Wolo Ni Akɛmaje Romabii Lɛ 1:1-32
1 Paulo, Kristo Yesu nyɔŋ ni atsɛ lɛ koni ebatsɔ bɔfo ni ajie lɛ ato ahã Nyɔŋmɔ sane kpakpa,+
2 nɔ ni etsɔ hiɛ ewo he shi kɛtsɔ egbalɔi lɛ anɔ yɛ Ŋmalɛ krɔŋkrɔŋ lɛ mli
3 ni kɔɔ e-Bi lɛ he, mɔ ni yɛ heloo gbɛfaŋ lɛ, ajɛ David seshi*+ lɛ mli afɔ lɛ,
4 shi atsɔ mumɔ ni yɔɔ krɔŋkrɔŋ lɛ nɔ ajie lɛ kpo yɛ hewalɛ mli akɛ Nyɔŋmɔ Bi+ kɛtsɔ shi ni atee lɛ kɛjɛ gbohii ateŋ lɛ nɔ+—hɛɛ, Yesu Kristo, wɔ-Nuŋtsɔ lɛ.
5 Enɔ wɔtsɔ wɔná dromɔ kɛ bɔfo nitsumɔ lɛ,+ koni ajɛ hemɔkɛyeli mli abo toi yɛ jeŋmaji+ lɛ fɛɛ amli yɛ egbɛ́i lɛ hewɔ,
6 jeŋmaji ni nyɛ hu nyɛyɔɔ amɛteŋ, nyɛ mɛi ni atsɛ nyɛ koni nyɛbatsɔmɔ Yesu Kristo nii lɛ—
7 kɛyahã mɛi fɛɛ ni yɔɔ Roma ni ji mɛi ni Nyɔŋmɔ sumɔɔ ni atsɛ amɛ koni amɛbatsɔmɔ mɛi krɔŋkrɔŋi lɛ:
Dromɔ kɛ toiŋjɔlɛ ni jɛ Nyɔŋmɔ, wɔ-Tsɛ lɛ, kɛ Nuŋtsɔ Yesu Kristo dɛŋ lɛ ahã nyɛ.
8 Klɛŋklɛŋ kwraa lɛ, miitsɔ Yesu Kristo nɔ miida mi-Nyɔŋmɔ lɛ shi yɛ nyɛ fɛɛ nyɛhewɔ, ejaakɛ awieɔ nyɛhemɔkɛyeli lɛ he yɛ je lɛŋ fɛɛ.
9 Ejaakɛ Nyɔŋmɔ, mɔ ni miŋɔɔ sɔɔmɔ krɔŋŋ mihãa kɛ mimumɔ fɛɛ yɛ e-Bi lɛ he sane kpakpa lɛ shiɛmɔ mli lɛ, ji midasefonyo akɛ mitsĩɔ nyɛtã yɛ misɔlemɔi amli daa ni mikpako,+
10 ni mikpaa fai akɛ kɛ́ ebaahi lɛ, manyɛ maba nyɛŋɔɔ agbɛnɛ, kɛ́ Nyɔŋmɔ miisumɔ.
11 Ejaakɛ miishwe akɛ mana nyɛ, koni mikɛ Nyɔŋmɔ nikeenii lɛ eko abahã nyɛ koni nyɛhe awa yɛ hemɔkɛyeli lɛ mli;
12 aloo, moŋ lɛ, koni wɔwowoo wɔhe hewalɛ,+ ni ji akɛ atsɔ nyɛhemɔkɛyeli lɛ nɔ awo mi hewalɛ ni atsɔ mi hu minɔ lɛ nɔ awo nyɛ hewalɛ.
13 Shi nyɛmimɛi, miisumɔ akɛ nyɛle akɛ, mito miyiŋ shii abɔ akɛ maba nyɛŋɔɔ, bɔ ni afee ni maná yibii komɛi yɛ nyɛ hu nyɛteŋ tamɔ bɔ ni miná yɛ jeŋmaji krokomɛi lɛ ateŋ lɛ—shi atsĩ minaa kɛbashi amrɔ nɛɛ.
14 Mihiɛ Greekbii kɛ maŋsɛɛbii,* hiɛshikalɔi kɛ mɛi ni leee nii fɛɛ nyɔmɔ;
15 no hewɔ lɛ, miishwe waa akɛ mabajaje sane kpakpa lɛ matsɔɔ nyɛ mɛi hu ni nyɛyɔɔ Roma lɛ.+
16 Ejaakɛ mihiɛ gbooo yɛ sane kpakpa lɛ he;+ yɛ anɔkwale mli lɛ, eji Nyɔŋmɔ hewalɛ ni ekɛhereɔ mɔ fɛɛ mɔ ni yɔɔ hemɔkɛyeli lɛ yiwala,+ Yudanyo lɛ klɛŋklɛŋ+ kɛ agbɛnɛ hu, Greeknyo lɛ.+
17 Ejaakɛ no nɔ atsɔɔ ajieɔ Nyɔŋmɔ jalɛ lɛ kpo, ni ebaa lɛ nakai yɛ hemɔkɛyeli ni mɔ ko yɔɔ lɛ hewɔ, ni ehãa mɔ lɛ hemɔkɛyeli daa,+ tamɔ bɔ ni aŋma lɛ, akɛ: “Shi jalɔ lɛ, ebaaya nɔ ehi shi yɛ hemɔkɛyeli hewɔ.”+
18 Ni aajie Nyɔŋmɔ mlifu+ lɛ kpo kɛmiijɛ ŋwɛi kɛmiishi nibii fɔji kɛ nibii ni ejaaa fɛɛ ni mɛi ni tsĩɔ anɔkwale+ lɛ nɔ yɛ gbɛ ni ejaaa nɔ lɛ feɔ lɛ,
19 ejaakɛ nɔ ni abaanyɛ ale yɛ Nyɔŋmɔ he lɛ yɛ faŋŋ yɛ amɛteŋ, ejaakɛ Nyɔŋmɔ ejie lɛ kpo etsɔɔ amɛ faŋŋ.+
20 Ejaakɛ esui ni anaaa lɛ, ni ji enaanɔ hewalɛ+ kɛ Nyɔŋmɔ ni eji lɛ,+ kɛjɛ jeŋbɔɔ mli beebe lɛ anaa faŋŋ, ejaakɛ atsɔɔ nibii ni efee+ lɛ anɔ ayɔseɔ enɛɛmɛi, ni no hewɔ lɛ, amɛbɛ naajiemɔ ko.
21 Ejaakɛ, amɛle Nyɔŋmɔ moŋ, shi amɛwooo ehiɛ nyam akɛ Nyɔŋmɔ, ni amɛdaaa lɛ shi hu, shi moŋ, amɛbatsɔmɔ mɛi ni jwɛŋɔ nibii ni sɛɛnamɔ bɛ he lɛ ahe, ni amɛtsuii ni jwɛŋŋ nii anɔ jogbaŋŋ lɛ wo duŋ.+
22 Amɛtsɛɔ amɛhe hiɛshikalɔi moŋ, shi amɛtsɔmɔ kwashiai
23 ni amɛkɛ Nyɔŋmɔ ni fiteee lɛ anunyam lɛ hãa nibii tamɔ gbɔmɔ ni fiteɔ kɛ loofɔji kɛ kooloi ni hiɛ naji ejwɛjwɛɛjwɛ kɛ kooloi ni wamɔɔ ahe amagai.+
24 No hewɔ lɛ, akɛni amɛmiitao amɛhi shi yɛ amɛ diɛŋtsɛ amɛtsuiiaŋ akɔnɔi lɛ anaa hewɔ lɛ, Nyɔŋmɔ ŋmɛɛ amɛhe ehã muji nii, koni amɛfite amɛ diɛŋtsɛ amɛgbɔmɔtsei lɛ.
25 Amɛkɛ Nyɔŋmɔ he anɔkwale lɛ etsake amale, ni amɛjá bɔɔ nii lɛ ni amɛkɛ sɔɔmɔ krɔŋŋ ehã bɔɔ nii lɛ moŋ fe Bɔlɔ lɛ, mɔ ni ajieɔ eyi kɛyaa naanɔ lɛ. Amen.
26 Enɛ hewɔ ni Nyɔŋmɔ ŋmɛɛ amɛhe koni amɛtiu bɔlɛnamɔ ni yɔɔ nyaŋemɔ he akɔnɔ sɛɛ lɛ,+ ejaakɛ bɔ ni ato yɛ adebɔɔ naa akɛ aná bɔlɛ lɛ, amɛyei lɛ etsake hiɛ amɛhã nɔ ni kɛ adebɔɔ naa nɔ lɛ kpãaa gbee;+
27 nakai nɔŋŋ hii lɛ hu eshi bɔ ni ato yɛ adebɔɔ naa akɛ hii kɛ yei aná bɔlɛ lɛ, ni amɛkɛ bɔlɛnamɔ he akɔnɔ ni naa wa nyiɛɔ amɛ diɛŋtsɛ amɛhe sɛɛ, ni hii kɛ hii tsuɔ yakayakanii,+ ni amɛ diɛŋtsɛ amɛnáa amɛtɔmɔ lɛ he toigbalamɔ* ni sa.+
28 Akɛni amɛsumɔɔɔ akɛ amɛle Nyɔŋmɔ hewɔ lɛ,* Nyɔŋmɔ ŋmɛɛ amɛhe ehã jwɛŋmɔ ni ejaaa, koni amɛfee nibii ni esaaa.+
29 Ni amɛyimɔ obɔbɔ kɛ nii ni ejaaa,+ kɛ efɔŋfeemɔ, kɛ amimyeli,*+ kɛ nibii gbohii fɛɛ, ni amɛyimɔ obɔbɔ kɛ hetsɛ̃,+ kɛ gbɔmɔgbee,+ kɛ béi, kɛ mɔlakamɔ,+ kɛ jwɛŋmɔ fɔŋ,+ ni amɛji ablɛbiwielɔi,*
30 kɛ mɛi afitelɔi,+ kɛ mɛi ni nyɛɔ Nyɔŋmɔ, kɛ mɛi ni ebuuu nɔ ko, kɛ henɔwolɔi, kɛ shwãlɔi, kɛ nibii ni yeɔ mɔ awui ahe ŋaatsɔlɔi,* kɛ fɔlɔi anɔ toigbolɔi,+
31 kɛ mɛi ni nuuu nii ashishi,+ kɛ kpaŋmɔ mlikulɔi, kɛ mɛi ni bɛ suɔmɔ kɛhã amɛweku mli bii, kɛ mɛi ni enaaa mɔbɔ.
32 Eyɛ mli akɛ mɛi nɛɛ le Nyɔŋmɔ jalɛ famɔ lɛ jogbaŋŋ—akɛ mɛi ni feɔ nɛkɛ nibii nɛɛ sa gbele+—moŋ shi jeee feemɔ kɛkɛ amɛyaa nɔ amɛfeɔ, shi moŋ, amɛnáa mɛi ni feɔ nibii nɛɛ ahe miishɛɛ hu.
Shishigbɛ Niŋmaa
^ Greek sht. ŋm., “dumɔwu.”
^ Loo “mɛi ni jeee Greekbii.” Greek mli lɛ, “barbarobii.”
^ Loo “nyɔmɔwoo.”
^ Loo “amɛsumɔɔɔ akɛ amɛhiɛɔ Nyɔŋmɔ he nilee krɔŋŋ mli hewɔ lɛ.”
^ Loo “mɛi-ahe-wielɔi.”
^ Loo “hiɛkɔ̃ɔ.”
^ Loo “nibii fɔji ahe ŋaatsɔlɔi.”
