Kolosinu lẹ 1:1-29
1 Paulu, apọsteli Klisti Jesu tọn gbọn ojlo Jiwheyẹwhe tọn gblamẹ, podọ Timoti+ mẹmẹsunnu mítọn
2 to wekanhlan omẹ wiwe lẹ po mẹmẹsunnu nugbonọ he to kọndopọ mẹ hẹ Klisti to Kolosi lẹ po:
Na mì ni tindo nukundagbe majẹhẹ po jijọho po sọn Jiwheyẹwhe Otọ́ mítọn dè.
3 Whepoponu wẹ mí nọ dopẹna Jiwheyẹwhe Otọ́ Oklunọ mítọn Jesu Klisti tọn to whenue mí to dẹ̀ho do ota mìtọn mẹ,
4 na mí sè gando yise mìtọn to Klisti Jesu mẹ go podọ gando owanyi he mì tindo na omẹ wiwe lẹpo go,
5 na todido he yin whiwhla do olọn mẹ+ na mì lọ wutu. Mìwlẹ ko sè gando todido ehe go dai gbọn nugbo wẹndagbe lọ tọn dali,
6 ehe ko wá mì dè. Kẹdẹdile wẹndagbe lọ to sinsẹ́n detọ́n bo to jijideji to aihọn lọ pete mẹ do,+ mọ wẹ e sọ to wiwà do to ṣẹnṣẹn mìtọn sọn azán he gbè mì ko sè bo yọ́n nugbo lọ gando nukundagbe majẹhẹ Jiwheyẹwhe tọn go hezeheze.
7 Enẹ wẹ nuhe mìwlẹ ko plọn sọn Epafla+ afanumẹ hatọ mẹyiwanna mítọn dè, mẹhe yin lizọnyizọnwatọ nugbonọ Klisti tọn do otẹn mítọn mẹ.
8 Ewọ sọ hẹn owanyi mìtọn to gbigbọ-liho* zun yinyọnẹn na mí.
9 Enẹ wẹ zọ́n ga bọ míwlẹ, sọn azán he gbè mí ko sè ehe, mí ma ko doalọtena dẹ̀hiho do ota mìtọn mẹ+ bo nọ to bibiọ dọ mì ni gọ́ na oyọnẹn he pegan+ ojlo etọn tọn to nuyọnẹn po nukunnumọjẹnumẹ gbigbọmẹ tọn lẹpo po mẹ,+
10 nado sọgan zinzọnlin dile e jẹ do to Jehovah* nukọn nado hẹn homẹ etọn hùn to gigọ́ mẹ dile mìwlẹ na to sinsẹ́n detọ́n zọnmii to azọ́n dagbe lẹpo mẹ bo na to jijideji to oyọnẹn he pegan Jiwheyẹwhe tọn mẹ;+
11 na huhlọn gigonọ etọn+ ni hẹn mì lodo bosọ na huhlọn mì ganji nado sọgan yí homẹfa po ayajẹ po do doakọnnanu to gigọ́ mẹ,
12 dile mì nọ dopẹna Otọ́ lọ he hẹn mì pegan nado tindo mahẹ to ogú omẹ wiwe+ he to hinhọ́n nù lẹ tọn mẹ.
13 Ewọ whlẹn mí sọn aṣẹpipa zinvlu tọn+ si bo diọtẹnna mí biọ ahọluduta Visunnu yiwanna etọn tọn mẹ,
14 mẹhe gblamẹ míwlẹ mọ tundote yí gbọn ofligọ dali, yèdọ jona ylando mítọn lẹ tọn.+
15 Ewọ wẹ yin apajlẹ Jiwheyẹwhe mayinukundomọ lọ tọn,+ yèdọ plọnji nudida lẹpo tọn;+
16 na gbọn ewọ gblamẹ wẹ nudevo lẹpo yin didá te to olọn mẹ podọ to aigba ji, yèdọ onú yinukundomọ lẹ po onú mayinukundomọ lẹ po,+ vlavo ofìn lẹ wẹo kavi oklunọ-yinyin lẹ kavi gandudu lẹ kavi aṣẹpipa lẹ. Nudevo lẹpo wẹ yin didá gbọn ewọ dali+ podọ na ewọ.
17 Humọ, ewọ tin jẹnukọnna nudevo lẹpo,+ podọ gbọn ewọ gblamẹ wẹ nudevo lẹpo yin hinhẹnwa tintin mẹ te,
18 ewọ sọ wẹ ota agbasa lọ tọn, yèdọ agun lọ.+ Ewọ wẹ bẹjẹeji, plọnji sọn oṣiọ lẹ mẹ,+ na ewọ nido sọgan lẹzun omẹ tintan to nulẹpo mẹ;
19 na Jiwheyẹwhe mọdọ e yọ́n nado dike nulẹpo ni nọ ewọ mẹ to gigọ́ mẹ,+
20 bo gbọn ewọ gblamẹ hẹn nudevo lẹpo+ gbọwhẹ hẹ ede gbọn ohùn+ he ewọ sọndai to yatin* ji yíyí do basi jijọho dali, vlavo onú aigba ji tọn lẹ kavi onú olọn mẹ tọn lẹ.
21 Na nugbo tọn, mìwlẹ he ko jẹla bo yin kẹntọ lẹ to ojlẹ de mẹ wayi, na ayiha mìtọn tin to azọ́n he yin ylankan lẹ ji wutu,
22 e ko gbọwhẹ hẹ mì todin gbọn agbasa gbẹtọ tọn omẹ enẹ he kú lọ tọn gblamẹ, nado sọgan hẹn mì wá ewọ nukọn to wiwe ji, madoblọ podọ matin dotẹnmẹ hundote na whẹsadokọnamẹ depope+—
23 na taun tọn, enẹ na yinmọ, eyin mìwlẹ ko gbẹ́ zindonukọn to yise+ he yin didoai do dodonu+ ji lọ mẹ bo nọte gligli+ bo masọ yin tẹnsẹna sọn todido wẹndagbe enẹ he mì sè podọ ehe yẹwheho etọn yin didọna nudida he to olọn glọ lẹpo+ lọ tọn mẹ. Wẹndagbe ehe wẹ yẹn Paulu lẹzun lizọnyizọnwatọ de na.+
24 Todin, yẹn to ayajẹ to yajiji ṣie lẹ mẹ do ota mìtọn mẹ,+ podọ yẹn ma ko pehẹ nukunbibia to gigọ́ mẹ na Klisti tọn wutu do ota agbasa etọn he yin agun lọ+ tọn mẹ+ gba.
25 Yẹn lẹzun lizọnyizọnwatọ agun ehe tọn de to kọndopọ mẹ hẹ họ̀nkọnsi-zọ́n+ he Jiwheyẹwhe na mi do ota mìtọn mẹ nado dọyẹwheho ohó Jiwheyẹwhe tọn to gigọ́ mẹ,
26 yèdọ aṣli wiwe+ he ko yin whiwhla sọn titonu*+ he wayi lẹ mẹ podọ sọn whẹndo he wayi lẹ mẹ. Ṣigba todin, e ko yin didehia omẹ wiwe etọn lẹ,+
27 mẹhe Jiwheyẹwhe ko hùnhomẹ nado hẹn aṣli wiwe gigonọ susugege etọn zun yinyọnẹn na lẹ to akọta lẹ ṣẹnṣẹn, podọ aṣli wiwe+ lọ wẹ yin Klisti to kọndopọ mẹ hẹ mì, yèdọ todido gigo etọn tọn.+
28 Ewọ wẹ mẹhe míwlẹ to lilá pé bo to tudohomẹna mẹlẹpo bosọ to mẹlẹpo plọn to nuyọnẹn lẹpo mẹ, na mí nido sọgan hẹn gbẹtọ lẹpo wá to pipé* mẹ to kọndopọ mẹ hẹ Klisti.+
29 Na nugbo tọn, ehe wutu wẹ yẹn to azọ́n sinsinyẹn wà bo to kanván po huhlọn etọn he to nuyiwa sinsinyẹn to yẹn mẹ po.+
