Heblu lẹ 2:1-18
2 Enẹwutu wẹ e do yin dandannu dọ mí ni na ayidonugo vonọtaun hlan nuhe mí ko sè lẹ,+ bọ mí ma nado danbú pọ́n gbede.+
2 Na eyin ohó he yin didọ gbọn angẹli lẹ gblamẹ+ sọgan yin jidedego, bọ yè sayana mẹhe doalọ to walọ sẹ́nhẹngba tọn po tolivivẹ tọn lẹpo po mẹ to kọndopọ mẹ hẹ whẹdida dodo,+
3 nawẹ míwlẹ na họ̀ngán do eyin mí ko gbẹkọ whlẹngán daho mọnkọtọn go?+ Na Oklunọ mítọn gblamẹ wẹ ohó etọn bẹjẹeji te+ bọ mẹhe sè ohó etọn lẹ dekunnu gandego na mí,
4 to whenuena Jiwheyẹwhe kọnawudopọ hẹ yé to kunnudide lọ mẹ gbọn ohia lẹ, nujiawu* lẹ po azọ́n huhlọnnọ voovo lẹ po dali+ podọ gbọn gbigbọ wiwe mimá namẹ sọgbe hẹ ojlo etọn dali.+
5 Na e ma yin angẹli lẹ glọ wẹ e ze aigba fininọ he ja,+ ehe mí to ohó etọn dọ lọ do gba.
6 Ṣigba, kunnudetọ de ko dọ to fide dọmọ: “Etẹwẹ gbẹtọ yin bọ hiẹ do nọ hẹn ẹn do ayiha mẹ, kavi etẹwẹ gbẹtọvi yin bọ hiẹ do nọ penukundo e go?+
7 Hiẹ hẹn ẹn yìdo vude hú angẹli lẹ; hiẹ yí gigo po gbégbò po do ṣinyọ́n jẹgbakun na ẹn, bo de e do azọ́n alọ towe tọn lẹ ji.
8 Hiẹ ko hẹn nulẹpo zun mẹmẹglọ to afọ etọn lẹ glọ.”+ Gbọn nulẹpo hinhẹn zun mẹmẹglọ na ẹn dali,+ Jiwheyẹwhe ma jo nudepope do he ma yin mẹmẹglọ na ẹn.+ Ṣigba, mí ma ko mọdọ nulẹpo yin mẹmẹglọ na ẹn todin gba.+
9 Amọ́ mí mọdọ Jesu, mẹhe yin hinhẹn whè vude hú angẹli lẹ,+ ko yin jẹgbakun gigo po gbégbò po tọn ṣinyọ́n na todin, na e ko jiya okú tọn,+ na ewọ nido gbọn nukundagbe majẹhẹ Jiwheyẹwhe tọn dali dọ́ okú pọ́n do gbẹtọ lẹpo tamẹ.+
10 Nulẹpo wẹ wá aimẹ na gigo Jiwheyẹwhe tọn wutu podọ gbọn ewọ gblamẹ wẹ yé do tin. Enẹwutu, nado hẹn visunnu susu wá gigo mẹ,+ e jẹ dọ ewọ ni hẹn Afọzedaitọ-gán whlẹngán yetọn tọn+ zun pipé gbọn yajiji lẹ gblamẹ.+
11 Na ewọ he to omẹ hẹn zun wiwe podọ mẹhe to yinyin hinhẹn zun wiwe lẹ,+ mẹdopo dè wẹ yemẹpo wá sọn,+ podọ na ehe wutu, winyan ma hù i nado ylọ yé dọ nọvisunnu lẹ,+
12 to whenuena e dọmọ: “Yẹn na lá oyín towe na nọvisunnu ṣie lẹ; yẹn na yí ohàn do pà we to agun ṣẹnṣẹn.”+
13 E sọ dọmọ: “Yẹn na dejido ewọ go.”+ Podọ ga: “Mì pọ́n! Yẹn po ovi pẹvi he Jehovah* ko na mi lẹ po.”+
14 Enẹwutu, to whenuena e yindọ “ovi pẹvi” lọ lẹ yin mimátọ to ohùn po agbasalan po mẹ, ewọ lọsu ga tindo mahẹ to nudopolọ lẹ mẹ,+ na gbọn okú etọn gblamẹ, ewọ nido sọgan hẹn mẹhe tindo huhlọn nado hẹn okú wá lọ,+ yèdọ Lẹgba, zun ovọ́,+
15 podọ na ewọ nido sọgan tún mẹlẹpo he ko lẹzun afanumẹ to gbẹzan yetọn lẹpo mẹ na obu okú tọn wutu dote.+
16 Na e ma yin angẹli lẹ wẹ ewọ to alọgọna na taun tọn gba, ṣigba kúnkan* Ablaham tọn wẹ e to alọgọna.+
17 Enẹwutu, e dona taidi “nọvisunnu” etọn lẹ to aliho lẹpo mẹ,+ na ewọ nido sọgan lẹzun yẹwhenọ daho lẹblanunọ podọ nugbonọ de to nuhe gando Jiwheyẹwhe go lẹ mẹ, nado sọgan basi avọ́sinsan oyẹsu tọn de*+ na ylando gbẹtọ lẹ tọn.+
18 Na ewọ lọsu ko jiya to whenuena e to yinyin whiwhlepọn wutu,+ e penugo nado gọalọna mẹhe to yinyin whiwhlepọn lẹ.+
Nudọnamẹ Odò Tọn
^ Kavi “nudabla.”
^ To paa mẹ, “okún.”
^ Kavi “nado basi avọ́sinsan ovẹsè tọn de; nado basi ovẹsè.”
