Wolo Ni Akɛmaje Kolosebii Lɛ 1:1-29
1 Paulo, Kristo Yesu bɔfo yɛ Nyɔŋmɔ suɔmɔ naa, kɛ wɔnyɛmi Timoteo,+
2 kɛ wolo nɛɛ miimaje mɛi krɔŋkrɔŋi kɛ nyɛmimɛi anɔkwafoi ni kɛ Kristo efee ekome yɛ Kolose lɛ:
Dromɔ kɛ toiŋjɔlɛ ni jɛ Nyɔŋmɔ, wɔ-Tsɛ lɛ dɛŋ ahã nyɛ.
3 Be fɛɛ be ni wɔsɔleɔ wɔhãa nyɛ lɛ, wɔdaa Nyɔŋmɔ, wɔ-Nuŋtsɔ Yesu Kristo Tsɛ lɛ shi,
4 ejaakɛ wɔnu hemɔkɛyeli ni nyɛyɔɔ yɛ Kristo Yesu mli, kɛ suɔmɔ ni nyɛyɔɔ kɛhã mɛi krɔŋkrɔŋi lɛ fɛɛ
5 yɛ hiɛnɔkamɔ ni akɛto ahã nyɛ yɛ ŋwɛi lɛ hewɔ lɛ he.+ Be ko ni eho lɛ, nyɛnu hiɛnɔkamɔ nɛɛ he kɛtsɔ sane kpakpa lɛ he anɔkwale sane lɛ
6 ni eba nyɛŋɔɔ lɛ nɔ. Bɔ ni sane kpakpa lɛ miiwo yibii ni eeshwere yɛ je lɛ mli fɛɛ lɛ,+ nakai nɔŋŋ efeɔ yɛ nyɛ hu nyɛteŋ, kɛjɛ gbi nɔ ni nyɛnu, ni nyɛná Nyɔŋmɔ dromɔ lɛ he nilee krɔŋŋ yɛ anɔkwale mli lɛ.
7 Enɛ ji nɔ ni nyɛkase kɛjɛ Epafra,+ ni ji wɔnaanyo nyɔŋ ni wɔsumɔɔ lɛ, ni eji Kristo lɛ anɔkwa sɔɔlɔ yɛ wɔnajiaŋ lɛ naa lɛ.
8 Ehã wɔle suɔmɔ ni nyɛná yɛ mumɔ lɛ naa lɛ hu.
9 No hewɔ hu ni kɛjɛ gbi nɔ ni wɔnu lɛ, wɔkpako sɔlemɔ kɛ nyɛ hãmɔ,+ ni wɔbiɔ koni ahã nyɛyimɔ obɔbɔ kɛ esuɔmɔnaa nii lɛ he nilee krɔŋŋ,+ yɛ hiɛshikamɔ kɛ niiashishinumɔ fɛɛ ni mumɔ lɛ hãa lɛ mli,+
10 koni nyɛnyiɛ bɔ ni sa Yehowa,* bɔ ni afee ni nyɛsa ehiɛ kwraa, be mli ni nyɛyaa nɔ nyɛwoɔ yibii yɛ nitsumɔ kpakpa fɛɛ nitsumɔ kpakpa mli, ni Nyɔŋmɔ he nilee krɔŋŋ ni nyɛyɔɔ lɛ faa lɛ;+
11 koni akɛ hewalɛ fɛɛ awaje nyɛ yɛ enyɛmɔ ni yɔɔ nyam lɛ naa+ koni nyɛnyɛ nyɛkɛ tsuishitoo kɛ miishɛɛ afi shi shiŋŋ,
12 be mli ni nyɛdaa Tsɛ lɛ ni hã nyɛtsɔmɔ mɛi ni sa akɛ nyɛnáa mɛi krɔŋkrɔŋi lɛ agboshinii lɛ mli gbɛfaŋnɔ+ yɛ la lɛ mli lɛ shi lɛ.
13 Ejie wɔ kɛjɛ duŋ hewalɛ lɛ mli+ kɛtee e-Bi ni esumɔɔ lɛ lɛ maŋtsɛyeli lɛ mli,
14 mɔ ni atsɔ enɔ akɛ kpɔmɔnɔ lɛ jie wɔ, ni ji, wɔhe eshai lɛ ni akɛke wɔ lɛ.+
15 Lɛ ji mɔ ni tamɔ Nyɔŋmɔ ni anaaa lɛ lɛ,+ bɔɔ nii fɛɛ ateŋ kromɔbi lɛ;+
16 ejaakɛ lɛ enɔ atsɔ abɔ nibii krokomɛi fɛɛ ni yɔɔ ŋwɛi kɛ nibii ni yɔɔ shikpɔŋ lɛ nɔ lɛ, nibii ni anaa kɛ nibii ni anaaa,+ maŋtsɛ sɛii jio, nuŋtsɔyelii jio, nɔyelii jio, hegbɛi jio. Lɛ enɔ atsɔ abɔ nibii krokomɛi fɛɛ,+ ni lɛ abɔ ahã.
17 Agbɛnɛ hu, eyɛ dani nibii krokomɛi fɛɛ ba,+ ni lɛ enɔ atsɔ ahã nibii krokomɛi fɛɛ ba shihilɛ mli,
18 ni lɛ ji gbɔmɔtso lɛ, ni ji asafo lɛ, yitso.+ Lɛ ji shishijee lɛ, kromɔbi ni ji klɛŋklɛŋ mɔ ni te shi kɛjɛ gbohii ateŋ lɛ,+ koni efee klɛŋklɛŋ mɔ yɛ nibii fɛɛ mli;
19 ejaakɛ esa Nyɔŋmɔ hiɛ akɛ ebaahã obɔyimɔ lɛ fɛɛ ahi emli,+
20 koni etsɔ enɔ esaa ekɛ nibii krokomɛi fɛɛ ateŋ,+ nibii ni yɔɔ shikpɔŋ lɛ nɔ jio, nibii ni yɔɔ ŋwɛi lɛ jio; etsɔ lá+ ni Kristo fɔse yɛ piŋmɔ tso* lɛ nɔ lɛ nɔ ehã toiŋjɔlɛ nɛɛ ba.
21 Anɔkwa, nyɛ ni tsutsu ko lɛ, nyɛtse nyɛhe ni nyɛji henyɛlɔi akɛni nyɛjwɛŋmɔi yɛ nitsumɔi fɔji anɔ hewɔ lɛ,
22 amrɔ nɛɛ etsɔ nakai mɔ lɛ heloo gbɔmɔtso lɛ gbele lɛ nɔ esaa ekɛ nyɛ teŋ, bɔ ni afee ni ekɛ nyɛ adamɔ ehiɛ akɛ mɛi krɔŋkrɔŋi ni kpa ko bɛ amɛhe ni anyɛŋ akɛ sane ko afɔ̃ amɛnɔ+—
23 shi ja nyɛtee nɔ nyɛhi hemɔkɛyeli lɛ mli,+ ni atswa nyɛ ama faneshi lɛ nɔ,+ ni nyɛdamɔ shi shiŋŋ,+ ni nyɛtsiii nyɛhe kɛjeee nakai sane kpakpa lɛ he hiɛnɔkamɔ lɛ he, sane kpakpa ni nyɛnu ni ashiɛ yɛ bɔɔ nii ni yɔɔ ŋwɛi shishi lɛ fɛɛ ateŋ lɛ.+ Mi Paulo, mibatsɔ sane kpakpa nɛɛ he sɔɔlɔ.+
24 Amrɔ nɛɛ, mimii shɛɔ mihe babaoo yɛ mimanehului ni minaa yɛ nyɛhewɔ lɛ amli,+ ni miigbe Kristo lɛ amanehului ni eshwɛ yɛ miheloo lɛ mli lɛ naa miihã egbɔmɔtso lɛ,+ ni ji asafo lɛ.+
25 Mibatsɔ asafo nɛɛ sɔɔlɔ yɛ shĩakwɛmɔ nitsumɔ+ ni jɛ Nyɔŋmɔ ŋɔɔ ni akɛhã mi yɛ nyɛhewɔ lɛ naa, akɛ mishiɛ Nyɔŋmɔ wiemɔ lɛ jogbaŋŋ,
26 teemɔŋ sane krɔŋkrɔŋ+ ni akɛtee kɛjɛ bei ni eho*+ lɛ kɛ yinɔi ni eho lɛ anɔ beebe lɛ. Shi amrɔ nɛɛ, ajie kpo atsɔɔ emɛi krɔŋkrɔŋi lɛ,+
27 mɛi ni esa Nyɔŋmɔ hiɛ akɛ ehã amɛle teemɔŋ sane nɛɛ he anunyam babaoo lɛ yɛ jeŋmaji lɛ ateŋ lɛ.+ Teemɔŋ sane nɛɛ ji Kristo ni kɛ nyɛ efee ekome lɛ, enunyam lɛ hiɛnɔkamɔ lɛ.+
28 Lɛ ji mɔ ni wɔjajeɔ lɛ wɔtsɔɔ lɛ, ni wɔbɔɔ mɔ fɛɛ mɔ kɔkɔ ni wɔtsɔɔ mɔ fɛɛ mɔ nii yɛ hiɛshikamɔ fɛɛ mli, koni wɔnyɛ wɔkɛ mɔ fɛɛ mɔ ahã akɛ Kristo sɛɛnyiɛlɔ ni he wa yɛ hemɔkɛyeli lɛ mli.+
29 No hewɔ lɛ, miitsu nii waa lɛɛlɛŋ, ni miimia mihiɛ yɛ ehewalɛ ni tsuɔ nii waa yɛ mimli lɛ naa.+
Shishigbɛ Niŋmaa
^ Kwɛmɔ Saji Krokomɛi A5 lɛ.
^ Kwɛmɔ Wiemɔi Titrii Amligbalamɔ lɛ.
^ Loo “shihilɛi agbɛjianɔtoi ni eho.” Kwɛmɔ Wiemɔi Titrii Amligbalamɔ lɛ.
