Wolo Ni Akɛmaje Romabii Lɛ 8:1-39
8 No hewɔ lɛ, mɛi ni kɛ Kristo Yesu efee ekome lɛ yeee fɔ.
2 Ejaakɛ mumɔ lɛ mla lɛ ni hãa wala yɛ Kristo Yesu mli lɛ ehã nyɛye nyɛhe+ kɛje esha mla lɛ kɛ gbele mla lɛ dɛŋ.
3 Nɔ ni Mla lɛ nyɛɛɛ afee+ akɛni wɔji heloo ni esha yɔɔ wɔhe hewɔ lɛ,+ Nyɔŋmɔ fee kɛtsɔ lɛ diɛŋtsɛ e-Bi+ lɛ ni etsu kɛba yɛ heloo+ mli koni ebajie esha kɛya lɛ nɔ, koni ekɛbu esha fɔ hu yɛ heloo lɛ mli,
4 koni Mla lɛ mli jalɛ taomɔ nii lɛ aba mli yɛ wɔ+ mɛi ni wɔnyiɛɛɛ yɛ heloo lɛ naa, shi moŋ wɔnyiɛɔ yɛ mumɔ lɛ naa lɛ anɔ.+
5 Ejaakɛ mɛi ni hiɔ shi yɛ heloo lɛ naa lɛ kɛ amɛjwɛŋmɔ maa heloo lɛ nibii anɔ,+ shi mɛi ni hiɔ shi yɛ mumɔ lɛ naa lɛ kɛ amɛjwɛŋmɔ maa mumɔ lɛ nibii anɔ.+
6 Ejaakɛ jwɛŋmɔ ni akɛmaa heloo lɛ nɔ lɛ, gbele ni,+ shi jwɛŋmɔ ni akɛmaa mumɔ lɛ nɔ lɛ, wala kɛ toiŋjɔlɛ ni;+
7 ejaakɛ jwɛŋmɔ ni akɛmaa heloo lɛ nɔ lɛ, nyɛɛ ni anyɛɔ Nyɔŋmɔ ni,+ ejaakɛ heloo lɛ baaa ehe shi ewooo Nyɔŋmɔ mla lɛ shishi, ni enyɛŋ efee nakai hu.
8 No hewɔ lɛ, mɛi ni nyiɛɔ yɛ heloo lɛ naa lɛ nyɛŋ amɛsa Nyɔŋmɔ hiɛ.
9 Shi kɛ́ Nyɔŋmɔ mumɔ lɛ yɛ nyɛmli lɛɛlɛŋ lɛ, no lɛ, nyɛnyiɛŋ yɛ heloo lɛ naa, shi moŋ nyɛbaanyiɛ yɛ mumɔ lɛ naa.+ Shi kɛ́ mɔ ko bɛ Kristo mumɔ lɛ, belɛ mɔ lɛ jeee Kristo nɔ.
10 Shi kɛ́ Kristo kɛ nyɛ efee ekome lɛ,+ no lɛ, gbɔmɔtso lɛ egbo yɛ esha hewɔ, shi mumɔ lɛ ji wala yɛ jalɛ hewɔ.
11 Agbɛnɛ, kɛji mɔ ni tee Yesu shi kɛjɛ gbohii ateŋ lɛ mumɔ lɛ yɛ nyɛmli lɛ, no lɛ, mɔ ni tee Kristo Yesu shi kɛjɛ gbohii ateŋ+ lɛ baatsɔ emumɔ ni yɔɔ nyɛmli lɛ nɔ ehã nyɛgbɔmɔtsei ni baagboi lɛ hu wala.+
12 No hewɔ lɛ, agbɛnɛ, nyɛmimɛi, sɔ̃ kã wɔnɔ, shi ejeee heloo lɛ he sɔ̃ ni biɔ ni wɔhi shi yɛ heloo lɛ naa;+
13 ejaakɛ kɛ́ nyɛhi shi yɛ heloo lɛ naa lɛ, bɔ fɛɛ bɔ ni fee lɛ nyɛbaagboi; shi kɛ́ nyɛtsɔ mumɔ lɛ nɔ nyɛgbe gbɔmɔtso lɛ nitsumɔi lɛ,+ nyɛhiɛ baakamɔ.+
14 Ejaakɛ mɛi fɛɛ ni Nyɔŋmɔ mumɔ lɛ tsɔɔ amɛ gbɛ lɛ, amɛji Nyɔŋmɔ bii lɛɛlɛŋ.+
15 Ejaakɛ jeee nyɔŋyeli mumɔ ní hãa asheɔ gbeyei ekoŋŋ lɛ nyɛná, shi moŋ nyɛná biiatsɔmɔ mumɔ, ni ji mumɔ ni hãa wɔbolɔɔ akɛ: “Aba,* Ataa!”+ lɛ.
16 Mumɔ lɛ diɛŋtsɛ kɛ wɔmumɔ lɛ yeɔ odase+ akɛ Nyɔŋmɔ bii ji wɔ.+
17 No hewɔ lɛ, kɛ́ bii ji wɔ lɛ, niyelɔi hu ji wɔ—anɔkwa, Nyɔŋmɔ niyelɔi, kɛ Kristo nanemɛi niyelɔi+—shi ja wɔ kɛ lɛ efee ekome kɛna nɔ dã,+ koni awo wɔ kɛ lɛ fɛɛ hiɛ nyam hu.+
18 Ejaakɛ misusuɔ akɛ kɛ́ akɛ amanehului ni wɔnaa amrɔ nɛɛ to anunyam ni abaajie kpo yɛ wɔmli lɛ he lɛ, nomɛi jeee nɔ ko kwraa.+
19 Ejaakɛ bɔɔ nii lɛ miikwɛ Nyɔŋmɔ bii lɛ akpojiemɔ lɛ gbɛ waa.+
20 Ejaakɛ akɛ bɔɔ nii lɛ wo nii ni sɛɛnamɔ bɛ he shishi,+ jeee yɛ amɛ diɛŋtsɛ amɛsuɔmɔ naa, shi moŋ yɛ mɔ ni kɛ amɛ wo shishi lɛ suɔmɔ naa, yɛ hiɛnɔkamɔ mli
21 akɛ abaahã bɔɔ nii lɛ diɛŋtsɛ hu aye amɛhe+ kɛjɛ fitemɔ nyɔŋyeli mli ni amɛná Nyɔŋmɔ bii lɛ anunyam heyeli lɛ.
22 Ejaakɛ wɔle akɛ bɔɔ nii lɛ fɛɛ feɔ ekome kɛyaa nɔ amɛkɛ̃mɔɔ ni amɛhe jaraa amɛ kɛbashi amrɔ nɛɛ.
23 Jeee no kɛkɛ, shi moŋ wɔ diɛŋtsɛ hu ni wɔyɔɔ klɛŋklɛŋ yibii, ni ji mumɔ lɛ, hɛɛ, wɔ diɛŋtsɛ hu wɔkɛ̃mɔɔ yɛ wɔmli,+ ni yɛ nakai beiaŋ nɔŋŋ lɛ wɔmiimɛ waa kɛhã bii ni wɔbaatsɔmɔ lɛ,+ ni ji kpɔmɔ ni abaatsɔ kpɔmɔnɔ lɛ nɔ akpɔ̃ wɔ kɛjɛ wɔgbɔmɔtsei lɛ amli lɛ.
24 Ejaakɛ ahere wɔyiwala yɛ hiɛnɔkamɔ nɛɛ mli; shi hiɛnɔkamɔ ni anaa lɛ, ejeee hiɛnɔkamɔ, ejaakɛ kɛ́ gbɔmɔ miina nɔ ko lɛ, ani ehiɛ kãa nakai nɔ lɛ nɔ?
25 Shi kɛ́ wɔhiɛ kã+ nɔ ni wɔnaaa lɛ nɔ lɛ,+ wɔyaa nɔ wɔfiɔ shi ni wɔkwɛɔ nakai nɔ lɛ gbɛ waa.+
26 Agbɛnɛ hu, akɛni wɔhe waaa hewɔ lɛ mumɔ lɛ yeɔ ebuaa wɔ;+ ejaakɛ bei komɛi shɛɔ ni wɔnuɔ he akɛ esa akɛ wɔsɔle, shi wɔleee nɔ ni wɔbaakɛɛ. Yɛ nakai bei lɛ amli lɛ, eyɛ mli akɛ wɔleee nɔ ni wɔbaakɛɛ kɛjie kɛ̃ɛmɔ ni wɔkɛ̃mɔɔ yɛ wɔmli lɛ kpo moŋ, shi mumɔ lɛ wieɔ* ehãa wɔ.
27 Shi mɔ ni taoɔ tsuii amli+ lɛ le nɔ ni mumɔ lɛ tsɔɔ lɛ,* ejaakɛ ekpaa fai ehãa mɛi krɔŋkrɔŋi lɛ yɛ Nyɔŋmɔ suɔmɔ naa.
28 Wɔle akɛ, Nyɔŋmɔ hãa enitsumɔi lɛ fɛɛ kɛ amɛhe kpãa gbee kɛhã mɛi ni sumɔɔ Nyɔŋmɔ lɛ, kɛhã mɛi ni atsɛ amɛ yɛ eyiŋtoo naa lɛ ahilɛkɛhamɔ;+
29 ejaakɛ mɛi ni ekpɛlɛ amɛnɔ klɛŋklɛŋ lɛ, etsɔ hiɛ ekpɛ mli eto hu akɛ amɛsu baatamɔ e-Bi lɛ nɔ lɛ,+ koni e-Bi lɛ afee kromɔbi+ yɛ nyɛmimɛi pii ateŋ.+
30 Agbɛnɛ hu, mɛi ni etsɔ hiɛ ekpɛ mli eto akɛ ebaahala amɛ+ lɛ ji mɛi nɔŋŋ ni etsɛ amɛ lɛ;+ ni mɛi ni etsɛ amɛ lɛ nɔŋŋ ji mɛi ni ebu amɛ jalɔi lɛ.+ Naagbee lɛ, mɛi ni ebu amɛ jalɔi lɛ nɔŋŋ ji mɛi ni ewo amɛhiɛ nyam lɛ.+
31 No hewɔ lɛ, mɛni wɔbaakɛɛ yɛ nibii nɛɛ ahe? Kɛ́ Nyɔŋmɔ yɛ wɔgbɛfaŋ lɛ, namɔ baate shi awo wɔ?+
32 Kɛ́ ekamaaa wɔ lɛ diɛŋtsɛ e-Bi lɛ, shi moŋ ekɛ lɛ hã yɛ wɔ fɛɛ wɔhewɔ lɛ,+ ani lɛ kɛ e-Bi lɛ fɛɛ kɛ nibii krokomɛi fɛɛ hãŋ wɔ tswaa?
33 Namɔ kɛ sane baafɔ̃ mɛi ni Nyɔŋmɔ ehala lɛ anɔ?+ Nyɔŋmɔ ji mɔ ni buɔ amɛ jalɔi.+
34 Namɔ baabu amɛ fɔ? Kristo Yesu ji mɔ ni gbo lɛ, shi nɔ ni fe no lɛ, lɛ ji mɔ ni atee lɛ shi ni yɔɔ Nyɔŋmɔ ninejurɔ nɔ+ ni kpaa fai hu ehãa wɔ lɛ.+
35 Namɔ baatse wɔ kɛje Kristo lɛ suɔmɔ lɛ he?+ Amanehulu loo haomɔ loo yiwaa loo hɔmɔ loo nyiɛmɔ ni anyiɛɔ kɛ he folo loo oshãra loo klante?+
36 Tamɔ bɔ ni aŋma lɛ, akɛ: “Agbeɔ wɔ gbi muu fɛɛ yɛ ohewɔ; abuɔ wɔ tamɔ gwantɛŋi ni ayaagbe amɛ.”+
37 Shi yɛ nibii nɛɛ fɛɛ amli lɛ, wɔtsɔɔ mɔ ni sumɔ wɔ lɛ nɔ wɔyeɔ kunim kɛmɔɔ shi.+
38 Ejaakɛ miyɛ nɔmimaa akɛ gbele jio, wala jio, ŋwɛibɔfoi jio, nɔyelii jio, nibii ni yɔɔ amrɔ nɛɛ jio, nibii ni baaba lɛ jio, hewalɛi jio,+
39 ŋwɛi jio, shishi jio, loo bɔɔ nii lɛ amli nɔ kroko jio, nyɛŋ atse wɔ kɛje Nyɔŋmɔ suɔmɔ ni yɔɔ Kristo Yesu, wɔ-Nuŋtsɔ lɛ mli lɛ he.
Shishigbɛ Niŋmaa
^ Hebri loo Aramaik wiemɔ ni shishi ji “Mitsɛ!”
^ Loo “mumɔ lɛ kpaa fai.”
^ Loo “le mumɔ lɛ yiŋtoo; jwɛŋmɔ.”
