Yẹwhehodọtọ 1:1-18
1 Ohó yẹwhehodọtọ*+ lọ tọn lẹ, yèdọ mẹhe yin visunnu Davidi ahọlu lọ tọn to Jelusalẹm.+
2 “Ovọ́ pete!” wẹ yẹwhehodọtọ lọ dọ,“Ovọ́ pete wẹ! Nulẹpo wẹ yin ovọ́!”+
3 Ale tẹwẹ mẹde nọ mọ sọn azọ́n sinsinyẹn etọn lẹpo mẹ
He mẹ ewọ to tuklajẹ te to owhè glọ?+
4 Whẹndo de to jujuyi, whẹndo devo sọ to wiwá,Ṣigba, aigba gbọṣi aimẹ* kakadoi.+
5 Owhè nọ zẹ̀,* owhè sọ nọ yihọ;E sọ nọ yawu lẹkọyi* nọtẹn etọn fie e nasọ vọ́ zẹ̀ sọn.+
6 Jẹhọn nọ yìn hlan hùwaji bosọ nọ lilẹ́ yì agewaji;E nọ to lilẹ́-lilẹ́ mapote; jẹhọn ma nọ doalọtena lilẹ́ etọn.
7 Asisa osin tọn* lẹpo nọ sà biọ hùmẹ, ṣogan ohù ma gọ́.+
Fie asisa osin tọn lẹ nọ sà sọn, finẹ wẹ yé sọ nọ gọ̀ do nado sà whladopo dogọ.+
8 Nulẹpo wẹ nọ hẹn apọṣimẹ;Yé sọ zẹ̀ nuhe gbẹtọ sọgan basi zẹẹmẹ etọn go.
Nukun ma nọ tindo pekọ to mimọ mẹ;Mọjanwẹ otó ma nọ gọ́ na sisè.
9 Nuhe ko tin lẹ janwẹ na gbẹ́ tin,Podọ nuhe ko yin wiwà lẹ janwẹ na gbẹ́ yin wiwà;Onú yọyọ de ma tin to owhè glọ.+
10 Be nude tin he go mẹde sọgan dọ gando dọmọ, “Pọ́n ehe—onú yọyọ de wẹ”?
E ko tin sọn ojlẹ dindẹn die;E ko tin jẹnukọnna ojlẹ mítọn.
11 Mẹdepope ma nọ flin omẹ hohowhenu tọn lẹ;Mọjanwẹ mẹdepope ma na flin mẹhe na wá to nukọn mẹ lẹ;Mọjanwẹ yelọsu lẹ ma na yin finflin gbọn mẹhe na gbẹsọ wá bọdo yé go lẹ dali do niyẹn.+
12 Yẹn, yẹwhehodọtọ lọ ko yin ahọlu do Islaeli ji to Jelusalẹm.+
13 Yẹn wleawuna ahun ṣie nado plọn bo dindona bosọ mọ nuyọnẹn yí+ gando nuhe ko yin wiwà to owhè glọ lẹpo go+—yèdọ azọ́n flumẹjijẹ tọn he Jiwheyẹwhe ko na visunnu gbẹtọ tọn lẹ he nọ hẹn alọnu yetọn ján.
14 Yẹn mọ azọ́n he nọ yin wiwà to owhè glọ lẹpo,Podọ pọ́n! ovọ́ wẹ nulẹpo, yèdọ wezundido to jẹhọn godo.+
15 Nuhe gbán ma sọgan yin jijlọ,Podọ nuhe ma tin ma sọgan yin sọhayina.
16 Whenẹnu wẹ yẹn dọ to ahun ṣie mẹ dọmọ: “Pọ́n! Yẹn ko tindo nuyọnẹn susu, yèdọ hú mẹhe ko tin jẹnukọnna mi to Jelusalẹm depope,+ yẹn sọ bẹ nuyọnẹn po oyọnẹn susu tlala po pli do ahun ṣie mẹ.”+
17 Yẹn dovivẹnu sọn ahun mẹ nado mọdona nuyọnẹn po nulú* po gọna gúgú,+ podọ wezundido to jẹhọn godo wẹ ehe lọsu yin.
18 Na nuyọnẹn susugege nọ hẹn flumẹjijẹ susugege wá,Enẹwutu, mẹdepope he hẹn oyọnẹn sudeji hẹn awufiẹsa sudeji.+
Nudọnamẹ Odò Tọn
^ Kavi “mẹhe nọ bẹ agun pli; mẹhe nọ bẹ gbẹtọ lẹ pli.”
^ To paa mẹ, “to ote.”
^ Kavi “nọ họ́n.”
^ Kavi “nọ lẹkọ po kanvinván po yì.”
^ Kavi “Osinwhín avivọ-whenu tọn; Osinwhín he nọ wá to ojlẹ etọn mẹ.”
^ Kavi “nulú sinsinyẹn.”
