Kemantika se keskij toTeotsij itekipanojkauaj motlatsintokiaj tlaj nelia kinpaleuia kichiuasej kampeka monejnemiltisej kej Biblia tlamachtia (Salmo 73:2, 3). Sekij uelis pejtokej kichiuaj tlen Jehová amo kipaktia. Teipa kitlatiaj tlen kichiuaj uan kiampa kinkajkayauaj katli nojkia kitekipanouaj Dios.

Ni tlamachtili mokualchijchijtok para maseualmej katli kiampa monejnemiltiaj pero sampa kinekij kuali tlaneltokasej.

Ipan ni tlamachtili tikitasej:

•  ¿Tlake kiijtosneki tijnextis kuali tijtekipanoua Jehová uan tijchijtos tlen amo kinamiki?

•  ¿Tlaj nijnextis kuali nijtekipanoua Jehová uan nijchijtos tlen amo kinamiki kiijtosneki amo nieli se kuali maseuali?

•  ¿Tlake nechpaleuis ayokmo nijnextis kuali nijtekipanoua Jehová uan nijchijtos tlen amo kinamiki?

•  Tlen telpokamej uan ichpokamej kiijtouaj

Kiijtosneki kema tiitstok ika mouampoyouaj katli amo kitlepanitaj Jehová itlanauatiljuaj tijchiua tlamantli tlen tijmati amo kinamiki. Pero kema tiitstok ininuaya toikniuaj, tijnextia kejuak nelia tijnekiskia tijtekipanos Jehová. Eli kejuak tijpixtoskia ome monemilis uan ipan sejse tijpia se máscara.

“Kema kiampa tijchiua, kejuak ipan sejse nemilistli tijtlatia se istlakatili uan amo aka kimati kenijkatsa nelnelia tieli. Kiampa nochi tikinkajkayaua” (Erin).

¿Tijmajtoya? Tijnextis kuali tijtekipanoua Jehová uan tijchijtos tlen amo kinamiki nojkia kiijtosneki tijchiua tlen Jehová amo kipaktia kema amo aka mitsita.

“Kema nijpixtoya 14 xiuitl, pejki nikita ipan internet tlaixkopinkayomej uan videos kampa nesi tlen amo kinamiki. Kema niitstoya ininuaya sekinok maseualmej nijchiuayaya kejuak nijkualankaitayaya pornografía, pero ipan noyolo amo kiampa nijyolmatiyaya” (Nolan).

Tlen Biblia kiijtoua: “Axaka uelis kintekipanos ome itekojuaj, pampa kikokolis se uan kiiknelis ne se. Uan ika se elis temachtli, pero ne seyok kitlauelkauas” (Mateo 6:24).

Amo. Pero se keskij maseualmej kinextijtokej amo kinpaktia moyakanasej ika Jehová itlanauatiljuaj. ¿Nelnelia ya nopa tlen mitspano? Uelis timoiljuia sekinok tlamantli, kej ni:

• Timajmaui tijnextis amo tieli sanse kej sekinok telpokamej.

• Más kuali tijyolmati kema tiitstok ininuaya katli timomachtia uan amo kej kema tiitstok ininuaya toikniuaj.

• Tijmati amo tiyajati tijchiuas nochi tlen Jehová mitsnauatia.

“Nimoiljuia se keskij telpokamej más kuali kiyolmatij kema itstokej ininuaya katli amo kitekipanouaj Jehová pampa kinekij mouampojchiuasej iuaya se akajya, maske amo kuali monejnemiltiaj” (David).

Ni amo kiijtosneki kena uelis tijtekipanos Jehová uan tijchiuas tlen amo kinamiki. Pero kena kinextia kemantika se akajya katli kuali monejnemiltia uelis kipanos ni tlamantli. Tlaj kiampa mitspano, ¿tlake uelis tijchiuas?

1. 1. Ximoiljui kenijkatsa timonejnemiltia. Ximotlajtlani: “¿Nelia kiampa nijneki nimonejnemiltis? Tlaj nojua kiampa nijchiua, ¿tlake nechpanos teipa?”.

   Tlen Biblia kiijtoua: “Se tlen tlalnamiki nimantsi momaka cuenta intla imelak uala tlen mauilili [...]. Pero tlen uiuitikej axmomakaj cuenta uan kinasi tlen kinkokoua” (Proverbios 27:12).

2. 2. Xikiljui se akajya. Xikiniljui tlen mitspano motatauaj o se mouampo katli kuali tlaneltoka uan kitlepanita Jehová itlanauatiljuaj. Inijuantij tlauel yolpakisej pampa tikiniljuik ma mitspaleuikaj, uan nojkia pampa kiitasej tijneki tijchiuas tlen kuali.

   “Tlauel ouij nijmatki nikiljuis se akajya tlen nijchiuayaya. Pero teipa tlauel kuali nijyolmatki” (Nolan).

   Tlen Biblia kiijtoua: “Aki kitlatia itlajtlakoljuaj axkualkisas, pero aki kipouilia TOTEKO nochi itlajtlakoljuaj uan kikaua, TOTEKO kitlapojpoljuis” (Proverbios 28:13).

3. 3. Kuali xijseli tlen mitsiljuisej. Tlaj amo tikiniljuik motatauaj uan toikniuaj nochi tlen tijchiuayaya ichtakatsi, uelis ayokmo tlauel motemachisej ipan ta. Uan uelis motatauaj o ueuejtlakamej tlen tlanechikoli amo mitskauilisej xijchiua se keski tlamantli. Pero kuali xijseli tlen mitsiljuisej uan ximosentlali kuali timonejnemiltis (Hebreos 13:18).

   Tlen Biblia kiijtoua: “Xijtlakakili nochi consejos uan xijseli inintlajtol tlen mitstlakaualtiaj, uan tijpias miak tlalnamikilistli tlen uejkauas nochi moyolis” (Proverbios 19:20).

4. 4. Ximotemachi Jehová mitsiknelia. Ya kiita nochi tlen tijchiua pampa mitsiknelia. Yeka, tlauel tijyolkokoua kema san tijnextia kuali tijtekipanoua uan tijchiua tlen amo kinamiki. Pero kitekipachoua tlen mitspano uan kineki mitspaleuis xijchiua tlen kuali (1 Pedro 5:7).

   Tlen Biblia kiijtoua: “TOTEKO kintlachilijtok nochi tlakamej kampa ueli ipan tlaltipaktli para kinnextilis iueyi chikaualis inijuantij tlen motemachiaj ipan ya ika nochi ininyolo” (2 Crónicas 16:9).