Jehová itekipanojkauaj mosentiliaj ompa ipan se semana ipan Kali kampa mosentiliaj Jehová itlajtoltemakauaj. ¿Tlake kichiuaj nopaya? ¿Kenijkatsa mitspaleuis tlaj tias ipan nopa tlanechikoli?

•  ¿Tlake kichiuaj ipan Kali kampa mosentiliaj Jehová itlajtoltemakauaj?

•  ¿Kenijkatsa mitspaleuis tlaj tias?

•  Tlen telpokamej uan ichpokamej kiijtouaj

 Ipan Kali kampa mosentiliaj Jehová itlajtoltemakauaj tlamachtiaj tlen Biblia kiijtoua uan tlen uelis kinpaleuis maseualmej ipan ininnemilis. Tlanechikoli tlen nopaya mochiua mitspaleuis:

•   Tijmatis tlen melauak tlen toTeotsij.

•   Tijmatis kenke pano tlen amo kuali ipan ni tonali.

•   Xijnexti kuajkuali tlamantli ipan monemilis.

•    Xikinpia kuali mouampoyouaj.

 ¿Tijmajtoya ni? Nopa kali kampa mosentiliaj katli kitekipanouaj Jehová kitokaxtiaj Kali kampa mosentiliaj Jehová itlajtoltemakauaj pampa nopaya tlamachtiaj tlen toTeotsij iTlanauatijkayo (Mateo 6:9, 10; 24:14; Lucas 4:43).

 Tlen nopaya tlamachtiaj tlauel mitspaleuis. Kema Jehová itlajtoltemakauaj mosentiliaj, kiixtomaj tlen Biblia tlamachtia uan nopa mitspaleuis xijpia tlalnamikilistli (Proverbios 4:5). Ni kiijtosneki Biblia mitspaleuis kuali xijtlapejpeni tlen tijchiuas ipan monemilis, uan nojkia kinankilia ni tlajtlanili:

•   ¿Kenke tiitstokej?

•   ¿ToTeotsij kichiua ma titlaijiyouikaj?

•   ¿Nojua itstokej katli miktokej?

 Ni eli se keski tlamachtili tlen mopanoltia sábado o domingo:

•   ¿Kenke moneki timoyakanasej ika Biblia?

•   ¿Ajkia uelis tikiljuisej ma techpaleui kema tijpiasej tlaouijkayotl?

•   ¿Kenijkatsa techpaleuia ipan ni tonali toTeotsij iTlanauatijkayo?

 “Se katli iuaya nimomachtia yajki kampa timonechikouaj. Moseuik ininuaya nochampoyouaj uan kitlanejtijkej se keski amatlajkuiloli. Teipa, nechiljuik mosentlachilik kema toikniuaj kichiuayayaj tlajtlanili uan nochi tlanankiliyayaj. Nojkia kiijtok ipan nopa iglesia kampa yaui amo kipiaj tlen ika momachtisej kej tojuantij tijpiaj” (Brenda).

 ¿Tijmajtoya ni? Ipan nopa Kali kampa mosentiliaj Jehová itlajtoltemakauaj amo kema mitsinamasej yon mitstlajtlanisej tomij.

 Maseualmej katli nopaya tikinixmatis tlauel mitsyolchikauasej. Biblia techiljuia kenke tlauel ipati ma timosentilikaj uan ma timoyolchikauakaj (Hebreos 10:24, 25). Maske ipan ni tonali maseualmej amo moikneliaj, tlauel techyolchikaua tiitstosej ininuaya katli kiikneliaj toTeotsij uan katli kintekipachoua tlen sekinok kinpano.

 “Maske ika tiotlak tlauel nisiajtok uan nimotekipachojtok, kema nia tlanechikoli toikniuaj tlauel nechyolchikauaj. Uan kema nitlakuepilia nochaj, tlauel niyolpaki uan ualmostla kuali nimomachilia” (Elisa).

 ¿Tijmajtoya ni? Ipan nochi Tlaltipaktli onka se 120,000 tlanechikoli tlen Jehová itlajtoltemakauaj uan kipano 60,000 kali kampa mosentiliaj. Pampa momiakiliaj Jehová itekipanojkauaj, sejse xiuitl mochijchiua se 1,500 Kali kampa mosentiliaj Jehová itlajtoltemakauaj. a