Ipan Estados Unidos kintlajtlanilijkej telpokamej tlaj momaijtouaj, 80% kiijtojkej kena momaijtouaj, uan san tlajko tlen inijuantij kiijtojkej mojmostla momaijtouaj. Yeka uelis sekij motlajtlaniaj: “¿Tlamaijtoli san techpaleuia kuali ma tijyolmatikaj?”.

•  ¿Tlake nelnelia eli tlamaijtoli?

•  ¿Nelia techtlakakilia toTeotsij kema timomaijtouaj?

•  ¿Tlake uelis tijtlajtlanisej toTeotsij?

•  Tlen telpokamej uan ichpokamej kiijtouaj

 Tlamaijtoli eli kema timokamanaljuiaj iuaya Jehová, katli kichijchijki nochi tlamantli. Ximoiljui ipan ni tlamantli: maske toTeotsij amo eli kej se maseuali “itstok nechka sejse tojuantij” (Hechos 17:27). Yeka Biblia techiljuia: “Ximonechkauikaj kampa toTeko uan yajaya inmechnechkauis” (Santiago 4:8).

 ¿Tlake uelis tijchiuas uan kiampa timonechkauis ika toTeotsij?

•   Ximomaijto, kiampa uelis tikamanaltis iuaya toTeotsij.

•   Ximomachti Biblia, kiampa tijtlakakilis toTeotsij.

 Tlaj tijneki kuali timouampojchiuas iuaya toTeotsij, moneki timomaijtos uan timomachtis Biblia.

 “Timokamanaljuisej iuaya Jehová eli se yejyektsi tlateochiualistli tlen techmakatok” (Jeremy).

 “Kema nikiljuia Jehová tlen nijyolmati nechpaleuia ma nimonechkaui iuaya” (Miranda).

 Maske titlaneltoka ipan toTeotsij uan timomaijtoua, kemantika uelis timoiljuia amo nelnelia mitstlakakilia. Maske kiampa timoiljuia, Biblia kiijtoua Jehová kitlakakilia nochi tlamaijtoli (Salmo 65:2). Uan nojkia kiijtoua uelis tikiljuis nochi tlen mitstekipachoua. ¿Kenke? Pampa toTeotsij kitekipachoua tlen mitspano (1 Pedro 5:7).

 Ximoiljui ipan ni tlamantli: ¿Nochipa timokamanaljuia iuaya mouampo? Kiampa uelis tijchiuas ika toTeotsij. Nochipa xikamanalti iuaya uan xijtekiui itoka, Jehová (Salmo 86:5-7; 88:9). Biblia techiljuia nochipa ma timomaijtokaj (1 Tesalonicenses 5:17).

 “Kema nimomaijtoua, nimokamanaljuia iuaya noTata Jehová uan nikiljuia nochi tlen nijyolmati” (Moises).

 “Kema nimokamanaljuia iuaya Jehová nikiljuia tlen tlauel ipati, kej nijchiua ika nonana uan nouampoyouaj” (Karen).

 Biblia kiijtoua: “Ximomaijtokaj ika toTeko ika nochi tlen inmechpanotiuala. Xijtlajtlanikaj ma inmechmaka nochi tlen moneki uan xijtlaskamatikaj para nochi tlen inmechchiuilijtok” (Filipenses 4:6).

 Uajka, ¿kinamiki tikiljuis tlen mitstekipachoua? Kena, Biblia kiijtoua: “Nochi mokuesol xijkaua imako toTeko uan yajaya mitsmakas temachili” (Salmo 55:22).

 Maske uelis tikiljuis tlen mitstekipachoua, nojkia xikiljui sekinok tlamantli tlen tijyolmati. Se ichpokatl katli itoka Chantelle, kiijtoua: “Tlaj san nikiljuis Jehová ma nechpaleui kema nikixnamikis se tlaouijkayotl, nijnextis ya amo eli nouampo”. Uan nojkia kiijtoua: “Na nimoiljuia achtoui moneki tijtlaskamatisej, uan tlaj kiampa tijnekij tijchiuasej moneki tikijkuilosej miak tlamantli tlen tijneki tijtlaskamatilisej”.

 Ximoiljui ipan ni tlamantli: ¿Tlake tijneki tijtlaskamatilis Jehová? Ximoiljui ipan eyi tlamantli tlen uelis tijtlaskamatilis ipan ni tonali.

 “Maske tikitas san se xochitl, mitspaleuis xijnojnotsa Jehová uan xijtlaskamatili” (Anita).

 “Ximoyoliljui ipan se texto o ipan se tlamantli tlen Jehová kichijchijtok tlen tlauel mitspaktia, uan teipa xijtlaskamatili” (Brian).