӕмӕ адӕймаг цӕмӕн цӕры?

Ӕппынфӕстаг мӕ фарстатӕн цы дзуаппытӕ ссардтон, уыдон мӕ дисы бафтыдтой. Иу изӕр академийы студенттимӕ бадтӕн  ӕмӕ фидӕныл ныхас кодтам. Студенттӕй иу чызг, Мэнди *, зӕгъгӕ, уыди Йегъовӕйы Ӕвдисӕн. Уыцы изӕр мын хорз уынаффӕ радта. Загъта мын: «Андреас, кӕд дӕ фӕнды, царды ӕмӕ дӕм фидӕны тыххӕй цы фарстатӕ ис, уыдонӕн дзуаппытӕ базонын, уӕд Библи лӕмбынӕг иртас».

Йӕ ныхӕстыл ын тынг нӕ баууӕндыдтӕн, фӕлӕ уӕддӕр мӕхицӕн загътон, Библийы дзуаппытӕ кӕй бацагурдзынӕн. Мэнди мын загъта, цӕмӕй Данелы чиныджы дыккаг сӕр бакӕсон. Цы бакастӕн, уый мӕ дисы бафтыдта. Уыцы пехуымпарады дзырд цыди, суанг нӕ рӕстӕджы онг, стыр тых кӕмӕ уыд, уыцы дунеон паддзӕхӕдтӕ кӕрӕдзийы фӕд-фӕдыл куыд хъуамӕ ивтаиккой, уый тыххӕй. Мэнди ма мын равдыста, нӕ фидӕнмӕ ма чи хауы, уыцы пехуымпарӕдтӕ дӕр. Кӕдӕй-уӕдӕй мӕ фарстатӕн дзуаппытӕ ссардтон! Фӕлӕ уыцы пехуымпарӕдтӕ чи ныффыста ӕмӕ кӕй бон уыд фидӕны хабӕрттӕ афтӕ бӕлвырд зонын? Уӕд ахъуыды кодтон, кӕд Хуыцау ӕцӕгдӕр ис, зӕгъгӕ.

Мэнди мӕ базонгӕ кодта Хорст ӕмӕ Ангеликӕимӕ. Уыцы лӕг ӕмӕ ус уыдысты Йегъовӕйы Ӕвдисӕнтӕ ӕмӕ мын баххуыс кодтой Хуыцауы Ныхас хуыздӕр бамбарынӕн. Ӕз базыдтон, Йегъовӕйы Ӕвдисӕнтӕ иннӕ динтӕй кӕй хицӕн кӕнынц – уыдон Хуыцауы ӕдзухдӕр йӕ номӕй хонынц ӕмӕ уыцы номы тыххӕй иннӕтӕн дӕр дзурынц (Псалом 83:18; Матфейы 6:9). Базыдтон, Йегъовӕ Хуыцау адӕмӕн диссаджы ныфсӕй зӕрдӕ кӕй ӕвӕры – зӕххыл дзӕнӕты ӕнустӕм кӕй цӕрдзысты. Псаломы 37:9 фыст ис: «Йӕ ныфс Йегъовӕйыл чи дары, уыдон та зӕхх бынӕн райсдзысты». Ӕмӕ мӕ зӕрдӕмӕ фӕцыд, Библимӕ гӕсгӕ алкӕмӕн дӕр кӕй ис ахӕм фадат, кӕд, Хуыцау уаг ӕмӕ ӕгъдауы тыххӕй цы уагӕвӕрдтӕ радта, уыдонмӕ гӕсгӕ цӕрынц, уӕд.

Фӕлӕ мын ӕнцон нӕ уыд мӕ цард фӕивын ӕмӕ Библимӕ гӕсгӕ цӕрын. Хорз музыкант ӕмӕ нывгӕнӕг кӕй уыдтӕн, уый тыххӕй уыдтӕн сӕрбӕрзонд, ӕмӕ мӕ фыццаджыдӕр хъуыди сӕрныллӕгдзинадыл ахуыр кӕнын. Уымӕй уӕлдай ма мын зын уыди ме ’нӕгъдау цард ныууадзын. Йегъовӕйӕ тынг бузныг дӕн, Библимӕ гӕсгӕ цӕрыныл ӕппӕт тыхтӕй чи архайы, уыдонимӕ фӕразон ӕмӕ фӕлмӕнзӕрдӕ кӕй у ӕмӕ сӕ кӕй ӕмбары!

Коммунизм ӕмӕ мыл атеизм тынг ӕндӕвтой мӕ царды фыццаг 18 азы, уӕдӕй фӕстӕмӕ та мӕ Библи ивы. Цы базыдтон, уый фӕрцы фидӕныл нал мӕт кӕнын ӕмӕ зонын, цӕмӕн цӕрын, уый. 1993 азы донаргъуыд райстон ӕмӕ сдӕн Йегъовӕйы Ӕвдисӕн. 2000 азы та мӕ цард баиу кодтон, Хуыцауӕн зынгзӕрдӕйӕ чи лӕггад кодта, иу ахӕм чызгимӕ, Табитӕимӕ. Гӕнӕн ӕмӕ амалӕй архайӕм, цӕмӕй фылдӕр рӕстӕг адӕмӕн ӕххуыс кӕнӕм Библи базонынӕн. Кӕуыл фембӕлӕм, уыдонӕй бирӕтӕ уыдысты коммунисттӕ ӕмӕ атеисттӕ. Ӕмӕ сын Йегъовӕйы тыххӕй куы фӕдзурын, уӕд мын уый стыр циндзинад ӕрхӕссы.

Йегъовӕйы Ӕвдисӕнтимӕ Библи ахуыр кӕнын куы райдыдтон, уӕд уый фыццаг мӕ ныййарджыты зӕрдӕмӕ нӕ фӕцыд. Фӕлӕ стӕй федтой, уый мӕ цардыл хорзырдӕм кӕй фӕзынд. Тынг ӕхсызгон мын у, ныр сӕхӕдӕг дӕр Библи кӕй фӕкӕсынц ӕмӕ Йегъовӕйы Ӕвдисӕнты ӕмбырдтӕм кӕй фӕцӕуынц.

Мах Табитӕимӕ стӕм тынг амондджын, уымӕн ӕмӕ, Библи бинонтӕн цы уынаффӕтӕ дӕтты, уыдонмӕ гӕсгӕ цӕрыныл архайӕм. Зӕгъӕм, лӕг ӕмӕ ус кӕрӕдзийыл ӕнувыд кӕй хъуамӕ уой, уыцы уынаффӕмӕ кӕй хъусӕм, уый фӕрцы кӕрӕдзи ноджы тынгдӕр уарзӕм (Дзуттӕгтӕм 13:4).

Ныр мӕ зӕрдӕйы тас нал ис ӕмӕ фидӕныл дӕр нал мӕт кӕнын. Мӕнӕн ӕгас дунейы дӕр ис хотӕ ӕмӕ ӕфсымӕртӕ, ӕмӕ не ’ппӕт дӕр цин кӕнӕм, не ’хсӕн цы фарн ӕмӕ иудзинад ис, ууыл. Уыцы бинонты алкӕмӕн дӕр ис ӕмхуызон бартӕ. Уый у, цӕрӕнбонты цӕуыл ӕууӕндыдтӕн ӕмӕ цӕмӕ бӕллыдтӕн, уый.