Wolo Ni Akɛmaje Kolosebii Lɛ 2:1-23
2 Ejaakɛ miitao ni nyɛyɔse bɔ ni mipeleɔ babaoo mihãa nyɛ, kɛ mɛi ni yɔɔ Laodikea+ lɛ, kɛ mɛi fɛɛ ni amɛ diɛŋtsɛ amɛnako mi* lɛ hu.
2 Miifee enɛ koni no ashɛje amɛmii,+ ni amɛfee ekome jogbaŋŋ yɛ suɔmɔ mli,+ ni amɛná nii fɛɛ ni anáa kɛjɛɔ niiashishinumɔ ni ama nɔ mi kɛmɔ shi lɛ mli lɛ, bɔ ni afee ni amɛná Nyɔŋmɔ teemɔŋ sane krɔŋkrɔŋ lɛ, ni ji Kristo lɛ, he nilee krɔŋŋ.+
3 Akɛ hiɛshikamɔ kɛ nilee jwetrii lɛ fɛɛ eto jogbaŋŋ yɛ emli.+
4 Miiwie enɛ koni mɔ ko kɛ saji ni kɔneɔ mɔ yiŋ akalaka nyɛ.
5 Mibɛ nyɛŋɔɔ yɛ gbɔmɔtso mli moŋ, shi mikɛ nyɛ yɛ yɛ mumɔ mli, ni mináa miishɛɛ jogbaŋŋ kɛ́ mina bɔ ni nyɛfeɔ nyɛnii yɛ gbɛjianɔtoo kpakpa naa,+ kɛ bɔ ni hemɔkɛyeli ni nyɛyɔɔ yɛ Kristo mli lɛ yɔɔ shiŋŋ lɛ.+
6 No hewɔ lɛ, bɔ ni nyɛhe Kristo Yesu ni ji Nuŋtsɔ lɛ nɔ nyɛye lɛ, nakai nɔŋŋ nyɛyaa nɔ nyɛ kɛ lɛ afea ekome kɛnyiɛa,
7 ni nyɛshishifã amɔmɔ shi, ni atswa nyɛ amamɔ enɔ+ ni nyɛmamɔ shi shiŋŋ yɛ hemɔkɛyeli lɛ mli,+ tamɔ bɔ nɔŋŋ ni atsɔɔ nyɛ lɛ, ni nyɛteke nɔ kɛ shidaa.+
8 Nyɛkwɛa jogbaŋŋ ni mɔ ko kɛ jeŋ nilee kɛ tsɔɔmɔi ni sɛɛnamɔ bɛ he lɛ akaŋɔ nyɛ nom,*+ yɛ gbɔmɛi akusum naa, yɛ bɔ ni je lɛ susuɔ nii ahe ehãa lɛ naa, ni jeee yɛ Kristo naa;
9 ejaakɛ lɛ emli Nyɔŋmɔ subaŋ lɛ obɔyimɔ lɛ fɛɛ yɔɔ yɛ gbɔmɔtso su mli.+
10 No hewɔ lɛ, nyɛtsɔ lɛ mɔ ni ji nɔyelii kɛ hegbɛi fɛɛ yitso+ lɛ nɔ nyɛná obɔyimɔ.
11 Wekukpaa ni kã nyɛ kɛ lɛ teŋ lɛ hewɔ lɛ, afolɔ nyɛ ketia hu kɛ ketiafoo ko ni jeee niji akɛfolɔ, no ji heloo lɛ gbɔmɔtso lɛ ni ajieɔ kɛjeɔ jɛmɛ lɛ,+ ni ji Kristo lɛ ketiafoo lɛ.+
12 Ejaakɛ afu nyɛ kɛ lɛ yɛ ebaptisimɔ lɛ mli,+ ni wekukpaa ni kã nyɛ kɛ lɛ teŋ lɛ hewɔ lɛ, atee nyɛ hu shi afata ehe,+ yɛ Nyɔŋmɔ, mɔ ni tee lɛ shi kɛjɛ gbohii ateŋ lɛ hewalɛ nitsumɔ lɛ mli hemɔkɛyeli ni nyɛyɔɔ lɛ hewɔ.+
13 Agbɛnɛ hu, eyɛ mli akɛ no mli lɛ nyɛgboi yɛ nyɛtɔmɔi lɛ amli, kɛ yɛ nyɛheloo lɛ ni afoko lɛ ketia lɛ hu mli moŋ, shi Nyɔŋmɔ hã nyɛ kɛ lɛ fɛɛ hiɛ kamɔ.+ Ejɛ mlihilɛ mli ekɛ wɔtɔmɔi lɛ fɛɛ ke wɔ+
14 ni egbe* wolo ni akɛ nine ŋma+ ni famɔi+ ni teɔ shi woɔ wɔ yɔɔ mli lɛ mli niŋmai lɛ.+ Ekala wolo nɛɛ ekpɛtɛ piŋmɔ tso* lɛ, ni ekɛfo Mla lɛ mli.+
15 Ni etsɔ no nɔ* ekpɔlɔ nɔyelii kɛ hegbɛi lɛ ahe nii kwraa, ni eshwie amɛhiɛ shi yɛ mɛi fɛɛ ahiɛ akɛ eye amɛnɔ kunim,+ ni enyiɛ amɛhiɛ yɛ kunimyeli akoŋshimɔ mli.
16 No hewɔ lɛ, nyɛkahãa mɔ ko kojoa nyɛ yɛ nɔ ni nyɛyeɔ loo nɔ ni nyɛnuɔ+ loo gbi jurɔ ko loo nyɔɔŋtsere hee+ loo hejɔɔmɔ gbi ko yeli he.+
17 Nakai nibii lɛ ji nibii ni baaba lɛ ahe mfoniri* kɛkɛ,+ shi nii* lɛ diɛŋtsɛ ji Kristo lɛ.+
18 Nyɛkwɛa jogbaŋŋ ni mɔ ko ni sumɔɔ ni mɛi ana lɛ akɛ ebaa ehe shi ni enyaa jamɔ ni akɛhãa ŋwɛibɔfoi he, ni “kɔɔ eshidaamɔ yɛ”* nibii ni ena lɛ ahe lɛ, akashɔ̃ jweremɔnɔ lɛ yɛ nyɛdɛŋ.+ Yɛ anɔkwale mli lɛ, eheloo jwɛŋmɔ lɛ hãa enaa ehe tsɔ,
19 ni ekpɛtɛɛɛ yitso lɛ he,+ ekpɛtɛɛɛ mɔ ni hãa gbɔmɔtso muu lɛ fɛɛ náa nii ni he hiaa lɛ ni etsaratsaraa ehe jogbaŋŋ kɛtsɔ etalɔi kɛ talɔi-amli-loi lɛ anɔ, ni ehãa edaa kɛ dalɛ ni jɛ Nyɔŋmɔ ŋɔɔ lɛ he.+
20 Kɛ́ nyɛ kɛ Kristo fɛɛ gboi yɛ bɔ ni je lɛ susuɔ nii ahe ehãa lɛ gbɛfaŋ lɛ,+ mɛni hewɔ nyɛhiɔ shi oookɛɛ nyɛfata je lɛ he lolo, ni nyɛyeɔ famɔi nɛɛ hu anɔ, akɛ:+
21 “Nyɛkamɔa mli, ni nyɛkasaa nyɛnaa, ni nyɛkataa he” hu lɛ?
22 Ejaakɛ nibii nɛɛ fɛɛ hiɛ kpãtãa yɛ amɛhe nitsumɔ mli, ni amɛji famɔi ni akɛhã yɛ gbɔmɛi akitãi kɛ amɛtsɔɔmɔi anaa.+
23 Eyɛ mli akɛ nibii nɛɛ feɔ tamɔ nɔ ni amɛji hiɛshikamɔ nibii yɛ kponɔgbɛ moŋ, shi amɛyeee amɛbuaaa mɛi koni amɛwu amɛshi nibii ni heloo lɛ shweɔ lɛ. Amɛyeɔ mlai nɛɛ anɔ ejaakɛ amɛmiitao amɛtsɔ amɛ diɛŋtsɛ amɛgbɛ nɔ amɛjá Nyɔŋmɔ. Amɛwaa amɛgbɔmɔtsei lɛ ayi hu ejaakɛ amɛmiitao mɛi ana amɛ akɛ amɛbaa amɛhe shi.+
Shishigbɛ Niŋmaa
^ Greek sht. ŋm., “mɛi ní amɛnako mihiɛ yɛ heloo lɛ mli.”
^ Loo “akaŋɔ nyɛ akɛ emilɛloo.”
^ Kwɛmɔ Wiemɔi Titrii Amligbalamɔ lɛ.
^ Loo “etsumɔ.”
^ Shishitsɔɔmɔi komɛi kɛɔ akɛ, “enɔ.”
^ Loo “ahe hɔɔŋ; ahe susuma.”
^ Greek sht. ŋm., “gbɔmɔtso.”
^ Atsɛ yisɛɛ kɛjɛ wɔŋjalɔi ateemɔŋ kusum nifeemɔi (ní akɛkpɛlɛɔ mɔ ko nɔ awoɔ nɔ ko mli lɛ) amli.
