“Dja N tenta lé Bíblia má N fika dizanimadu pamodi se tamanhu!” — Briana, 15 anu.

 Bu ta xinti si? Kel artigu li pode djuda-u!

•  Pamodi ki é bon lé Bíblia?

•  Modi ki N pode lé Bíblia?

•  Kuzê ki otus jóven ta fla

 Óras ki bu ta pensa na lé Bíblia, bu ta xinti prigisa? Ka bu preokupa, ta da pa ntende. Bíblia é un livru ku más di mil pájina, ku létras pikinoti i ki ka ten ninhun imaji. Odja tilivizon i odja vídius ta parse más interesanti!

 Má pensa na kel-li: Si bu atxa un kófri grandi ku un tizoru antigu, bu ka ta fikaba kuriozu pa bu sabe kuzê ki sta déntu di el?

 Bíblia é sima kel kófri. El ten txeu jóia di sabedoria ki ta djuda-u

•   Toma bons disizon

•   Da dretu ku bu mai i ku bu pai

•   Atxa amigus di verdadi

•   Lida ku preokupason

 Modi ki un livru ki é antigu pode sirbi pa nos ténpu? É pamodi ‘tudu ki sta na Skritura ben di Deus’. (2 Timóteo 3:16) Kel-li krê fla ma kes konsedju ki sta na Bíblia ben di kel midjór fonti ki ten.

 Un primeru manera é lé Bíblia di komésu ti fin. Kel-li ta djuda-u sabe kuzê ki Bíblia ta pâpia di el. Ten txeu manera di lé Bíblia. Odja dôs izénplu:

•    Bu pode lé kes 66 livru di Bíblia sima es ta parse, di Génesis ti Apocalipse.

•    Bu pode lé Bíblia pa órdi ki kuzas kontise.

 Un sugundu manera di lé Bíblia é skodje un stória ki ten aver ku difikuldadi ki bu sta pasa pa el. Pur izénplu:

•   Bu ta gostaba di atxa amigus di verdadi? Lé stória di Jonatan ku Davidi. (1 Samuel, kapítlus 18 ti 20)

•   Bu ta gostaba di ten más forsa pa bu ka kai na tentason? Lé kel stória di Juzé pa bu odja modi ki el faze kel-li. (Génesis, kapítlu 39)

•   Bu ta gostaba di prende modi ki orason pode djuda-u? Lé stória di Neemias. (Neemias, kapítlu 2)

 Sujiston: Óras ki bu ta lé Bíblia, djobe un lugar kétu asi pa bu pode konsentra.

 Un tirseru manera di lé Bíblia é skodje un stória ô un Salmo, lé-l i dipôs pensa na modi ki el ta aplika na bo. Dipôs di lé, faze bu kabésa perguntas sima kes-li:

•    Pamodi ki Jeová poi kel párti li na Bíblia?

•    Kuzê ki el ta inxina sobri manera di ser di Jeová i manera ki el ta faze kuzas?

•    Modi ki N pode aplika kel-li na nha vida?

 Sujiston: Poi un méta.