Hweɖélɛ́nu ɔ, mɛsɛntɔ́ Mawu tɔn ɖé lɛ́ nɔ kanbyɔ́ yěɖée lɛ́ ɖɔ gbɛ zínzán sɔgbe xá nǔgbódodó Biblu tɔn lɛ́, éé nɔ byɔ́ hwenu kpó gǎndídó kpó é ka sɔ mɔ̌ kɔ a jí. (Ðɛhan 73:2, 3) Yě tlɛ sixú jɛ nǔ ɖěɖěe sɔ́ ta sɛ́n Jexóva tɔn lɛ́ é wa jí, bɔ énɛ́ gúdo ɔ, yě ná tɛ́n kpɔ́n bo ná blɛ́ mawusɛntɔ́ hǎtɔ́ ɖěvo lɛ́ gbɔn nǔwalɔ nyanya yětɔn hwíhwlá gblamɛ.

 È sɔ́ nǔ nú xóta élɔ́ bo ná d’alɔ mɛ ɖěɖěe sixú ko mlɛ́ ali énɛ́ bo ka jló ná lɛ́ kɔ sín nǔwiwa mɛblɛ́blɛ́ tɔn yětɔn gúdo lɛ́ é.

Ðo xóta élɔ́ mɛ ɔ, mǐ ná ɖɔ xó dó nǔ élɔ́ lɛ́ jí:

•  Étɛ́ ka nyí tínmɛ gbɛ we zínzán tɔn?

•  Ðó un nɔ zán gbɛ we wútu ɔ, xlɛ́xlɛ́ wɛ énɛ́ ɖe ɖɔ mɛ nyanya wɛ nú mì a?

•  Nɛ̌ un ka sixú ɖó gbɛ we zínzán te gbɔn?

•  Nǔ e gbɛ̌ towe lɛ́ nɔ ɖɔ é

 Gbɛ we zínzán sín tínmɛ wɛ nyí ɖɔ hwenu e a ɖo kpɔ́ xá gbɛ̌ towe ɖěɖěe ma nɔ se tónú nú Jexóva ǎ lɛ́ é ɔ, a nɔ wa nǔ ɖěɖěe a tuun ɖɔ yě nylá lɛ́ é; amɔ̌, hwenu e a ɖo kpɔ́ xá nǔɖitɔ́ hǎtɔ́ lɛ́ é ɔ, a nɔ wa nǔ cí nǔ ɖɔ a ba ná sɛn Jexóva ɖɔhun. É cí gbɛzán we wɛ a ɖó ɖɔhun, bɔ ɖo gbɛzán énɛ́ lɛ́ ɖokpó ɖokpó mɛ ɔ, a nɔ hwlá nǔ e a nyí nǔgbó nǔgbó é.

 “Ényí a ɖo gbɛ we zán wɛ hǔn, a ɖo nǔɖé hwlá wɛ ɖo akpá we lɛ́ bǐ xwé nɛ́, énɛ́ wú ɔ, mɛ ɖěbǔ ná tuun mɛ alɔkpa e a nyí nǔgbó nǔgbó é ǎ. È ná ɖɔ ɔ, gbɛ we zínzán ɔ, mɛ flúflú ɖó we jí wɛ.”—Erin.

 A ka tuun a? Nǔ ɖěɖěe Jexóva gbɛ́ wǎn ná lɛ́ é wiwa hwenu e a ɖo hwiɖokpó é lɔ ɔ, gbɛ we zínzán wɛ.

 “Hwenu e un ɖó xwe 14 é ɔ, un jɛ fɔtóo nǔblíblíwiwa tɔn lɛ́ kpɔ́n jí ɖo Ɛntɛnɛ́ti jí. Ényí un ɖo mɛ ɖěvo lɛ́ nukɔn ɔ, un nɔ wa nǔ cí nǔ ɖɔ un gbɛ́ wǎn nú fɔtóo nǔblíblíwiwa tɔn lɛ́ wɛ ɖɔhun, amɔ̌, un tuun dó ayi ce mɛ ɖɔ nǔ kún nyí mɔ̌ ó.”—Nolan.

 Nǔgbódodó Biblu tɔn: “Mɛ ɖěbǔ sixú nyí kannumɔ nú gǎn we ǎ; ɖó é ná gbɛ́ wǎn nú mɛ ɖě, bo ná yí wǎn nú mɛ ɖě ɔ, alǒ é ná tɛ́ dó mɛ ɖě wú, bo ka ná ké ya nú mɛ ɖě ɔ ǎ.”—Matíe 6:24.

 É nyí mɔ̌ dandan ǎ. Nǔgbó wɛ ɖɔ mɛɖé lɛ́ wá gbeta ɔ kɔn ɖɔ émí kún ná zán gbɛ sɔgbe xá nǔgbódodó Biblu tɔn lɛ́ ó. Mɔ̌ jɛ́n é ka nyí gbɔn nú hwɛ dóó a? Alǒ hwɛjijɔ lěhun lɛ́ wɛ zɔ́n bɔ a ɖo nǔ wa gbɔn mɔ̌ wɛ:

•   Xɛsi nɔ ɖi we dó vo e a ná gbɔn nú gbɛ̌ towe lɛ́ é wú.

•   É nɔ cí nú we ɖɔ nǔ e a ɖó ɖo bǔ xá wěmaxɔmɛvígbɛ́ towe lɛ́ é hú gǎn nǔ e a ɖó ɖo bǔ xá mɛ e ɖo agun towe mɛ lɛ́ é.

•   É nɔ cí nú we kpowun ɖɔ a kún ɖó hlɔ̌nhlɔ́n kpó nǔwúkpíkpé kpó bo ná xwedó sɛ́n Mawu tɔn lɛ́ bǐ ó.

 “Un lin ɖɔ mɛ wínnyáwínnyá e nɔ zán gbɛ we é ɖé lɛ́ nɔ vo ɖo mɛ ɖěɖěe ma nɔ xwedó nǔgbódodó klisánwun tɔn yětɔn lɛ́ ǎ lɛ́ é kpá hú gǎn, ɖó yě nɔ mɔ ɖɔ émí ɖó ná nyɔ́ ɖo mɛ bǐ sí, ɖo fí bǐ.”—David.

 É ɖo wɛn ɖɔ hwɛjijɔ énɛ́ lɛ́ ɖě kún ɖo xlɛ́xlɛ́ wɛ ɖɔ gbɛ we zínzán nyí nǔ ɖagbe ó. Amɔ̌, yě d’alɔ bɔ è mɔ nǔ jɛ nǔ e wú mɛ ɖagbe ɖé sixú jɛ mɔ mɔ̌hun mɛ é mɛ. Ényí nǔ mɔ̌hun ko jɛ dó jǐ we wɛ nyí ɔ, étɛ́ a ka sixú wa?

1.  1. Gbějé lěe zán gbɛ gbɔn wɛ a ɖe ɖo alɔnu din é kpɔ́n. Kan nǔ élɔ́ lɛ́ byɔ́ hwiɖée: ‘Mɛ alɔkpa e un ka ba ná nyí é jɛ́n ɖíe a? Ényí un kpo ɖo gbɛ zán gbɔn mɔ̌ wɛ ɔ, étɛ́ mɛ é ka ná tɔ́n kɔ dó?’

    Nǔgbódodó Biblu tɔn: “Gbɛtɔ́ e ayi tɔn ɖo te ɔ mɔ nǔ nyanya ja ɔ, é nɔ hɔn bɛ; xlonɔ ka nɔ zɔn mɔ̌ bo nɔ yi zɔn mɛ.”—Nǔnywɛ́xó 27:12.

2.  2. Ðɔ nǔgbó. Ðɔ xó dó ninɔmɛ towe wú xá mɛjitɔ́ towe lɛ́ alǒ xɔ́ntɔn e zin bo nɔ ɖó sísí nú sɛ́n Jexóva tɔn lɛ́ é ɖé. Xomɛ ná ɖibla hun yě ɖɔ a wá ba alɔdó yětɔn. Bɔ yě ná gó ɖó wǔ we ɖó mɔ e yě ná mɔ ɖɔ a jló ná wa nǔ ɖagbe é wú!

    “Nǔ e un wa nyi do é ɖiɖɔ nú mɛ ɖěvo lɛ́ wɛ nyí nǔ vɛ́ wǔ nú mì hú gǎn é, amɔ̌, ée un wa mɔ̌ é ɔ, un mɔ nyiɖée mɛ tawun.”—Nolan.

    Nǔgbódodó Biblu tɔn: “Mɛ e nɔ sɔ́ hwɛ tɔn hwlá ɔ nɔ yi nukɔn ǎ; amɔ̌, mɛ e nɔ ɖɔ hwɛ tɔn lɛ́, bo nɔ jó dó ɔ, è nɔ sɔ́ hwɛ tɔn kɛ ɛ.”—Nǔnywɛ́xó 28:13.

3.  3. Yǐ gbe nú nǔ e é ná ji lɛ́ é. Flín ɖɔ ényí a hwlá nǔɖé dó mɛjitɔ́ towe lɛ́ alǒ dó agun ɔ hǔn, nǔ wɛ a wa dó jiɖiɖe e yě ɖó dó wǔ we é wú mɔ̌ nɛ́. Wǎgbɔ tɔn ɔ, mɛjitɔ́ towe lɛ́ alǒ mɛxó agun tɔn lɛ́ sixú ɖó dogbó ɖé lɛ́ nú we. Yǐ gbe nú nǔ ɖěɖěe nǔ e a wa nyi do é ji lɛ́ é, bo kán ɖ’é jí sín fínɛ́ ɖidó bá “zán gbɛ ɖagbe ɖo nǔ bǐ mɛ.”—Eblée lɛ́ 13:18.

    Nǔgbódodó Biblu tɔn: “Nɔ ɖótó kplɔ́n; è kplɔ́n nǔ we hǔn nɔ se; énɛ́ ɔ, a ná húzú nǔnywɛ́tɔ́.”—Nǔnywɛ́xó 19:20.

4.  4. Tɛ́n kpɔ́n bo ná hlɔ̌nhlɔ́n kán e a kán ɖ’é jí ɖɔ Mawu yí wǎn nú we é. Ðó Jexóva yí wǎn nú mǐ wútu ɔ, é nɔ ɖó ayi nǔwiwa mǐtɔn lɛ́ ɖokpó ɖokpó wú. Énɛ́ wú ɔ, ényí a ɖo gbɛ we zán wɛ ɔ, é nɔ mɔ, bɔ é nɔ lɛ́ kú wǔ n’i. É ɖo mɔ̌ có, “ɖó nǔ [towe] nɔ ɖu ayi mɛ n’i” wútu ɔ, akpakpa ɖo sísɔ́ ɛ wɛ, bónú é ná d’alɔ we bɔ a ná jlá gbɛzán towe ɖó.—1 Piyɛ́ɛ 5:7.

    Nǔgbódodó Biblu tɔn: “Nukún [Jexóva] tɔn ɖo ayǐkúngban ɔ bǐ jí, bɔ é nɔ dó wǔsyɛ́n lanmɛ nú mɛ e yí wǎn n’i kpó ayixa yětɔn bǐ kpó lɛ́.”—2 Tan 16:9.