“Désdi pikinoti, un di kes prubléma más difísil ki N pasa pa el, éra pamodi N gostaba di rapazinhus, N ta atxaba ma sima N ta ba ta kria, N ta dexaba di xinti kes sentimentu li, má ti inda N ta xinti si.” — Davidi, 23 anu.

 Davidi é un algen ki ta sirbi Deus i el krê agrada-l. El ta pode faze kel-li sikrê el gosta di rapás? Kuzê ki Deus ta pensa sobri omoseksualismu?

•  Kuzê ki Bíblia ta fla?

•  Kel-li krê fla ma. . . ?

•  Má i si. . . ?

 Kel ki pesoas ta pensa sobri ser omoseksual ta muda di akordu ku ses kultura ô na ki ténpu es vive. Má kes ki ta sirbi Deus ka ta dexa ser influensiadu pa opinion di maioria di algen, ô es ka ta ‘lebadu pa li i pa la, pa tudu béntu di ensinus’. (Efésios 4:14) Envês di kel-li, manera ki es ta nkara omoseksualismu i tudu kel ki es ta faze na vida ten bazi na kel ki Bíblia ta inxina.

 Kuzê ki Bíblia ta fla sobri ser omoseksual, é klaru. El ta fla:

•  ‘Bu ka debe ten relason seksual ku un ómi, sima ta kustuma fazedu ku un mudjer.’ — Levítico 18:22.

•  ‘Di akordu ku dizejus di ses korason, Deus ntrega-s pa paxon diskontroladu i vergonhozu, pamodi kes mudjer larga kel tipu di relason seksual normal pa es ten kes tipu di relason ki é kóntra naturéza’. — Romanos 1:24, 26.

•  ‘Ka nhos dexa nada ngana nhos. Kes ki ta faze konportamentu seksual mariadu, kes ki ta faze idolatria, kes ki ta faze adultériu, kes ki ta seta séksu ómi ku ómi, kes ki ta faze séksu ómi ku ómi, kes ladron, kes ki ten ganánsia, kes ki ta bebe dimás, kes ki ta injúria otus algen i kes ki ta ngana algen pa toma-s ses kuza, ka ta erda Reinu di Deus.’ — 1 Coríntios 6:9, 10.

 Kel ki Deus ta pensa sobri kel asuntu li ta aplika na tudu algen, ka ta nporta si es gosta di ómi ô di mudjer. Pamodi nos é inperfetu, alvês nu ta krê faze kuzas mariadu. Má nos tudu ten ki kontrola nos dizeju pa nu pode agrada Deus. — Colossenses 3:5.

 Kel-li krê fla ma Bíblia ta inxina ma nu debe ôdia kes ki é omoseksual?

 Nau. Na verdadi Bíblia ta fla ma nu ka debe ôdia ningen, sikrê el é omoseksual ô nau. Envês di kel-li é ta fla ma nu debe ‘sforsa pa ten pas ku tudu algen’, ka ta nporta se manera di vive. (Hebreus 12:14) Nton, é eradu maltrata un algen pamodi el é omoseksual.

 Nton, kel-li krê fla ma sérvu di Deus ta bai kóntra kes lei ki ta legaliza kazamentu di omoseksual?

 Bíblia ta mostra ma Deus faze kazamentu pa ser entri un ómi ku un mudjer. (Mateus 19:4-6) Má, kes lei ki govérnu ta faze sobri kazamentu entri omoseksual ten bazi na kuzê ki pesoas ta pensa, ka na Palavra di Deus. Bíblia ta mostra ma sérvus di Deus ka ta mete na asuntus di mundu. (João 18:36) Nton, kes ki ta sirbi Deus ka ta apoia nen es é ka kóntra kes lei di govérnu ki ta nvolve kazamentu entri omoseksual ô kalker otu asuntu ki ten aver ku kes ki é omoseksual.

 Má i si un algen é omoseksual? El pode muda?

 Sin. Na verdadi, alguns di kes algen na primeru séklu éra omoseksual, i es konsigi muda. Dipôs di fla ma kes algen ki é omoseksual ka ta erda Reinu di Deus, Bíblia ta fla: ‘Alguns di nhos éra asi.’ — 1 Coríntios 6:11.

 Kel-li krê fla ma kes ki dexa di ser omoseksual ka ta xinti más ninhun di kes dizeju li? Nau. Bíblia ta fla: ‘Nhos bisti di kel manera di ser novu, ki através di konhisimentu izatu el sta ta bira novu’. (Colossenses 3: 10) Kel mudansa li ta kontise poku-poku.

 Má i si un algen krê faze vontadi di Deus ma ti inda el ta xinti dizeju di ser omoseksual?

 Sima ta kontise ku otus tipu di dizeju eradu, un algen pode skodje ka kontinua ta pensa na es ô aji di akordu ku es. Modi ki es pode faze kel-li? Bíblia ta fla: ‘Nhos kontinua ta anda di akordu ku spritu, i nhos ka ta faze ninhun dizeju di karni.’ — Gálatas 5:16.

 Repara ma kel testu li ka ta fla ma kel algen ka ta xinti ninhun tipu di dizeju di karni. Envês di kel-li, kel algen ten ki kontinua ta studa Bíblia i faze orason. Asi el ta ten kel forsa ki el meste pa el rezisti kel dizeju.

 Davidi, ki dja nu papiaba di el na komésu, sta ta konsigi faze kel-li, prinsipalmenti dipôs ki el pâpia di se prubléma ku se mai i ku se pai ki é Tistimunha di Jeová. Dipôs ki el pâpia ku es, el fla: “Foi sima ki N tra un pézu grandi riba di nha kósta. N podia sérba mutu más filís kantu mi era más jóven si N papiaba ku es antis.”

 Sénpri nu ta ser filís si nu sigi leis di Jeová. I nu ten sertéza ma es ‘é justu, es ta poi korason kontenti’ i nu ta ‘ten txeu rekonpénsa na sigi-s.’ — Salmos 19:8, 11.