Wolo Ni Akɛmaje Romabii Lɛ 13:1-14
13 Mɔ fɛɛ mɔ* aba ehe shi awo hegbɛi ni yeɔ nɔ lɛ ashishi,+ ejaakɛ hegbɛ ko bɛ ni jeee Nyɔŋmɔ ŋɔɔ ejɛ;+ hegbɛi ni yɔɔ lɛ, Nyɔŋmɔ ji mɔ ni kɛ amɛ to amɛgbɛhei lɛ.+
2 No hewɔ lɛ, mɔ fɛɛ mɔ ni teɔ shi ewoɔ hegbɛ lɛ, eete shi eewo Nyɔŋmɔ gbɛjianɔtoo; mɛi ni teɔ shi amɛwoɔ hegbɛ lɛ, abaagbala amɛtoi.
3 Ejaakɛ nakai nɔyelɔi lɛ ahe yɛ gbeyei, jeee kɛhã mɛi ni feɔ nɔ kpakpa, shi moŋ kɛhã mɛi ni feɔ nibii gbohii lɛ.+ Osumɔŋ ni hegbɛ lɛ he gbeyei amɔ bo, aloo jeee nakai? Belɛ, yaa nɔ ofee ekpakpa,+ ni obaaná yijiemɔ kɛjɛ edɛŋ;
4 ejaakɛ eji Nyɔŋmɔ sɔɔlɔ kɛhã bo yɛ ohilɛkɛhamɔ hewɔ. Shi kɛ́ oofee nɔ ko gbonyo lɛ, no lɛ she gbeyei, ejaakɛ ehiɛɛɛ klante lɛ efolo. Eji Nyɔŋmɔ sɔɔlɔ, oweletɔlɔ ni jieɔ mlifu kpo yɛ mɔ ni feɔ nɔ ko gbonyo lɛ nɔ.*
5 No hewɔ lɛ, nyɛbaa nyɛhe shi nyɛwoa hegbɛi ni yeɔ nɔ lɛ ashishi, jeee yɛ nakai mlifu lɛ pɛ hewɔ, shi moŋ yɛ nyɛhenilee hu hewɔ.+
6 Enɛ hewɔ ni nyɛwoɔ too hu lɛ; ejaakɛ amɛji Nyɔŋmɔ tsuji ni sɔmɔɔ mɛi daa nɛɛ.
7 Nyɛkɛ mɛi fɛɛ agbɛnaa nii ahãa amɛ: mɔ ni biɔ too lɛ, nyɛwoa too lɛ;+ mɔ ni biɔ ni awo shika ko ahã lɛ lɛ, nyɛwoa nakai shika lɛ nyɛhãa lɛ; mɔ ni biɔ gbeyeishemɔ lɛ, nyɛkɛ nakai gbeyeishemɔ lɛ ahãa lɛ;+ mɔ ni biɔ woo lɛ, nyɛkɛ nakai woo lɛ ahãa lɛ.+
8 Nyɛkahiɛa mɔ ko mɔ ko nɔ ko kwraa he nyɔmɔ, ja suɔmɔ ni nyɛaasumɔsumɔɔ nyɛhe lɛ kɛkɛ;+ ejaakɛ mɔ fɛɛ mɔ ni sumɔɔ enyɛmi gbɔmɔ lɛ, ewo mla lɛ obɔ.+
9 Ejaakɛ mlai ni ji, “Kaafite gbãla,*+ kaagbe gbɔmɔ,+ kaaju,+ ohiɛ akakɔ̃ nii anɔ,”+ kɛ kitãi krokomɛi ni yɔɔ lɛ fɛɛ lɛ, amua fɛɛ naa yɛ wiemɔ nɛɛ mli akɛ: “Suɔmɔ onyɛmi gbɔmɔ tamɔ bo diɛŋtsɛ ohe.”+
10 Suɔmɔ efeee enyɛmi gbɔmɔ efɔŋ;+ no hewɔ lɛ, suɔmɔ woɔ mla lɛ obɔ.+
11 Ni nyɛfea enɛ, titri lɛ akɛni nyɛle be lɛ, akɛ ŋmɛlɛtswaa ni esa akɛ nyɛte shi kɛjɛ wɔ mli lɛ eshɛ lɛ hewɔ,+ ejaakɛ amrɔ nɛɛ, wɔyiwalaheremɔ lɛ ebɛŋkɛ fe be mli ni wɔhe Nuŋtsɔ lɛ nɔ wɔye lɛ.
12 Nyɔɔŋ be lɛ eho etã; jetsɛremɔ ebɛŋkɛ. No hewɔ lɛ, nyɛhãa wɔjiea duŋ mli nitsumɔi lɛ wɔshwiea,+ ni wɔwo la lɛ tawuu atade lɛ kɛ ehe nibii lɛ.+
13 Nyɛhãa wɔnyiɛa jogbaŋŋ+ bɔ ni sa jetsɛremɔ, jeee yɛ henaabuamɔi* ni yɔɔ hoo kɛ dãatɔɔ mli, jeee yɛ ajwamaŋbɔɔ kɛ jeŋbai gbohii ni efeee mɔ hiɛgbele* amli,+ jeee yɛ béi kɛ awuŋayeli mli.+
14 Shi moŋ nyɛwoa Nuŋtsɔ Yesu Kristo tamɔ atade,+ ni nyɛkatsɔa hiɛ nyɛtoa gbɛjianɔ kɛhã nibii ni heloo lɛ shweɔ.+
Shishigbɛ Niŋmaa
^ Loo “Susuma fɛɛ susuma.”
^ Loo “ni gbalaa mɔ ni feɔ nɔ ko gbonyo lɛ toi.”
^ Kɛ́ mɔ ko ni ebote gbalashihilɛ mli yabɔ ajwamaŋ lɛ, no ji gbalafitemɔ. Kwɛmɔ Wiemɔi Titrii Amligbalamɔ, “por·neiʹa.”
^ Loo “okpɔlɔŋmɛi.”
^ Loo “nyɛnyɛŋtswibɔi.” Greek wiemɔ ni ji a·selʹgei·a lɛ piifeemɔ. Kwɛmɔ Wiemɔi Titrii Amligbalamɔ lɛ.
