တၢ်မၤလိ ၃
“ကယဲၢ်ပှၤနာ်တၢ် . . . ခဲလၢာ်အပၢ်”
၁, ၂. ဒ်တၢ်ဆၢကတီၢ်လဲၤပူၤကွံာ်အသိးန့ၣ် တၢ်မၤအသးဒ်လဲၣ်. ဒီး စီၤအၤဘြၤဟၣ် တူၢ်ဘၣ်ဝဲဒ်လဲၣ်.
စီၤအၤဘြၤဟၣ်ကွၢ်ဃီၤဝဲ တၢ်လုၢ်ဟံၣ်ဖးထီတဖျၢၣ် လၢဝ့ၢ်အူၢ်အပူၤန့ၣ်လီၤ. * ဖဲန့ၣ်အဝဲနၢ်ဟူဘၣ်ဝဲ တၢ်သီၣ်သထြူးသထြီ ဒီးထံၣ်ဘၣ်ဝဲ မ့ၣ်အူလုၢ်ခုၣ်ထီၣ်ဝဲလီၤ. ဖဲန့ၣ်အဆၢကတီၢ် ပှၤလုၢ်တၢ်အဒိၣ်တဖၣ်လၢ အဘူၣ်ထီၣ်ဘါထီၣ်လါန့ၣ် လုၢ်ထီၣ်တၢ်ဆူလါအအိၣ်လီၤ. ဒီးဖဲစီၤအၤဘြၤဟၣ်ထံၣ်ဘၣ်ဝဲ တၢ်မၤအသးဒ်အံၤအခါ အဝဲဃၣ်တရံးအသးဒီး ဂံၤဂုၤထီၣ်ဝဲအခိၣ်လၢ တၢ်သးဘၣ်အၢအပူၤန့ၣ်လီၤ. ထံၣ်ကမှံကွၢ်, ဖဲစီၤအၤဘြၤဟၣ်ခါထီၣ်အခီၣ် ဒီးက့ၤဝဲဆူဟံၣ်အခါ ဆိကမိၣ်ထီၣ်ဝဲဘၣ်ဃးဒီး ပှၤအိၣ်လၢ ဝ့ၢ်အူၢ်အပူၤလၢ အဘူၣ်ထီၣ်ဘါထီၣ်ဝဲ တၢ်ဂီၤတၢ်ဖှီၣ်အဂ့ၢ်န့ၣ်တက့ၢ်. စးထီၣ်လၢ စီၤနိအၤအစိၤလံၤလံၤန့ၣ် တၢ်ဘူၣ်တၢ်ဘါအကမၣ် ရၤလီၤအသးလၢ တၢ်လီၢ်သကုၤဆးဒးလီၤ.
၂ ဖဲစီၤနိအၤဒီးအဟံၣ်ဖိဃီဖိ စံၣ်လီၤလၢကဘီပူၤဝံၤအလီၢ်ခံ အဝဲသ့ၣ်လုၢ်ထီၣ်တၢ်ဆူ ယဟိဝၤယွၤအအိၣ်န့ၣ်လီၤ. ဒီးဖဲန့ၣ်အဆၢကတီၢ် ကစၢ်ယွၤ ဒုးအိၣ်ထီၣ်ဝဲတၢၢ်ကွဲၤ လၢမူကပိာ်အလိၤလီၤ. (၁ မိၤ. ၈:၂၀; ၉:၁၂-၁၄) ဖဲန့ၣ်အခါ ပှၤဟီၣ်ခိၣ်ဖိတဖၣ် ဘူၣ်ထီၣ်ဘါထီၣ်ဝဲ ထဲယဟိဝၤယွၤ တဂၤဧိၤလီၤ. ဘၣ်ဆၣ် ဖဲထံလုၢ်ဘၢတၢ်ပူၤကွံာ်အနံၣ် ၃၅၀ ဝံၤအလီၢ်ခံန့ၣ် စီၤနိအၤသံဝဲလီၤ. ဒီးဆူမဲာ်ညါခံနံၣ်န့ၣ် စီၤအၤဘြၤဟၣ်အိၣ်ဖျဲၣ်ထီၣ်ဝဲလီၤ. ဒီးပှၤဟီၣ်ခိၣ်ဖိအါထီၣ်ဂီၢ်ထီၣ် ဒီးရၤလီၤအသးလၢ ဟီၣ်ခိၣ်ချၢန့ၣ်လီၤ. ဘၣ်ဆၣ် ပှၤဘူၣ်ထီၣ်ဘါထီၣ် ယဟိဝၤယွၤ န့ၣ်အိၣ်ဒၣ်စှၤဂၤလီၤ. ဒီးပှၤဟီၣ်ခိၣ်ဖိအါဒၣ်တၢ်တက့ၢ် လၢတၢ်လီၢ်ကိးတီၤဒဲးန့ၣ် ဘူၣ်ထီၣ်ဘါထီၣ်ဝဲ ယွၤလၢအကမၣ်လီၤ. တကးဒံးဘၣ် စီၤအၤဘြၤဟၣ်အပၢ်လၢအမ့ၢ် စီၤတ့ရၤန့ၣ်ဘူၣ်ထီၣ်ဘါထီၣ်ဝဲ ယွၤလၢအကမၣ် ဒီးဘၣ်သ့ၣ်သ့ၣ် အဝဲတ့ထီၣ်ဝဲ တၢ်ဂီၤတၢ်ဖှီၣ်တဖၣ်န့ၣ်လီၤ.—ယိၤၡူ ၂၄:၂.
ဘၣ်မနုၤအဃိ စီၤအၤဘြၤဟၣ်အတၢ်နာ်န့ၣ် ကဲထီၣ်တၢ်ဒိဂ့ၤ တဲာ်ဘၣ် လၢပဂီၢ်လဲၣ်
၃. စီၤအၤဘြၤဟၣ်န့ၣ် အတၢ်အိၣ်မူလီၤဆီဒီး ပှၤလၢအခိၣ်အဃၢၤ လၢကျဲဒ်လဲၣ်. ဒီးပမၤလိန့ၢ် တၢ်လၢအအိၣ်ဒ်လဲၣ်.
၃ ခီဖျိလၢ စီၤအၤဘြၤဟၣ်နာ်ကစၢ်ယွၤအဃိ အတၢ်အိၣ်မူလီၤဆီဒီး ပှၤလၢအခိၣ်အဃၢၤဒိၣ်မးလီၤ. လၢခံသးစီဆှံ ထိးဘၣ်တၢ်မၢဖိပီလူးအသး ဒီးအဝဲကွဲးဝဲလၢ စီၤအၤဘြၤဟၣ် ကဲထီၣ်ဝဲ “ကယဲၢ်ပှၤနာ်တၢ် . . . ခဲလၢာ်အပၢ်” န့ၣ်လီၤ. (ဖး ရိမ့ၤ ၄:၁၁ တက့ၢ်.) ခဲအံၤပကတဲသကိး စီၤအၤဘြၤဟၣ် အတၢ်နာ်ဂၢၢ်ကျၢၤထီၣ်ဝဲ လၢကျဲဒ်လဲၣ်န့ၣ်လီၤ. ဖဲပမၤလိ စီၤအၤဘြၤဟၣ်အဂ့ၢ်ဒီး ဆိကမိၣ်ထံအီၤန့ၣ် ကမၤစၢၤပှၤဒ်သိး ပတၢ်နာ်ကဂၢၢ်ကျၢၤထီၣ်ဝဲလီၤ.
မၤယဟိဝၤယွၤ အတၢ်မၤဖဲထံလုၢ်ဘၢတၢ် ဝံၤအလီၢ်ခံ
၄, ၅. ဘၣ်သ့ၣ်သ့ၣ် စီၤအၤဘြၤဟၣ်ကနၢ်ဟူဘၣ်ဝဲ ယဟိဝၤယွၤအဂ့ၢ် လၢမတၤတဂၤအအိၣ်လဲၣ်. ဒီးဘၣ်မနုၤအဃိ ပတဲဒ်န့ၣ်သ့ဝဲလဲၣ်.
၄ စီၤအၤဘြၤဟၣ် သ့ၣ်ညါထီၣ် ယဟိဝၤယွၤအဂ့ၢ်လၢကျဲဒ်လဲၣ်. ဖဲန့ၣ်အဆၢကတီၢ် ပသ့ၣ်ညါဘၣ်လၢ ယဟိဝၤယွၤအိၣ်ဒီး အခ့အပှၤလၢ အတီတဖၣ်လီၤ. အဒိ ဖဲစိၤအဝဲန့ၣ် စီၤၡ့ၣ်မ့ၢ်ပှၤလၢ အတီအလိၤတဂၤလီၤ. လၢစီၤနိအၤ အဖိသၢဂၤအကျါ စီၤၡ့ၣ်တမ့ၢ် ဖိဝဲၢ်ကိသနာ်က့ လံာ်စီဆှံပာ်ဖျါထီၣ်အမံၤ လၢအဆိကတၢၢ်အဃိ ဘၣ်သ့ၣ်သ့ၣ် အဝဲကမ့ၢ်ပှၤလၢ အအိၣ်ဒီးတၢ်နာ် လၢအဂၢၢ်ကျၢၤဒိၣ်ကတၢၢ်န့ၣ်လီၤ. * ဖဲထံလုၢ်ဘၢတၢ်ဝံၤအလီၢ်ခံန့ၣ် စီၤနိအၤကိးဝဲယဟိဝၤယွၤလၢ “စီၤၡ့ၣ်အကစၢ်” န့ၣ်လီၤ. (၁ မိၤ. ၉:၂၆) စီၤၡ့ၣ်ပာ်ဖျါထီၣ် တၢ်ပာ်ကဲယဟိဝၤယွၤ ဒီးပာ်လုၢ်ပာ်ပှ့ၤဝဲ တၢ်ဘူၣ်တၢ်ဘါအမ့ၢ်အတီန့ၣ်လီၤ.
၅ မ့ၢ်စီၤအၤဘြၤဟၣ် သ့ၣ်ညါစီၤၡ့ၣ်ဧါ. ဘၣ်သ့ၣ်သ့ၣ် အဝဲကသ့ၣ်ညါဝဲလီၤ. ထံၣ်ကမှံကွၢ် ဖဲစီၤအၤဘြၤဟၣ် မ့ၢ်ဖိသၣ်အဆၢကတီၢ်န့ၣ်တက့ၢ်. ဒီးဆိကမိၣ်ကွၢ် ဖဲအဝဲသ့ၣ်ညါထီၣ်ဝဲလၢ အဘူးအတံၢ်တဂၤ လၢအသးနံၣ် အိၣ်အါန့ၢ်အနံၣ် ၄၀၀ န့ၣ်အိၣ်မူးဒံးဝဲအဃိ စီၤအၤဘြၤဟၣ်ကပှဲၤဒီး တၢ်သူၣ်ပိၢ်သးဝးထဲလဲၣ်န့ၣ်တက့ၢ်. စီၤၡ့ၣ်ထံၣ်ဘၣ်ဝဲ တၢ်အၢတၢ်သီ တချုးလၢ ထံလုၢ်ဘၢတၢ်အဆၢကတီၢ် ဒီးတုၤလီၤလၢ ကစၢ်ယွၤသ့စီဝဲ ဟီၣ်ခိၣ်လၢထံန့ၣ်လီၤ. တကးဒံးဘၣ် ဖဲထံလုၢ်ဘၢတၢ်ဝံၤအလီၢ်ခံန့ၣ် အဝဲထံၣ်ဘၣ်ဝဲ ပှၤဟီၣ်ခိၣ်ဖိတဖၣ် ဟဲအါထီၣ်ဂီၢ်ထီၣ် လၢဟီၣ်ခိၣ်ချၢ ဒီးထံၣ်ဘၣ်စ့ၢ်ကီးဝဲ စီၤနံးမရိး တ့ထီၣ်ဝဲတၢးဘၤဘ့းလး ဒီးပူထီၣ်ထီဒါဝဲကစၢ်ယွၤလီၤ. စီၤၡ့ၣ်တပၣ်ဃုာ်လၢ ပှၤပူထီၣ်ထီဒါတၢ်အကျါ ဒီးတမၤစၢၤ ပှၤလၢအတ့ထီၣ်ဝဲ တၢးဘၤဘ့းလးစ့ၢ်ကီးဘၣ်. လၢတၢ်န့ၣ်အဃိ ဖဲကစၢ်ယွၤ မၤသဘံၣ်သဘုၣ်ဝဲ ကျိာ်အခါ စီၤၡ့ၣ်ဒီးအဟံၣ်ဖိဃီဖိ ကတိၤဒံးဝဲကျိာ်တခါဃီလၢ စီၤနိအၤကတိၤဝဲန့ၣ်လီၤ. ဒီးစီၤအၤဘြၤဟၣ်စ့ၢ်ကီး ကတိၤဝဲကျိာ်တကျိာ်ဃီဒ် စီၤၡ့ၣ်ကတိၤဝဲအသိးန့ၣ်လီၤ. ဖဲစီၤအၤဘြၤဟၣ် ဒိၣ်ထီၣ်ဝဲအဆၢကတီၢ်န့ၣ် စီၤၡ့ၣ်အိၣ်မူဒံးဝဲအဃိ အဝဲကပာ်ကဲဝဲ စီၤၡ့ၣ်ဒိၣ်မးလီၤ. ဒီးဘၣ်သ့ၣ်သ့ၣ် စီၤအၤဘြၤဟၣ်ကနၢ်ဟူဘၣ်ဝဲ ယဟိဝၤယွၤအဂ့ၢ် လၢစီၤၡ့ၣ်အအိၣ်န့ၣ်လီၤ.
စီၤအၤဘြၤဟၣ် ဟးဆှဲးဝဲတၢ်ဘူၣ်ထီၣ်ဘါထီၣ် တၢ်ဂီၤတၢ်ဖှီၣ်လၢ ဝ့ၢ်အူၢ်အပူၤ.
၆. (က) ခီဖျိလၢယဟိဝၤယွၤ လုၢ်ဘၢဝဲဟီၣ်ခိၣ်လၢထံအဃိ စီၤအၤဘြၤဟၣ်ဆၢတဲာ်လီၤအသးလၢ အကမၤဝဲတၢ်မနုၤလဲၣ်. (ခ) စီၤအၤဘြၤဟၣ်ဒီးနီၢ်စၤရါ အတၢ်အိၣ်မူ မၤအသးဒ်လဲၣ်.
၆ ခီဖျိလၢ ယဟိဝၤယွၤ လုၢ်ဘၢဝဲဟီၣ်ခိၣ်လၢထံအဃိ စီၤအၤဘြၤဟၣ်ဒိးန့ၢ်ဘၣ် တၢ်မၤလိဂ့ၤဂ့ၤလီၤ. လၢတၢ်န့ၣ်အဃိ စီၤအၤဘြၤဟၣ်ဂုာ်ကျဲးစၢး ဒိကနၣ် ကစၢ်ယွၤအကလုၢ် ဒ်စီၤနိအၤအသိး ဒီးအဝဲတဘူၣ်ထီၣ်ဘါထီၣ်ဝဲ တၢ်ဂီၤတၢ်ဖှီၣ်စ့ၢ်ကီးဘၣ်. မ့ၢ်လၢ စီၤအၤဘြၤဟၣ်အိၣ်ဒီး တၢ်နာ်ဂၢၢ်ဂၢၢ်ကျၢၤကျၢၤအဃိ အတၢ်အိၣ်မူလီၤဆီန့ၢ်ဒံး အဟံၣ်ဖိဃီဖိဒီး ပှၤလၢအအိၣ်လၢဝ့ၢ်အူၢ်အပူၤန့ၣ်လီၤ. လၢခံန့ၣ် စီၤအၤဘြၤဟၣ်ဒိးန့ၢ်ဘၣ်ဝဲ မါလၢအဂ့ၤတဂၤ ဒီးအမံၤမ့ၢ်ဝဲနီၢ်စၤရါန့ၣ်လီၤ. နီၢ်စၤရါမ့ၢ်ပိာ်မုၣ်လၢ အဃံအလၤတဂၤဒီး မ့ၢ်ပှၤလၢအိၣ်ဒီး တၢ်နာ်ဂၢၢ်ဂၢၢ်ကျၢၤကျၢၤ လၢယဟိဝၤယွၤအဖီခိၣ်စ့ၢ်ကီးလီၤ. * အဝဲသ့ၣ်ခံဂၤန့ၣ် အဖိတအိၣ်ဘၣ်ဆၣ် မၤဝဲယဟိဝၤယွၤ အတၢ်မၤလၢ တၢ်သူၣ်ဖှံသးညီအပူၤလီၤ. ဒီးလၢခံန့ၣ် အဝဲသ့ၣ် လုၢ်ဖိဝဲအဖိဒိၣ်ခွါ စီၤလိာ်န့ၣ်လီၤ.
၇. ယ့ၣ်ၡူးအပျဲၢ်အဘီၣ်တဖၣ် ကွၢ်လိမၤဒိးစီၤအၤဘြၤဟၣ်သ့လၢ ကျဲဒ်လဲၣ်
၇ စီၤအၤဘြၤဟၣ် တီဒီးယဟိဝၤယွၤထီဘိလီၤ. ဒီးအဝဲတဆိကမိၣ်ဝဲလၢ အကဘူၣ်ထီၣ်ဘါထီၣ်ဝဲ တၢ်ဂီၤတၢ်ဖှီၣ်ဒ်ပှၤအိၣ်လၢ ဝ့ၢ်အူၢ်အပူၤအသိး နီတဘျီဘၣ်. အဝဲဒီးအမါ နီၢ်စၤရါအိၣ်ဒီးတၢ်သးဒူအဃိ အဝဲသ့ၣ်အိၣ်လီၤဆီဒီးပှၤလၢ အဘူၣ်ထီၣ်ဘါထီၣ် တၢ်ဂီၤတၢ်ဖှီၣ်လၢ အဟီၣ်ကဝီၤအပူၤန့ၣ်လီၤ. ပဝဲစ့ၢ်ကီး ပကဘၣ်အိၣ်ဒီးတၢ်သးဒူ ဒ်သိးဒီးအဝဲသ့ၣ်လီၤ. ယ့ၣ်ၡူးစံးဝဲလၢ အပျဲၢ်အဘီၣ်တဖၣ် “တဘၣ်ဃးဘၣ်ဒီးဟီၣ်ခိၣ်” ဘၣ်. လၢတၢ်န့ၣ်အဃိ ဟီၣ်ခိၣ်ကသးဟ့အဝဲသ့ၣ်န့ၣ်လီၤ. (ဖး ယိၤဟၣ် ၁၅:၁၉ တက့ၢ်.) ဘၣ်သ့ၣ်သ့ၣ် ခီဖျိလၢ နဆၢတဲာ်လီၤနသးလၢ နကမၤတၢ်ဘၣ်ယဟိဝၤယွၤအသးအဃိ နဟံၣ်ဖိဃီဖိ မ့တမ့ၢ် ပှၤလၢနဟီၣ်ကဝီၤအပူၤန့ၣ် ကထီဒါနၤလီၤ. လၢတၢ်န့ၣ်အဃိ နကတူၢ်ဘၣ် တၢ်သူၣ်တမုာ်သးတမုာ် ဒီးနသးကဘၣ်ဒိဝဲဒိၣ်မးလီၤ. ဘၣ်ဆၣ် သ့ၣ်နီၣ်ထီၣ်က့ၤလၢ ပှၤလၢအကွၢ်ဆၢၣ်မဲာ်ဘၣ် တၢ်ကီတၢ်ခဲသ့ၣ်တဖၣ်အံၤန့ၣ် တမ့ၢ်ထဲနၤတဂၤဧိၤဘၣ်. နဆၢတဲာ်လီၤနသးလၢနကမၤ တၢ်ဘၣ်ယွၤအသးန့ၣ်, မ့ၢ်နကွၢ်လိမၤဒိး စီၤအၤဘြၤဟၣ်ဒီးနီၢ်စၤရါ အဒိအတဲာ်န့ၣ်လီၤ.
“ဟးထီၣ်ကွံာ်လၢ နထံနကီၢ်”
၈, ၉. (က) စီၤအၤဘြၤဟၣ်ထံၣ်ဘၣ်ဝဲ တၢ်မၤအသးတခါလၢ အသးပ့ၤနီၣ်ဝဲ တသ့နီတဘျီန့ၣ် မ့ၢ်မနုၤလဲၣ်. (ခ) ယဟိဝၤယွၤ ဆှၢလီၤတၢ်ကစီၣ် မနုၤလၢစီၤအၤဘြၤဟၣ် အအိၣ်လဲၣ်.
၈ ဘၣ်တနံၤန့ၣ် စီၤအၤဘြၤဟၣ်ထံၣ်ဘၣ်ဝဲ တၢ်မၤအသးတခါလၢ အသးပ့ၤနီၣ်ဝဲ တသ့နီတဘျီဘၣ်. ယဟိဝၤယွၤ ဆှၢလီၤဝဲတၢ်ကစီၣ် ဆူစီၤအၤဘြၤဟၣ်အအိၣ်လီၤ. ဒီးစီၤအၤဘြၤဟၣ်ဒိးန့ၢ်ဘၣ်ဝဲ တၢ်ကစီၣ်အံၤလၢကျဲဒ်လဲၣ်န့ၣ် လံာ်စီဆှံ တပာ်ဖျါထီၣ်ဝဲ လီၤတံၢ်လီၤဆဲးဘၣ်. ဘၣ်ဆၣ် လံာ်စီဆှံစံးဝဲလၢ “တၢ်လၤတၢ်ကပီၤအကစၢ်” လီၣ်ဖျါထီၣ်အသးလၢ စီၤအၤဘြၤဟၣ်အမဲာ်ညါန့ၣ်လီၤ. (ဖး မၤတၢ် ၇:၂, ၃ တက့ၢ်.) ဘၣ်သ့ၣ်သ့ၣ် ကစၢ်ယွၤကသူဝဲ မူခိၣ်ကလူးတဂၤလၢ ကဟဲတဲဘၣ်ဝဲ စီၤအၤဘြၤဟၣ်တၢ်ကစီၣ် လၢထးတခါအံၤန့ၣ်လီၤ. ဒီးလၢတဖျးမဲာ်အတီၢ်ပူၤန့ၣ် စီၤအၤဘြၤဟၣ်ကထံၣ်ဘၣ်ဝဲ တၢ်ဘၣ်တ့ကစၢ်လၢအမ့ၢ် ယဟိဝၤယွၤအလၤကပီၤ ခီဖျိလၢမူခိၣ်ကလူးတဂၤအံၤန့ၣ်လီၤ. ဖဲန့ၣ်အဆၢကတီၢ် စီၤအၤဘြၤဟၣ်ကသးခုဒိၣ်မး ခီဖျိလၢ အဝဲထံၣ်ဘၣ်ဝဲလၢယဟိဝၤယွၤ အိၣ်ဒီးတၢ်စိတၢ်ကမီၤအါမးလီၤ. မ့မ့ၢ်တၢ်ဂီၤတၢ်ဖှီၣ်လၢပှၤဝ့ၢ်အူၢ်ဖိဘူၣ်ထီၣ်ဘါထီၣ်ဝဲတဖၣ်န့ၣ် တမ့ၢ်တၢ်နီတမံၤဘၣ်.
၉ ယဟိဝၤယွၤ ဆှၢလီၤတၢ်ကစီၣ် မနုၤလၢစီၤအၤဘြၤဟၣ်အအိၣ်လဲၣ်. ကစၢ်ယွၤစံးဘၣ်အီၤလၢ “ဟးထီၣ်ကွံာ်လၢနထံနကီၢ်, ဒီးလၢနဘူးနတံၢ်အအိၣ်, ဒီးလဲၤဆူထံဆူကီၢ်လၢ ယကဒုးနဲၣ်နၤတက့ၢ်.” တၢ်လီၢ်လၢ စီၤအၤဘြၤဟၣ်ကဘၣ်လဲၤဝဲန့ၣ် ယဟိဝၤယွၤ တတဲဘၣ်အီၤလီၤတံၢ်လီၤဆဲးဘၣ်. တၢ်လၢစီၤအၤဘြၤဟၣ် ကဘၣ်မၤဝဲအဆိကတၢၢ်တခါန့ၣ် အဝဲကဘၣ်ပာ်တ့ၢ်ကွံာ် အတၢ်အိၣ်တၢ်ဆိးအလီၢ် ဒီးအဘူးအတံၢ်တဖၣ်န့ၣ်လီၤ. ဘၣ်ဆၣ် ဖဲန့ၣ်အခါ ပှၤမုၢ်ထီၣ်ဖိတဖၣ်ပာ်ဝဲ အဟံၣ်ဖိဃီဖိ ဒ်အမ့ၢ်တၢ်လၢအရ့ဒိၣ်ဒိၣ်မးလၢ အဝဲသ့ၣ်အဂီၢ်လီၤ. ခီဖျိလၢအဝဲသ့ၣ်အလုၢ်အလၢ်တဖၣ်အံၤအဃိ အဝဲသ့ၣ်ဆိကမိၣ်ဝဲလၢ ပိာ်ခွါတဂၤမ့ၢ်ဘၣ်ပာ်တ့ၢ်ကွံာ် အဘူးအတံၢ်တဖၣ် ဒီးမ့ၢ်ဘၣ်လဲၤအိၣ်လဲၤဆိးဝဲလၢ တၢ်လီၢ်လၢအယံၤန့ၣ် မ့ၢ်တၢ်ဟဲဝံဟဲစိာ်လၢအနးဝဲဒိၣ်မးလီၤ. ဒီးပှၤတနီၤထံၣ်ဝဲလၢ အဝဲမ့ၢ်ဘၣ်သံန့ၣ် ကဂ့ၤန့ၢ်အန့ၣ်တက့ၢ်လီၤ.
၁၀. ဘၣ်မနုၤအဃိ ပတဲသ့လၢ အဝဲသ့ၣ်ဟ့ၣ်လီၤအသးလၢ ယွၤအအိၣ်လၢာ်လၢာ်ဆ့ဆ့လဲၣ်.
၁၀ စီၤအၤဘြၤဟၣ် ကဘၣ်ပာ်တ့ၢ်ကွံာ် အဟံၣ်အဃီန့ၣ် ကီလၢအဂီၢ်ဒိၣ်မးလီၤ. ဒီးတၢ်အုၣ်အသးအိၣ်ဝဲလၢ ဝ့ၢ်အူၢ်န့ၣ်မ့ၢ်ဝ့ၢ်လၢ အပှဲၤဒီးတၢ်ထူးတၢ်တီၤ ဒီးတၢ်လဲၤထီၣ်လဲၤထီအိၣ်ဝဲအါမးလီၤ. (ကွၢ်တၢ်လွံၢ်နၢၣ်လၢ “ ဝ့ၢ်လၢ စီၤအၤဘြၤဟၣ်ဒီးနီၢ်စၤရါ ဟးထီၣ်ကွံာ်လၢအပူၤ” န့ၣ်တက့ၢ်.) လၢပျၢၤ ပသ့ၣ်ညါဘၣ်လၢ ဝ့ၢ်အူၢ်အပူၤန့ၣ် အိၣ်ဝဲဒီးဟံၣ်ဒိၣ်ကျိၤသွါ ဒီးကရၢၢ်ဖးလဲၢ်ဖးထီ လၢအဃံလၤန့ၣ်လီၤ. ဒီးဟံၣ်တနီၤန့ၣ် အဒၢးအိၣ်ဝဲ တဆံခံဒၢး ဒီးတနီၤန့ၣ်အဒၢးအိၣ် အါန့ၢ်တဆံခံဒၢးလၢ အဟံၣ်ဖိဃီဖိဒီးအခ့အပှၤတဖၣ် ကအိၣ်ဝဲဆိးဝဲအဂီၢ်လီၤ. ဒီးလၢဟံၣ်ပူၤန့ၣ် အိၣ်ဒီးဒၢးလၢပှၤတမှံၤတဖၣ် ကတဲသကိးတၢ်အဂီၢ်န့ၣ်လီၤ. တကးဒံးဘၣ် ပှၤဝ့ၢ်ဖိတဖၣ်ဒိးန့ၢ်ဘၣ်ထံညီဝဲ, အိၣ်ဒီးတၢ်ဟးလီၢ်ဒီး တၢ်လီၢ်လၢပှၤကမၤဟးဂီၤကွံာ် တၢ်ကမှံၤန့ၣ်လီၤ. ဒီးသ့ၣ်နီၣ်ထီၣ်က့ၤလၢ စီၤအၤဘြၤဟၣ်ဒီးနီၢ်စၤရါ တမ့ၢ်ပှၤသးစၢ်လၢၤဘၣ်. ဖဲန့ၣ်အခါ စီၤအၤဘြၤဟၣ်အသးနံၣ်ကအိၣ်ဝဲ ၇၀ ဘျဲၣ်ဒီးနီၢ်စၤရါန့ၣ်အသးနံၣ်ကအိၣ်ဝဲ ၆၀ ဘျဲၣ်န့ၣ်လီၤ. ဒ်ဝၤလၢအဂ့ၤတဂၤ အဲၣ်ဒိးလၢအမါကအိၣ်ဘၣ် ဂ့ၤဂ့ၤဒီးမုာ်မုာ်ခုၣ်ခုၣ်အသိး စီၤအၤဘြၤဟၣ်ကအဲၣ်ဒိးဝဲလၢ အမါကအိၣ်ဘၣ်ဒ်န့ၣ်စ့ၢ်ကီးလီၤ. ဆိကမိၣ်ကွၢ် ဖဲအဝဲသ့ၣ်ခံဂၤ တဲသကိးတၢ်ဘၣ်ဃးဒီး မူဒါလၢယဟိဝၤယွၤ ဟ့ၣ်လီၤအဝဲသ့ၣ်တက့ၢ်. အဝဲသ့ၣ် ကတဲသကိးဝဲ တၢ်ဂ့ၢ်ကီမ့တမ့ၢ် တၢ်လၢအဘၣ်ယိၣ်ဝဲတဖၣ်န့ၣ်လီၤ. ခီဖျိလၢ နီၢ်စၤရါဆီၣ်ထွဲအဝၤ ဒီးသးအိၣ်ပာ်တ့ၢ်ကွံာ် အဟံၣ်အဃီအဃိ စီၤအၤဘြၤဟၣ်ကသးခုဝဲဒီး စံးဘျုးအီၤဒိၣ်မးလီၤ.
၁၁, ၁၂. (က) တချုးလၢ စီၤအၤဘြၤဟၣ်ဒီးနီၢ်စၤရါ ဟးထီၣ်လၢ ဝ့ၢ်အူၢ်အပူၤန့ၣ် အဝဲသ့ၣ်ဘၣ်ရဲၣ်ကျဲၤတၢ်မနုၤလဲၣ်. ဒီးအဝဲသ့ၣ်ဘၣ်ဆၢတဲာ်လီၤအသးဘၣ်ဃးဒီး တၢ်ဂ့ၢ်မနုၤလဲၣ်. (ခ) မုၢ်နံၤလၢအဝဲသ့ၣ် ကဟးထီၣ်ဝဲလၢဝ့ၢ်အံၤအပူၤန့ၣ် တၢ်မၤအသးဒ်လဲၣ်န့ၣ် တဲဖျါထီၣ်တက့ၢ်.
၁၁ ဖဲစီၤအၤဘြၤဟၣ်ဒီးနီၢ်စၤရါ ဆၢတဲာ်လီၤအသးလၢ ကဟးထီၣ်ကွံာ်လၢ ဝ့ၢ်အူၢ်ပူၤဝံၤအလီၢ်ခံ တၢ်လၢအဝဲသ့ၣ် ကဘၣ်မၤဝဲန့ၣ်အိၣ်အါမးလီၤ. အဒိ အဝဲသ့ၣ် ကဘၣ်ဆၢတဲာ်ဝဲလၢ ကဘၣ်လဲၤစိာ်ဝဲ တၢ်မနုၤလဲၣ် ဒီးကဘၣ်ပာ်တ့ၢ်ဝဲ တၢ်မနုၤလဲၣ်န့ၣ်လီၤ. တကးဒံးဘၣ် အဝဲသ့ၣ်ကဘၣ်ရဲၣ်ကျဲၤတၢ်လၢ အဟံၣ်ဖိဃီဖိ, အခ့အပှၤတဖၣ် ဒီးအပၢ်စီၤတ့ရၤအဂီၢ်န့ၣ်လီၤ. ဒီးအဝဲသ့ၣ် ဆၢတဲာ်လီၤအသးလၢ ကလဲၤကိးဃုာ်ဒီးအပၢ် စီၤတ့ရၤဒ်သိးကကွၢ်ထွဲအီၤ တုၤအသံတစုန့ၣ်လီၤ. ဖျါလၢစီၤတ့ရၤ အၢၣ်လီၤဝဲလၢ အကလဲၤဃုာ်ဒီး စီၤအၤဘြၤဟၣ်လၢ တၢ်သူၣ်အိၣ်သးအိၣ်အပူၤလီၤ. မ့ၢ်လၢ လံာ်စီဆှံစံးဝဲလၢ စီၤတ့ရၤန့ၣ် မ့ၢ်ပှၤလၢ အကိးထီၣ်အဟံၣ်ဖိဃီဖိ ဒီးဟးထီၣ်ကွံာ် လၢဝ့ၢ်အူၢ်အပူၤန့ၣ်လီၤ. လၢတၢ်န့ၣ်အဃိ ဖဲန့ၣ်အဆၢကတီၢ် လီၤဂာ်လၢစီၤတ့ရၤန့ၣ် တဘူၣ်ထီၣ်ဘါထီၣ်ဝဲ တၢ်ဂီၤတၢ်ဖှီၣ်လၢၤဘၣ်. ဒီးစီၤအၤဘြၤဟၣ်အဖိဒိၣ်ခွါ စီၤလိာ် လဲၤဃုာ်တၢ်ဒီးအီၤစ့ၢ်ကီးလီၤ.—၁ မိၤ. ၁၁:၃၁.
၁၂ ခဲအံၤန့ၣ် တၢ်ဆၢကတီၢ်ဘၣ်လၢ အဝဲသ့ၣ်ကဘၣ်ဟးထီၣ် လၢဝ့ၢ်အူၢ်အပူၤလံ. ဆိကမိၣ်ကွၢ် ဖဲမုၢ်ဝါထီၣ်ကဒုကယီၢ် အဆၢကတီၢ်န့ၣ် ပှၤဂီၢ်မုၢ်ဖးဒိၣ်တဒူၣ် ဟဲပာ်ဖှိၣ်ထီၣ်အသးလၢ ဝ့ၢ်ခိၣ်ဒူအချၢ ဖဲထံကျိအကပၤန့ၣ်လီၤ. အဝဲသ့ၣ်ဟဲစိာ်ဃုာ်ဒီး အတၢ်ဖိတၢ်လံၤဒီဒူၣ်ဒီထၢလီၤ. တၢ်ဖိတၢ်လံၤတဖၣ်အံၤန့ၣ် ပာ်ထီၣ်ဝဲလၢ ကီၤလၤအူးဒီးကသ့ၣ်ယီၤတဖၣ် အဖီခိၣ်လီၤ. ခဲအံၤစီၤအၤဘြၤဟၣ် အဟံၣ်ဖိဃီဖိဒီး အခ့အပှၤတဖၣ် ကတဲာ်ကတီၤထီၣ်အသးဝံၤဝဲလံ. ဒီးအဝဲသ့ၣ်အိၣ်ဒီး တၢ်သူၣ်ပိၢ်သးဝးလၢ တၢ်လဲၤတၢ်က့ၤတဘျီအံၤအဂီၢ်လီၤ. * ဘၣ်သ့ၣ်သ့ၣ် အဝဲသ့ၣ်ကိးဂၤဒဲး ကကျ့ၣ်ထီၣ်အမဲာ် ဒီးကွၢ်ဃီၤတၢ်ဆူ စီၤအၤဘြၤဟၣ်အအိၣ်လီၤ. ဒီးဖဲစီၤအၤဘြၤဟၣ် ဟ့ၣ်ထီၣ်ဝဲတၢ်ပနီၣ်အခါ အဝဲသ့ၣ် စးထီၣ်လဲၤတၢ် ဒီးပာ်တ့ၢ်ကွံာ်ဝ့ၢ်အူၢ်န့ၣ်လီၤ.
၁၃. မုၢ်မဆါတနံၤအံၤ ယွၤအခ့အပှၤတဖၣ် တူၢ်ဆါအသး ဒ် စီၤအၤဘြၤဟၣ်ဒီးနီၢ်စၤရါ သ့လၢကျဲဒ်လဲၣ်.
၁၃ မုၢ်မဆါတနံၤအံၤ ယဟိဝၤယွၤ အခ့အပှၤအါဂၤန့ၣ် ဆၢတဲာ်လီၤအသးလၢ ကလဲၤသုးအသးဆူ တၢ်လီၢ်လၢပှၤလိၣ်ဘၣ် ပှၤစံၣ်တဲၤတဲလီၤတၢ်ဖိ အလီၢ်န့ၣ်လီၤ. ပှၤတနီၤနီၤန့ၣ် မၤလိဝဲကျိာ်လၢအဂၤ ဒ်သိးကမၤဂုၤထီၣ်ပသီထီၣ်ဝဲ တၢ်စံၣ်တဲၤတဲလီၤတၢ်မၤန့ၣ်လီၤ. ဒီးအဂၤတနီၤန့ၣ် ဂုာ်ကျဲးစၢး စံၣ်တဲၤတဲလီၤတၢ်လၢ ကျဲအဂုၤအဂၤလၢ အဝဲသ့ၣ်တမၤညီနုၢ်ဝဲန့ၣ်လီၤ. ဒီးပှၤလၢအဆၢတဲာ်လီၤအသးဒ်အံၤန့ၣ် တူၢ်ဆါအသးဒ်သိး ကမၤဒိၣ်ထီၣ်ထီထီၣ်ဝဲ တၢ်စံၣ်တဲၤတဲလီၤတၢ်မၤအဂီၢ်န့ၣ်လီၤ. ပှၤသ့ၣ်တဖၣ်အံၤ ကွၢ်လိမၤဒိးဝဲ စီၤအၤဘြၤဟၣ်ဒီးနီၢ်စၤရါ အဒိအတဲာ်အဃိ မ့ၢ်တၢ်လၢအလီၤစံးပတြၢၤဒိၣ်မးန့ၣ်လီၤ. ဒီးပမ့ၢ်ပာ်ဖျါထီၣ် ပတၢ်နာ်လၢကျဲဒ်အံၤန့ၣ် ကစၢ်ယွၤကဟ့ၣ်က့ၤပှၤ အါန့ၢ်ဒံးတၢ်လၢ ပဟ့ၣ်အီၤန့ၣ်လီၤ. (ဧ့ၤ. ၆:၁၀; ၁၁:၆) မ့ၢ်ကစၢ်ယွၤ ဆိၣ်ဂ့ၤစီၤအၤဘြၤဟၣ်စ့ၢ်ကီးဧါ.
ခီဂာ်ထံကျိ ဖရၤသး
၁၄, ၁၅. အဝဲသ့ၣ်လဲၤတၢ် စးထီၣ်လၢ ဝ့ၢ်အူၢ်တုၤလီၤလၢဝ့ၢ်ဟၤရၣ်န့ၣ် တၢ်မၤအသးဒ်လဲၣ်, ဒီးစီၤအၤဘြၤဟၣ် သူၣ်လီၤအတၢ်အိၣ်တၢ်ဆိး အလီၢ်လၢဝ့ၢ်ဟၤရၣ်န့ၣ် ကမ့ၢ်လၢတၢ်ဂ့ၢ်မနုၤအဃိလဲၣ်.
၁၄ ပှၤဂီၢ်မုၢ်တဒူၣ်အံၤ လဲၤတၢ်က့ၤတၢ်ဖးယံာ်လံ. ပထံၣ်ကမှံကွၢ်သ့လၢ တဘျီတခီၣ်န့ၣ် စီၤအၤဘြၤဟၣ်ဒီးနီၢ်စၤရါ ကဒိးဝဲကီၤလၤအူး မ့တမ့ၢ်ကသ့ၣ်ယီၤ ဒီးတဘျီတခီၣ်န့ၣ် အဝဲသ့ၣ်ကဟးဝဲလၢအခီၣ်လီၤ. ဖဲအဝဲသ့ၣ် တဲသကိးတၢ်အခါန့ၣ် ဆၣ်ဖိကီၢ်ဖိအကနူး ကသီၣ်ဝဲကြ့ကြ့ကြိကြိစ့ၢ်ကီးလီၤ. ဒ်တၢ်ဆၢကတီၢ်လဲၤပူၤကွံာ်ဝဲအသိး ပှၤဂီၢ်မုၢ်သ့ၣ်တဖၣ် အတၢ်သ့တၢ်ဘၣ် ကအါထီၣ်ဝဲလၢ ကတ့ထီၣ်ဝဲယၣ်ဒဲလၢ ကသုးအလီၢ်တဆီဘၣ်တဆီအဂီၢ်လီၤ. ဒီးအဝဲသ့ၣ်ကဘၣ်ကတဲာ်ကတီၤန့ၢ်ဝဲ သးပှၢ်စီၤတ့ရၤအလီၢ်လၢ ကီၤလၤအူး မ့တမ့ၢ်ကသ့ၣ်ယီၤအဖီခိၣ် ဒ်လဲၣ်ဒ်လဲၣ်န့ၣ် အဝဲသ့ၣ်သ့ၣ်ညါဝဲလံ. အဝဲသ့ၣ်လဲၤတၢ်လၢ မုၢ်နုာ်ကလံၤစိးတကပၤ ဒီးလဲၤပိာ်ဝဲထံကျိဖရၤသးန့ၣ်လီၤ. အဝဲသ့ၣ်လဲၤတၢ် ယံာ်ဝဲအနွံအါမးလံ ဘၣ်ဆၣ်ဆဲးလဲၤဒံးဝဲဆူညါကွ့ၢ်ကွ့ၢ်လီၤ.
၁၅ ဖဲအဝဲသ့ၣ်လဲၤတၢ် တၢ်ဒ့ၣ်စၢၤယံၤဝဲ ၆၀၀ မံးလာ်ဃၣ်ဃၣ်ဝံၤအလီၢ်ခံန့ၣ် အဝဲသ့ၣ်လဲၤတုၤလၢ ဝ့ၢ်ဟၤရၣ်ဒီးထံၣ်ဘၣ်ဝဲဒဲဖိတဖၣ်လီၤ. ဝ့ၢ်ဟၤရၣ်န့ၣ် မ့ၢ်ဝ့ၢ်လၢအအိၣ်ဒီးတၢ်လဲၤထီၣ်လဲၤထီ တကးဒံးဘၣ် ပှဲၤဝဲဒီးပှၤမုၢ်ထီၣ်ဖိ ဒီးပှၤမုၢ်နုာ်ဖိတဖၣ် လၢအဟဲပှ့ၤတၢ်ဆါတၢ်လၢအပူၤန့ၣ်လီၤ. စီၤအၤဘြၤဟၣ် သူၣ်လီၤဝဲအတၢ်အိၣ်တၢ်ဆိးအလီၢ် ဖဲဝ့ၢ်တဖျၢၣ်အံၤအပူၤ တစိၢ်တလီၢ်လီၤ. ဘၣ်သ့ၣ်သ့ၣ် မ့ၢ်လၢအပၢ်စီၤတ့ရၤ လဲၤတၢ်ဆူညါတကဲလၢၤဘၣ်အဃိလီၤ.
၁၆, ၁၇. (က) တၢ်အၢၣ်လီၤအီလီၤလၢ အထိၣ်ဟူးထိၣ်ဂဲၤထီၣ် စီၤအၤဘြၤဟၣ်အသးန့ၣ် မ့ၢ်မနုၤလဲၣ်. (ခ) ဖဲစီၤအၤဘြၤဟၣ် အိၣ်လၢဝ့ၢ်ဟၤရၣ်အခါ ယဟိဝၤယွၤ ဆိၣ်ဂ့ၤအီၤဒ်လဲၣ်.
၁၆ စီၤတ့ရၤသံဝဲလၢ ဝ့ၢ်ဟၤရၣ်အပူၤ ဖဲအသးအိၣ် ၂၀၅ နံၣ်န့ၣ်လီၤ. (၁ မိၤ. ၁၁:၃၂) ဒီးစီၤအၤဘြၤဟၣ် အသးဘၣ်ဒိဘၣ်ထံးဝဲဒိၣ်မးလီၤ. ဘၣ်ဆၣ် ခီဖျိလၢ ယဟိဝၤယွၤဆဲးကျိးဒီးအီၤလၢအသီတဘျီ အဃိ စီၤအၤဘြၤဟၣ်ဒိးန့ၢ်ဘၣ်ဝဲ တၢ်သူၣ်မံသးမုာ်လီၤ. ဒီးကစၢ်ယွၤ ဒုးသ့ၣ်နီၣ်ထီၣ်က့ၤ စီၤအၤဘြၤဟၣ်ဘၣ်ဃးဒီးတၢ်လၢ အဝဲကဘၣ်မၤဝဲန့ၣ်လီၤ. တကးဒံးဘၣ် ကစၢ်ယွၤအၢၣ်လီၤအီလီၤဝဲလၢ စီၤအၤဘြၤဟၣ်ကကဲထီၣ် “ပှၤတကလုာ်ဖးဒိၣ်” ဒီးပှၤဟီၣ်ခိၣ်ဖိ ကိးဒူၣ်ဒဲး ကဒိးန့ၢ်ဘၣ် တၢ်ဆိၣ်ဂ့ၤလၢအဃိလီၤ. (ဖး ၁ မိၤၡ့ ၁၂:၂, ၃ တက့ၢ်.) ကစၢ်ယွၤအတၢ်အၢၣ်လီၤအီလီၤအံၤ ကထိၣ်ဟူးထိၣ်ဂဲၤထီၣ် စီၤအၤဘြၤဟၣ်အသး လၢအဝဲကဆဲးလဲၤတၢ် ဆူညါအဂီၢ်လီၤ.
၁၇ ဖဲစီၤအၤဘြၤဟၣ် အိၣ်လၢဝ့ၢ်ဟၤရၣ်အခါ ကစၢ်ယွၤဆိၣ်ဂ့ၤအီၤအါမးအဃိ လၢအတၢ်လဲၤတၢ်က့ၤ တဘျီအံၤအဂီၢ် ကဘၣ်စိာ်ဝဲ တၢ်ဖိတၢ်လံၤအါန့ၢ်ဒံးလၢညါတဘျီန့ၣ်လီၤ. လံာ်စီဆှံပာ်ဖျါထီၣ်ဝဲလၢ စီၤအၤဘြၤဟၣ်လဲၤစိာ်ဝဲ “ကယဲၢ်တၢ်ဖိတၢ်လံၤလၢ အမၤန့ၢ်ဝဲ, ဒီးပှၤအသးလၢအန့ၢ်ဘၣ်ဝဲလၢ ဟၤရၣ်အပူၤ” ခဲလၢာ်လီၤ. (၁ မိၤ. ၁၂:၅) ဒ်သိး စီၤအၤဘြၤဟၣ် ကကဲထီၣ်ပှၤကလုာ်ဖးဒိၣ်တဒူၣ်အဂီၢ် အဝဲလိၣ်ဘၣ်ဝဲ တၢ်ထူးတၢ်တီၤ ဒီးအခ့အပှၤတဖၣ်လီၤ. ယဟိဝၤယွၤန့ၣ် တဆိၣ်ဂ့ၤဝဲ အခ့အပှၤကိးဂၤဒဲးလၢ အကကဲဒိၣ်ထီၣ်ဝဲအဂီၢ်ဘၣ်. ဘၣ်ဆၣ်သနာ်က့ ဒ်သိး အတၢ်တိာ်ပာ်ကလၢထီၣ်ပှဲၤထီၣ်အဂီၢ် ယွၤဟ့ၣ်လီၤအခ့အပှၤတဖၣ်လၢ တၢ်လၢအဝဲသ့ၣ်လိၣ်ဘၣ်ဝဲန့ၣ်လီၤ. စီၤအၤဘြၤဟၣ်တီခိၣ်ရိၤမဲဝဲ အပှၤဂီၢ်မုၢ်တဖၣ်ဒီး ဆဲးလဲၤဝဲဆူတၢ်လီၢ်လၢ အဝဲသ့ၣ်တသ့ၣ်ညါဝဲန့ၣ်လီၤ.
စီၤအၤဘြၤဟၣ်ဒီးနီၢ်စၤရါ ဘၣ်ပာ်တ့ၢ်ကွံာ် အတၢ်အိၣ်တၢ်ဆိးအလီၢ် လၢဝ့ၢ်အူၢ်ပူၤအဃိ တမ့ၢ်တၢ်အညီလၢ အဝဲသ့ၣ်အဂီၢ်ဘၣ်.
၁၈. (က) မုၢ်နံၤမုၢ်သီလၢ အရ့ဒိၣ်လၢ ကစၢ်ယွၤဒီးအခ့အပှၤတဖၣ်အဂီၢ်န့ၣ် မ့ၢ်မုၢ်နံၤဖဲလဲၣ်တနံၤလဲၣ်. (ခ) လၢခံ ဖဲလါနံစၣ် ၁၄ သီအနံၤန့ၣ် တၢ်မၤအသးအရ့ဒိၣ်လၢအဂုၤအဂၤ မနုၤတဖၣ်ဟဲကဲထီၣ်အသးလဲၣ်. (ကွၢ်တၢ်လွံၢ်နၢၣ်လၢ “မုၢ်နံၤမုၢ်သီ အရ့ဒိၣ်တနံၤလၢ လံာ်စီဆှံအပူၤ” တက့ၢ်.)
၁၈ ဖဲအဝဲသ့ၣ် ဟးထီၣ်လၢ ဝ့ၢ်ဟၤရၣ်အပူၤ စှၤသီဝံၤအလီၢ်ခံန့ၣ် လဲၤတုၤဝဲလၢ ဝ့ၢ်ကၢ်ကမံၣ်အပူၤလီၤ. ပှၤလဲၤတၢ်ဖိတဖၣ် ညီနုၢ်ခီဂာ်ဝဲထံကျိ ဖရၤသး လၢဝ့ၢ်အံၤအပူၤလီၤ. ဒီးဖဲစီၤအၤဘြၤဟၣ် ဒီးအပှၤဂီၢ်မုၢ် ခီဂာ်ဝဲထံကျိအံၤအခါ ကဘၣ်ဖဲ ချ.ခ.န ၁၉၄၃, လါနံစၣ် ၁၄ သီအနံၤန့ၣ်လီၤ. (၂ မိၤ. ၁၂:၄၀-၄၃) မုၢ်နံၤမုၢ်သီအဝဲအံၤန့ၣ် အရ့ဒိၣ်လၢကစၢ်ယွၤ ဒီးအခ့အပှၤတဖၣ်အဂီၢ်လီၤ. မ့ၢ်လၢကစၢ်ယွၤအတၢ်အၢၣ်လီၤအီလီၤ ဒီး စီၤအၤဘြၤဟၣ်န့ၣ် ဘၣ်တၢ်ပာ်ဂၢၢ်ပာ်ကျၢၤအီၤ ဖဲတၢ်ဆၢကတီၢ်အဝဲန့ၣ်လီၤ. ဖဲစီၤအၤဘြၤဟၣ်ဒီးအပှၤဂီၢ်မုၢ်ခီဂာ်ဝဲ ထံကျိဝံၤအလီၢ်ခံ အဝဲသ့ၣ်မ့ၢ်ကွၢ်စိဃီၤတၢ်ဆူ ကလံၤထံးတကပၤန့ၣ် ကထံၣ်ဘၣ်ဝဲ ထံကီၢ်လၢ ကစၢ်ယွၤအၢၣ်လီၤဝဲလၢ အကဒုးနဲၣ် စီၤအၤဘြၤဟၣ်န့ၣ်လီၤ.
၁၉. ဖဲယဟိဝၤယွၤအၢၣ်လီၤအီလီၤ စီၤအၤဘြၤဟၣ်အဆၢကတီၢ် အဝဲတဲဖျါထီၣ်စ့ၢ်ကီးဝဲ တၢ်ဂ့ၢ်လၢအဂၤမနုၤတမံၤလဲၣ်, ဒီးစီၤအၤဘြၤဟၣ် ကသ့ၣ်နီၣ်ထီၣ်က့ၤဝဲ တၢ်မနုၤလဲၣ်.
၁၉ စီၤအၤဘြၤဟၣ်ကွၢ်တၢ်လၢ ကလံၤထံးတကပၤ ဒီးဆဲးလဲၤတၢ်ဆူညါလီၤ. တယံာ်တမီၢ်န့ၣ် အဝဲသ့ၣ်လဲၤတုၤဝဲလၢ မိၤရံယၤသ့ၣ်ထူၣ်ဖးဒိၣ်တဖၣ်အကပၤ လၢအဘူးဒီးဝ့ၢ်ၡက့ၣ်န့ၣ်လီၤ. ဒီးပှၤဂီၢ်မုၢ်တဖၣ် အိၣ်ဘှံးအိၣ်သါဝဲဖဲန့ၣ်လီၤ. ဖဲန့ၣ်အခါ ယဟိဝၤယွၤ ဆဲးကျိးဒီးစီၤအၤဘြၤဟၣ် လၢအသီတဘျီန့ၣ်လီၤ. တဘျီညါအံၤ ဖဲကစၢ်ယွၤအၢၣ်လီၤအီလီၤ စီၤအၤဘြၤဟၣ်အဆၢကတီၢ်န့ၣ် အဝဲတဲဖျါထီၣ်ဝဲလၢ စီၤအၤဘြၤဟၣ်အချံအသၣ် ကန့ၢ်သါဘၣ် ထံကီၢ်တဘ့ၣ်အံၤန့ၣ်လီၤ. ဖဲကစၢ်ယွၤတဲအီၤဒ်န့ၣ်အခါ ဘၣ်သ့ၣ်သ့ၣ် စီၤအၤဘြၤဟၣ်ကသ့ၣ်နီၣ်ထီၣ်က့ၤ ‘ချံသၣ်’ မ့တမ့ၢ် စၢၤသွဲၣ် လၢကမၤထူၣ်ဖျဲးထီၣ်ဝဲ ပှၤဟီၣ်ခိၣ်ဖိလၢ ကစၢ်ယွၤအၢၣ်လီၤတ့ၢ်ဝဲဖဲ ဧ့ၤဒ့ၣ်တၤသၣ်အလီၢ်န့ၣ်လီၤ. (၁ မိၤ. ၃:၁၅; ၁၂:၇) ဘၣ်ဃးဒီးချံသၣ်အတၢ်စံးပာ်န့ၣ် ဘၣ်သ့ၣ်သ့ၣ် စီၤအၤဘြၤဟၣ်ကနၢ်ပၢၢ်ထီၣ်ဝဲလၢ အဘၣ်ထွဲလိာ်အသးဒီးအီၤစ့ၢ်ကီးလီၤ.
၂၀. စီၤအၤဘြၤဟၣ် ပာ်လုၢ်ပာ်ပှ့ၤဝဲတၢ်ခွဲးတၢ်ယာ်လၢ ယဟိဝၤယွၤ ဟ့ၣ်လီၤအီၤန့ၣ် ပာ်ဖျါထီၣ်ဝဲဒ်လဲၣ်.
၂၀ စီၤအၤဘြၤဟၣ် ပာ်လုၢ်ပာ်ပှ့ၤဝဲ တၢ်ခွဲးတၢ်ယာ်အံၤလၢ ယဟိဝၤယွၤဟ့ၣ်လီၤအီၤန့ၣ်လီၤ. ဖဲစီၤအၤဘြၤဟၣ်ဟးဝဲလၢ ကီၢ်ပူၤအံၤအခါ အဝဲအိၣ်ဒီး တၢ်ပလီၢ်သူၣ်ပလီၢ်သး မ့ၢ်လၢပှၤကနၤဧၣ်ဖိ အိၣ်ဝဲအဃိန့ၣ်လီၤ. ဒီးဖဲစီၤအၤဘြၤဟၣ် အိၣ်ပတုာ်ဝဲအဆၢကတီၢ်န့ၣ် တ့ထီၣ်ဝဲတၢ်လုၢ်လီၢ် လၢယဟိဝၤယွၤအဂီၢ်လီၤ. အဝဲတ့ထီၣ်ဝဲအဆိကတၢၢ်တခါန့ၣ် ဘူးဒီးမိၤရံယၤအသ့ၣ်ထူၣ်ဖးဒိၣ်တဖၣ် ဒီးခံခါတခါန့ၣ် ဘူးဒီးဝ့ၢ်ဘ့ၤသ့လးန့ၣ်လီၤ. စီၤအၤဘြၤဟၣ် ကိးထီၣ်ကစၢ်ယွၤအမံၤ ဒီးဖဲအဝဲဆိကမိၣ်ထီၣ်ဝဲ အဖိအလံၤအတၢ်အိၣ်မူလၢ ခါဆူညါအဂ့ၢ်န့ၣ် စံးဘျုးစံးဖှိၣ်ဝဲယဟိဝၤယွၤ လၢအသးဒီဖျၢၣ်လီၤ. ဘၣ်သ့ၣ်သ့ၣ် အဝဲကစံၣ်တဲၤတဲလီၤတၢ်လၢ ပှၤကနၤဧၣ်ဖိတဖၣ်အအိၣ်စ့ၢ်ကီးလီၤ. (ဖး ၁ မိၤၡ့ ၁၂:၇, ၈ တက့ၢ်.) တၢ်လၢအကမၤကွၢ် စီၤအၤဘြၤဟၣ် အတၢ်နာ်န့ၣ်အိၣ်ဒံးဝဲအါမးလီၤ. ဘၣ်ဆၣ် အဝဲတကွၢ်ကဒါက့ၤ တၢ်ဆူအလီၢ်ခံဘၣ်. လၢန့ၣ်အမဲာ်ညါ အဝဲကွၢ်စိဃီၤတၢ် ဆူမဲာ်ညါန့ၣ်လီၤ. ဧ့ၤဘြံၤ ၁၁:၁၀ စံးဝဲလၢစီၤအၤဘြၤဟၣ်– “ကွၢ်လၢ်ဝ့ၢ်တဖျၢၣ်လၢ အအိၣ်ဒီးအခီၣ်ထံးတဖၣ်, လၢပှၤသူၣ်အီၤဒီးတ့အီၤတဂၤန့ၣ်, မ့ၢ်ယွၤလီၤ.”
၂၁. ဘၣ်ဃးဒီးယွၤအဘီအမုၢ်န့ၣ် ယွၤအခ့အပှၤလၢ မုၢ်မဆါတနံၤအံၤ သ့ၣ်ညါနၢ်ပၢၢ်ဝဲအါန့ၢ်ဒံး စီၤအၤဘြၤဟၣ်ဒ်လဲၣ်, ဒီးတၢ်အံၤ ကြၢးထိၣ်ဟူးထိၣ်ဂဲၤထီၣ်နၤဒ်လဲၣ်.
၂၁ ဧ့ၤဘြံၤ ၁၁:၁၀ ပာ်ဖျါထီၣ်ဝဲ “ဝ့ၢ်” န့ၣ်အဲၣ်ဒိးစံးဝဲလၢယွၤအဘီအမုၢ်န့ၣ်လီၤ. ဒီးဘၣ်ဃးဒီးယွၤအဘီအမုၢ်န့ၣ် ယဟိဝၤယွၤ အခ့အပှၤလၢ မုၢ်မဆါတနံၤအံၤ သ့ၣ်ညါနၢ်ပၢၢ်ဝဲ အါန့ၢ်စီၤအၤဘြၤဟၣ်လီၤ. ခဲအံၤန့ၣ် ပနၢ်ပၢၢ်လၢ ယွၤအဘီအမုၢ်ပၢတၢ်လၢ မူခိၣ်ဒီးတယံာ်တမီၢ်န့ၣ် ဘီမုၢ်အံၤကမၤကတၢၢ်ကွံာ် မုၣ်ကီၤလံၢ်အတၢ်ရဲၣ်တၢ်ကျဲၤ လၢဟီၣ်ခိၣ်အံၤန့ၣ်လီၤ. ဒီးပသ့ၣ်ညါဘၣ်လၢ စီၤအၤဘြၤဟၣ် အချံအသၣ်လၢ တၢ်စံးပာ်တ့ၢ်အီၤန့ၣ် မ့ၢ်ဝဲယ့ၣ်ၡူး ဒီးခဲအံၤအဝဲပၢတၢ်လၢ ယွၤအဘီအမုၢ်ပူၤလီၤ. တကးဒံးဘၣ် စီၤအၤဘြၤဟၣ် မ့ၢ်ဂဲၤဆၢထၢၣ်သမူထီၣ်က့ၤန့ၣ် မ့ၢ်တၢ်ခွဲးတၢ်ယာ်ဖးဒိၣ် တခါလၢပကထံၣ်ဘၣ်အီၤန့ၣ်လီၤ. ဖဲစီၤအၤဘြၤဟၣ် သမူထီၣ်က့ၤအဆၢကတီၢ် အဝဲကသ့ၣ်ညါနၢ်ပၢၢ်ဘၣ်ဝဲလၢ ကစၢ်ယွၤအတၢ်တိာ်ပာ်န့ၣ် ဟဲလၢထီၣ်ပှဲၤထီၣ်ဝဲဒ်လဲၣ်အဂ့ၢ်န့ၣ်လီၤ. မ့ၢ်နအဲၣ်ဒိးထံၣ်ဘၣ်လၢ ယဟိဝၤယွၤ ကမၤလၢပှဲၤထီၣ် အတၢ်စံးပာ်ခဲလၢာ်ဧါ. နမ့ၢ်အဲၣ်ဒိးထံၣ်န့ၣ် ကွၢ်လိမၤဒိး စီၤအၤဘြၤဟၣ်တက့ၢ်. ဟ့ၣ်လီၤနသးလၢ နကမၤယွၤအတၢ်ဖံးတၢ်မၤ, အိၣ်ဒီးတၢ်ဒိကနၣ် ဒီးစံးဘျုးယဟိဝၤယွၤလၢ နတၢ်ထုကဖၣ်အပူၤ ခီဖျိလၢအဟ့ၣ်လီၤနၤမူဒါတဖၣ်န့ၣ်တက့ၢ်. စီၤအၤဘြၤဟၣ်မ့ၢ် “ကယဲၢ်ပှၤနာ်တၢ် . . . ခဲလၢာ်အပၢ်” လီၤ. လၢတၢ်န့ၣ်အဃိ နမ့ၢ်ကွၢ်လိမၤဒိး အတၢ်နာ်န့ၣ် အဝဲကကဲထီၣ် ဒ်သိးဒီးနပၢ်တဂၤလီၤ.
^ လံာ်အဆၢ. 1 ဖဲန့ၣ်အဆၢကတီၢ် စီၤအၤဘြၤဟၣ်န့ၣ် ဘၣ်တၢ်ကိးအမံၤလၢ စီၤအၤဘြၣ်လီၤ. ဒ်တၢ်ဆၢကတီၢ်လဲၤပူၤကွံာ်ဝဲအသိး ကစၢ်ယွၤဆီတလဲအမံၤဆူ စီၤအၤဘြၤဟၣ်လီၤ. မံၤအံၤအခီပညီမ့ၢ်ဝဲ “ပှၤအါကလုာ်အပၢ်” န့ၣ်လီၤ.—၁ မိၤ. ၁၇:၅.
^ လံာ်အဆၢ. 4 ဒ်န့ၣ်အသိး စီၤအၤဘြၤဟၣ် တမ့ၢ်စီၤတ့ရၤ အဖိခွါဝဲၢ်ကိသနာ်က့ လံာ်စီဆှံပာ်ဖျါထီၣ်ဝဲ အမံၤလၢ အဆိကတၢၢ်န့ၣ်လီၤ.
^ လံာ်အဆၢ. 6 ဖဲန့ၣ်အဆၢကတီၢ် နီၢ်စၤရါန့ၣ် ဘၣ်တၢ်ကိးအမံၤလၢ နီၢ်စၤရဲလီၤ. ဒ်တၢ်ဆၢကတီၢ်လဲၤပူၤကွံာ်ဝဲအသိး ကစၢ်ယွၤဆီတလဲအမံၤဆူ နီၢ်စၤရါလီၤ. မံၤအံၤအခီပညီမ့ၢ်ဝဲ “နီၢ်ပၤမုၣ်” န့ၣ်လီၤ.—၁ မိၤ. ၁၇:၁၅.
^ လံာ်အဆၢ. 12 ပှၤကူၣ်ဘၣ်ကူၣ်သ့တနီၤ ဆိကမိၣ်ဝဲလၢ စီၤအၤဘြၤဟၣ်အစိၤန့ၣ် ပှၤတဘုၣ်ဝဲ ကီၤလၤအူးလၢဟံၣ်ဘၣ်. ဘၣ်ဆၣ် လၢတၢ်ဂ့ၢ်အံၤအဖီခိၣ်န့ၣ် အဝဲသ့ၣ် တအိၣ်ဒီးတၢ်အုၣ်အသးနီတမံၤဘၣ်. မ့မ့ၢ်လံာ်စီဆှံန့ၣ် ပာ်ဖျါထီၣ်ဝဲလၢ စီၤအၤဘြၤဟၣ် ဘုၣ်ဝဲကီၤလၤအူးန့ၣ်လီၤ. —၁ မိၤ. ၁၂:၁၆; ၂၄:၃၅.
You May Also Like
တၢ်ဂီၤမူတဖၣ်
ကွၢ်လိမၤဒိးအဝဲသ့ၣ်အတၢ်နာ်—စီၤအၤဘြၤဟၣ်, အကူာ် ၁
လၢတၢ်ဂီၤမူအံၤအပူၤ ပကထံၣ်ဘၣ်လၢ စီၤအၤဘြၤဟၣ်နာ်ဝဲလၢ တၢ်လၢယဟိဝၤယွၤ အၢၣ်လီၤဝဲခဲလၢာ် ကလၢပှဲၤထီၣ်.
တၢ်ဂီၤမူတဖၣ်
ကွၢ်လိမၤဒိး အဝဲသ့ၣ်အတၢ်နာ်—စီၤအၤဘြၤဟၣ်, အကူာ် ၂
လၢတၢ်ဂီၤမူအံၤအပူၤ ပကထံၣ်ဘၣ်လၢ စီၤအၤဘြၤဟၣ် ဒိးန့ၢ်ဘၣ် တၢ်ဆိၣ်ဂ့ၤ တကးဒံးဘၣ် ပှၤဟီၣ်ခိၣ်ဖိ လၢဟီၣ်ခိၣ်ဒီဘ့ၣ် န့ၢ်ဘၣ်တၢ်ဆိၣ်ဂ့ၤလၢအဃိ.
လံာ်စီဆှံ အတၢ်သိၣ်လိတဖၣ်
တၢ်ပီးတၢ်လီတဖၣ်လၢ တၢ်မၤလိလံာ်စီဆှံအဂီၢ်
ဒ်သိး နမၤလိလံာ်စီဆှံကမုာ် ဒီးကထုးန့ၢ်နသးအဂီၢ် ဃုထၢ တၢ်ပီးတၢ်လီလၢ တၢ်မၤလိလံာ်စီဆှံအဂီၢ် တဖၣ်အံၤတက့ၢ်.
လံာ်စီဆှံ အတၢ်သိၣ်လိတဖၣ်
မၤလိကွၢ် လံာ်စီဆှံဒီးပှၤ
မၤလိသကိး တၢ်မၤလိလံာ်စီဆှံ လၢတလိၣ်ဟ့ၣ်စ့ဘၣ်ဒီး ပှၤလၢအကမၤလိနၤ လံာ်စီဆှံတဂၤ.
