Jakọbu 4:1-17
4 Etẹwẹ hẹn awhàn po avùn lẹ po wá ṣẹnṣẹn mìtọn? Be e ma yin ojlo agbasalan tọn mìtọn he nọ to avùnho to mì mẹ* lẹ wẹ?+
2 Mìwlẹ jlo, ṣogan mì ma tindo. Mì nọ to hlọ̀nhù bo nọ to nukunkẹn do mapote, ṣogan mì ma penugo nado mọyi. Mì nọ to avùnho bosọ nọ to awhànfun mapote.+ Mì ma tindo, na mì ma biọ wutu.
3 To whenuena mì biọ, mì ma mọyi, na mì nọ biọ na lẹndai he ma sọgbe wutu, na mì nido yí i zan na ojlo agbasalan tọn mìtọn lẹ.
4 Mì yọnnu ayọdetọ lẹ,* be mì ma yọnẹn dọ họntọnjiji hẹ aihọn, okẹ̀n wẹ e yin to Jiwheyẹwhe dè? Enẹwutu, mẹdepope he jlo na yin họntọn aihọn tọn to ede hẹn zun kẹntọ Jiwheyẹwhe tọn.+
5 Kavi be mì lẹndọ tata wẹ adà Owe-wiwe tọn lọ do dọ dọ: “Gbigbọ nuvẹun tọn he to mí mẹ nọ to nulẹpo jlo vẹkuvẹku mapote” ya?+
6 Ṣigba, nukundagbe majẹhẹ he Ewọ nọ dohia klo taun. Enẹwutu, owe-wiwe dọmọ: “Jiwheyẹwhe nọ diọnukunsọ saklanọ lẹ,+ ṣigba e nọ do nukundagbe majẹhẹ hia whiwhẹnọ lẹ.”+
7 Enẹwutu, mì litaina Jiwheyẹwhe;+ ṣigba mì diọnukunsọ Lẹgba,+ ewọ nasọ họ̀n sọn mì dè.+
8 Mì dọnsẹpọ Jiwheyẹwhe, ewọ nasọ dọnsẹpọ mì.+ Mì klọ́ alọ mìtọn lẹ wé, mì ylandonọ lẹ,+ bosọ lẹ̀ ahun mìtọn lẹ wé,+ mì ayihaawenọ lẹ.
9 Mì jẹ awubla ji bo biọ aluẹmẹ bosọ viavi.+ Mì dike nukiko mìtọn ni diọ zun aluẹmẹninọ, podọ ayajẹ mìtọn ni diọ zun flumẹjijẹ.
10 Mì whiwhẹ mìde to nukun Jehovah* tọn mẹ,+ ewọ nasọ ze mì daga.+
11 Mẹmẹsunnu lẹ emi, mì sọ dọho jẹagọdo ode awetọ ba blo.+ Mẹdepope he dọho jẹagọdo mẹmẹsunnu de kavi dawhẹna mẹmẹsunnu etọn dọho jẹagọdo osẹ́n bosọ dawhẹna osẹ́n. Todin, eyin hiẹ dawhẹna osẹ́n, hiẹ ma yin basitọ osẹ́n tọn, ṣigba whẹdatọ de.
12 Omẹ dopo gee wẹ Sẹ́nnamẹtọ podọ Whẹdatọ,+ yèdọ mẹlọ he penugo nado whlẹngán podọ nado vasudo.+ Ṣigba hiẹ, mẹnu wẹ hiẹ nado to whẹdana kọmẹnu towe?+
13 Todin, mì wá, mì he nọ dọmọ: “To egbé kavi osọ, mí na zingbejizọnlin yì tòdaho ehe mẹ bo na zan owhe dopo, podọ mí na wàjọ bo duale,”+
14 to whenuena e yindọ mì ma yọ́n nuhe ogbẹ̀ mìtọn na yin to osọ.+ Na avìvì wẹ mìwlẹ, ehe nọ sọawuhia na ojlẹ vude podọ to enẹgodo nọ busẹ.+
15 Kakatimọ, mì dona nọ dọ dọ: “Eyin Jehovah* jlo,+ mí na nọgbẹ̀ bo na wà ehe kavi enẹ.”
16 Ṣigba todin, mì to awagundo to mẹdezedaga goyiyi tọn mìtọn lẹ mẹ. Nuylankan wẹ mẹdezedaga mọnkọtọn lẹpo.
17 Enẹwutu, eyin mẹde yọ́n lehe e na wà nuhe sọgbe do ṣogan bo ma wà ẹ, ylando de wẹ e yin na ẹn.+
