Mrɛlɛbulɛ 22:1-29
22 Ɔwɔ kɛ ɛkpa duma kpalɛ* na tɛ anwonyia kpole;+Bɛbu wɔ* a ɔle kpalɛ ɔtɛla dwɛtɛ fufule nee nvutuke.
2 Sukoavolɛ nee ehyianli le ko:*
Gyihova a bɔle bɛ mu nwiɔ a.+
3 Sonla mɔɔ anye gyi ɔ ti anwo la nwu esiane na ɔfa ɔ nwo ɔfea,Noko mɔɔ ɛnlɛ anwubielɛ la kɔ ɔ nyunlu fɔɔnwo na ɔnwu nwolɛ amaneɛ.*
4 Mɔɔ vi mɛlɛbɛnwoaze nee Gyihova ɛzulolɛ nu ba laA le anwonyia nee anyunlunyia yɛɛ ngoane.+
5 Mbowule nee ngane wɔ sonla mɔɔ ɛnli nɔhalɛ la adenle nu,Noko awie biala mɔɔ ye ngoane* nwo hyia ye la twe ɔ nwo kɔ moamoa.+
6 Tete kakula wɔ adenle mɔɔ ɔwɔ kɛ ɔfa zo la anu;+Saa ɔyɛ kpanyinli bɔbɔ a ɔnrɛvi zolɛ.+
7 Sukoavolɛ di ehyianli nwo zo tumi,Yɛɛ mɔɔ biza bosea la le akɛlɛ maa mɔɔ bɔ ye bosea la.+
8 Awie biala mɔɔ dua ninyɛndane la babu esiane,+Yɛɛ ye ɛyavalɛ baka ne bara ye awieleɛ.+
9 Sonla mɔɔ yɛ nyele* la banyia nyilalɛ,Ɔluakɛ ɔ nee ehyianli kyɛ ye aleɛ.+
10 Foa agolobɛnwo sonla ne,Na manzonle bara awieleɛ;Butulelilɛ* nee aholoba ɛbɔlɛ bo bapɛ.
11 Sonla mɔɔ kulo ahonle mɔɔ anu te na ye ɛdendɛlɛ yɛ fɛ laBayɛ belemgbunli ne agɔnwo.+
12 Gyihova anye bɔ nrɛlɛbɛ* nwo bane,Noko ɔkakyi mɛlɛbɛlama edwɛkɛ nye.+
13 Mgbovonle sonla ka kɛ: “Awenade wɔ alienwo lɔ!
Ɔbahu me wɔ gua ne azo!”+
14 Mraalɛ mɔɔ bɛdɔ gua zo la* anloa le kuma kpole.+
Sonla mɔɔ Gyihova ɛbua ye fɔlɛ la badɔ nu.
15 Ngoaseade kyekye kakula ahonle nwo,+Noko ɛdenrɛdenrɛlɛ baka ne baye ye avi ɔ nwo ahɔ moamoa.+
16 Sonla mɔɔ sisi ehyianli amaa ye anwonyia ayɛ kpole+Nee sonla mɔɔ fa ahyɛlɛdeɛ maa sukoavolɛ laBali ehyia.
17 Yɛ ɛnzolɛ na tie nrɛlɛbɛvolɛma edwɛkɛ,+Amaa wɔava wɔ ahonle wɔazie me nrɛlɛbɛ ne azo.+
18 Ɔluakɛ ɔle kpalɛ kɛ ɛkɛmaa bɛkɛdɛnla wɔ ahonle nu,+Amaa bɛ kɔsɔɔti bɛala ɛ nloa dahuu.+
19 Melɛmaa wɔ adwenle ɛnɛ,Amaa wɔava ɛ nwo wɔado Gyihova anwo zo.
20 Asoo metɛkɛlɛle wɔ dɛba,Metɛmaanle wɔ folɛdulɛ nee adwenle,
21 Kɛ mekilehile wɔ edwɛkɛ mɔɔ le nɔhalɛ nee mɔɔ bɛfa bɛ nwo bɛto zo la,Amaa wɔava amaneɛ mɔɔ le nɔhalɛ la wɔazia wɔahɔmaa ahenle mɔɔ zoanle wɔ la ɔ?
22 Mmawua ehyianli ɔluakɛ ɔle ehyianli la ati,+Yɛɛ mmasisi koahweabane wɔ suakpole ne anlenkɛ kpole ne anloa,+
23 Ɔluakɛ Gyihova bali bɛ edwɛkɛ amaa bɛ+Na ɔbaye bɛdabɛ mɔɔ bɛsisi menli la ngoane* yeavi ɛkɛ.
24 Mmafa sonla mɔɔ lɛ ahonle la agɔnwolɛAnzɛɛ ɛ nee sonla mɔɔ fa ɛya mgbane mgbane la mmatu,
25 Amaa wɔanzukoa ye ndenle ne mɔNa wɔanzua ɛ nwo* ɛhane.+
26 Mmaboka bɛdabɛ mɔɔ bɛsoma menli sa nu bɛdi agyinlanu la anwo,Bɛdabɛ mɔɔ bɛdi menli agyinlanu bɛmaa bɛdie bosea la.+
27 Saa wɔannyia ɛhwee wɔandua a,Bɛbaye wɔ ɛkpa bɔbɔ bɛavi ɛ bo!
28 Mmatu tete ɛweɛneMɔɔ wɔ nenyia mɔ kpɔnlanle la.+
29 Wɔnwu sonla mɔɔ ze ye gyima nye zo la ɔ?
Ɔbagyinla arelemgbunli nyunlu;+Ɔnrɛgyinla koahweabanema anyunlu.
Ɔbodwɛkɛ
^ Hibulu aneɛ nu, “Ɛlɛ ɛlolɛ.”
^ Anzɛɛ “dumamɔlɛ kpalɛ.” Hibulu aneɛ nu, “duma.”
^ Hibulu aneɛ nu, “bɔ nu yia.”
^ Anzɛɛ “ɔnyia nwolɛ anzohwenlɛ.”
^ Anzɛɛ “ye ɛkɛla.”
^ Hibulu aneɛ nu, “Sonla mɔɔ lɛ ɛnyelɛ kpalɛ.”
^ Anzɛɛ “Edwɛkɛ mɔɔ bɛfa bɛkɔ kɔɔto.”
^ Anzɛɛ “adwenle.”
^ Anzɛɛ “ɛkɛla.”
^ Anzɛɛ “wɔ ɛkɛla.”
