Na kel artigu li

•  Kuzê ki é namoru?

•  Bu sta priparadu pa namora?

 Alguns algen ta atxa ma namoru é sô un diverson. Má, na kel artigu li “namoru” krê fla kel ténpu ki un kazal ta pasa djuntu pa odja si es ta konbina ku kunpanheru pa kazamentu. Nton, namoru ten un obijetivu. É ka sô un manera di resebe atenson di kel otu.

 Ku ténpu, namoru debe djuda-u disidi si bu ta kaza ô si bu ta tirmina ku un algen. Óras ki bu kumesa ta namora, bu debe sta priparadu pa kaza ô pa tirmina.

 Konkluzon: Si bu ta xinti ma bu sta priparadu pa namora, tanbê bu debe xinti ma bu sta priparadu pa kazamentu.

 Namoru pode leba pa kazamentu, nton bu debe djobe ki kualidadis ki bu ten ki pode djuda ô prujudika nhos kazamentu. Pur izénplu, pensa na kes pontu li:

•   Amizadi ku bu família. Manera ki bu ta trata bu pai ku bu mai i bus irmon, prinsipalmenti óras ki bu sta stresadu, ta mostra modi ki bu ta ben trata bu maridu ô bu mudjer.

   Konsedju di Bíblia: “Nhos bandona tudu tipu di rankor, fúria, raiba, gritaria i palavras ki ta ofende i tanbê tudu maldadi.” — Efézius 4:31.

   Pensa na kel-li: ‘Nha pai ku nha mai i nhas irmon ta atxa ma N ta trata-s ku ruspetu? Óras ki N ka ta konkorda ku un di es, ami é kapás di pâpia ku kalma ô N ta fika xatiadu i N ta diskuti?’

•   Sakrifisiu. Óras ki bu sta kazadu, bu ten ki ta pensa na kuzê ki bu maridu ô mudjer krê i txeu bês bu ten ki faze sakrifisiu pa el envês di faze kel ki bu krê.

   Konsedju di Bíblia: “Pa kada algen kontinua ta djobe, ka se própi vantajen, má kel di otu algen.” — 1 Koríntius 10:24.

   Pensa na kel-li: ‘Sénpri N ta insisti pa kuzas fazedu di nha jetu? Otus algen ta atxa ma mi é ikilibradu? Di ki manera dja N mostra ma N ta poi nisisidadis di otus pa riba di meu?’

•   Umildadi. Un bon maridu ô mudjer ta rekonhese se érus i ta pidi diskulpa di korason.

   Konsedju di Bíblia: “Nos tudu nu ta tropesa txeu bês.” — Tiagu 3:2, nóta di rodapé.

   Pensa na kel-li: ‘N sta prontu pa rekonhese nhas éru ô N ta ranja diskulpa pa es? N ta fika xatiadu ô ofendidu óras ki N ta dadu konsedju sobri modi ki N pode midjora di algun manera?’

•   Dinheru. Un algen ki ta uza dinheru ku responsabilidadi, ta ivita un di kes kuza ki más ta poi maridu ku mudjer ta diskuti.

   Konsedju di Bíblia: “Kal di nhos, ki si krê faze un tori, primeru el ka ta xinta i djobe kantu ki el ta kusta, asi pa el odja si kel ki el ten ta txiga pa tirmina-l?” — Lukas 14:28.

   Pensa na kel-li: ‘N ta kontrola nhas gastu ô N ta sta sénpri ku dívida? Modi ki dja N mostra ma N pode gasta dinheru ku responsabilidadi?’

•   Amizadi ku Deus. Si bo é un Tistimunha di Jeová, bu debe ten un bon prugrama di studa Bíblia i di sisti runions.

   Konsedju di Bíblia: “Filís é kes ki sabe ma es meste di Deus.” — Mateus 5:3.

   Pensa na kel-li: ‘N ta faze sforsu pa N kontinua ku nha amizadi ku Jeová fórti? Nha amizadi ku Jeová sta na primeru lugar ô N ta dexa otus kuza trapadja-m?’

 Konkluzon: Kel algen ki bu ta kaza ku el, merese pa bu ser un bon maridu ô un bon mudjer. Si bu sta ta sforsa txeu pa bu ser kel tipu di algen li, bu ten más xansi di atxa un algen ki sta ta faze si tanbê.