တၢ်မၤလိ ၁၉
ဒ်အဝဲမ့ၢ်ဟံၣ်ခိၣ် ဒီးယွၤအခ့အပှၤအသိးန့ၣ် မၤလၢပှဲၤဝဲအမူဒါ
၁, ၂. (က) စီၤယိၤသးအဟံၣ်ဖိဃီဖိ အတၢ်အိၣ်မူကဆီတလဲအသး လၢကျဲဒ်လဲၣ်. (ခ) စီၤယိၤသး ကဘၣ်တဲဘၣ်အမါလၢ တၢ်ကစီၣ်မနုၤလဲၣ်.
ထံၣ်ကမှံကွၢ်လၢ စီၤယိၤသးတီၣ်ထီၣ်ဝဲ တၢ်ဘိၣ်တဖၣ်လၢ ကသ့ၣ်ယီၤအလိၤ ဝံၤဒီးအဝဲကွၢ်တရံးဝဲ သဝီဘ့ၤသလ့ဃ့ၣ်လၢ တၢ်ခံးသူအကျါ ဒီးဒဲဝဲကသ့ၣ်ယီၤကယီကယီလၢ အယိးဃာ်ဝဲတၢ်ဝံတၢ်ယိးန့ၣ်တက့ၢ်. ဖဲန့ၣ်အခါအဝဲ ကဆိကမိၣ်ထီၣ်ဝဲ ကျဲဖးယံၤတဘိလၢ အဝဲကဘၣ်လဲၤဝဲဆူ ကီၢ်အဲၤကူပတူးန့ၣ်လီၤ. စီၤယိၤသးအတၢ်ကတိၤဒီး အတၢ်ဆဲးတၢ်လၤန့ၣ် လီၤဆီလိာ်သးဒီး ပှၤအိၣ်ဖဲန့ၣ်တဖၣ်ဒိၣ်မးလီၤ. လၢတၢ်န့ၣ်အဃိ အဝဲသ့ၣ်လဲၤမ့ၢ်တုၤဖဲတၢ်လီၢ်အဝဲန့ၣ်န့ၣ် အတၢ်အိၣ်မူကမၤအသးဒ်လဲၣ်.
၂ စီၤယိၤသးကတဲဘၣ်ဝဲ အမါသးဘိလၢ တၢ်ကစီၣ်လၢ အလီၤသူၣ်ပျံၤသးဖုးအံၤန့ၣ် တမ့ၢ်တၢ်လၢအညီဝဲဘၣ်. ဘၣ်ဆၣ် အဝဲပာ်ဆူၣ်ထီၣ်အသးဒီး တဲဘၣ်အမါလၢ မူခိၣ်ကလူးတဂၤ ဟဲဒုးသ့ၣ်ညါအီၤခီဖျိလၢ တၢ်မံမီၢ်လၢ စီၤပၤဟ့ၤရိာ်အဲၣ်ဒိးမၤသံ အဝဲသ့ၣ်အဖိခွါန့ၣ်လီၤ. လၢတၢ်န့ၣ်အဃိ အဝဲသ့ၣ်ကဘၣ်ဃ့ၢ်ဟးထီၣ်ကွံာ်ဝဲလၢ ဘ့ၤသလ့ဃ့ၣ်အပူၤ လၢအဆိအချ့လီၤ. (ဖး မးသဲ ၂:၁၃, ၁၄ တက့ၢ်.) နီၢ်မၤရံ ကဘၣ်ယိၣ်တၢ်ဒိၣ်မးလီၤ. ဘၣ်မနုၤအဃိ ပှၤအဲၣ်ဒိးမၤသံအဖိခွါလၢ အတမၤတၢ်ဒဲးဘးနီတမံၤဘၣ် တဂၤအံၤလဲၣ်. တၢ်ဂ့ၢ်တခါအံၤဒု နီၢ်မၤရံဒီးစီၤယိၤသး နၢ်ပၢၢ်ဝဲတသ့ဘၣ်. ဘၣ်ဆၣ် အဝဲသ့ၣ်နာ်ဝဲ ယဟိဝၤယွၤအဃိ ကတဲာ်ကတီၤထီၣ်အသးလၢ ကလဲၤဝဲဆူကီၢ်အဲၤကူပတူးလီၤ.
၃. ဖဲစီၤယိၤသးဒီး အဟံၣ်ဖိဃီဖိဟးထီၣ်ကွံာ်လၢ ဘ့ၤသလ့ဃ့ၣ်အပူၤန့ၣ် တၢ်မၤအသးဒ်လဲၣ်. (ကွၢ်တၢ်ဂီၤတက့ၢ်.)
၃ စီၤပၤဟ့ၤရိာ် အတၢ်ကူၣ်ထီၣ်ဖးလီၤ လၢဘ့ၤသလ့ဃ့ၣ်အဖီခိၣ် အိၣ်ဝဲဒ်လဲၣ်ဒ်လဲၣ်န့ၣ် ပှၤသဝီဖိတဖၣ် တသ့ၣ်ညါဝဲ တၢ်ခိၣ်တၢ်ခံနီတမံၤဘၣ်. ဖဲပှၤသဝီဖိတဖၣ် မံဝဲလၢမုၢ်နၤခီအခါ နီၢ်မၤရံ, စီၤယိၤသးဒီး ဖိသၣ်ယ့ၣ်ၡူးန့ၣ် ဟးထီၣ်ကွံာ်လၢသဝီပူၤကစုဒုလီၤ. ဖဲအဝဲသ့ၣ်လဲၤတၢ်လၢကျဲဆူ ကလံၤထံးတခီအဆၢကတီၢ် မုၢ်ဟဲထီၣ်ဝဲကယီကယီ ဒီးစီၤယိၤသးဆိကမိၣ်ထီၣ်ဝဲလၢ တဘျီညါအံၤဒု ယတၢ်အိၣ်မူ ကမၤအသးဒ်လဲၣ်န့ၣ်လီၤ. ဒီးကဆိကမိၣ်လီၤအသးလၢ အဝဲမ့ၢ်ဒၣ် ပှၤဘှီတၢ်ဖိလၢအကျိၣ်အစ့တအိၣ်အဃိ ဒီသဒၢအဟံၣ်ဖိဃီဖိလၢ စီၤပၤဟ့ၤရိာ်ဒီး မုၣ်ကီၤလံၢ်အစုပူၤ ကသ့ဒ်လဲၣ်. မ့ၢ်အဝဲလုၢ်အီၣ်လုၢ်အီဝဲ အဟံၣ်ဖိဃီဖိကသ့ဧါ. ဖိခွါလီၤဆီလၢ ကစၢ်ယွၤဟ့ၣ်လီၤအီၤတဂၤအံၤန့ၣ် မ့ၢ်အဝဲကွၢ်လုၢ်ဒိၣ်ထီၣ်ဝဲ ဂ့ၤဂ့ၤဘၣ်ဘၣ်ကသ့ဧါ. တၢ်ကီတၢ်ခဲတဖၣ်လၢ စီၤယိၤသးအမဲာ်ညါန့ၣ် မၤအသးဒ်သိးဒီး အဝဲဘၣ်ခီဂာ်ဝဲမဲးမုၢ်ပျီဖးလဲၢ်ဖးထီလၢ တၢ်ကိၢ်ကျါန့ၣ်လီၤ. မ့ၢ်အဝဲမၤလၢပှဲၤ အမူဒါတဖၣ်အံၤ ကသ့ဒ်လဲၣ်. ဖဲပသမံသမိးကွၢ်တၢ်ဂ့ၢ်တဖၣ်အံၤအခါ ပကထံၣ်ဘၣ်လၢ ဟံၣ်ခိၣ်တဖၣ်ဒီးပဝဲဒၣ်ကိးဂၤဒဲးန့ၣ် ပကဘၣ်ကွၢ်လိမၤဒိး စီၤယိၤသးအတၢ်နာ်လီၤ.
စီၤယိၤသး ဒီသဒၢဝဲအဟံၣ်ဖိဃီဖိ
၄, ၅. (က) စီၤယိၤသးအတၢ်အိၣ်မူ ဆီတလဲအသးဒ်လဲၣ်. (ခ) မူခိၣ်ကလူးတဂၤ ဟ့ၣ်ဂံၢ်ဟ့ၣ်ဘါစီၤယိၤသးဒ်လဲၣ်.
၄ လၢအပူၤကွံာ်တနံၣ်ဘျဲၣ်န့ၣ် ဖဲပှၤနစၤရ့းဖိစီၤယိၤသး အဲၣ်တီဃာ်ဒီး စီၤဟ့ၤလံအဖိမုၣ် နီၢ်မၤရံဝံၤအလီၢ်ခံ အတၢ်အိၣ်မူဆီတလဲကွံာ်ဝဲ လၢာ်လၢာ်ဆ့ဆ့လီၤ. စီၤယိၤသးသ့ၣ်ညါဝဲလၢ နီၢ်မၤရံန့ၣ်မ့ၢ်မုၣ်ကနီၤစီဆှံ လၢအသးတီ ဒီးအဲၣ်ဝဲယဟိဝၤယွၤအတၢ်သိၣ်တၢ်သီတဖၣ်လီၤ. ဘၣ်ဆၣ် ဖဲအဝဲသ့ၣ်ညါဘၣ်လၢ နီၢ်မၤရံအဟုးအသးအိၣ်ထီၣ်ဝဲအခါ အသးကမၤအသးဒ်လဲၣ်. ဒီးစီၤယိၤသး တအဲၣ်ဒိးလၢ နီၢ်မၤရံကတူၢ်ဘၣ်တၢ်မဲာ်ဆှးအဃိ ပာ်လီၤအသးလၢ ကမၤလီၤဖးအသးဒီးအီၤကစုဒုလီၤ. * ဘၣ်ဆၣ် မူခိၣ်ကလူးတဂၤ တဲဘၣ်အီၤလၢတၢ်မံမီၢ်အပူၤ ဒီးစံးဝဲလၢ နီၢ်မၤရံအဟုးအသးအိၣ်ထီၣ်လၢ ယဟိဝၤယွၤအသးစီဆှံန့ၣ်လီၤ. အဝဲစံးကဒီးဝဲလၢ ဖိခွါတဂၤအံၤ “ကအုၣ်က့ၤခီၣ်က့ၤ အပှၤဂီၢ်မုၢ်လၢ အတၢ်ဒဲးဘးအပူၤလီၤ.” ဒီးမူခိၣ်ကလူးတဂၤအံၤ ဟ့ၣ်ဂံၢ်ဟ့ၣ်ဘါစီၤယိၤသးလၢ “နဟံးန့ၢ်နမါနီၢ်မၤရံန့ၣ် ပျံၤတၢ်တဂ့ၤ.”—မး. ၁:၁၈-၂၁.
၅ စီၤယိၤသးမ့ၢ်ပှၤတီပှၤလိၤဒီး အိၣ်ဒီးတၢ်ဆီၣ်လီၤသးအဃိ အဝဲမၤဝဲဒ် မူခိၣ်ကလူးတဲအီၤအသိးန့ၣ်လီၤ. ဖိခွါတဂၤအံၤ တမ့ၢ်အသွံၣ်အထံဘၣ်. ဘၣ်ဆၣ် အဝဲဟံးထီၣ်ဖီၣ်ထီၣ်မူဒါ လၢအဒိၣ်ကတၢၢ်တခါ ဒီးကွၢ်လုၢ်ဒိၣ်ထီၣ်ဝဲ ယွၤအဖိခွါလၢ အလုၢ်ဒိၣ်ပှ့ၤဒိၣ်ကတၢၢ်တဂၤအံၤလီၤ. ဘၣ်ဆၣ် တချုးဖဲဖိသၣ်အိၣ်ဖျဲၣ်ထီၣ်ဝဲအခါန့ၣ် မ့ၢ်လၢပဒိၣ်ထုးထီၣ်တၢ်သိၣ်တၢ်သီအဃိ စီၤယိၤသးဒီးအမါလၢ အအိၣ်ဒီးအဟုးအသးတဂၤအံၤ ဘၣ်လဲၤဝဲဆူဘ့ၤသလ့ဃ့ၣ် ဒ်သိးကဆဲးလီၤအမံၤအဂီၢ်လီၤ. ဒီးနီၢ်မၤရံ အိၣ်ဖျဲၣ်ထီၣ်ဝဲအဖိဖဲန့ၣ်လီၤ.
၆–၈. (က) စီၤယိၤသးဒီးအဟံၣ်ဖိဃီဖိ အတၢ်အိၣ်မူဆီတလဲအသး လၢတၢ်ဂ့ၢ်မနုၤအဃိလဲၣ်. (ခ) မုၣ်ကီၤလံၢ်သူဝဲ ဆၣ်တဖျၢၣ်အံၤ ပသ့ၣ်ညါဘၣ်ဒ်လဲၣ်. (ကွၢ်တၢ်ဂ့ၢ်အဘျဲၣ်တက့ၢ်.)
၆ စီၤယိၤသးတက့ၤကိး အဟံၣ်ဖိဃီဖိလၢ ဝ့ၢ်နစၤရ့းအပူၤဘၣ်. လၢတၢ်န့ၣ်အလီၢ် အဝဲသ့ၣ်အိၣ်ဝဲဖဲ ဘ့ၤသလ့ဃ့ၣ်လၢ အအိၣ်ယံၤဒီးဝ့ၢ်ယရူၤၡလ့ၣ်စှၤမံးလာ်န့ၣ်လီၤ. အဝဲသ့ၣ်မ့ၢ်ပှၤဖီၣ်ဖိယာ်ဖိဘၣ်ဆၣ် တသ့ဖဲအသ့န့ၣ် စီၤယိၤသးဂုာ်ကျဲးစၢးမၤလၢပှဲၤ နီၢ်မၤရံဒီးဖိသၣ်ယ့ၣ်ၡူး အတၢ်လိၣ်ဘၣ်တဖၣ် ဒီးအံးထွဲကွၢ်ထွဲအဝဲသ့ၣ်လၢ အဂ့ၤကတၢၢ်လီၤ. တယံာ်တမီၢ်န့ၣ် အဝဲသ့ၣ်ဃု ဟံၣ်ယိယိဖိတဖျၢၣ်ဘၣ်ဝဲအဃိ အိၣ်ဝဲဆိးဝဲဖဲန့ၣ်လီၤ.
၇ ပှၤဒွးဆၣ်ဧိၤဖီဧိၤလၢ အအိၣ်ဟဲလၢမုၢ်ထီၣ်တခီန့ၣ် ဃုဝဲဖိသၣ်ဖိတဂၤလၢ အကကဲထီၣ်ပှၤယူဒၤဖိအစီၤပၤန့ၣ်လီၤ. ဒီးဆၣ်တဖျၢၣ်န့ၣ်ဆှၢအီၤဆူ နီၢ်မၤရံဒီးစီၤယိၤသးအဟံၣ်န့ၣ်လီၤ. ဖျါလၢ ပှၤတဖၣ်အံၤဟဲလၢ ကီၢ်ဘၤဘူၤလိၣ်န့ၣ်လီၤ. ဒီးအဝဲသ့ၣ်အိၣ်ဒီး တၢ်ယူးယီၣ်ပာ်ကဲဒိၣ်မးလီၤ.
၈ ပှၤဒွးဆၣ်ဧိၤဖီဧိၤတဖၣ်န့ၣ် ဒုးအိၣ်ထီၣ်ဝဲတၢ်ဘၣ်ယိၣ်လၢ ဖိသၣ်ယ့ၣ်ၡူးအသးသမူအဂီၢ်လီၤ. ဘၣ်မနုၤအဃိလဲၣ်. ဆၣ်တဖျၢၣ်အံၤ တဆှၢဝဲပှၤဒွးတၢ်ဖိတဖၣ်ဆူ ဘ့ၤသလ့ဃ့ၣ်အပူၤ တဘျီဃီဘၣ်, ဆှၢဆိအဝဲသ့ၣ်ဆူ ဝ့ၢ်ယရူၤၡလ့ၣ်န့ၣ်လီၤ. * ဖဲန့ၣ်န့ၣ် ပှၤဒွးတၢ်ဖိတဲဘၣ်စီၤပၤဟ့ၤရိာ်လၢ အဝဲသ့ၣ်ဃုဝဲဖိသၣ်လၢ အကကဲထီၣ်ပှၤယူဒၤဖိအစီၤပၤလီၤ. ဖဲစီၤပၤဟ့ၤရိာ်နၢ်ဟူဘၣ်ဝဲ တၢ်ကတိၤအံၤအခါ အသးပှံၢ်ထီၣ်တၢ်ဒိၣ်မးလီၤ.
၉–၁၁. (က) ယဟိဝၤယွၤမၤဟးဂီၤ စီၤပၤဟ့ၤရိာ်ဒီးမုၣ်ကီၤလံၢ် အတၢ်ကူၣ်ထီၣ်ဖးလီၤလၢ ကျဲဒ်လဲၣ်. (ခ) စီၤယိၤသးအဟံၣ်ဖိဃီဖိ အတၢ်လဲၤကျဲဆူ ကီၢ်အဲၤကူပတူးန့ၣ် တလဲၤအသးဒ်ပူကလီကလီတဲဝဲအသိးန့ၣ် တဲဖျါထီၣ်တက့ၢ်.
၉ လီၤသးခုဒိၣ်မးလၢ ပှၤလၢအစိကမီၤဒိၣ်န့ၢ်ဒံး စီၤပၤဟ့ၤရိာ်ဒီး မုၣ်ကီၤလံၢ်န့ၣ်အိၣ်ဝဲလီၤ. ပှၤတမှံၤတဖၣ်အံၤ ဟဲတုၤလၢယ့ၣ်ၡူးအဟံၣ်ဒီး ထံၣ်လိာ်အသးဒီးယ့ၣ်ၡူးအမိၢ်အခါ ဟ့ၣ်လီၤဝဲ “ထူ, ဒီးလီၢ်ဘၣ်, ဒီးမူရၣ်” န့ၣ်လီၤ. ဒီးအဝဲသ့ၣ်တဃ့တၢ်လၢ နီၢ်မၤရံဒီးစီၤယိၤသးအအိၣ်နီတမံၤဘၣ်. ခီဖျိလၢ နီၢ်မၤရံဒီးစီၤယိၤသးဒိးန့ၢ်ဘၣ်ဝဲ တၢ်ဟ့ၣ်လၢအလုၢ်ဒိၣ်ပှ့ၤဒိၣ်တဖၣ်အံၤအဃိ အဝဲသ့ၣ်ကမၢကမၣ်ဝဲဒိၣ်မးလီၤ. ဒီးပှၤဒွးဆၣ်ဧိၤဖီဧိၤတဖၣ် ပာ်လီၤအသးလၢ ကက့ၤတဲဘၣ်ဝဲစီၤပၤဟ့ၤရိာ်လၢ ဖိသၣ်အိၣ်ဝဲအလီၢ်ဘၣ်ဆၣ် ယဟိဝၤယွၤတဲဘၣ်အဝဲသ့ၣ်လၢ တၢ်မံမီၢ်အပူၤ လၢအဝဲသ့ၣ်ကဘၣ်က့ၤဆူအဟံၣ် လၢကျဲအဂၤတဘိန့ၣ်လီၤ.—ဖး မးသဲ ၂:၁-၁၂ တက့ၢ်.
၁၀ ပှၤဒွးဆၣ်ဧိၤဖီဧိၤတဖၣ် က့ၤဝဲတယံာ်ဘၣ်ဒီး ယဟိဝၤယွၤအမူခိၣ်ကလူး တဲပလီၢ်ဝဲစီၤယိၤသးလၢ “ဂဲၤဆၢထၢၣ်ဟံးန့ၢ်ဖိသၣ်ဒီးအမိၢ်, ဒီးဃ့ၢ်ထီၣ်ဆူအဲၤကူပတူး, ဒီးအိၣ်ဖဲန့ၣ်တုၤယစံးဘၣ်နၤတက့ၢ်. အဂ့ၢ်ဒ်အံၤ, စီၤဟ့ၤရိာ်ကဃုဖိသၣ်န့ၣ် ဒ်သိးအကမၤသံအီၤလီၤ.” (မး. ၂:၁၃) ဒ်ပထံၣ်ဘၣ်လၢ တၢ်မၤလိအခီၣ်ထံးအသိးန့ၣ် စီၤယိၤသးဒိကနၣ်ဝဲတဘျီဃီလီၤ. ဖိသၣ်တဂၤအံၤ ကပူၤဖျဲးလၢတၢ်ဘၣ်ယိၣ်အလီၢ်န့ၣ် မ့ၢ်တၢ်အရ့ဒိၣ်ကတၢၢ်လၢ စီၤယိၤသးအဂီၢ်အဃိ အဝဲလဲၤကိးဝဲအဟံၣ်ဖိဃီဖိ ဆူကီၢ်အဲၤကူပတူးလီၤ. တၢ်ဟ့ၣ်လၢပှၤသူခိၣ်ဖိလၢ အဒွးဆၣ်ဧိၤဖီဧိၤတဖၣ် ဟ့ၣ်တ့ၢ်ဝဲစီၤယိၤသးအဟံၣ်ဖိဃီဖိန့ၣ် ကဲထီၣ်တၢ်မၤစၢၤဖဲ အဝဲသ့ၣ်လဲၤတၢ်လၢကျဲ ဒီးအိၣ်ဝဲလၢကီၢ်အဲၤကူပတူးအခါန့ၣ်လီၤ.
စီၤယိၤသးတူၢ်ဆါအသး ဒ်သိးကဒီသဒၢအဖိခွါအဂီၢ်
၁၁ ပူကလီကလီတဖၣ် ပာ်ဖျါထီၣ်ဝဲလၢ စီၤယိၤသးအတၢ်လဲၤကျဲဆူကီၢ်အဲၤကူပတူးန့ၣ် မ့ၢ်တၢ်လၢအလီၤသူၣ်ပိၢ်သးဝးလီၤ. အဒိ, လံာ်တဖၣ်အံၤတဲဝဲလၢ ဖိသၣ်ယ့ၣ်ၡူး မၤဝဲတၢ်လီၤလးခီဖျိ အဝဲမၤဖုၣ်လီၤကျဲ ဒ်သိးကလဲၤတုၤဆူကီၢ်အဲၤကူပတူး ချ့ချ့အဂီၢ်န့ၣ်လီၤ. တကးဒံးဘၣ် တဲစ့ၢ်ကီးဝဲလၢ အဝဲဒီသဒၢအဟံၣ်ဖိဃီဖိလၢ တမျာ်တဖၣ်ဒီး မၤသကူးလီၤဝဲ စူၣ်ပလိၣ်အထူၣ် ဒ်သိးအမိၢ်ကဒဲးအီၣ်ဝဲအသၣ်အဂီၢ်လီၤ. * နီၢ်နီၢ်န့ၣ် ဒ်သိးစီၤယိၤသးအဟံၣ်ဖိဃီဖိတဖၣ် ကလဲၤတုၤလၢ ကီၢ်အဲၤကူပတူးအဂီၢ်န့ၣ် အဝဲသ့ၣ်ဘၣ်လဲၤတၢ်ဖးယံၤဒီး ကီဝဲခဲဝဲလီၤ.
စီၤယိၤသး တူၢ်ဆါအသးလၢ အဟံၣ်ဖိဃီဖိအဂီၢ်
၁၂. မိၢ်ပၢ်တဖၣ်လၢ မုၢ်မဆါတနံၤအံၤန့ၣ် ဟံးန့ၢ်တၢ်မၤလိလၢ စီၤယိၤသးအအိၣ်သ့ဒ်လဲၣ်.
၁၂ မိၢ်ပၢ်တဖၣ်ဟံးန့ၢ်တၢ်မၤလိလၢ စီၤယိၤသးအအိၣ်သ့ဝဲလီၤ. ဒ်သိးကဒီသဒၢအဟံၣ်ဖိဃီဖိအဂီၢ် စီၤယိၤသးတူၢ်ဆါအသးဒီး ပာ်ကတီၢ်ဃာ်အတၢ်မၤလီၤ. ပသ့ၣ်ညါဘၣ်လၢ စီၤယိၤသးပာ်လုၢ်ပာ်ပှ့ၤ အဟံၣ်ဖိဃီဖိဒ် တၢ်လုၢ်ဒိၣ်ပှ့ၤဒိၣ်လၢ အဟဲလၢယဟိဝၤယွၤအအိၣ်န့ၣ်လီၤ. မိၢ်ပၢ်တဖၣ်လၢ မုၢ်မဆါတနံၤညါအံၤ ဘၣ်ကွၢ်လုၢ်ဒိၣ်ထီၣ်အဖိလၢ ဟီၣ်ခိၣ်လၢအပှဲၤဒီး တၢ်အၢတၢ်သီလီၤ. လၢတၢ်န့ၣ်အဃိ တၢ်လ့ပစီဒီး တၢ်လၢကကဲထီၣ်တၢ်ထုးဃၢ လၢပှၤသးစၢ်တဖၣ်အဂီၢ် အိၣ်ဝဲအါမးလီၤ. မိၢ်ပၢ်တဖၣ်လၢ အဂုာ်ကျဲးစၢးအဂ့ၤကတၢၢ်လၢ ကဒီသဒၢဝဲအဖိ ဒ်စီၤယိၤသးအသိးန့ၣ် လီၤစံးပတြၢၤဒိၣ်မးလီၤ.
စီၤယိၤသး လုၢ်အီၣ်လုၢ်အီဝဲအဟံၣ်ဖိဃီဖိ
၁၃, ၁၄. ဘၣ်မနုၤအဃိ စီၤယိၤသးအဟံၣ်ဖိဃီဖိ က့ၤအိၣ်ဝဲဆိးဝဲလၢ ဝ့ၢ်နစၤရ့းအပူၤလဲၣ်.
၁၃ ဖျါလၢ စီၤယိၤသးဒီးအဟံၣ်ဖိဃီဖိန့ၣ် တအိၣ်လၢကီၢ်အဲၤကူပတူးအပူၤယံာ်ယံာ်ဘၣ်. ဖဲအဝဲသ့ၣ်လဲၤတုၤလၢ ကီၢ်အဲၤကူပတူးအပူၤ တယံာ်တမီၢ်န့ၣ် မူခိၣ်ကလူးတဂၤဟဲတဲဘၣ်အီၤလၢ စီၤပၤဟ့ၤရိာ်သံဝဲလံ. ဒီးစီၤယိၤသးက့ၤကိးဝဲ အဟံၣ်ဖိဃီဖိတဖၣ်လၢ အဒ့ပီၤအလီၢ်န့ၣ်လီၤ. လၢတၢ်န့ၣ်အဃိ ဝံအတၢ်စံးပာ်လၢ အတဲဆိပာ်စၢၤဝဲလၢ ယဟိဝၤယွၤ ကကိးန့ၢ်အဖိခွါလၢ “အဲၤကူပတူးအပူၤ” န့ၣ်ဟဲလၢထီၣ်ပှဲၤထီၣ်ဝဲလီၤ. (မး. ၂:၁၅) ဘၣ်ဆၣ်ခဲၤအံၤန့ၣ် မ့ၢ်အဝဲသ့ၣ်ကက့ၤအိၣ်ဝဲဖဲလဲၣ်.
၁၄ စီၤယိၤသးန့ၣ်အိၣ်ဒီး တၢ်ပလီၢ်ပဒီဒီး မ့ၢ်ပှၤလၢအကူၣ်တၢ်သ့တဂၤလီၤ. အဝဲသ့ၣ်ညါဝဲလၢ စီၤအၢ်ဃ့လးလၢအထီၣ်စီၤပၤဟ့ၤရိာ်အလီၢ်န့ၣ် မ့ၢ်စ့ၢ်ကီးပှၤလၢအအၢသံတဂၤအဃိ စီၤယိၤသးဘၣ်ယိၣ်တၢ်ဒိၣ်မးလီၤ. ခီဖျိလၢ ကစၢ်ယွၤအတၢ်နဲၣ်လိအဃိ စီၤယိၤသးတက့ၤကိးဝဲ အဟံၣ်ဖိဃီဖိတဖၣ်ဆူ ဝ့ၢ်ယရူၤၡလ့ၣ်လၢ အပှဲၤဒီးတၢ်ဘၣ်ယိၣ်အလီၢ်န့ၣ်ဘၣ်, က့ၤကိးအဝဲသ့ၣ်ဆူ ဝ့ၢ်နစၤရ့းလၢအအိၣ်ဝဲလၢ ကီၢ်ကၤလံၤလါအပူၤလီၤ. ဒီးစီၤယိၤသးဒီး အဟံၣ်ဖိဃီဖိတဖၣ် အိၣ်ဝဲဆိးဝဲဖဲန့ၣ်လီၤ.—ဖး မးသဲ ၂:၁၉-၂၃ တက့ၢ်.
၁၅, ၁၆. စီၤယိၤသးအတၢ်ဖံးတၢ်မၤ မၤအသးဒ်လဲၣ်. ဒီးအဝဲသူဝဲ တၢ်ပီးတၢ်လီမနုၤတဖၣ်လဲၣ်.
၁၅ စီၤယိၤသးဒီး အဟံၣ်ဖိဃီဖိန့ၣ် အိၣ်မူဝဲယိယိဖိဘၣ်ဆၣ် တအိၣ်ဘၣ်ဝဲဘီၣ်ဘီၣ်ညီညီဘၣ်. လံာ်စီဆှံပာ်ဖျါထီၣ်ဝဲလၢ စီၤယိၤသးမ့ၢ်ပှၤစုသ့ဖိအဃိ အဝဲကကျီသ့ၣ်, က့ၤယိးဝဲသ့ၣ် ဒီးကဘၣ်မၤဘျ့ထီၣ်ဝဲ ဒ်သိးကဘှီထီၣ်ဟံၣ်, ချံ, တိၤ, လ့ၣ်ဆီၣ်, တၢ်အပၣ်, နီၣ်ယိးဘိဒီး တၢ်ပီးတၢ်လီလၢ ပှၤသူအီၤလၢစံာ်ပျီအပူၤလီၤ. (မး. ၁၃:၅၅) စီၤယိၤသးဘၣ်မၤတၢ် ကီကီခဲခဲလီၤ. ဖဲန့ၣ်အဆၢကတီၢ် ပှၤစုသ့ဖိတဖၣ်န့ၣ် မၤတၢ်ဖဲအဟံၣ်မဲာ်ညါ မ့တမ့ၢ် ဒၢးဖိတဖျၢၣ်လၢအဟံၣ်ကပၤန့ၣ်လီၤ.
၁၆ စီၤယိၤသးကသူဝဲ တၢ်ပီးတၢ်လီအကလုာ်ကလုာ်လီၤ. ဒီးတၢ်ပီးတၢ်လီတနီၤန့ၣ် အဝဲကဒိးန့ၢ်ဘၣ်ဝဲလၢ အပၢ်အအိၣ်လီၤ. အဒိ အဝဲကသူစ့ၢ်ကီးဝဲ တၢ်ပီးတၢ်လီအရ့ဒိၣ်တဖၣ် ဒ်သိးဒီးတၢ်အိၣ်ဒီးအနၢၣ် ၉၀ ဒံၢ်ကရံၣ်, ဟီၣ်ခိၣ်ဝါ, ကွါဖိ, လွး, ကွါ, နီၣ်ဒိ, နီၣ်စိးပိး, ထးပျၤ, ထးပျံာ် ဒီးထးတဖၣ်န့ၣ်လီၤ.
၁၇, ၁၈. (က) ယ့ၣ်ၡူးကမၤလိန့ၢ်တၢ်မနုၤလၢ အပၢ်လၢအလုၢ်ဒိၣ်ထီၣ်အီၤအအိၣ်န့ၣ်လဲၣ်. (ခ) ဒ်တၢ်ဆၢကတီၢ်လဲၤပူၤကွံာ်ဝဲအသိး ဘၣ်မနုၤအဃိ စီၤယိၤသးကဘၣ်ဖံးတၢ်မၤတၢ် အါန့ၢ်ဒံးအလီၢ်လဲၣ်.
၁၇ ထံၣ်ကမှံကွၢ်, ဖဲယ့ၣ်ၡူး မ့ၢ်ပိာ်ခွါဖိသၣ်အခါ အဝဲကွၢ်ဝဲစီၤယိၤသး လၢအလုၢ်ဒိၣ်ထီၣ်အီၤတဂၤ မၤတၢ်မၤန့ၣ်တက့ၢ်. ဖဲစီၤယိၤသးမၤတၢ်တခါဂ့ၤတခါဂ့ၤ အဝဲဟးလူၤကွၢ်ဝဲထံထံဆးဆး လၢတၢ်သူၣ်အိၣ်သးအိၣ်အပူၤဒီး ဘၣ်သူၣ်ဘၣ်သးဝဲဒိၣ်မးလီၤ. အဝဲကထံၣ်ဘၣ်လၢ စီၤယိၤသးအဂံၢ်ဆူၣ်ဘါဆူၣ်ဒီး မၤတၢ်သ့ဂ့ၤဂ့ၤလီၤ. စီၤယိၤသးကသိၣ်လိဝဲအဖိခွါလၢ တၢ်မၤလၢအညီဒ်သိးဒီး ပှၤကဘၣ်ထူးဘျ့ထီၣ်သ့ၣ်အညၣ် လၢကျဲဒ်လဲၣ်အဂ့ၢ်န့ၣ်လီၤ. ဒီးကသိၣ်လိစ့ၢ်ကီးဝဲ အဖိခွါလၢသ့ၣ်အကလုာ်ကလုာ်လၢအသူဝဲတဖၣ် ဒ်သိးဒီးသ့ၣ်ချၢၣ်ဒၢ, သ့ၣ်ထိးဖၣ်ဒီး သ့ၣ်စၤယံးအညၣ်န့ၣ် လီၤဆီလိာ်အသးဒ်လဲၣ်န့ၣ်လီၤ.
စီၤယိၤသးသိၣ်လိဝဲအဖိခွါ ဒ်သိးကကဲထီၣ် ပှၤစုသ့ဖိတဂၤအဂီၢ်
၁၈ ယ့ၣ်ၡူးထံၣ်ဘၣ်ဝဲစီၤယိၤသး အဂံၢ်ဆူၣ်ဘါဆူၣ်တုၤဒၣ်လဲာ် ကူာ်လီၤဝဲသ့ၣ်, ထူးဘျ့ထီၣ်ဝဲသ့ၣ် ဒီးဒိနုာ်ဝဲထးဒ်သိး သ့ၣ်အညၣ်ကစဲထီအသး တကးဒံးဘၣ်ထံၣ်ဘၣ်စ့ၢ်ကီးဝဲ စီၤယိၤသးကဟုကယာ်ဝဲအဖိဒီးအမါလၢ တၢ်အဲၣ်တၢ်ကွံအပူၤလီၤ. နီၢ်မၤရံဒီးစီၤယိၤသး အဖိတအိၣ်ဝဲထဲယ့ၣ်ၡူးတဂၤဧိၤဘၣ်. လၢခံန့ၣ် အဝဲသ့ၣ်အဖိအိၣ်ဒံးဝဲအစှၤကတၢၢ်ဃုဂၤလီၤ. (မး. ၁၃:၅၅, ၅၆) ခီဖျိလၢ အဟံၣ်ဖိဃီဖိအါထီၣ်ဝဲအဃိ စီၤယိၤသးကဘၣ်ဂုာ်ကျဲးစၢးဖံးတၢ်မၤတၢ် အါန့ၢ်ဒံးအလီၢ်လီၤ.
စီၤယိၤသးသ့ၣ်ညါဝဲလၢ အဟံၣ်ဖိဃီဖိအတၢ်လိၣ်ဘၣ်လၢ နီၢ်သးတခီန့ၣ် မ့ၢ်တၢ်လၢ အရ့ဒိၣ်ကတၢၢ်
၁၉. စီၤယိၤသး အံးထွဲကွၢ်ထွဲဝဲ အဟံၣ်ဖိဃီဖိအတၢ်လိၣ်ဘၣ်လၢ နီၢ်သးတခီလၢကျဲဒ်လဲၣ်.
၁၉ ဘၣ်ဆၣ် စီၤယိၤသးသ့ၣ်ညါဝဲလၢ အဟံၣ်ဖိဃီဖိအတၢ်လိၣ်ဘၣ်လၢ နီၢ်သးတခီန့ၣ် မ့ၢ်တၢ်လၢအရ့ဒိၣ်ကတၢၢ်လီၤ. ထီဘိန့ၣ်အဝဲဟံးန့ၢ်တၢ်ဆၢကတီၢ်လၢ ကသိၣ်လိအဖိတဖၣ် လၢယဟိဝၤယွၤဒီး အတၢ်သိၣ်တၢ်သီတဖၣ်အဂ့ၢ်လီၤ. တကးဒံးဘၣ် အဝဲဒီးနီၢ်မၤရံန့ၣ် လဲၤကိးဝဲအဖိတဖၣ်ဆူ ဘူၣ်ဘျီၣ်အပူၤ လၢအမ့ၢ်တၢ်လီၢ်လၢပှၤဖးဒီး တဲဖျါထီၣ်ဝဲစီၤမိၤၡ့ အတၢ်သိၣ်တၢ်သီအခီပညီန့ၣ်လီၤ. ဖဲအဝဲသ့ၣ် လဲၤဆူဘူၣ်ဘျီၣ်ဝံၤအလီၢ်ခံန့ၣ် ယ့ၣ်ၡူးအတၢ်သံကွၢ်ကအိၣ်ဝဲအါမးလီၤ. ဒီးစီၤယိၤသးကဂုာ်ကျဲးစၢး စံးဆၢဝဲအတၢ်သံကွၢ်တဖၣ် တုၤလၢယ့ၣ်ၡူးအသးမံဝဲတစုလီၤ. တကးဒံးဘၣ် ကိးနံၣ်ဒဲးဖဲ ပှၤမၤဝဲတၢ်ဘူၣ်တၢ်ဘါမူးပွဲတဖၣ်အခါန့ၣ် စီၤယိၤသး လဲၤကိးဝဲအဟံၣ်ဖိဃီဖိတဖၣ်ဆူ ဝ့ၢ်ယရူၤၡလ့ၣ်အပူၤလီၤ. ဒီးတနံၣ်တဘျီ ဖဲဘူၣ်လဲၤကပာ်ဘၣ်ဝဲအခါ အဝဲသ့ၣ်လဲၤတၢ်ဒ့ၣ်စၢၤ ယံၤဝဲ ၇၅ မံးလာ်, မၤဝဲဘူၣ်လဲၤကပာ်မူးပွဲဝံၤအလီၢ်ခံ က့ၤကဒါက့ၤဆူအဟံၣ်န့ၣ်လီၤ. လၢတၢ်လဲၤတၢ်က့ၤအံၤအဂီၢ်န့ၣ် စီၤယိၤသး ကဘၣ်ဟံးန့ၢ်တၢ်ဆၢကတီၢ် ခံနွံဃၣ်ဃၣ်လီၤ.
စီၤယိၤသးလဲၤကိးဝဲ အဟံၣ်ဖိဃီဖိဆူ ဝ့ၢ်ယရူၤၡလ့ၣ် ဒ်သိးကလဲၤ ဘူၣ်ထီၣ်ဘါထီၣ်တၢ်အဂီၢ်
၂၀. ခရံာ်ဖိလၢအမ့ၢ်ဟံၣ်ခိၣ်တဖၣ် ကွၢ်လိမၤဒိးစီၤယိၤသး အဒိအတဲာ်သ့လၢကျဲဒ်လဲၣ်.
၂၀ မုၢ်မဆါတနံၤအံၤ ခရံာ်ဖိလၢအမ့ၢ်ဟံၣ်ခိၣ်တဖၣ်န့ၣ် ကွၢ်လိမၤဒိးဝဲ စီၤယိၤသးအဒိအတဲာ်လီၤ. အဝဲသ့ၣ် တူၢ်ဆါအသးဒ်သိး ကလုၢ်အီၣ်လုၢ်အီအဖိလၢ နီၢ်ခိတခီတကးဒံးဘၣ် ပာ်ဆိနီၢ်သးအတၢ်လိၣ်ဘၣ်လၢ နီၣ်ဂံၢ်တၢန့ၣ်လီၤ. အဝဲသ့ၣ် ဂုာ်ကျဲးစၢးမၤဟံၣ်ဖိဃီဖိ တၢ်မၤလိလံာ်စီဆှံလၢဟံၣ်ပူၤ ဒီးလဲၤကိးဝဲအဖိဆူ တၢ်အိၣ်ဖှိၣ်ရိဖှိၣ်ဒီး တၢ်အိၣ်ဖှိၣ်ဖးဒိၣ်န့ၣ်လီၤ. ဒ်စီၤယိၤသးအသိး ဟံၣ်ခိၣ်လၢမုၢ်မဆါတနံၤညါအံၤ သ့ၣ်ညါဝဲလၢ အဝဲသ့ၣ်မ့ၢ်ဂုာ်ကျဲးစၢးသိၣ်လိအဖိ လၢယဟိဝၤယွၤအဂ့ၢ်န့ၣ် မ့ၢ်ကျဲလၢအဂ့ၤကတၢၢ်လီၤ.
“တၢ်သူၣ်ကိၢ်သးဂီၤ”
၂၁. ဖဲဘူၣ်လဲၤကပာ်အဆၢကတီၢ်န့ၣ် စီၤယိၤသးအဟံၣ်ဖိဃီဖိတဖၣ် မၤဝဲမနုၤလဲၣ်, နီၢ်မၤရံဒီးစီၤယိၤသး သ့ၣ်ညါဝဲလၢယ့ၣ်ၡူးလီၤမၢ်လၢ ဆၢကတီၢ်ဖဲလဲၣ်.
၂၁ ဖဲယ့ၣ်ၡူအသးအိၣ် ၁၂ နံၣ်အခါစီၤယိၤသး လဲၤကိးဝဲအဟံၣ်ဖိဃီဖိတဖၣ် ဆူဝ့ၢ်ယရူၤၡလ့ၣ် ဒ်အလဲၤညီနုၢ်ဝဲအသိးလီၤ. မ့ၢ်လၢဘူၣ်လဲၤကပာ် အဆၢကတီၢ်ဘၣ်ဝဲအဃိ ဟံၣ်ဖိဃီဖိတဖၣ်ခီဂာ်ဝဲ သဝီလၢအပှဲၤဒီးနီၣ်လါဟ့ တဖျၢၣ်ဘၣ်တဖျၢၣ် လၢတၢ်သူၣ်ဖှံသးညီအပူၤလီၤ. ဖဲအဝဲသ့ၣ် လဲၤဘူးထီၣ်ဒီးဝ့ၢ်ယရူၤၡလ့ၣ်လၢ အအိၣ်ဝဲလၢကစၢၢ်ကလိအကျါန့ၣ် ကသးဝံၣ်သကိးဝဲ ထါသးဝံၣ်စံးထီၣ်ပတြၢၤန့ၣ်လီၤ. (စံး. ၁၂၀-၁၃၄) ဖဲန့ၣ်အဆၢကတီၢ် ဝ့ၢ်ယရူၤၡလ့ၣ်ကပှဲၤဒီး ပှၤလၢအကလီၢ်တဖၣ်လီၤ. ဒီးဖဲပှၤမၤဘူၣ်လဲၤကပာ်ဝံၤအလီၢ်ခံန့ၣ် ဟံၣ်ဖိဃီဖိတဖၣ် က့ၤကဒါက့ၤဆူအဟံၣ်န့ၣ်လီၤ. ဘၣ်သ့ၣ်သ့ၣ် နီၢ်မၤရံဒီးစီၤယိၤသး အတၢ်မၤကအါဒီး ကဆိကမိၣ်လီၤအသးလၢ ယ့ၣ်ၡူးကပၣ်ဃုာ်လၢ ပှၤလၢအဟဲက့ၤတဖၣ်အကျါဧါသၢၣ်. ဘၣ်ဆၣ် ဖဲအဝဲသ့ၣ်ဟးထီၣ်လၢ ဝ့ၢ်ယရူၤၡလ့ၣ်ဝံၤ ပူၤကွံာ်တသီန့ၣ် နီၢ်မၤရံဒီးစီၤယိၤသး သ့ၣ်ညါဝဲလၢယ့ၣ်ၡူးလီၤမၢ်ဝဲလံ အဃိအသးချံၣ်လီၤဝဲသတူၢ်ကလာ်လီၤ.—လူၤကၣ် ၂:၄၁-၄၄.
၂၂, ၂၃. ဖဲနီၢ်မၤရံဒီးစီၤယိၤသး သ့ၣ်ညါဝဲလၢအဖိခွါလီၤမၢ်အခါ အဝဲသ့ၣ်မၤဝဲဒ်လဲၣ်, ဒီးဖဲအဝဲသ့ၣ်ထံၣ်ဘၣ်က့ၤအီၤအခါ နီၢ်မၤရံတဲဝဲဒ်လဲၣ်.
၂၂ နီၢ်မၤရံဒီးစီၤယိၤသး သူၣ်ကိၢ်သးဂီၤဝဲဒိၣ်မးဒီး ကရီလဲၤကဒါက့ၤဝဲ ဆူဝ့ၢ်ယရူၤၡလ့ၣ်လီၤ. ဒီးအဝဲသ့ၣ်ဟးဃုယ့ၣ်ၡူးလၢ တၢ်လီၢ်သကုၤဆးဒးလီၤ. ထံၣ်ကမှံကွၢ်လၢ အဝဲသ့ၣ်ကိးဝဲယ့ၣ်ၡူးအမံၤဒီး ဟးဃုဝဲလၢ ကျဲတဘိဝံၤတဘိန့ၣ်တက့ၢ်. ဖိသၣ်တဂၤအံၤ လဲၤတုၤဝဲဖဲလဲၣ်. ဖဲအဝဲသ့ၣ်လူၤဃုဝဲ တုၤလီၤလၢသၢသီတသီန့ၣ် စီၤယိၤသးကတူၢ်ဘၣ်ဝဲလၢ အဝဲတမၤလၢပှဲၤအမူဒါလၢ ယဟိဝၤယွၤဟ့ၣ်လီၤအီၤဘၣ်. လၢခံကတၢၢ်အဝဲသ့ၣ် လဲၤဃုဝဲလၢတၢ်လုၢ်ဟံၣ်လီၤ. ဒီးဃုဝဲတဆီဘၣ်တဆီတုၤလၢ အထံၣ်ဝဲလၢယ့ၣ်ၡူးဆ့ၣ်နီၤလၢ ဒၢးဖးဒိၣ်တဖျၢၣ်အပူၤ လၢသရၣ်အါဂၤ ဒီးပှၤသ့လံာ်တၢ်သိၣ်တၢ်သီတဖၣ်အကျါန့ၣ်လီၤ. နီၢ်မၤရံဒီးစီၤယိၤသး အသးကခုၣ်လီၤက့ၤသပှၢ်ကတၢၢ်လီၤ.—လူၤကၣ် ၂:၄၅, ၄၆.
၂၃ ထံၣ်ကမှံကွၢ်လၢ ယ့ၣ်ၡူးဒိကနၣ်ဝဲတၢ်လၢ သရၣ်တဖၣ်ဒီး ပှၤသ့လံာ်တၢ်သိၣ်တၢ်သီတဖၣ်တဲဝဲဒီး သံကွၢ်ဝဲတၢ်သံကွၢ်လၢ တၢ်သူၣ်အိၣ်သးအိၣ်အပူၤန့ၣ်တက့ၢ်. ခီဖျိလၢယ့ၣ်ၡူး အတၢ်နၢ်ပၢၢ်ဒီးအတၢ်စံးဆၢတဖၣ်အဃိ အဝဲသ့ၣ်ကမၢကမၣ်ဝဲဒိၣ်မးလီၤ. ဖဲနီၢ်မၤရံဒီးစီၤယိၤသး ထံၣ်ဘၣ်ဝဲယ့ၣ်ၡူးအဆၢကတီၢ် အဝဲသ့ၣ်စ့ၢ်ကီးကမၢကမၣ်ဝဲဒိၣ်မးလီၤ. လံာ်စီဆှံတပာ်ဖျါထီၣ်ဝဲ စီၤယိၤသးအတၢ်ကတိၤဘၣ်ဆၣ် တၢ်လၢနီၢ်မၤရံတဲဝဲတဖၣ်န့ၣ် ပာ်ဖျါထီၣ်န့ၢ်ပှၤလၢ ပှၤဒီမါဝၤခံဂၤ တူၢ်ဘၣ်တၢ်ဒ်လဲၣ်န့ၣ်လီၤ. နီၢ်မၤရံစံးဝဲလၢ “ဖိခွါဧၢ, နမၤပှၤဒ်သိးအံၤ ဘၣ်မနုၤအဃိလဲၣ်. နပၢ်ဒီးယၤပလူၤဃုတ့ၢ်နၤလၢ တၢ်သူၣ်ကိၢ်သးဂီၤအပူၤလီၤ.”—လူၤကၣ် ၂:၄၇, ၄၈, ခ့ခါစှီၤကျိာ်.
၂၄. မိၢ်ပၢ်တဖၣ်အတၢ်အိၣ်သးန့ၣ် လံာ်စီဆှံပာ်ဖျါထီၣ်ဝဲ ဒ်လဲၣ်.
၂၄ လံာ်စီဆှံပာ်ဖျါထီၣ်ဝဲ မိၢ်ပၢ်အတၢ်အိၣ်သး နီၢ်နီၢ်လီၤ. ဖိလၢအလၢအပှဲၤဒၣ်လဲာ် မၤကိၢ်မၤဂီၤ အမိၢ်အပၢ်အသးမ့ၢ်သ့န့ၣ် ပှၤလၢအဘၣ်လုၢ်ဒိၣ်ထီၣ်အဖိလၢ မုၢ်မဆါတနံၤအံၤန့ၣ် ကတူၢ်ဘၣ်ဝဲ “တၢ်သူၣ်ကိၢ်သးဂီၤ” တုၤဒၣ်လဲာ် ပတဲဖျါထီၣ်အီၤတလၢာ်ဝဲဘၣ်. နီၢ်မၤရံဒီးစီၤယိၤသး အဒိအတဲာ်လၢ လံာ်စီဆှံပာ်ဖျါထီၣ်ဝဲန့ၣ် ကဲထီၣ်တၢ်ဂံၢ်တၢ်ဘါလၢ မိၢ်ပၢ်တဖၣ်လၢ မုၢ်မဆါတနံၤအံၤအဂီၢ်လီၤ.
၂၅, ၂၆. ယ့ၣ်ၡူးစံးဆၢဝဲ အမိၢ်အပၢ်ဒ်လဲၣ်, ဘၣ်ဃးဒီးယ့ၣ်ၡူးအတၢ်စံးဆၢန့ၣ် စီၤယိၤသးကတူၢ်ဘၣ်ဝဲဒ်လဲၣ်.
၂၅ ဘၣ်မနုၤအဃိ ယ့ၣ်ၡူးအိၣ်တ့ၢ်ဝဲဖဲ တၢ်လုၢ်ဟံၣ်လဲၣ်. တၢတမံၤန့ၣ် ဖဲယ့ၣ်ၡူးအိၣ်လၢ တၢ်လုၢ်ဟံၣ်အဆၢကတီၢ် အဝဲတူၢ်ဘၣ်ဝဲလၢ အအိၣ်ဘူးဒီး အပၢ်အိၣ်လၢမူခိၣ်န့ၣ်လီၤ. ခံမံၤတမံၤန့ၣ် ဖဲအဝဲအိၣ်လၢတၢ်လုၢ်ဟံၣ်အဆၢကတီၢ် မၤလိအါထီၣ်ဝဲကစၢ်ယွၤအဂ့ၢ် လၢတၢ်သူၣ်ဖှံသးညီအပူၤသ့ဝဲလီၤ. လၢတၢ်န့ၣ်အဃိ အဝဲစံးဆၢက့ၤအမိၢ်အပၢ်လၢ တၢ်သူၣ်ဘျၢသးဘျၢအပူၤ ဒီးတဲဘၣ်အဝဲသ့ၣ်လၢ “ဘၣ်မနုၤလၢသုဃုယၤလဲၣ်. သုတသ့ၣ်ညါဘၣ်လၢ ယဘၣ်အိၣ်လၢ ယပၢ်အဟံၣ်ပူၤဘၣ်ဧါ.”—လူၤကၣ် ၂:၄၉.
၂၆ စီၤယိၤသး ကဆိကမိၣ်က့ၤဝဲ ယ့ၣ်ၡူးအတၢ်ကတိၤအံၤ တဘျီဝံၤတဘျီဒီး ကပာ်ကဖၢလၢအသးလၢ ယ့ၣ်ၡူးအဖီခိၣ်လီၤ. မ့ၢ်လၢအဝဲသိၣ်လိတ့ၢ်ဝဲယ့ၣ်ၡူး ဒ်သိးအကအိၣ်ဒီးတၢ်ပာ်သူၣ်ပာ်သးလၢ ယဟိဝၤယွၤ အဖီခိၣ်ဒ်န့ၣ်လီၤ. ဖဲယ့ၣ်ၡူး ဒိၣ်ထီၣ်သီအဆၢကတီၢ် အဝဲအိၣ်ဒီးတၢ်ရ့လိာ်သးဒီး စီၤယိၤသးဘူးဘူးတံၢ်တံၢ်န့ၣ်လီၤ. လၢတၢ်န့ၣ်အဃိ လၢအနီၢ်ဆံးခါလံၤလံၤန့ၣ် သ့ၣ်ညါဝဲလၢ ပၢ်လၢအအိၣ်ဒီးတၢ်အဲၣ်တၢ်ကွံတဂၤန့ၣ် မ့ၢ်ပှၤဒ်လဲၣ်န့ၣ်လီၤ.
၂၇. နမ့မ့ၢ်ပၢ်တဂၤန့ၣ် နအိၣ်ဒီးတၢ်ခွဲးတၢ်ယာ်ဒ်လဲၣ်, ဒီးနကြၢးကွၢ်လိမၤဒိး စီၤယိၤသးအဒိအတဲာ်လၢ ကျဲဒ်လဲၣ်.
၂၇ နမ့မ့ၢ်ပၢ်တဂၤန့ၣ် နအိၣ်ဒီးတၢ်ခွဲးတၢ်ယာ်လီၤဆီလၢ နကသိၣ်လိနဖိတဖၣ် ဒ်သိးအဝဲသ့ၣ်ကနၢ်ပၢၢ်ထီၣ်ဝဲလၢ ပၢ်လၢအအိၣ်ဒီးတၢ်အဲၣ်တၢ်ကွံတဂၤန့ၣ် မ့ၢ်ပှၤဒ်လဲၣ်န့ၣ်လီၤ. နမ့ၢ်အိၣ်ဒီးဖိလၢ နလုၢ်ဖိအီၤမ့ၢ်ဂ့ၤ နမ့ၢ်အိၣ်ဒီးဖိယၢ်တဖၣ်မ့ၢ်ဂ့ၤ ကွၢ်လိမၤဒိးစီၤယိၤသးအဒိအတဲာ် ဒီးပာ်လုၢ်ပာ်ပှ့ၤအဝဲသ့ၣ်တဂၤစုာ်စုာ်တက့ၢ်. တကးဒံးဘၣ် မၤစၢၤအီၤဒ်သိး အဝဲသ့ၣ်ကအိၣ်ဒီး တၢ်ရ့လိာ်သးဒီး ယဟိဝၤယွၤဘူးဘူးတံၢ်တံၢ်အဂီၢ်တက့ၢ်.—ဖး အ့းဖ့းစူး ၆:၄ တက့ၢ်.
စီၤယိၤသးဂုာ်ကျဲးစၢးတုၤလၢအကတၢၢ်
၂၈, ၂၉. (က) လူၤကၣ် ၂:၅၁, ၅၂ ပာ်ဖျါထီၣ်ဝဲလၢ စီၤယိၤသးမ့ၢ်ပှၤဒ်လဲၣ်တဂၤလဲၣ်. (ခ) ဒ်သိးယ့ၣ်ၡူးအတၢ်ကူၣ်သ့ကအါထီၣ်အဂီၢ် စီၤယိၤသးမၤစၢၤအီၤဒ်လဲၣ်.
၂၈ လၢခံန့ၣ် လံာ်စီဆှံတပာ်ဖျါထီၣ်ဝဲ စီၤယိၤသးအဂ့ၢ်အါအါလၢၤဘၣ်. ဘၣ်ဆၣ်ပမၤလိန့ၢ်တၢ်လၢ စီၤယိၤသးအအိၣ်အါမးလီၤ. အဒိ လံာ်စီဆှံပာ်ဖျါထီၣ်ဝဲလၢ ယ့ၣ်ၡူး “ပာ်အသးလၢအဖီလာ်” လီၤ. တကးဒံးဘၣ်ပာ်ဖျါထီၣ်စ့ၢ်ကီးဝဲလၢ “ယ့ၣ်ၡူးဒိၣ်ထီၣ်လၢ တၢ်ကူၣ်သ့, ဒီးလၢအနီၢ်ခိ, ဒီးလၢတၢ်ဘၣ်ယွၤအသး ဒီးပှၤကညီအသးလီၤ.” (ဖး လူၤကၣ် ၂:၅၁, ၅၂ တက့ၢ်.) ဘၣ်ဃးဒီးစီၤယိၤသးန့ၣ် တၢ်ကတိၤတဖၣ်အံၤ ပာ်ဖျါထီၣ်ဝဲတၢ်မနုၤလဲၣ်. ပာ်ဖျါထီၣ်ဝဲလၢ စီၤယိၤသးတီခိၣ်ရိၤမဲဝဲ အဟံၣ်ဖိဃီဖိဂ့ၤဂ့ၤဘၣ်ဘၣ်လီၤ. လၢတၢ်န့ၣ်အဃိ ပထံၣ်ဘၣ်လၢအဖိခွါလၢ အလၢအပှဲၤတဂၤအံၤ ပာ်ကဲအီၤဒီးဒိကနၣ်အကလုၢ်လီၤ.
၂၉ အဂၤတမံၤန့ၣ် ပထံၣ်ဘၣ်လၢ ယ့ၣ်ၡူးအတၢ်ကူၣ်သ့ ဒံးယံာ်ဒံးအါထီၣ်ဝဲလီၤ. ဒ်သိးအတၢ်ကူၣ်သ့ကအါထီၣ်ဝဲအဂီၢ် စီၤယိၤသးကမၤစၢၤအီၤသပှၢ်ကတၢၢ်လီၤ. ဖဲန့ၣ်အခါ ပှၤယူဒၤဖိတဖၣ် အတၢ်ကတိၤဒိအိၣ်ဝဲတခါလၢ ထဲဒၣ်ပှၤပိာ်ခွါလၢ အကဲဒိၣ်ဒီးအိၣ်ဘၣ်ဝဲဘီၣ်ဘီၣ်ညီညီတဖၣ်န့ၣ် ကဲထီၣ်ဝဲပှၤကူၣ်တၢ်သ့ သ့ဝဲလီၤ. မ့မ့ၢ်ပှၤစုသ့ဖိ, ပှၤထူစံာ်ဖိဒီး ပှၤပိာ်ထးဖိတဖၣ်န့ၣ် “ပဲာ်ဖးနီၤဖးဝဲတၢ်စံၣ်ညီၣ်တီဒီး တၢ်တီတၢ်လိၤအဂ့ၢ်တဘၣ်ဝဲဘၣ်. ဒီးတဲဝဲတၢ်ကတိၤဒိလၢ အပှဲၤဒီးတၢ်ကူၣ်သ့ တသ့ဝဲစ့ၢ်ကီးဘၣ်.” တုၤလီၤလၢ မုၢ်မဆါတနံၤညါအံၤဒၣ်လဲာ် ပှၤတနီၤနီၤသ့ၣ်ညါဒံးဝဲ တၢ်ကတိၤဒိတခါအံၤလီၤ. ဘၣ်ဆၣ် မ့ၢ်လၢယ့ၣ်ၡူးပှဲၤဒီးတၢ်ကူၣ်သ့အဃိ အဝဲပာ်ဖျါထီၣ်ဝဲလၢ တၢ်ကတိၤဒိအံၤမ့ၢ်တၢ်လၢအကမၣ်ဝဲလီၤ. တကးဒံးဘၣ် ယ့ၣ်ၡူးနၢ်ဟူဘၣ်ဝဲ စီၤယိၤသးလၢအမ့ၢ်ပှၤစုသ့ဖိလၢ အဖှီၣ်အယာ်တဂၤအံၤ သိၣ်လိအီၤလၢ ယဟိဝၤယွၤ “အတၢ်စံၣ်ညီၣ်တီ ဒီးတၢ်တီတၢ်လိၤ” အဂ့ၢ် ဂ့ၤဂ့ၤဘၣ်ဘၣ်အဘျီတဖၣ်အဘျီလီၤ.
၃၀. စီၤယိၤသးပာ်ဖျါထီၣ်ဝဲ တၢ်ဒိဂ့ၤတဲာ်ဘၣ်လၢဟံၣ်ခိၣ်တဖၣ်အဂီၢ်ဒ်လဲၣ်.
၃၀ တၢ်အုၣ်အသးလၢ စီၤယိၤသးအံးထွဲကွၢ်ထွဲဝဲ ယ့ၣ်ၡူးလၢနီၢ်ခိတခီန့ၣ် အိၣ်ဝဲစ့ၢ်ကီးလီၤ. ဖဲယ့ၣ်ၡူးအနီၢ်ဆံးအခါ စီၤယိၤသးကဟုကယာ်အီၤဂ့ၤဂ့ၤအဃိ အဝဲအိၣ်ဒီးတၢ်အိၣ်ဆူၣ်အိၣ်ချ့လၢအဂ့ၤလီၤ. တကးဒံးဘၣ် ဒ်သိးယ့ၣ်ၡူးမၤဝဲ ပှၤစုသ့အတၢ်မၤကသ့ဂ့ၤဂ့ၤအဂီၢ် စီၤယိၤသးသိၣ်လိအီၤ လီၤတံၢ်လီၤဆဲးလီၤ. ပထံၣ်ဘၣ်လၢ ပှၤသ့ၣ်ညါယ့ၣ်ၡူးလၢ ပှၤစုသ့အဖိခွါတကးဒံးဘၣ် ပှၤသ့ၣ်ညါစ့ၢ်ကီးအီၤလၢ “ပှၤစုသ့” ဖိတဂၤလီၤ. (မၢ်ကူး ၆:၃) လၢတၢ်န့ၣ်အဃိ ပသ့ၣ်ညါဘၣ်လၢ စီၤယိၤသးအတၢ်သိၣ်လိနဲၣ်လိန့ၣ် ကဲထီၣ်လိၣ်ထီၣ်ဝဲလီၤ. ဟံၣ်ခိၣ်တဖၣ်န့ၣ် ကွၢ်လိမၤဒိးဝဲစီၤယိၤသးသ့ခီဖျိလၢ သိၣ်လိနဲၣ်လိဝဲအဖိတဖၣ် ဒ်သိးအဝဲသ့ၣ်ဆၢထၢၣ်လၢ အနီၢ်ကစၢ်အခီၣ်ဒၣ်ဝဲကသ့အဂီၢ်လီၤ.
၃၁. (က) တၢ်အုၣ်အသးပာ်ဖျါထီၣ်ဝဲလၢ စီၤယိၤသးသံလၢ ဆၢကတီၢ်ဖဲလဲၣ်. (ကွၢ် တၢ်လွံၢ်နၢၣ်တက့ၢ်.) (ခ) စီၤယိၤသးပာ်လီၤတဲာ်တ့ၢ် တၢ်ဒိဂ့ၤတဲာ်ဘၣ်လၢပဂီၢ်ဒ်လဲၣ်.
၃၁ ဖဲယ့ၣ်ၡူးအသးအိၣ်အနံၣ် ၃၀ အခါ လံာ်စီဆှံတပာ်ဖျါထီၣ်ဝဲ စီၤယိၤသးအဂ့ၢ်လၢၤဘၣ်. ဒီးတၢ်အုၣ်အသးပာ်ဖျါထီၣ်ဝဲလၢ ဖဲယ့ၣ်ၡူးစးထီၣ်စံၣ်တဲၤတဲလီၤတၢ်အခါ နီၢ်မၤရံကဲထီၣ်ဝဲမုၣ်ကမဲလံ. ဘၣ်ဆၣ် စီၤယိၤသးပာ်လီၤတဲာ်တ့ၢ်ဝဲ တၢ်အဒိအတဲာ်လၢအဂ့ၤန့ၣ်လီၤ. အဝဲဒီသဒၢ ဒီးလုၢ်အီၣ်လုၢ်အီဝဲအဟံၣ်ဖိဃီဖိ တကးဒံးဘၣ် ဂုာ်ကျဲးစၢးမၤစၢၤအဝဲသ့ၣ် တုၤလၢအသံတစုလီၤ. ပၢ်မ့ၢ်ဂ့ၤ, ဟံၣ်ခိၣ်မ့ၢ်ဂ့ၤ, ခရံာ်ဖိကိးဂၤဒဲး ကြၢးကွၢ်လိမၤဒိးဝဲ စီၤယိၤသးအဒိအတဲာ်လၢအဂ့ၤန့ၣ်လီၤ.
^ လံာ်အဆၢ. 4 ဖဲန့ၣ်အဆၢကတီၢ် ပှၤခံဂၤမ့ၢ်အဲၣ်တီဃာ်လိာ်အသးန့ၣ် ပှၤပာ်ပနီၣ်အဝဲသ့ၣ် ဒ်နီၢ်ဒီမိဝၤအသိးလီၤ.
^ လံာ်အဆၢ. 8 ဆၣ်တဖျၢၣ်အံၤ တမ့ၢ်ဆၣ်အနီၢ်ကီၢ်တဖျၢၣ်ဘၣ်. ဒီးတဟဲဝဲလၢယွၤအအိၣ်ဘၣ်. မုၣ်ကီၤလံၢ်ကူၣ်ထီၣ်ဖးလီၤဝဲလၢ ကမၤသံဝဲယ့ၣ်ၡူးအဃိသူဝဲ ဆၣ်လၢအလီၤလိၢ်လီၤလးတဖျၢၣ်အံၤလီၤ.
^ လံာ်အဆၢ. 11 လံာ်စီဆှံပာ်ဖျါထီၣ်ဝဲ လီၤတံၢ်လီၤဆဲးလၢ “ယ့ၣ်ၡူးမၤတၢ်လီၤလးအခီၣ်ထံး” ကတၢၢ်တဘျီ ဘၣ်ဖဲအဝဲဒိးဘျၢထံဝံၤ အလီၢ်ခံန့ၣ်လီၤ.—ယိၤဟၣ် ၂:၁-၁၁.
You May Also Like
ကွၢ်လိမၤဒိးအဝဲသ့ၣ်အတၢ်နာ်
နီၢ်မၤရံ—“ကွၢ်ကွၢ်, ကစၢ်အကုၢ်ပိာ်မုၣ်လီၤ”
ဖဲနီၢ်မၤရံစံးဆၢက့ၤ မူခိၣ်ကလူးကၤဘအ့းလအခါ အဝဲပာ်ဖျါထီၣ်ဝဲလၢ အအိၣ်ဒီးတၢ်နာ်ဒ်လဲၣ်. ဒီးအဝဲပာ်ဖျါထီၣ် တၢ်ဂ့ၤတၢ်ဝါအဂၤမနုၤတဖၣ်လဲၣ်.
လံာ်စီဆှံ အတၢ်သိၣ်လိတဖၣ်
တၢ်ပီးတၢ်လီတဖၣ်လၢ တၢ်မၤလိလံာ်စီဆှံအဂီၢ်
ဒ်သိး နမၤလိလံာ်စီဆှံကမုာ် ဒီးကထုးန့ၢ်နသးအဂီၢ် ဃုထၢ တၢ်ပီးတၢ်လီလၢ တၢ်မၤလိလံာ်စီဆှံအဂီၢ် တဖၣ်အံၤတက့ၢ်.
လံာ်စီဆှံ အတၢ်သိၣ်လိတဖၣ်
မၤလိကွၢ် လံာ်စီဆှံဒီးပှၤ
မၤလိသကိး တၢ်မၤလိလံာ်စီဆှံ လၢတလိၣ်ဟ့ၣ်စ့ဘၣ်ဒီး ပှၤလၢအကမၤလိနၤ လံာ်စီဆှံတဂၤ.
