តើលោកយេស៊ូសង្គ្រោះយើងតាមរបៀបណា?
ចម្លើយពីគម្ពីរ
ពេលលោកយេស៊ូបានឲ្យជីវិតខ្លួនជាថ្លៃលោះ លោកបានសង្គ្រោះមនុស្សដែលមានចិត្តស្មោះត្រង់។ (ម៉ាថាយ ២០:២៨) ហេតុនេះគម្ពីរហៅលោកយេស៊ូថាជាអ្នក«សង្គ្រោះពិភពលោក»។ (យ៉ូហានទី១ ៤:១៤) គម្ពីរក៏ចែងដែរថា៖«គ្មានសេចក្ដីសង្គ្រោះតាមរយៈអ្នកណាទៀតឡើយ ព្រោះនៅក្រោមមេឃ គ្មាននាមណាផ្សេងទៀតដែលព្រះបានផ្ដល់ក្នុងចំណោមមនុស្សជាតិឲ្យយើងរាល់គ្នាទទួលសេចក្ដីសង្គ្រោះទេ»។—សកម្មភាព ៤:១២
លោកយេស៊ូ«ឆ្លងកាត់សេចក្ដីស្លាប់ជាប្រយោជន៍ដល់មនុស្សគ្រប់រូប»ដែលបង្ហាញជំនឿលើលោក។ (ហេប្រឺ ២:៩; យ៉ូហាន ៣:១៦) ក្រោយមក «ព្រះបានប្រោសលោកឲ្យរស់ឡើងវិញ» ហើយលោកបានត្រឡប់ទៅស្ថានសួគ៌ជាបុគ្គលវិញ្ញាណ។ (សកម្មភាព ៣:១៥) នៅទីនោះ លោកយេស៊ូអាច«សង្គ្រោះយ៉ាងពេញលេញអ្នកដែលចូលទៅជិតព្រះតាមរយៈលោក ពីព្រោះលោកមានជីវិតរស់នៅជារៀងរហូតដើម្បីអង្វរជំនួសពួកគេ»។—ហេប្រឺ ៧:២៥
ហេតុអ្វីយើងត្រូវការឲ្យលោកយេស៊ូអង្វរជំនួសយើង?
យើងគ្រប់គ្នាមានភាពខុសឆ្គង។ (រ៉ូម ៣:២៣) ភាពខុសឆ្គងមានឥទ្ធិពលលើចំណងមិត្តភាពរបស់យើងជាមួយនឹងព្រះ ហើយនាំមកនូវសេចក្ដីស្លាប់។ (រ៉ូម ៦:២៣) លោកយេស៊ូគឺជាអ្នក«ជួយ»អស់អ្នកដែលមានជំនឿលើថ្លៃលោះដែលលោកបានផ្ដល់។ (យ៉ូហានទី១ ២:១) លោកអង្វរជំនួសពួកគេដោយសុំព្រះស្ដាប់សេចក្ដីអធិដ្ឋានរបស់ពួកគេ ហើយអភ័យទោសអំពើខុសឆ្គងតាមរយៈថ្លៃលោះ។ (ម៉ាថាយ ១:២១; រ៉ូម ៨:៣៤) ព្រះស្ដាប់តាមការអង្វរពីលោកយេស៊ូពីព្រោះនេះគឺសមស្របតាមគោលបំណងរបស់លោក។ ព្រះបានចាត់លោកយេស៊ូឲ្យមកផែនដី«ដើម្បីឲ្យពិភពលោកអាចត្រូវសង្គ្រោះតាមរយៈបុត្ររបស់លោក»។—យ៉ូហាន ៣:១៧
តើការមានជំនឿលើលោកយេស៊ូគ្រប់គ្រាន់ដើម្បីទទួលសេចក្ដីសង្គ្រោះឬទេ?
អត់ទេ។ ទោះបីជាយើងត្រូវជឿលើលោកយេស៊ូដើម្បីទទួលសេចក្ដីសង្គ្រោះក៏ដោយ យើងត្រូវធ្វើលើសពីនេះទៅទៀត។ (សកម្មភាព ១៦:៣០, ៣១) គម្ពីរចែងថា៖ «ជំនឿដែលគ្មានការប្រព្រឹត្តគឺស្លាប់ហើយ ដូចរូបកាយដែលគ្មានកម្លាំងជីវិតក៏ស្លាប់ដែរ»។ (យ៉ាកុប ២:២៦) បើយើងចង់ទទួលសេចក្ដីសង្គ្រោះ យើងត្រូវតែ:
រៀនអំពីលោកយេស៊ូនិងបិតារបស់លោក ព្រះយេហូវ៉ា។—យ៉ូហាន ១៧:៣
ពង្រឹងជំនឿលើលោកទាំងពីរ។—យ៉ូហាន ១២:៤៤; ១៤:១
បង្ហាញជំនឿរបស់យើងដោយធ្វើតាមបញ្ញត្តិផ្សេងៗក្នុងគម្ពីរ។ (លូកា ៦:៤៦; យ៉ូហានទី១ ២:១៧) លោកយេស៊ូបានបង្រៀនថាមិនមែនអស់អ្នកដែលហៅលោកថា«លោកម្ចាស់»នឹងទទួលសេចក្ដីសង្គ្រោះឡើយ ។ មានតែអស់អ្នកដែល«ធ្វើតាមបំណងប្រាថ្នានៃបិតា[របស់លោក]ដែលស្ថិតនៅស្ថានសួគ៌វិញ»។—ម៉ាថាយ ៧:២១
បន្តបង្ហាញជំនឿរបស់យើង សូម្បីតែនៅពេលដែលយើងជួបប្រទះនឹងការពិបាកផ្សេងៗក្ដី។ លោកយេស៊ូបានបញ្ជាក់ចំណុចនេះពេលលោកមានប្រសាសន៍ថា៖ «អ្នកណាដែលស៊ូទ្រាំរហូតដល់ទីបញ្ចប់ អ្នកនោះនឹងត្រូវសង្គ្រោះ»។—ម៉ាថាយ ២៤:១៣
លោកអ្នកក៏ប្រហែលជាចូលចិត្តដែរ
សេចក្ដីបង្រៀនសំខាន់ៗក្នុងគម្ពីរ
ហេតុអ្វីលោកយេស៊ូបានស្លាប់?
គម្ពីរប្រាប់យើងអំពីសារៈសំខាន់នៃការស្លាប់របស់លោកយេស៊ូ។ តើការស្លាប់របស់លោកមានគោលបំណងអ្វី?
ទស្សនាវដ្ដី
តើអ្នកអាចមានជីវិតប្រសើរជាងយ៉ាងដូចម្ដេច?
មាន«ផ្លូវ»មួយដែលអ្នកត្រូវដើរលើដើម្បីបានជីវិតដែលព្រះកំពុងរៀបចំសម្រាប់អ្នកដែលស្រឡាញ់លោក។
