PERGUNTAS KI JÓVENS TA FAZE
Pamodi ki N debe faze orason?
Txeu jóven ta fla ma es ta faze orason, má ka tudu dia. É klaru ki alguns di kes jóven li ta pergunta: ‘Orason é un kuza ki é sô pa poi algen ta xinti dretu ô é más ki kel-la?’
Kuzê ki é orason?
Orason é pâpia ku Kriador, kel ki faze tudu kuza. Pensa un poku na kuzê ki kel-li krê fla! Jeová é mutu más grandi ki nos di tudu manera. Má simé, ‘el ka sta lonji di kada un di nos.’ (Atus 17:27, Bíblia Na Prugrésu Di Traduson Pa Lingua Kabuverdianu, BPK) Na verdadi, Bíblia ta faze-nu un konviti sábi: ‘Nhos ser amigu di Deus i el ta ser nhos amigu.’ — Tiago 4:8.
Modi ki bu pode ser amigu di Deus?
Óras ki bu ta faze orason, kel-li é manera di pâpia ku Deus.
Óras ki bu ta studa Bíblia, kel-li é manera ki Deus ta “pâpia” ku bo.
Nton, faze orason i studa Bíblia ta djuda-u ten un amizadi fórti ku Deus.
“Pâpia ku Jeová, ki é kel Algen Más Grandi di Séu ku Téra, é un di kes priviléjiu más grandi ki un algen pode ten.” — Jeremy.
“Konta Jeová nhas sentimentu más fundu ta pô-m ta xinti más pértu di el.” — Miranda.
Deus ta obi orason?
Mésmu ki bu ta kridita na Deus i bu ta faze orason pa el, bu pode atxa difísil kridita ma el ta obi-u. Má, Bíblia ta fla ma Jeová é ‘Kel ki ta obi orason’. (Salmo 65:2) Ti el ta konvida-u pa bu ‘bota tudu bus preokupason riba di el’. Pamodi? ‘Pamodi el ta kuida di bo.’ — 1 Pedro 5:7.
Pensa na kel-li: Bu ka ta kustuma tra ténpu pa bu pâpia ku kes algen ki nhos é más amigu? Bu pode faze mésmu kuza ku Deus. Pâpia ku el sénpri na orason i uza se nómi Jeová. (Salmo 86:5-7; 88:9) Bíblia ta konvida-u pa bu faze ‘orason sénpri.’ — 1 Tessalonicenses 5:17.
“Orason é óras ki N ta pâpia mi ku nha Pai na Séu, i N pode fla-l kuzê ki N sta ta xinti di korason.” — Moises.
“N ta pâpia ku Jeová sobri kes kuza ki N sta xinti na fundu di korason, sima N ta faze ku nha mai ô ku un algen ki nos é txeu amiga.” — Karen.
Sobri kuzê ki N pode ora?
Bíblia ta fla: ‘Na tudu kuza nhos faze orason ku súplika, djuntu ku agradesimentu, pa nhos dexa Deus sabe kuzê ki nhos krê’. — Filipenses 4:6.
Nton, nu pode pâpia sobri nos prublémas na orason? É klaru ki sin! Na verdadi, Bíblia ta fla: ‘Lansa bu karga na Jeová i el ta apoia-u.’ — Salmo 55:22.
É klaru ki óras ki nu ta faze orason, nu ka debe fika ta pâpia sô di nos prubléma. Un jóven ki txoma Chantelle fla: “Ka ta sérba un bon amizadi si N fikaba sô ta pidi pa Jeová djuda-m. N ta atxa ma é bon agradese primeru, i N ten txeu kuza pa agradese.”
Pensa na kel-li: Ki kuzas na bu vida ta pô-u ta xinti gratidon? Bu ta konsigi pensa na três kuza ki bu pode agradese Jeová oji?
“Ti kuzas sinplis sima odja un flor bunitu, pode pô-nu ku vontadi di agradese Jeová na orason.” — Anita.
“Pensa na algun kuza na kriason ki ta pô-u ta fika dimiradu ô na un versíklu di Bíblia ki ta mexe txeu ku bo i dipôs agradese Jeová pa kel-li.” — Brian.