Tlaj tijchiua tlen Biblia kiijtoua uan tijchiua kampeka timouampojchijtos iuaya toTeotsij, uelis timoiljuijtok tlaj ya uelis timoatsonpoliuiltis. ¿Kenijkatsa uelis tijmatis tlaj ya uelis timoatsonpoliuiltis? a

Ipan ni tlamachtili tikitasej ni:

•  ¿Moneki tijmatis miak tlamantli?

•  ¿Tlake moneki nijchijtos?

•  Tlen telpokamej uan ichpokamej kiijtouaj

 Tlaj tijneki timoatsonpoliuiltis amo kiijtosneki tijtsontekontlalis miak tlamantli kej kema tijchiua se examen. Tlen kena uelis tijchiuas eli “kuali tijtekiuis motlalnamikilis” uan kiampa tijmatis tlaj nelia melauak tlen tijneltoka (Romanos 12:1). Se neskayotl:

•   ¿Timotemachia nelia itstok toTeotsij uan san ya moneki tijueyichiuas?

   Biblia kiijtoua: “Katli kinechkauia toTeotsij moneki kineltokas yaya nelia itstok uan kinteochiua katli nochipa kichiuaj kampeka kitemosej” (Hebreos 11:6).

   Ximotlajtlani: “¿Kenke nijneltoka itstok toTeotsij?” (Hebreos 3:4). “¿Kenke san ya moneki nijueyichiuas?” (Apocalipsis 4:11).

   ¿Tijneki ma mitspaleuikaj? Xijpoua nopa tlamachtili “¿Creación o evolución? Primera parte: ¿Por qué creer en Dios?”.

•   ¿Timotemachia tlen kiijtoua Biblia eli toTeotsij iTlajtol?

   Biblia kiijtoua: “ToTeko temakak nochi nopa tlatsejtseloltik Tlajkuiloli, uan kipia iteki para techmachtia tlen melauak uan techtlakaualtia kema tijchiuaj tlen axmoneki. Uan itlajtol techtlalnamiktia uan technextilia kejatsa ma timonejnemiltikaj xitlauak” (2 Timoteo 3:16).

   Ximotlajtlani: “¿Kenke nijneltoka tlen eltok ipan Biblia amo eli inintlalnamikilis maseualmej?” (Isaías 46:10; 1 Tesalonicenses 2:13).

   ¿Tijneki ma mitspaleuikaj? Xijpoua nopa tlamachtili “¿Kenijkatsa uelis nechpaleuis Biblia? Tlaxeloli 1: Xijtemo tlen tlauel ipati”.

•   ¿Tijneltoka Jehová kitekiuia itlanechikol uan kiampa kichiua tlen mosentlalia?

   Biblia kiijtoua: “Nochipa ma tijueyichiuakaj toTeotsij ipan tlanechikoli uan ika Cristo Jesús” (Efesios 3:21, TNM).

   Ximotlajtlani: “Tlen moixtoma ipan tlanechikoli, ¿nikita eli tlen toTeotsij tlamachtia o san maseualmej inintlalnamikilis?” (Mateo 24:45). “Kema notatauaj amo uelij yauij tlanechikoli uan nechiljuiaj noselti ma nia, ¿tlake nijchiua? ¿Nimokaua nochaj o nia tlanechikoli?” (Hebreos 10:24, 25).

   ¿Tijneki ma mitspaleuikaj? Xijpoua nopa tlamachtili “¿Kenijkatsa mitspaleuis tlaj tias kampa mosentiliaj Jehová itlajtoltemakauaj?”.

 Maske kemantika timokuapolos, kena uelis timoatsonpoliuiltis. Tlauel ipati tijnextis tijneki tijchiuas tlen kiijtok nopa salmista: “Ximoiyokatlali ika tlen axkuali, uan xijchiua san tlen xitlauak” (Salmo 34:14). Ximoiljui ni:

•   ¿Tijchiua tlen Jehová tlanauatia?

   Biblia kiijtoua: “Xijpiakaj [kuali] inmoyolo [o inmotlalnamikilis]” (1 Pedro 3:16).

   Ximotlajtlani: “¿Kenijkatsa nijnextijtok kuali nijtekiuia notlalnamikilis uan kiampa nijmatis ‘tlen kuali uan tlen axkuali’?” (Hebreos 5:14). “¿Nikilnamiki kema amo nijchijki tlen amo kuali maske sekinok telpokamej nechtetsopkej? ¿Nouampoyouaj nechpaleuiaj ma nijchiua tlen kuali?” (Proverbios 13:20).

   ¿Tijneki ma mitspaleuikaj? Xijpoua nopa tlamachtili “¿Cómo puedo educar mi conciencia?”.

•   ¿Tijmajtok Jehová mitstlajtolsenkauas ika tlen tijchiua?

   Biblia kiijtoua: “Uajka sejse tojuantij moneki tijchiuasej cuentas ika toTeko Dios ika tlen tijchijtokej” (Romanos 14:12).

   Ximotlajtlani: “¿Amo nimokajkayaua noselti uan amo nikinkajkayaua sekinok?” (Hebreos 13:18). “¿Tlake nijchiua kema nimokuapoloua? ¿Nikijtoua tlen nijchijki o amo? ¿Nikintlajtlakoltia sekinok?” (Proverbios 28:13).

   ¿Tijneki ma mitspaleuikaj? Xijpoua nopa tlamachtili “¿Qué debería hacer cuando cometo un error?”.

•   ¿Tijchijtok kampeka nojua kuali timouampojchiuas iuaya Jehová?

   Biblia kiijtoua: “Ximonechkauikaj kampa toTeko uan yajaya inmechnechkauis” (Santiago 4:8).

   Ximotlajtlani: “¿Tlake tlamantli nijchijtok uan kiampa nojua nimonechkauia ika Jehová? ¿Nochipa nijpoua Biblia?” (Salmo 1:1, 2). “¿Nimomaijtoua mojmostla?” (1 Tesalonicenses 5:17). “¿Nikiljuia Jehová tlen nechtekipachoua? ¿Nouampoyouaj nojkia mouampojchijtokej iuaya Jehová?” (Salmo 15:1, 4).

   ¿Tijneki ma mitspaleuikaj? Xijpoua nopa tlamachtili “¿Kenijkatsa uelis nechpaleuis Biblia? Tlaxeloli 2: Xikita kenijkatsa uelis mitspaktis tijpouas Biblia” uan “¿Kenke tlauel moneki timomaijtosej?”.

 UELIS TIJCHIUAS NI: Xijpoua tlamachtili 37 tlen nopa amochtli Kej monankilia tlen telpokamej kinekij kimatisej, volumen 2. Ni uelis mitspaleuis timoatsonpoliuiltis. Xikita nopa tlajtlanili tlen uala ipan iamayo 308 uan 309.