“Kema nieliyaya nipiltelpokatsi, tlauel ouij nijmatki pampa nikinixtokayaya sekinok telpokamej. Maske nimoiljuiyaya amo uejkauaskia kiampa nijyolmatis, nama nojua nikinixtoka” (David, 23 xiuitl).

 David kitekipanoua toTeotsij uan kineki kineltokas. ¿Uelis se akajya kineltokas toTeotsij tlaj kinixtoka itlakapoyouaj o isiuapoyouaj? ¿Kenijkatsa kinita toTeotsij maseualmej katli mosiuanekij o motlakanekij?

•  ¿Tlake kiijtoua Biblia?

•  ¿Kineki kiijtos...?

•  ¿Uan tlaj...?

 Ipan ni tonali, maseualmej ayokmo kinitaj katli mosiuanekij o motlakanekij kej uejkajkia kinitayayaj, uan ipan sejse altepetl nojkia amo sanse kej kinitaj. Cristo itokilijkauaj amo timoiljuiaj sanse kej miakej moiljuiaj. Tojuantij amo tijchiuaj kej katli “kipatlaj inintlalnamikilis ajachika”, kej kiijtoua Efesios 4:14. Kej tikinitaj katli mosiuanekij o motlakanekij o katli kichiuaj sekinok tlamantli tlen amo kuali, mokixtijtok ipan tlen Biblia kiijtoua.

 Biblia kiijtoua kenijkatsa kinita toTeotsij katli mosiuanekij uan motlakanekij. Ma tikitakaj tlake kiijtoua:

•  “Se tlakatl ma axkichiua tlamantli iuaya seyok tlakatl keja eliskia isiua, pampa nopa se ueyi tlajtlakoli” (Levítico 18:22).

•  “ToTeko kintlauelkajtok para ma kichiuakaj nopa fiero tlamantli tlen ininyolo kineki kichiuas. [...] Kinkauilia ma kichiuakaj nochi tlen fiero tlen inintlakayo kineki, yonke se pinaualistli. Uan hasta ininsiuajuaj ayok kinekij itstosej ininuaya tlakamej keja toTeko kinchijtok, pero yauij ininuaya sekinok siuamej para tlen ueli mochiuilisej” (Romanos 1:24, 26).

•  “¡Amo ximokajkayauakaj! Axkalakisej nepa [ipan toTeotsij iTlanauatijkayo] tlen kichiuaj tlamantli ika tlen axininnamik, o tlen kinueyimatij tlaixkopinkayomej, o tlen momekatiaj, o tlakamej tlen mosiuanekij. Axkalakisej nepa tlakamej tlen kichiuaj tlen ueli ika sekinok tlakamej, o tlen tlachtekij, o tlen kiixtokaj tlen sekinok kipiaj, o moiuintiaj, o tlen tlateuiaj uan tlen tlakajkayauaj uan kiuikaj tlen sekinok ininaxka” (1 Corintios 6:9, 10).

 Nochi moneki tijchiuasej tlen Biblia tlanauatia. Maske sekij kinixtokaj inintlakapoyouaj o ininsiuapoyouaj, nochi moneki tijchiuasej kampeka amo titlajtlakolchiuasej, uan kiampa amo tijyolkokosej toTeotsij (Colosenses 3:5).

 ¿Kineki kiijtos Biblia kiijtoua moneki tikinkualankaitasej katli mosiuanekij o motlakanekij?

 Amo. Biblia kiijtoua moneki amo titekualankaitasej. Nopaya kiijtoua kuali ma tiitstokaj ininuaya nochi maseualmej maske amo monejnemiltiaj sanse kej tojuantij (Hebreos 12:14). Yeka, amo kinamiki tikinpinajtisej, tikintlatsakuiltisej yon tikintlaijiyouiltisej katli mosiuanekij o motlakanekij.

 ¿Kineki kiijtos Cristo itokilijkauaj moneki tijpaleuisej nopa tlanauatili kampa kiijtoua katli mosiuanekij o motlakanekij uelis mosenkauasej?

 Biblia kiijtoua toTeotsij kuali kiita san kema se tlakatl uan se siuatl mosenkauaj (Mateo 19:4-6). Cristo itokilijkauaj amo tijpaleuiaj yon tikijtouaj amo ma mochiua se tlanauatili kampa kiijtos katli mosiuanekij o motlakanekij uelis mosenkauasej. Tlaj tijpaleuisej se tlanauatili, kinextis timokalakiaj ipan política uan Biblia kiijtoua amo ma timokalakikaj ipan nopa tlamantli (Juan 18:36).

 ¿Uan tlaj se akajya mosiuaneki o motlakaneki, uelis kipatlas kej monejnemiltia?

 Kena uelis. Biblia kiijtoua se keskij maseualmej katli itstoyaj ipan achtoui siglo kipatlakej kej monejnemiltiyayaj. Kema apóstol Pablo kintlajkuiljuilik katli itstoyaj Corinto, kiijtok katli mosiuanekij o motlakanekij amo itstosej kema toTeotsij iTlanauatijkayo tekichiuas, uan nojkia kiijtok: “Achtouia sekij inmojuantij initstoyaj keja nopa” (1 Corintios 6:11).

 ¿Kiijtosneki nopa maseualmej katli mosiuanekiyayaj o motlakanekiyayaj ayokmo kema sampa kinejkej kichiuasej tlen momajtoyaj? Amo, amo ya nopa kiijtosneki. Biblia kiijtoua: “Keja se tlakatl tlen mokentia iyoyo tlen yankuik, toTeko inmechmakatok se inmonemilis tlen yankuik tlen eltok keja ya. Yeka mojmostla xijchiuakaj kampeka” (Colosenses 3:10). Uajka, tlaj tijnekij tijpatlasej kej timonejnemiltiaj, moneki nochipa tijchijtosej kampeka.

 ¿Uan tlaj se akajya katli kineki kineltokas toTeotsij nojua kinixtoka itlakapoyouaj o isiuapoyouaj?

 Sanse kej kichiua ika sekinok tlajtlakoli, se akajya uelis kitlapejpenis tlaj nojua moiljuijtos ipan tlen kiyoltilana o amo. ¿Tlake kipaleuis amo ma kichiua tlen kiyoltilana? Biblia kiijtoua: “Ximonejnemiltikaj kuali ika itlapaleuil uan ichikaualis itonal toTeko uan kej nopa axinkitokilisej inmotlakayo tlen kineki tlajtlakolchiuas” (Gálatas 5:16).

 Ipan nopa texto amo kiijtoua se akajya ayokmo kema moyoliljuis tlen amo kuali, nopaya kiijtoua tlaj kichiua kampeka nochipa momachtis Biblia uan momaijtos, kipaleuis ayokmo kiampa ma moiljui uan amo ma tlajtlakolchiua.

 David, katli tikijtojkej achtouia, kiitak kenijkatsa kipaleuik momachtis Biblia uan momaijtos, uan nojua tlauel kipaleuik kema kiniljuik itatauaj tlen kipanoyaya. Ya kiijtoua: “Ayokmo tlauel nimotekipachok, uan uelis nojua tlauel niyolpaktoskia kema nojua nieliyaya nipiltelpokatsi tlaj nima nikiniljuijtoskia notatauaj tlen nechpanoyaya”.

 Tlauel tiyolpakij kema tijchiuaj tlen Jehová technauatia. Uelis timotemachisej “itlanauatiljuaj toTeko eltok melauak uan xitlauak” uan “kinmaka pakilistli tlakamej ipan ininyolo”. Yeka, katli kichiua tlen toTeotsij kiijtoua, “kitlanis miak” (Salmo 19:8, 11).